யோகாயணம்!

கோடை விடுமுறையில் நீங்கள் செய்ய வேண்டியவற்றின் பட்டியலில் யோகா செய்வதையும் சேர்த்துக்கொள்ளுங்கள். இனி வரும் இதழ்களில் யோகா செய்வது பற்றி சென்னையில் உள்ள சன் அஷ்டாங்க யோகா நிலையத்தின் ஆசிரியர் ஏ.கல்பனா பயிற்சி அளிக்கிறார்...

சிலருக்கு படித்தது மறந்து போவது, பாடங்களைச் சரியாக கவனிக்க முடியாதது, ஞாபக மறதி, மனதில் தேவையில்லாத பயம், குழப்பம், எதிர்மறையான எண்ணங்கள் போன்ற பிரச்னைகள் இருக்கும். இந்த பிரச்னைகளுக்கு எல்லாம் ஒரே தீர்வு உண்டு என்றால் அது யோகாதான்!

யோகா செய்யும்போது மனம் ஒருமுகப் படுவதால் உங்கள் கவனிக்கும் திறன் அதிகமாகும். உடல் சுறுசுறுப்பாக இருக்கும். மனதில் தேவையில்லாத குழப்பங்கள்ஏற்படாது. தன்னம்பிக்கையுடன் எப்போதும் ஃபிரஷ்ஷாக இருப்பீர்கள். மேலும் உடலில் நாடி நரம்புகள் எல்லாம் தூண்டப்படும். இதனால் சிறுநீரகம், கணையம், நுரையீரல், இதயம் போன்ற முக்கிய உறுப்புகளின் இயக்கம் நன்றாக இருக்கும். தினமும் யோகா செய்தால் உடலில் நோய் எதிர்ப்புச் சக்தி அதிகரிக்கும். ஒற்றைத் தலைவலி, அடிக்கடி சளி தொந்தரவு, ஆஸ்துமா பிரச்னைகளும் விரைவில் குணமாகும். இந்த சிறிய வயதிலேயே யோகா பயிற்சிகளை உங்களால் எளிதாகக் கற்றுக் கொள்ள முடியும். சரி, யோகா செய்ய ஆரம்பிக்கலாமா?

யோகா செய்வதற்கு முன்பு நீங்கள் சில விஷயங்களைத் தெரிந்துகொள்ள வேண்டும். யோகா செய்யும்போது உங்கள் கை, கால் அல்லது உடலில் லேசான வலி ஏற்படலாம். அப்படிப்பட்ட சமயங்களில் யோகா செய்வதை நிறுத்தி விடுங்கள். தினமும் முயற்சி செய்து கொஞ்சம் கொஞ்சமாக யோகா கற்றுக்கொள்ளலாம். உடலை வருத்திக்கொண்டு யோகா செய்யக்கூடாது. ஆசனங்கள் செய்யும் போது என்ன மாதிரியான விதிமுறைகளைக் கடைப்பிடிக்க வேண்டும் என்று சொல்லப் படுகிறதோ அதை மட்டுமே செய்ய வேண்டும். பொதுவாக அதிகாலையில் குளித்துவிட்டு யோகா செய்வது நல்லது. இந்தக் கட்டுரைத் தொடர் உங்கள் ஆர்வத்தைத் தூண்டுவதற்காகவே. ஆசிரியரிடம் நேரடியாகப் பயிற்சி எடுத்துக்கொண்டு செய்வதே நல்லது. சரி, முதல் ஆசனமாக ‘உட்கட்டாசனம்’ பற்றிப் பார்ப்போமா..?

படத்தில் காட்டியபடி ஒவ்வொரு நிலைகளாக ஆசனத்தை செய்யவும். ஆசனத்தின் கடைசி நிலைக்கு (படம் 3) வந்த பின் உங்கள் மனதினுள் ஒன்று, இரண்டு என்று இருபது எண்கள் வரை எண்ணுங்கள். இருபதாவது எண் வந்த பிறகு மெதுவாக ஆசனத்தைக் கலைத்துவிட்டு மீண்டும் பழைய நிலைக்கு (படம் 5 ) செல்லுங்கள். பின் 2 நிமிடம் ஓய்வு எடுங்கள். மீண்டும் ஆசனம் செய்யுங்கள். இவ்வாறு தினமும் மூன்று தடவை மட்டும் உட்கட்டாசனம் செய்தால் போதும். இந்த ஆசனம் செய்யும் போது இயல்பாக மூச்சு விடவும்.

நன்மைகள்:

இந்த ஆசனம் செய்வதால் நாடி நரம்புகள் இளகி உடல் தளர்வு ஏற்படும். இதனால் அடுத்தடுத்து ஆசனப் பயிற்சிகள் செய்யும்போது உடல் சுலபமாக ஒத்துழைப்புக் கொடுக்கும்.

காலில் இருக்கும் ரத்த ஓட்டம் உடலின் மேல் பகுதிக்குத் திருப்பிவிடப்படும். இதனால் அடிவயிறு, தொடைப்பகுதி போன்ற இடங்களில் ரத்த ஓட்டம் அதிகரிக்கும்.

கால் மூட்டு வீக்கம், மூட்டில் நீர் கோத்துக்கொள்ளுதல், வலி போன்ற பிரச்னைகள் நீங்கும்.

ஐந்து மைல் தூரம் வாக்கிங் செல்வதால் கிடைக்கும் நன்மைகள் இதன் மூலம் கிடைக்கும்.

-அடுத்த இதழில் சந்திப்போம்...