Published:Updated:

"கடிதம் போட்டோம் களத்தில் குதித்தோம் !

இ.கார்த்திகேயன் தி.ஹரிகரன்

"கடிதம் போட்டோம் களத்தில் குதித்தோம் !

இ.கார்த்திகேயன் தி.ஹரிகரன்

Published:Updated:

''இது என்ன ஸ்கூல்ல எலெக்ஷன் நடக்குதா?'' என்று திகைப்புடன் கேட்கும் வகையில் கோவில்பட்டி பள்ளிகளில் அந்தக் காட்சியைப் பார்க்க முடிகிறது.

பள்ளி வளாகத்தில் 'மாணவர்களின் சமூகப் பங்களிப்புப் பதிவுகள்’ என்று எழுதப்பட்ட ஒரு பெட்டி வைக்கப்பட்டிருக்கிறது. மாணவர்கள் ஆர்வத்துடன் வரிசையாக நின்று, வாக்குச் சீட்டு போல எதையோ பெட்டியில் போடுகிறார்கள். விசாரித்தால், ''இதுக்கெல்லாம் காரணம், நம்ம சப் கலெக்டர் சார்தான்'' என்கிறார்கள்.

இந்தத் திட்டம் குறித்து, கோவில்பட்டி சார் ஆட்சியர் மற்றும் உட்கோட்ட நடுவர், டாக்டர். விஜய கார்த்திகேயன், ''படிக்க வேண்டிய வயதில் மாணவர்களின் கவனம், படிப்பில் இருக்க வேண்டும் என்பது சரிதான். அதே சமயம், 'நம்மைச் சுற்றி என்ன நடக்கிறது? இந்தச் சமுதாயத்துக்கு நாம் செய்ய வேண்டியது என்ன?’ என்ற அடிப்படை விஷயத்தையும் தெரிந்துகொள்ள வேண்டும்.அப்போதுதான், பெரியவர்கள் ஆனதும் 'தெருவில் எது நடந்தாலும் நமக்கு என்ன?’ என்று கடந்து செல்லாமல், தங்களால் முடிந்ததைச் செய்வார்கள். இதற்காக ஆரம்பிக்கப்பட்டதே இந்தத் திட்டம்'' என்கிறார்.

ஒட்டுமொத்த விகடனுக்கும் ஒரே ஷார்ட்கட்!

முதல் கட்டமாக, கோவில்பட்டியைச் சுற்றியுள்ள 18 உயர்நிலை மற்றும் மேல்நிலைப் பள்ளிகளில் இந்தத் திட்டம் அறிமுகமாகி இருக்கிறது. ஒவ்வொரு பள்ளியிலும் 'மாணவர்களின் சமூகப் பங்களிப்புப் பதிவுகள்’ என்ற பெட்டிகள் இருக்கும். மாணவர்கள் தினமும் பள்ளிக்குச் செல்லும்போதும் வீட்டுக்குத் திரும்பும்போதும் கண்ணால் பார்க்கிற பிரச்னைகளை எழுதி, பெட்டியில் போடலாம். இவை, ஒவ்வொரு வாரமும் வெள்ளிக்கிழமை சேகரிக்கப்பட்டு, சப் கலெக்டர் அலுவலகத்துக்கு எடுத்து வரப்படும்.

"கடிதம் போட்டோம் களத்தில் குதித்தோம் !

''நான் அவற்றை எடுத்துப் படிப்பேன். குடும்பம், தெரு, ஊர் என எந்தப் பிரச்னையாக இருந்தாலும்  தெரியப்படுத்தலாம். பெயர், வகுப்பு, பள்ளி ஆகியவற்றை எழுதிவிட்டு கீழே பிரச்னை பற்றி குறிப்பிட வேண்டும். அதை எப்படித் தீர்க்கலாம் என்ற யோசனை இருந்தால், அதையும் தெரியப்படுத்தலாம். சம்பந்தப்பட்ட மாணவர்களின் பெயர்கள், ரகசியமாக வைக்கப்படும். செயல்வீரர்கள் பிரச்னைகள், கவுன்சிலிங் பிரச்னைகள், துறை ரீதியான பிரச்னைகள் என்று மூன்று வகைகளாகப் பிரிப்போம். பள்ளி மாணவர்களின் பிரச்னைகளைத் தீர்ப்பதற்காக, சுற்றுவட்டாரக் கல்லூரிகளில் இருந்து 150 மாணவர்கள், ஆறு அணிகளாகப் பிரிக்கப்பட்டு உள்ளனர். இவர்கள் தினமும் மாலையில் பிரச்னைக்குரிய இடத்துக்குச் சென்று தகவல் சொல்வார்கள். குப்பைகள், சுத்தம், நெரிசல் ஆகிய பிரச்னைகளுக்குத் துறை அதிகாரிகளுடன் இணைந்து செயல்படுவார்கள். குடும்பப் பிரச்னை, மருத்துவப் பிரச்னைகளுக்கு ஆசிரியர், வழக்கறிஞர், மருத்துவர் அடங்கிய குழு மூலம் கவுன்சிலிங் அளிக்கப்படும். லஞ்சம், குடிநீர் வசதி, மின் வசதி போன்ற துறை ரீதியான பிரச்னைகளுக்கு சம்பந்தப்பட்ட துறைகள் மூலம் நடவடிக்கை எடுப்பேன்'' என்கிறார் சார் ஆட்சியர் விஜய கார்த்திகேயன்.

இந்தத் திட்டத்துக்கு பள்ளி மாணவர்களிடம் பெரும் வரவேற்பு. முதல் வாரத்திலேயே 238 புகார்கள் வந்துள்ளன. இது, மாணவர்கள் மத்தியில் சமூக அக்கறை, சுய சிந்தனை, தலைமை தாங்கும் குணம் ஆகியவற்றை ஏற்படுத்தியுள்ளது. பிரச்னைகளுக்கு சிறந்த தீர்வு எழுதும் மாணவர்களுக்குப் பரிசு வழங்கும் திட்டமும் இருக்கிறது.

"கடிதம் போட்டோம் களத்தில் குதித்தோம் !

''இது தவிர, கோவில்பட்டியை குப்பையில்லாத நகரமாக மாற்ற, மாணவர்கள் தங்கள் பங்களிப்பை அளிக்கும் திட்டமும் இருக்கிறது. வார இறுதியில் பள்ளிகளில் இருந்து குப்பைகள் சேகரிக்கப்பட்டு

"கடிதம் போட்டோம் களத்தில் குதித்தோம் !

எடை போடப்படும். எந்தப் பள்ளி அதிகமான குப்பைகளைச் சேகரித்துள்ளதோ, அந்தப் பள்ளிக்குப் பரிசு வழங்கப்படும். இந்த மாணவர்கள் பங்களிப்புத் திட்டம் தொடர்ந்து செயல்படும். அடுத்ததாக, மாணவர்கள் தங்கள் பிரச்னைகளைத் தொலைபேசியில் உடனுக்குடன் தெரிவிக்க, 'ஸ்டூடன்ட்ஸ் சோஷியல் ஹெல்ப்லைன்’ என்ற திட்டத்தைத் தொடங்க இருக்கிறோம்'' என்றார் விஜய கார்த்திகேயன்.  

இது குறித்து, கோவில்பட்டி லக்ஷ்மி ஆலை மேல்நிலைப் பள்ளி மாணவ, மாணவிகளிடம் பேசினோம்.

''இந்தத் திட்டத்தால், எங்கள் பகுதியின் குறைகளை அரசுக்குத் தெரிவிக்க வாய்ப்புக் கிடைச்சிருக்கு. அப்பாகிட்ட சொல்லி, ஒரு குயர் பேப்பர் வாங்கினேன். பிரச்னையைச் சொல்றதோடு, அதுக்குத் தீர்வுகளையும் யோசிச்சு எழுதுறப்ப, நம்மாளும் இது மாதிரி பிரச்னைகளைத் தீர்க்க உதவியா இருக்க முடியும்னு நம்பிக்கை ஏற்படுது. பாரதி பாடிய 'அச்சமில்லை... அச்சமில்லை’ பாடலுக்கு ஏற்ற மாதிரி செயல்படுவோம்'' என்கிறார் 10-ம் வகுப்பு மாணவி, ரங்கநாயகி.

''பழைய பஸ் ஸ்டாண்ட் பின்புறம் உள்ள பகுதிகளில்  கைவண்டிக் கடை, ஹோட்டல்கள் கழிவுகளைக் கொட்டிடுவாங்க. அந்தப் பக்கம் போனாலே, துர்நாற்றம் வீசும். அது பற்றி புகார் கடிதத்தில் எழுதிப் போட்டேன். இரண்டு நாளில் கழிவுகளை அகற்றினாங்க. இனிமேல் குப்பைத் தொட்டியில்தான் கழிவுகளைப் போடணும்னு கடைக்காரர்களுக்கு எச்சரிக்கை செய்திருக்காங்க. இப்போ, அந்த இடம் சுத்தமா இருக்கு. அந்தப் பக்கம் வரும்போது 'இது என்னால நடந்த விஷயம்’னு நினைக்கும்போது சந்தோஷமா இருக்கு'' என்று பெருமிதத்துடன் சொல்கிறார் மதுமிதா.

"கடிதம் போட்டோம் களத்தில் குதித்தோம் !

''கோவில்பட்டிக்கு மதுரை பைபாஸில் இருந்து  வருவதற்கு மேம்பாலம் இருக்கு. ஆனா, மேம்பாலத்தில் கால்நடைகளைக் கவனிக்காமல் விட்டுடுறாங்க. வாகனங்கள் வரும்போது கால்நடைகள் குறுக்கே வந்து அதனால் விபத்து ஏற்படுது. இது பற்றி எழுதிப் போட்டிருக்கேன்'' என்கிறார் சிந்துஜா.

சுந்தர்ராஜ் என்ற மாணவர், ''இந்தத் திட்டம் வந்த பிறகுதான் நான் ஒரு விஷயத்தைத் தெரிஞ்சுக்கிட்டேன்.  பள்ளியிலிருந்து 100 மீட்டர் தூரம் வரை டாஸ்மாக் கடையோ, புகையிலை, சிகரெட் விற்கும் கடையோ இருக்கக் கூடாது என்பது அரசின் விதியாம். ஆனால், 20 மீட்டர் தூரத்திலேயே இது மாதிரி கடைகள் இருக்கின்றன. இது பற்றி என் நண்பர்களிடமும் பேசி, மனு எழுதிப் போட்டிருக்கேன்'' என்கிறார்.

''சமுதாயப் பிரச்னை மட்டும் இல்லாம, குடும்பத்துல நடக்குற பிரச்னைகளையும் தெரியப்படுத்தலாம். வீட்டுல  அம்மா-அப்பா சண்டை, அப்பா குடிச்சுட்டு வர்றதுனு இதுவரைக்கும் எங்களால் வெளியே சொல்ல முடியாம இருந்த விஷயங்களையும் எழுதுறோம். தீர்வு கிடைச்சு, எங்க குடும்பத்திலும் எப்பவும் சந்தோஷம் இருக்கும்னு நம்பிக்கை இருக்கு. இந்தத் திட்டத்தை தமிழ்நாடு முழுக்கவே ஆரம்பிக்கலாம்'' என்று கண்களில் எதிர்பார்ப்பும் நம்பிக்கையும் மின்னிடச் சொல்கிறார் ஒரு மாணவர்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism