Published:Updated:

திருவருள் பெருகும் திருக்கார்த்திகை!

கார்த்திகை மாதம் முழுமதி நாளில்...

திருவருள் பெருகும் திருக்கார்த்திகை!

கார்த்திகை மாதம் முழுமதி நாளில்...

Published:Updated:
திருவருள் பெருகும் திருக்கார்த்திகை!

ட்சத்திரங்களை விண்மீன் என்றும் சொல்வார்கள். கடலில் சதா சுற்றிச் சுழன்று அலைந்துகொண்டிருக்கும் மீன்களைப் போன்று, வானத்தில் ஓளிரும் நட்சத்திரங்களும் இடம் பெயர்ந்து கொண்டே இருப்பதால் விண்மீன்கள் என்று அழைக்கிறோம். அவற்றுள் கார்த்திகை நட்சத்திரக் கூட்டத்தை, 'அறுமீன்’ என்று இலக்கியங்கள் சிறப்பிக்கின்றன. இந்த மீன்கள் வளர்த்த செல்வன் என்பதால் முருகனுக்கு 'மீனவன்’ என்றும் பெயருண்டு என்று ஆன்றோர் சிலாகிப்பார்கள்!

திருமாலும் பிரம்மனும் அடிமுடி தேடிய திருக்கதையையும், அவர்களால் அடிமுடியைக் கண்டடையமுடியாதவாறு சிவபிரான் ஜோதிப் பிழம்பாகக் காட்சியளித்த திருக்கதையையும் திருக்கார்த்திகை திருநாளுடன் பொருத்திச் சொல்கிறது, திருவண்ணாமலை தலபுராணம்.

ஒட்டுமொத்த விகடனுக்கும் ஒரே ஷார்ட்கட்!

திருக்கார்த்திகை குறித்த வேறு விசேஷத் தகவல்களையும் ஞான நூல்கள் விவரிக்கின்றன. கார்த்திகை நட்சத்திரத்தை அக்னி நட்சத்திரம் என்கின்றன ஜோதிட நூல்கள். இந்த நட்சத்திர மண்டலத்தைச் சூரியன் கடக்கும் வேளையில், வெயில் அதிகமாக இருக்கும். நெருப்புக் கோளமான சூரியனும் அக்னி வடிவான இந்த நட்சத்திரக்கூட்டமும் சேர்ந்திருக்கும் காலத்தில் வெயில் அதிகமாக இருக்கும். அதையே அக்னி நட்சத்திரம் என்றும் கத்திரி என்றும் கூறுகின்றனர்.

அப்போது வெம்மையைக் குறைக்க வேண்டி, சிவலிங்கத்துக்கு மேல் 'தாரா பாத்திரம்’ (சிறுதுளை கொண்ட பாத்திரம் இது; சிவலிங்கத்துக்கு மேலாக தொங்கவிடப்பட்டிருக்கும். இதில் நிரப்பப்படும் நீரானது தாரையாக லிங்கத்தின் மீது விழுந்தபடி இருக்கும்) அமைப்பதும் பெருமானுக்குத் தயிர்சாதம் நிவேதிப்பதும் நிகழும்.

அதேபோன்று கார்த்திகை நட்சத்திரத்துடன் முழுமதி சேரும் காலம் எங்கும் பனியும் குளிருமாக இருக்கும். இப்படி முழுமதியும் கார்த்திகையும் இணையும் மாதம் கார்த்திகை மாதம் ஆகும். இப்படியான குளிர் மிகுந்த கார்த்திகையின் முழுமதி நாளில், சிவபெருமான் சோதிப் பிழம்பாகக் காட்சியளிக்கிறார். அவர், அக்னி மண்டலத்தின் நடுவில் உமையொரு பாகனாக திருநடனம் புரிகிறார். அதுவே கார்த்திகை தீபத் திருவிழாவாகக் கொண்டாடப்படுகிறது.

திருவருள் பெருகும் திருக்கார்த்திகை!

சரி, இந்தத் திருநாளில் ஆலயங்கள்தோறும், வீடுகள்தோறும் ஏராளமான விளக்குகளை ஏற்றுகின்றனர். அது ஏன்? விண்ணில் விளங்கும் நட்சத்திரக் கூட்டங்களை மண்ணில் ஒளிர்வதாகக் காட்டுவதே திருக்கார்த்திகை தீபத்திருநாள். அதையொட்டியே, அன்று எண்ணற்ற தீப விளக்குகள் ஏற்றப்படுகின்றன.

முருகப்பெருமானின் வளர்ப்புத் தாய்மார்களான கார்த்திகைப் பெண்கள், நம் இல்லம் தேடி வருவார்கள். அவர்களை வரவேற்பதே இவ்விழாவாகும் என்பர் சிலர். அவர்களுடன் கார்த்திகேயனும் வருவான். அவனருளால் நம் வாழ்வில் வளமையும் செல்வமும் பெருகும் என்பது நம்பிக்கை. கொற்றவையாகிய துர்காதேவிக்கும் கார்த்திகா என்றொரு திருநாமம் உண்டு. துர்கை அக்னி மண்டலத்தில் வீற்றிருப்பவள். அக்னிமயமானவள். அதனால் அவள் கார்த்திகைப் பெண்களுக்கு நடுவே அக்னி துர்கையாக வீற்றிருக்கின்றாள் என்கின்றன ஞானநூல்கள்.

கார்த்திகைப் பெண்களால் வளர்க்கப்பட்டதாலும், கார்த்திகாவான துர்கையின் புதல்வன் ஆதலாலும், முருகனுக்குக் கார்த்திகேயன் என்பது பெயராயிற்று. கிருத்திகா புத்திரன், கார்த்திகை மைந்தன் என்ற பெயர்களும் அவருக்கு உண்டு. கார்த்திகை போரைக் குறிக்கும் நட்சத்திரமாகும். வெற்றியை விரும்புபவர்கள், கார்த்திகை நட்சத்திர தினத்தில் முருகனை வழிபடவேண்டும் என்பார்கள் பெரியோர்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism