Published:Updated:

இனிக்கும் மாம்பழம்!

ஏற்றம் தரும் ஏற்றுமதி தொழில்கள்! - 20

இனிக்கும் மாம்பழம்!

ஏற்றம் தரும் ஏற்றுமதி தொழில்கள்! - 20

Published:Updated:

னைவருக்கும் பிடித்த பழ வகைகளில் முன்னிலை வகிப்பது மாம்பழம்தான். பெரும்பாலான நாடுகளிலும் பல வகையான மாம்பழங்கள் விளைவிக்கப்பட்டாலும், இந்தியாவில் விளையும் மாம்பழங்களுக்கு உலக நாடுகளில் தேவை அதிகரித்துக் காணப்படுகிறது. தேவைகள் அதிகமாக இருப்பதால், இந்தியாவிலிருந்து மாம்பழம் ஏற்றுமதியும் அதிகரித்து வருகின்றன. மாம்பழம் மட்டுமல்லாமல், மேங்கோ பல்ப் (Mango pulp), மேங்கோ ஃப்ரோசன் (Mango frozen), மாங்காய் ஊறுகாய் என மாம்பழம் சார்ந்த பொருட்களும் ஏற்றுமதியாகி வருகின்றன. ஏற்றுமதி வாய்ப்புகள் அதிகமுள்ள நாடுகள் எவை, போட்டி நாடுகள் மற்றும் அதிலுள்ள நெளிவுசுழிவுகள் என்ன என்பதைப் பற்றி இந்த வாரம் பார்ப்போம்.

இனிக்கும் மாம்பழம்!

மாம்பழம் உற்பத்தி!

இந்தியாவைப் பொறுத்தவரை, பல வகையிலான மாம்பழங்கள் விளைவிக்கப் படுகின்றன. இதில் அல்போன்ஸா, பங்கனபள்ளி, சுவர்ணரேகா, நீலம் மற்றும் தோத்தாபுரி ஆகிய மாம்பழ வகைகள் அனைத்து மக்களாலும் அதிகமாக விரும்பப்படுகிறது. இந்த வகை மாம்பழங்களே அதிகமாக ஏற்றுமதியும் செய்யப் படுகின்றன.

ஒரு மாம்பழம் ஒரு மனிதனுக்குத் தினசரி தேவைப் படும் 40 சதவிகித நார்சத்துக் களைத் தருகிறது என்பதாலும், அதன் சுவையின் காரணமாகவும் எல்லோரும் ருசித்து மாம்பழத்தை சாப்பிடுகிறார்கள். சுவை, நிறம், தரம் மற்றும் ஈர்க்கும் வடிவம் ஆகியவை இந்திய மாம்பழங்களில் சிறந்து காணப்படுவதாலேயே உலகம் முழுவதும் இந்திய மாம்பழங்களுக்கு மவுசு அதிகமாக இருக்கிறது. இந்தியாவில், ஆந்திராவில்தான் அதிகமாக மாம்பழங்கள் விளைவிக்கப்படுகின்றன. இதற்கு அடுத்து உத்திரப்பிரதேசம், கர்நாடகா, பீகார், குஜராத் மற்றும் தமிழ்நாடு ஆகிய மாநிலங்களிலும் அதிகமாக விளைவிக்கப்படுகிறது. இந்திய மாம்பழ உற்பத்தியில் ஆந்திராவின் பங்கு மட்டும் 24.48% ஆகும்.

இனிக்கும் மாம்பழம்!

முதலிடத்தில் இந்தியா!

மாம்பழம் ஏற்றுமதி குறித்துச் சென்னை அண்ணா சாலையில் உள்ள மத்திய அரசின் ஏற்றுமதி மேம்பாட்டு நிறுவனமான தென் மண்டல அலுவலகத்தின் (FIEO) இணை துணை பொது இயக்குநர் உன்னி கிருஷ்ணணிடம் பேசினோம்.

“இந்தியாதான் மாம்பழம் மற்றும் மாம்பழம் சார்ந்த பொருட்களை ஏற்றுமதி செய்வதில் முதலிடத்தில் இருக்கிறது. உலகின் மொத்த மாம்பழ ஏற்றுமதியில் இந்தியாவின் பங்கு 40 சதவிகிதமாகக் காணப்படுகிறது. கடந்த 2013-14-ம் ஆண்டில் மட்டும் 41,280 டன் மாம்பழம் இந்தியாவிலிருந்து ஏற்றுமதியாகி இருக்கிறது. இதன் மதிப்பு 285.44 கோடி ரூபாய்.

மாம்பழங்கள் மற்றும் மாம்பழம் சார்ந்த பொருட்கள் ஐக்கிய அரபு நாடுகள், ஐரோப்பிய நாடுகள், வங்காளதேசம், இங்கிலாந்து, சவுதி அரேபியா, குவைத், கத்தார், பக்ரைன், நேபாளம்,  அமெரிக்கா, ஓமன், சிங்கப்பூர், மலேசியா போன்ற நாற்பதுக்கும் மேற்பட்ட நாடுகளுக்கு ஏற்றுமதி செய்யப்படுகின்றன.

இந்தியாவிலிருந்து மாம்பழங்களை ஐக்கிய அரபு நாடுகள் அதிகமாக இறக்குமதி செய்து வருகின்றன. இந்த நாட்டைத் தொடர்ந்து ஐரோப்பிய நாடுகள் அதிகமாக மாம்பழங்களை இறக்குமதி செய்து வருகின்றன. மாம்பழ ஏற்றுமதியில் இந்தியா முன்னணியில் இருப்பதுபோல, மேங்கோ பல்ப் (Mango pulp/pure) ஏற்றுமதியிலும் இந்தியாதான் முன்னணியில் இருக்கிறது.

இனிக்கும் மாம்பழம்!

உலக மேங்கோ பல்ப் ஏற்றுமதியில் 60% இந்தியாவின் பங்கு இருக்கிறது. இந்தியாவி லிருந்து 70% மேங்கோ பல்ப் மத்திய கிழக்கு நாடுகளுக்கும், 12% ஐரோப்பாவுக்கும், 5% வட அமெரிக்காவுக்கும் மற்றும் 13% மற்ற நாடுகளுக்கும் ஏற்றுமதியாகிறது.

சந்தை வாய்ப்பு!

சவுதி அரேபியா, இங்கிலாந்து, நேபாளம், கத்தார் மற்றும் அமெரிக்கா ஆகிய நாடுகளில் மாம்பழத்துக்கான நிலையான சந்தை வாய்ப்புகள் காணப்படு கின்றன. ஆனால், இந்த நாடுகள் ஒவ்வொன்றிலும் சுகாதாரக் கட்டுப் பாடுகள் இருப்பதால், ஏற்றுமதி செய்வதற்கு முன்பு தரமான மாங்காய்களை, தரச்சான்றிதழ் களுடன் ஏற்றுமதி செய்வது அவசியம். உணவுப் பொருட்கள் ஏற்றுமதிக்கு APEDA-வில் உரிமம் பெற வேண்டும் என்பதால், மாம்பழத்துக்கான ஏற்றுமதிக்கும் அந்த கவுன்சிலிடம்தான் உரிமம் பெற வேண்டும். (http://apeda.gov.in இந்த வலைதளத்தில் ஒவ்வொரு உணவுப் பொருட்கள் குறித்தும் விரிவான தகவல்கள் இருக்கின்றன).

சேதமாவதைத் தடுக்க வேண்டும்!

இந்தியாவிலிருந்து மாம்பழங்கள் அதிகமாக ஏற்றுமதியாவது சந்தோஷமாக இருந்தாலும், அறுவடையின்போது ஒவ்வொரு ஆண்டும் அதிகமான மாம்பழங்கள் சேதமடைகின்றன என்பது வருத்தப்பட வேண்டிய விஷயம். பொதுவாக, மாம்பழம் அழுகக்கூடிய தன்மையுள்ள பொருள் என்பதால்,  இதை கையாளுவதில் அதிக அக்கறை இருக்க வேண்டும். மாம்பழம் சேதமடைவதைத் தடுக்க அதன் அறுவடையில் அதிகக் கவனம் அவசியமாகிறது.

இனிக்கும் மாம்பழம்!

மாம்பழத்தை பொறுத்தவரை, ஒவ்வொரு பழமாக நீரில் கழுவி சுத்தம் செய்து அதை அதற்குத் தக்கபடியான காற்றோட்டமுள்ள அட்டை பெட்டிகளிலோ அல்லது பைகளில் அடைத்தோ ஏற்றுமதி செய்ய வேண்டும். ஏற்றுமதியாளர்கள் மாம்பழத்தின் தரத்தில் கவனம் செலுத்துவது போல, மாம்பழங்களை பேக்கிங் செய்யப் பயன்படுத்தும் பொருட்களும் தரமாக, சுத்தமாக இருக்கிறதா என்பதையும் கவனிக்க வேண்டும். மிக முக்கியமாக, அட்டைப்பெட்டி அல்லாத பைகளில் பிரின்ட் செய்யப்படும் இங்க் முதற்கொண்டு தரமானதாக இருக்க வேண்டியது அவசியம்.

மேங்கோ பல்ப் மற்றும் ஃப்ரோசன்!

பல வருடங்களாக மேங்கோ பல்ப் மற்றும் மேங்கோ ஃப்ரோசன் ஏற்றுமதி செய்து வரும் ஓஸியானிக் டிரோபிகல் ஃப்ரூட்ஸ் (Oceanic Tropical Fruits Exports) நிறுவனத்தின் மேலாண்மை இயக்குனர்      ஏ.ஜோஸப் ராஜிடம் பேசினோம்..

‘‘மாம்பழம் மற்றும் மாம்பழம் சார்ந்த பொருட்களின் ஏற்றுமதியைப் பொறுத்தவரை அதன் தரத்தில் அதிக அக்கறை காட்ட வேண்டியது அவசியமாகும். எங்களைப் பொறுத்தவரை, மேங்கோ பல்ப் மற்றும் மேங்கோ ஃப்ரோசன் ஆகிய இரு பொருட்களை உலக நாடுகளுக்கு ஏற்றுமதி செய்து வருகிறோம். இதற்கான தேவைகள் ஐரோப்பிய நாடுகள், மத்திய கிழக்கு நாடுகள், ஜப்பான் மற்றும் அமெரிக்கா ஆகிய நாடுகளில் அதிகத் தேவை காணப்படுகிறது. அதனால் எங்களுக்கான சந்தைகளை அங்கு உருவாக்கியுள்ளோம்.

மேங்கோ பல்ப் என்பது மாம்பழக் கூழ் என்று சொல்லலாம். அதாவது, ஒரு டன் மாம்பழத்தில் தோல் மற்றும் கொட்டையை நீக்கி அதைக் கூழாக்கினால் அரை டன் மேங்கோ பல்ப் கிடைக்கும்.

இதிலிருந்து கான்சன்ட்ரேட் என்கிற பொருளைத் தயாரிக்க முடியும். கான்சன்ட்ரேட் என்பது மாம்பழக் கூழில் இருக்கும் தண்ணீரைப் பிரித்தெடுத்து பேஸ்டாக மாற்றுவது. அரை டன் மாம்பழக் கூழில் 1/4 டன் கான்சன்ட்ரேட் தயாரிக்க முடியும்.

இனிக்கும் மாம்பழம்!

இந்த மேங்கோ கான்சன்ட்ரேட் பெரும்பாலும் உள்நாட்டு தேவைக்கு மட்டுமே பயன்படுத்தப்படுகிறது. மேங்கோ ஃப்ரோசன் என்பது தோல் நீக்கிய மாம்பழங்களைச் சிறு சிறு துண்டுகளாக வெட்டி (இறக்குமதியாளர்கள் எதிர்பார்க்கும் அளவை பொறுத்தது) அதைக் குளிரூட்டி, அதே தன்மையுடன் ஏற்றுமதி செய்யப்படுகிறது. இதற்கும் நல்ல வரவேற்பு இருக்கிறது.

ஏற்றுமதி விலை நிர்ணயம்!

பொதுவாக, மாம்பழங்கள் சீஸனில்தான் கிடைக்கும் என்பதால், அப்போது நல்ல மாம்பழங்களாக வாங்கி அதிலிருந்து மேங்கோ பல்ப் மற்றும் மேங்கோ ஃப்ரோசனை தயாரித்து ஸ்டாக் வைத்துக் கொள்வோம். சாதாரணமாக வைத்தால் கெட்டுப்போகும் என்பதால், இத்தாலியிலிருந்து அசெப்டிக் பைகளை (Aseptic Bags) வரவைத்து அதில் அடைத்து வைத்துக் கொள்வோம்.

இந்த வகையான பைகள் இரண்டு ஆண்டுகள் வரை கெடாமல் பார்த்துக் கொள்வதால், ஆண்டு முழுவதும் இறக்குமதியாளர்களின் தேவையைப் பூர்த்திச் செய்ய முடிகிறது. முழு மாம்பழங்களை ஏற்றுமதி செய்யும் ஏற்றுமதியாளர்கள் உள்நாட்டில் மாம்பழங்களை வாங்கும்போது பழமாக வாங்காமல், அதேசமயம் காயாகவும் வாங்காமல் இரண்டுக்கும் இடைப்பட்ட நிலையில் வாங்கி ஏற்றுமதி செய்வது நல்லது. அப்போதுதான் அது இறக்குமதியாளர்கள் வாங்கும்போது நல்ல நிலையில் இருக்கும்.

சீஸன் ஆரம்பத்தில்  மாம்பழங்கள் விலை அதிகரித்தும், விளைச்சல் அதிகரித்திருக்கும் நேரத்தில் விலை குறைந்தும், சீஸன் முடியும் நேரத்தில் மீண்டும் விலை அதிகரித்தும் காணப்படும். இதனால் தேவைக்குத் தக்கபடி அந்தந்த சமயங்களில் மாம்பழங்களை வாங்கி, சராசரி விலையாகக் கணக்கில் கொண்டு ஏற்றுமதி விலையை நிர்ணயம் செய்யலாம்.

இனிக்கும் மாம்பழம்!

மாம்பழம் சார்ந்த பொருட்கள் தயாரிப்பு, பேக்கிங் எனச் செலவுகள் அனைத்தையும் கொண்டு ஏற்றுமதி விலையை நிர்ணயம் செய்வது உத்தமம். மேங்கோ பல்ப் தயாரிக்க தோத்தாபுரி மாம்பழத்தை (கிளிமூக்கு மாம்பழம்) பயன்படுத்தும்போது கூடுதல் சுவை கிடைப்பதால், இறக்குமதியாளர்கள் இதை அதிகம் விரும்புகிறார்கள்.

இந்த வகை மாம்பழங்கள் குறைந்த விலையில் கிடைப்பது ஏற்றுமதியாளர்களுக்குக் கூடுதல் சிறப்பாகும். பெரும்பாலும் அனைத்து நாடுகளிலும் சுகா தாரக் கட்டுப்பாடு இருப்பதால், நமக்கு ஆர்டர் தருபவர்கள் நேரடியாக வந்து தரத்தை பரிசோதித்து, அதில் திருப்தி என்றால் மட்டுமே ஆர்டர்களை வழங்குவார்கள். அதனால் தரத்தை சிறப்பாகக் கையாள்வது அவசியம்” என்றார்.

பணமும் தொழில்நுட்ப வல்லமையும் கொண்டவர்கள் இந்தத் தொழிலை நன்றாக செய்யலாமே!


ஏற்றுமதியாளர்கள் கவனத்துக்கு...

ஏற்றுமதி தொழில் சார்ந்த உங்களின் சந்தேகங்கள் மற்றும் கேள்விகளை exports@vikatan.com என்கிற மெயில்  ஐடி-க்கு அனுப்பி வையுங்கள். குரல்பதிவு மூலமாகவும் உங்கள் கேள்வி மற்றும் சந்தேகங்களைப் பதிவு செய்யலாம். அதற்கு 044-668029920 என்ற எண்ணுக்கு டயல் செய்யுங்கள். கணினி குரல் வழிகாட்டும்.

செ.கார்த்திகேயன்