Published:Updated:

எங்கிருந்து வந்தது இந்த அகங்காரம் ?

எங்கிருந்து வந்தது இந்த அகங்காரம் ?

எங்கிருந்து வந்தது இந்த அகங்காரம் ?

சென்னை, பால வித்யா மந்திர் பள்ளியின் அதிகக் கட்டணக் கொள்ளையைக் கண்டித்து, பெற்றோர்களும் ஆசிரியர்களும் இணைந்து ஒரு வாரமாக நடத்திய போராட்டம், தலைநகரின் பெரும் பரபரப்பு. இரு தரப்புப் பேச்சுவார்த்தைக்குப் பிறகு, பிரச்னை தற்காலிக முடிவுக்கு வந்திருக்கிறது. ஆனால், தமிழ்நாடு முழுவதும் உள்ள தனியார் பள்ளிகளில், அரசு நிர்ணயித்த கட்டணத்தைவிட அதிகமாக, அராஜகமாக, கட்டணக் கொள்ளைகள் வரைமுறை இன்றித் தொடர்கின்றன. 

நீதிபதி சிங்காரவேலர் தலைமையிலான அரசின் பள்ளிக் கட்டண நிர்ணயக் குழு, மாநிலம் முழுவதும் உள்ள ஒவ்வொரு தனியார் பள்ளியும், ஒவ்வொரு வகுப்புக்கும் எவ்வளவு கட்டணம் வசூலிக்கலாம் என்பதை நிர்ணயித்திருக்கிறது. ஆனால், பெரும்பாலான பள்ளிகள் இதைப் பின்பற்றுவதே இல்லை. காரணம், நிர்ணயித்ததைவிட அதிகக் கட்டணம் வசூலிக்கும் பள்ளியின் மீது நடவடிக்கை எடுப்பதற்கான அதிகாரம் சிங்காரவேலர் கமிட்டிக்கு இல்லை. விளைவு... கல்விக் கட்டணம், பருவக் கட்டணம், சீருடைக் கட்டணம், தேர்வுக் கட்டணம், நன்கொடை... என விதவிதமான பெயர்களால் வசூல் வேட்டை நடத்துகின்றனர்.  

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz

கட்டண நிர்ணயக் குழு இப்படி அதிகாரம் இல்லாத அமைப்பாக இருப்பதால், அதன் மீது பள்ளிகளுக்கு எந்த அச்சமும் இல்லை. இல்லையென்றால், 'அரசுக் கட்டணத்தை மட்டும் கட்டும் மாணவர்களுக்கு அரை நாள்தான் பள்ளி நடக்கும்’ என அறிவிக்கும் அகங்காரம் எங்கிருந்து வரும்?

பெற்றோர்களின் உழைப்பை உறிஞ்சி, மாணவர்களின் எதிர்காலத்தைப் பாழாக்கும் கல்வி நிறுவனங்களின் விதிமீறல்கள், கொடும் குற்றங்களாகக் கருதப்பட வேண்டும். ஒரு குற்றத்தைத் தடுத்து நிறுத்துவது மட்டும் அல்ல, இதுவரை அதைச் செய்ததற்கான தண்டனையும் வழங்கப்பட வேண்டும். அதைப்போலவே, பெற்றோர்கள் இந்தக் கொள்ளைப் பள்ளிகளை அடியோடு புறக்கணிக்க வேண்டும். லாபத்தை மட்டுமே நோக்கமாகக் கொண்டவர்களிடம் படித்தால், உங்கள் பிள்ளைகள் எப்படி நல்லவர்களாக வருவார்கள்?

அரசுப் பள்ளிகளை தரம் உயர்த்தி, செயல்திறனை மேம்படுத்தி, மக்களிடம் இழந்த நம்பிக்கையை மீண்டும் பெறவேண்டியது இதற்கான நீண்ட காலத் தீர்வு. அதே நேரம் தான் அனுமதித்த தனியார் பள்ளிகளின் தரத்தையும் நேர்மையையும் சோதித்து உறுதிப்படுத்தவேண்டியது ஒவ்வொரு முறையும் அரசின் பொறுப்பே. நற்பண்பும் நல்லறிவும்தான் கல்வியின் அடிப்படை. இவற்றை மாணவர்களுக்குப் போதிக்கும் முன்பாக, கல்வி நிறுவனங்கள் அதன்படி நடந்து காட்டட்டும்!