Published:Updated:

நிலாவுக்கு 'ஒன்ஸ்மோர்', சூரியனுக்குச் செயற்கைகோள்... நாசாவின் 2018 ஆக்ஷன் பிளான்!

நிலாவுக்கு 'ஒன்ஸ்மோர்', சூரியனுக்குச் செயற்கைகோள்... நாசாவின் 2018 ஆக்ஷன் பிளான்!
நிலாவுக்கு 'ஒன்ஸ்மோர்', சூரியனுக்குச் செயற்கைகோள்... நாசாவின் 2018 ஆக்ஷன் பிளான்!

நிலாவுக்கு 'ஒன்ஸ்மோர்', சூரியனுக்குச் செயற்கைகோள்... நாசாவின் 2018 ஆக்ஷன் பிளான்!

விண்வெளித் துறையைப் பொறுத்தவரையில் சொல்லி அடிப்பதில் கில்லி நாசா. ஒவ்வொரு வருடத்தின் இறுதியிலும், அடுத்த ஆண்டு என்ன செய்யவிருக்கிறார்கள் என்ற விவரத்தை வெளியிடுவது நாசாவின் வழக்கம். கடந்த சில ஆண்டுகளாகவே இதனை செய்துவருகிறது நாசா. அப்படி 2018-ம் வருடம் என்ன செய்யப்போகிறோம் என்ற வீடியோவை வெளியிட்ட நாசா அதில் பல ஆச்சர்ய நிகழ்வுகளைப் பட்டியலிட்டிருக்கிறது. நாசா பட்டியலிட்ட அடுத்து நடைபெறப்போகும் நிகழ்வுகளில் முக்கியமானவை இதோ.

 செவ்வாய்க்கு ஒரு பயணம்

ஏற்கெனவே செவ்வாய் கிரகத்தை ஆராய்வதற்கு பல முறை விண்கலங்களை அனுப்பியிருக்கிறது நாசா. தற்பொழுது கியூரியாசிட்டி என்ற விண்கலம் செவ்வாயில் இருக்கிறது. அதேபோல் செவ்வாயில் தரையிறங்கி ஆய்வு செய்யும் இன்சைட் என்ற விண்கலத்தை 2018 மே மாதம் அனுப்புவதற்கு தயாராக இருக்கிறது நாசா. இந்த விண்கலம் செவ்வாயின் உட்புறத்தை ஆய்வு செய்யும் வகையில் வடிவமைக்கப்பட்டிருக்கிறது. இந்த விண்கலத்தில் மேலும் ஒரு சுவாரஸ்யமான விஷயமும் இருக்கிறது. இந்த விண்கலத்தோடு மனிதர்களின் பெயர்களும் செவ்வாய்க்குப் பயணப்பட இருக்கிறது. இதில் இருக்கும் மைக்ரோ சிப்பில் பெயர்கள் பதியப்பட்டு செவ்வாய் கிரகத்திற்கு அனுப்பப்படும் என்று இந்தத் திட்டம் தொடங்கப்படும் பொழுதே அறிவித்திருந்தது நாசா. நம்மால் செவ்வாய்குத்தான் நேரில் போக முடியவில்லை பெயராவது போகட்டும் என்று நினைத்தார்களோ என்னவோ உலகம் முழுவதுமிருந்து 24 லட்சம் பேர் தங்களது பெயரை இதற்காகப் பதிவு செய்திருக்கிறார்கள் அதில் ஒரு லட்சத்திற்கும் மேற்பட்ட இந்தியர்களும் அடக்கம்.

சூரியனுக்கு மிக மிக அருகில்

விண்வெளியில் இதுவரை உலக நாடுகள் நினைத்துக்கூட பார்க்காத ஒன்றை அடுத்த வருடம் செயல்படுத்த இருக்கிறது நாசா. சூரியனை ஆராய்வதற்காக பார்க்கர் சோலார் ப்ரோப் என்ற செயற்கைக்கோளை அடுத்த வருடம் ஆகஸ்ட் மாதத்தில் அனுப்ப திட்டமிட்டுள்ளது. இது சூரியனின் வளிமண்டலத்தின் உள்ளேயே சென்று ஆய்வு நடத்தும். இதுவரை எந்தச் செயற்கைக்கோளும் அதை முயற்சி கூட செய்து பார்த்ததில்லை. சூரியனின் மேலடுக்கு வெப்பநிலை 10000 °F. அதே வேளையில் அதன் வளிமண்டலம் அதை விட மூன்று மடங்கு வெப்பம் அதிகமாக இருக்கும். இது போன்ற அதீத வெப்பத்தை சமாளிக்கும் வகையில் இந்தச் செயற்கைக்கோள் வடிவமைக்கப்பட்டிருக்கிறது. இந்த முயற்சி வெற்றி பெற்றால் சூரியனைப் பற்றிய பல ரகசியங்கள் நமக்குத் தெரியவரலாம்.

விண்வெளித் தொலைநோக்கி

நாசா விண்வெளிக்கு அனுப்பிய தொலைநோக்கிகளிலேயே சிறப்பானதாகக் கருதப்படுவது ஹபிள் விண்வெளித் தொலைநோக்கி. அது தற்பொழுது வரைக்கும் சிறப்பாகச் செயல்பட்டுக்கொண்டுதான் இருக்கிறது. அதற்கு அடுத்த தலைமுறை விண்வெளித் தொலைநோக்கியை அடுத்த வருடம் அக்டோபர் மாதம் விண்வெளிக்கு அனுப்ப தயாராக இருக்கிறது நாசா. ஜேம்ஸ் வெப் என்று பெயரிடப்பட்டிருக்கும் இது அடுத்த பத்து வருடத்திற்கு செயல்படும் வகையில் வடிவமைக்கப்பட்டிருக்கிறது. பூமியிலிருந்து 15 லட்சம் கிலோமீட்டர் தொலைவில் இது நிலைநிறுத்தப்படும். இது அனுப்பும் புகைப்படங்கள் நமது பிரபஞ்சத்தின் தோற்றம் பற்றிய ஆய்வுகளுக்கு உதவியாக இருக்கும்.

2 கிலோ சாம்பிளின் விலை 800 மில்லியன் டாலர்கள்.

ஓஸிரிஸ் ரெக்ஸ் எனும் செயற்கைக்கோள் மூலமாக பென்னு என்ற சிறுகோளில் இருந்து பரிசோதனை மாதிரிகளை எடுத்து வர திட்டமிட்டிருக்கிறது நாசா. கடந்த 2016-ல் பூமியிலிருந்து அனுப்பப்பட்ட ஓஸிரிஸ் ரெக்ஸ் இரண்டு வருடங்களுக்கு அடுத்த வருடம் ஆகஸ்ட் மாதம் பென்னுவை மிக அருகில் நெருங்கி, எங்கு மாதிரியை எடுப்பது என்று முடிவு செய்யும். அதன் பின்னர் ஓஸிரிஸ் ரெக்ஸ் செயற்கைகோளிலிருந்து வெளிப்படும் கை போன்ற அமைப்பு பென்னுவின் மேற்பரப்பை உடைத்து மாதிரியைச் சேகரிக்கும். அதன் பின்னர் பூமியை நோக்கி பயணம் செய்ய தொடங்கும் ஓஸிரிஸ் ரெக்ஸ் மார்ச் 2023-ல் அது சேகரித்த பென்னுவின் மாதிரியுடன் பூமிக்குத் திரும்பும் வகையில் திட்டமிடப்பட்டிருக்கிறது. நமது சூரியக்குடும்பத்தின் வயதை விட மிகப்பழைமையானதாகக் கருதப்படும் பென்னுவிலிருந்து சேகரித்துக் கொண்டு வரப்படும் மாதிரிகள் மூலமாக நமது சூரியக்குடும்பத்தின் தொடக்கம் பற்றி அறிய முடியும். 800 மில்லியன் அமெரிக்க டாலர்கள் செலவில் செயல்படுத்தப்படும் இந்தத் திட்டத்தில் சேகரிக்கப்படும் மாதிரியின் எடை அதிகபட்சம் 2 கிலோ மட்டுமே.

இவைதவிர, அடுத்த வருடம் முதல் மீண்டும் மனிதர்களை நிலவிற்கு அனுப்பும் ஆராய்ச்சிகளும் தொடங்கப்பட இருக்கின்றன. செயற்கை கோள் மூலமாக லேசரைப் பயன்படுத்தி பூமியில் இருக்கும் காடுகள், பனிப்பாறைகள், கடல்நீர் மட்டம், ஆகியவற்றின் முப்பரிமாண தகவல்களைச் சேகரித்து வரைபடம் தயாரிக்க முடிவு செய்யப்பட்டிருக்கிறது. 

விண்வெளியில் இருக்கும் செயற்கைக்கோள்கள் அதன் திசைகளை மாற்றுவதற்கும், அதிவேகத்தில் செல்லவும் ஏதாவது ஓர் எரிபொருளையே பயன்படுத்துகின்றன. அதற்குப் பதிலாக சூரியனின் ஆற்றலை எப்படிப் பயன்படுத்துவது தொடர்பான ஆய்வுகள் நடைபெறவிருக்கின்றன. அடுத்த வருடம் ஜூலை 29-ம் தேதி நாசாவிற்கு 60-வது பிறந்தநாள். அதைச் சிறப்பான முறையில் கொண்டாடவும் தயாராகி வருகிறது.

அடுத்த கட்டுரைக்கு