Published:Updated:

ஏ.டி.எம்-மில் உங்கள் கணக்கிலிருந்து திருடப்பட்ட பணத்துக்கு யார் பொறுப்பு? #ATM

ஏ.டி.எம்-மில் உங்கள் கணக்கிலிருந்து திருடப்பட்ட பணத்துக்கு யார் பொறுப்பு? #ATM
ஏ.டி.எம்-மில் உங்கள் கணக்கிலிருந்து திருடப்பட்ட பணத்துக்கு யார் பொறுப்பு? #ATM

ஏ.டி.எம்-மில் உங்கள் கணக்கிலிருந்து திருடப்பட்ட பணத்துக்கு யார் பொறுப்பு? #ATM

`ஏ.டி.எம் வழியாக பணப்பரிமாற்றம் செய்வது மிகவும் பாதுகாப்பானது, எளிமையானது' என்ற நம்பிக்கை, ஆங்காங்கே நடந்துவரும் ஏ.டி.எம் பணத்திருட்டுகள் மூலம் கேள்விக்குறியாகிவருகிறது. மின்னணு டெபிட் கார்டு, பின் நம்பர், பாதுகாப்பான ஏ.டி.எம் இயந்திரம் என இத்தனை பாதுகாப்பு வசதிகள் இருந்தும் திருட்டுகள் நடப்பது, வாடிக்கையாளர்களிடையே அச்சத்தை ஏற்படுத்துகின்றன. தொழில்நுட்பம் வளர்வதற்கேற்ப வங்கித் திருடர்களும் நாளுக்குநாள் தங்களை அதிநவீனமாக மாற்றிவருகிறார்கள். ஏ.டி.எம்-களின் மூலம் பணத்தைத் திருடுவது மட்டுமல்லாமல், அது எப்படித் திருடப்பட்டது என்பதே தெரியாதபடியும் செய்துவிடுகிறார்கள். டிஜிட்டல் திருட்டுகளில் இதுதான் பெரும்பிரச்னையே. திருடப்பட்ட வழி தெரிந்தால்தான் அதைத் தடுப்பதற்கான செயலில் இறங்க முடியும்.

சில நாள்களுக்கு முன்னர், டெல்லி கால்காஜியில் உள்ள ஏ.டி.எம் மையம் ஒன்றில் பணத்தை எடுத்த பொதுமக்கள் பலருக்கும் அடுத்த சில மணி நேரங்களிலேயே அவர்களது கணக்கிலிருந்த பணம் கூடுதலாக எடுக்கப்பட்டது தெரியவந்து காவல்துறையில் புகார் அளித்தனர். அவர்களில் சிலருக்கு லட்சக்கணக்கில் பண இழப்பு ஏற்பட்டிருந்தது. இன்று வரை பணம் எப்படித் திருடப்பட்டது என காவல்துறையால் கண்டுபிடிக்கவே முடியவில்லை. ஏ.டி.எம்-மில் செருகப்பட்ட கார்டுகள் க்ளோன் செய்யப்பட்டது எப்படி என மண்டையைப் பிய்த்துக்கொள்ளும் நிலை. ஏதேனும் ஒரு திருட்டுக்கும்பல், ஏ.டி.எம் இயந்திரத்தின் கணினி நெட்வொர்க்கை ஹேக் செய்திருக்கலாம் என காவல்துறை சந்தேகப்படுகிறது. ஒவ்வொரு நாளும் புதிது புதிதாகப் பாதுகாப்பு அச்சுறுத்தல்கள் உருவாகிவருவதால், திருட்டுத்தனமான பரிவர்த்தனைகளால் பணம் திருடப்படும் சூழல்களில், தங்களுக்கு அதில் எந்த அளவுக்குப் பொறுப்புண்டு என்பதை வாடிக்கையாளர்கள் அறிந்துவைத்திருப்பது நல்லது.

2017, ஜூலை மாதத்தில் இந்திய ரிசர்வ் வங்கி (RBI), வங்கிக் கணக்குகளில் திருட்டுத்தனமாகச் செய்யப்படும் பரிவர்த்தனை மோசடிகளைத் தடுப்பதற்காக, அதன் விதிமுறைகளை மீளாய்வு செய்து, தனது வாடிக்கையாளர்களுக்கு சில எல்லைகளை வகுத்தது. இதன்மூலம், டிஜிட்டல் பரிவர்த்தனைகளில் நடக்கும் மோசடி சம்பவங்களைத் தடுக்க, தேசிய அளவில் குடிமக்களின் நலன்காக்கும் பாதுகாப்பு வளையம் ஒன்றை உருவாக்கியது. அதன்படி, திருட்டுத்தனமான பரிவர்த்தனையால் நடக்கும் இழப்பில் வங்கி மற்றும் அதன் வாடிக்கையாளர்களுக்கு எந்த அளவுக்கு பங்கு உள்ளது எனத் தெரிந்துவைத்திருக்கிறது.

ஜீரோ பொறுப்பு:

ஒரு வாடிக்கையாளரின் கணக்கில் நடந்த திருட்டுத்தனமான பணப் பரிவர்த்தனையானது, அதில் வங்கிக்கும் பங்களிப்பு இருந்தாலோ, கவனக்குறைவால் ஏற்பட்டிருந்தாலோ அல்லது பற்றாக்குறையின்போது ஏற்பட்டிருந்தாலோ அவற்றுக்கு வாடிக்கையாளர் பொறுப்பேற்கத் தேவையில்லை. இதைத்தான் `ஜீரோ பொறுப்பு' எனக் குறிப்பிடுகிறார்கள். திருட்டுத்தனமான பரிவர்த்தனையின் மூலம் பண இழப்பு ஏற்பட்டது குறித்து தகவல் கிடைத்த மூன்று நாள்களுக்குள் வங்கியைத் தொடர்புகொண்டு தெரிவித்துவிட வேண்டும். அப்போதுதான் அந்தப் பரிவர்த்தனை மீது உரிய நடவடிக்கை எடுத்து மீட்க இயலும்.

வரையறுக்கப்பட்ட பொறுப்பு:

இங்கே குறிப்பிடப்படும் இரண்டுவித திருட்டுத்தனமான பரிவர்த்தனையின் மூலம் ஏற்படும் பண இழப்புக்கு வாடிக்கையாளர்களும் பொறுப்பேற்க வேண்டும் என வங்கி அறிவுறுத்துகிறது. 

1. வாடிக்கையாளர், அலட்சியமாக தன் வங்கிக்கணக்கு குறித்த விவரங்களை இன்னொருவருக்குத் தெரியும்படி செய்து, அதனால் வங்கிக் கணக்கிலிருந்து பணம் பரிவர்த்தனை செய்யப்பட்டிருந்தால், அதற்கு வாடிக்கையாளரே பொறுப்பேற்க வேண்டும். பணம் திருடப்பட்ட செய்தியை வாடிக்கையாளர் வங்கிக்குத் தெரியப்படுத்திய பிறகு மீண்டும் பணம் திருட்டுத்தனமாக பரிவர்த்தனை செய்யப்பட்டால், அந்தப் பரிவர்த்தனைக்கு மட்டும் வங்கி பொறுப்பேற்றுக்கொள்ளும்.

2. திருட்டுத்தனமான மின்னணு வங்கிப் பரிவர்த்தனைக்கு வங்கியின் தவறோ அல்லது வாடிக்கையாளரின் தவறோ காரணமாக இல்லாதபட்சத்தில், அந்தப் பரிவர்த்தனைகுறித்து வங்கிக்குத் தெரியப்படுத்த தாமதம் (வங்கியிடமிருந்து தகவல் பெறும் நான்கு முதல் ஏழு வேலை நாள்களுக்குள்) ஏற்பட்டால், அந்தத் தாமதத்தால் ஏற்படும் இழப்பை வாடிக்கையாளரே ஏற்க வேண்டும். இத்தகைய தவறுக்கு ஆர்.பி.ஐ விதித்துள்ள கட்டணம் அல்லது இழந்த தொகை இந்த இரண்டில் எது குறைவோ அந்தத் தொகையை வாடிக்கையாளர் ஏற்றுக்கொள்ள வேண்டும்.
 

திருட்டுத்தனமான பரிவர்த்தனை குறித்து வங்கிக்குத் தெரிவிக்க ஏழு நாள்களுக்கும்மேல் தாமதமானால், அந்தக் குறிப்பிட்ட வங்கியின் கொள்கைக்கு ஏற்ப தொகை பிடித்தம் செய்யப்படும். எனவே, வங்கிகள் இதுகுறித்த கொள்கைகளை வெளிப்படையாக வாடிக்கையாளர்களுக்குத் தெரியும்படி செய்ய வேண்டும். ஒவ்வொரு வாடிக்கையாளருக்கும் தனித்தனி கடிதம்வாயிலாகத் தெரியப்படுத்தி விழிப்பு உணர்வு ஏற்படுத்த வேண்டும். ஆக, பணப்பரிவர்த்தனையைப் பாதுகாப்பாகச் செயல்படுத்துவதோடு, அதில் ஏதேனும் தவறு நேர்ந்திருப்பது தெரிந்தால் உடனே வங்கிக்குத் தெரிவிப்பதில் காலதாமதமின்றி செயல்பட வேண்டும்.

அடுத்த கட்டுரைக்கு