Published:Updated:

மறுமதிப்பீடு மெகா குளறுபடி!

மறுமதிப்பீடு மெகா குளறுபடி!
பிரீமியம் ஸ்டோரி
மறுமதிப்பீடு மெகா குளறுபடி!

அலறவைக்கும் அண்ணா பல்கலைக்கழகம்அதிஷா, ஓவியம்: ஹாசிப்கான்

மறுமதிப்பீடு மெகா குளறுபடி!

அலறவைக்கும் அண்ணா பல்கலைக்கழகம்அதிஷா, ஓவியம்: ஹாசிப்கான்

Published:Updated:
மறுமதிப்பீடு மெகா குளறுபடி!
பிரீமியம் ஸ்டோரி
மறுமதிப்பீடு மெகா குளறுபடி!
மறுமதிப்பீடு மெகா குளறுபடி!

`சுற்றுச்சூழல் அறிவியல் தேர்வில் தோல்வி அடைவோம்’ என வித்யா எதிர்பார்க்கவே இல்லை. இன்ஜினீயரிங்கை முடித்துவிட்டு சுற்றுச்சூழல் தொடர்பான மேற்படிப்புப் படிப்பதுதான் வித்யாவின் இலக்கு. இரண்டாம் ஆண்டு தேர்வு முடிவுகள் வந்திருந்த சமயத்தில்தான் சுற்றுச்சூழல் அறிவியல் தேர்வில் தோல்வி அடைந்திருந்தார் வித்யா. மூன்று நாட்களுக்கு மேல் உணவு, உறக்கம் இல்லாமல் பித்துப்பிடித்ததுபோல அமர்ந்திருந்தார். தனிமையில் விட்டால் அவ்வளவுதான் என்ற நிலை. வித்யாவின் தந்தை, உடனடியாக அண்ணா பல்கலைக்கழகத்தில் மறுமதிப்பீட்டு(Revaluation)க்கு விண்ணப்பித்தார். வந்த ரிசல்ட், நேர் எதிர். தோல்வி அடைந்ததாகச் சொல்லப்பட்ட அதே பேப்பருக்கு 80 சதவிகித மதிப்பெண் கிடைத்தது.

பொறியியல் கல்லூரி மாணவர்கள், அடிக்கடி சந்திக்கும் சங்கடமாக இந்தத் தோல்விகளும் அதற்குப் பிறகான மறுமதிப்பீடுகளும் மாறிப் போயிருக்கின்றன. விடைத்தாள்கள் அலட்சியமாகத் திருத்தப்படுவதும், மறுமதிப்பீட்டுக்கு விண்ணப்பித்த பிறகு சரியான மதிப்பெண் பெறுவதும் சகஜமாகிவிட்டன. இந்த மறுமதிப்பீட்டுக்காக ஒரு பேப்பருக்கு வசூலிக்கப்படும் தொகை 700 ரூபாய். சில மாணவர்கள் ஆண்டுதோறும் இந்த மறுமதிப்பீட்டுக்காக மட்டுமே 10,000 ரூபாய் வரை செலவழிக்கிறார்கள். விடைத்தாள் நகல்களுக்கு 300 ரூபாயும், மறுமதிப்பீட்டுக்கு 400 ரூபாயும் வசூலிக்கிறது பல்கலைக்கழகம். மறுமதிப்பீட்டில் திருப்தி இல்லை என்றால், ரிவ்யூவுக்கு விண்ணப்பிக்கலாம். இதற்கு 3,000 ரூபாய்.

வித்யா ஓர் உதாரணம். இன்று தமிழகப் பொறியியல் கல்லூரிகளில் வித்யாவைப் போலவே அலட்சியமாகத் திருத்தப்பட்ட விடைத்தாள்களால் சிக்கலில் சிக்கிய மாணவர்களின் எண்ணிக்கை லட்சங்களைத் தொடுகிறது. இந்த எண்ணிக்கை ஆண்டுதோறும் அதிகரித்துவருகிறது. இப்படி `ஒவ்வோர் ஆண்டும் மறுமதிப்பீட்டுக்கு விண்ணப்பித்த மாணவர்களால் அண்ணா பல்கலைக்கழகத்துக்குக் கிடைத்த வருமானம் எவ்வளவு?’ என அண்மையில் தகவல் அறியும் உரிமைச் சட்டத்தின் கீழ் கேட்கப்பட்டது. கிடைத்த தகவல் கடும் அதிர்ச்சி ரகம்.

2011-ம் ஆண்டு தொடங்கி அண்ணா பல்கலைக்கழகம் இந்த மறுமதிப்பீட்டுக்காகவும், விடைத்தாள்களின் நகல் வழங்குவதற்காகவும் மாணவர்களிடம் இருந்து வசூலித்த தொகை 75 கோடி ரூபாய். `ஆன்லைன்ஆர்டிஐ.காம்’ என்ற அமைப்பின் சார்பில் கேட்கப்பட்ட தகவல்களுக்குப் பதில் அளிக்கும் வகையில் ‘விடைத்தாள் நகல் களுக்காக 28.82 கோடி ரூபாயும், மறுமதிப்பீட்டுக்காக 46.65 கோடி ரூபாயும்’ வசூலிக்கப்பட்டிருப்பதாக அண்ணா பல்கலைக்கழகம் தெரிவித்துள்ளது. வசூலிக்கப்பட்டிருப்பது இத்தனை கோடி என்றால், எத்தனை ஆயிரம் மாணவர்களின் விடைத்தாள்கள் தவறாகத் திருத்தப்பட்டிருக்கும்? அவர்கள் அடையும் மனஉளைச்சலுக்கு யார் பதில் சொல்வது?

மறுமதிப்பீட்டுக்கு விண்ணப்பிக்கும் மாணவர்களின் எண்ணிக்கை ஒவ்வொரு வருடமும் கணிசமாக உயர்கிறது. கடந்த 2011-ம் ஆண்டு 54,531 பேர் விண்ணப்பித்திருந்த நிலையில், கடந்த 2015-ம் ஆண்டு விண்ணப்பித்தவர்களின் எண்ணிக்கை சுமார் 1.09 லட்சம் பேர். ஐந்து ஆண்டுகளில் மறுமதிப்பீட்டுக்கு விண்ணப்பிப் போரின் எண்ணிக்கை இரு மடங்காக உயர்ந்துள்ளது. ஒரு தவறு காலப்போக்கில் குறைய வேண்டும். ஆனால், இவர்கள் ஏதோ இலக்கு நிர்ணயித்து அதை நோக்கிச் செல்வதைப்போல, மறுமதிப்பீடு அவசியப்படும் மாணவர்களின் எண்ணிக்கையை அதிகப்படுத்திக்கொண்டே செல்கிறார்கள். இதற்கு என்ன மாதிரியான இழப்பீட்டை அண்ணா பல்கலைக்கழகம் தருகிறது என்றால், ஒன்றுமே இல்லை. சொல்லப்போனால் தோல்வியடைந்த மாணவன் மறுமதிப்பீட்டுக்குப் பிறகு தேர்ச்சிபெற்றாலும், அவன் இதற்காக கட்டிய பணம் திரும்பத் தரப்பட மாட்டாது.

தற்போது ஒரு நாளைக்கு ஓர் ஆசிரியர் அதிகபட்சம் 50 விடைத்தாள்கள் வரை திருத்தலாம். ஒரு விடைத்தாளுக்கு 20 ரூபாய் சம்பளமாக வழங்கப்படுகிறது. அதாவது ஒரு நாளைக்கு 1,000 ரூபாய் சம்பளம். இவ்வளவு தொகை பெற்றும் அந்த ஆசிரியர் ஒரு விடைத்தாளை முறையாகத் திருத்தவில்லை என்றால், அந்தத் தவறுக்கு மாணவர்களிடம் பணம் வாங்குவது எப்படி சரி? இன்று வரை தேர்வுமுறையிலும் விடைத்தாள் எப்படித் திருத்தப்படுகிறது என்பதிலும் வெளிப்படைத்தன்மை இல்லை. விடைத்தாள் நகல்களைப் பெற்றாலும், எந்த பதிலுக்கு எவ்வளவு மதிப்பெண் என்பதை எல்லாம் தெரிந்துகொள்ள முடியாது. நாம் எழுதியது சரியாக இருக்கிறதா எனப் பார்த்து மறுமதிப்பீட்டுக்கு விண்ணப் பிக்கலாம். ஆனால், நம் விடைத்தாள் முறையாகத் திருத்தப்பட்டதா என்பதைப் பரிசோதிக்கும் வாய்ப்பே இல்லை. ஏன் மார்க் குறைந்தது, எதற்காகத் தோல்வியடைந்தோம்... என்பதைத் தெரிந்துகொள்ள முடியாது. செய்ய முடிந்தது எல்லாம், மறுமதிப்பீட்டுக்கு விண்ணப்பிப்பது மட்டும்தான்.

‘`பத்து ஆண்டுகளுக்கு முன்னர் வரை இந்தப் பிரச்னை இல்லை. இப்போது வருவதற்குக் காரணம், சப்ஜெக்ட் குறித்த அனுபவமற்ற ஆசிரியர்கள், விடைத்தாள் திருத்தலில் ஈடுபடுவதுதான். அதிகரித்துவிட்ட பொறியியல் கல்லூரிகளால் விடைத்தாள் திருத்துவதற்கு அதிக ஆசிரியர்கள் தேவை என்ற நிலை, சில ஆண்டுகளுக்கு முன்னர் வந்தது. அதுவரை `ஐந்து ஆண்டுகள் அனுபவம் உள்ளவர்கள்தான் விடைத்தாள் திருத்த வேண்டும்’ என்று இருந்த விதியை, `மூன்று ஆண்டுகள் அனுபவமே போதும்’ என மாற்றினார்கள். அதில் இருந்துதான் பிரச்னை அதிகரித்துள்ளது.

நிறைய ஆசிரியர்களுக்கு இந்த மூன்று ஆண்டுகள் அனுபவம்கூட இருக்காது. இந்தப் புதிய ஆசிரியர்கள் யாருக்கும், ஒரு விடைத்தாளை முழுமையாகப் படித்துப் பார்த்துத் திருத்தும் திறன் இல்லை. அப்படியே திருத்தினாலும் அந்தப் பாடம் குறித்த தெளிவு இருக்க வேண்டும்; அதுவும் கிடையாது. எல்லாமே அவசரம்தான். அதனால்தான் மறுமதிப்பீட்டில் பெரிய வித்தியாசம் வருகிறது’’ என்றார் பெயர் வெளியிட விரும்பாத பேராசிரியர் ஒருவர்.

‘`இப்படி அலட்சியமாக விடைத்தாள்கள் திருத்தப்படுவதால் மாணவர்கள் தொடர்ச்சியாக பல்வேறு பிரச்னைகளைச் சந்திக்கிறார்கள். அதில் முக்கியமானது வேலைவாய்ப்பு. இறுதி செமஸ்டரில் இப்படி ஒரு சிக்கல் வந்துவிட்டால், மறுமதிப்பீடு முடிந்து ரிசல்ட் வரும் வரை அந்த மாணவனால் வேறு எங்கும் வேலை தேட முடியாது. மறுமதிப்பீட்டில் தேர்ச்சி பெற்றாலும் மதிப்பெண் சான்றிதழ் வரும் வரை மாதக்கணக்கில் காத்திருக்க வேண்டும். கேம்பஸ் இன்டர்வியூவில் கலந்துகொள்ள முடியாமல் போகும். வாய்ப்புகள் வந்து கதவைத் தட்டும்போதும் காத்திருக்க வேண்டியிருக்கும். மேற்படிப்புகளுக்கு முயற்சி செய்துகொண்டிருந்தால் அதுவும் சிக்கலாகும்’’ என ஆதங்கமாகப் பேசுகிறார் அண்ணா பல்கலைக்கழக முன்னாள் மாணவர் சரவணன்.

மாணவர்களைப் பொறுத்தவரை, பெற்றோரைச் சமாளிக்க வேண்டும் என்பது அச்சம் நிறைந்த கூடுதல் சுமை.

‘`நீ சரியா படிச்சிருந்தா, மார்க் ஏன் கம்மியா வரப்போகுது?’’ என்பதுதான் வழக்கமாக பெற்றோர் சொல்லும் பதில். மறுமதிப்பீடு முடிவு வரும் வரையிலும் அவர்களுக்கு இவற்றை எல்லாம் புரியவைக்க முடியாது.

நன்றாகப் படிக்கக்கூடிய மாணவர்களுக்கு, குறிப்பாக பள்ளியில் எப்போதும் தோல்வியே சந்தித்திடாத, எப்போதும் நல்ல மதிப்பெண் பெறும் ஒரு மாணவனுக்கு, இப்படி ஒரு தேர்வு முடிவு வந்தால் அவனை அது நிலைகுலைய வைத்துவிடுகிறது. பொறியியல் கல்லூரி மாணவர்கள் மத்தியில் அதிகரித்திருக்கும் தற்கொலைகளுக்கும் இந்த விடைத்தாள் குழப்பங் களுக்கும் நிறையவே தொடர்பு இருக்கின்றன.

‘`இதற்கு, பல்கலைக்கழகத்தின் தேர்வுகள் கட்டுப்பாட்டு அலுவலர்தான் முதல் பொறுப்பு. வருடாவருடம் மாணவர்களின் எண்ணிக்கை உயர்வதற்கு ஏற்ப, திருத்தும் ஆசிரியர்களின் எண்ணிக்கையையும் உயர்த்த வேண்டும். தவறுதலாகத் திருத்தும் ஆசிரியர்களைத் தகுதிநீக்கம் செய்ய வேண்டும். சென்னை பல்கலைக்கழகத்தில் இப்படி நடந்திருக்கிறது’’ என்கிறார் ஓய்வுபெற்ற அரசுக் கல்லூரி முதல்வரும் இயற்பியல் துறை தலைவருமான பேராசிரியர் சிவகுமார்.

விடைத்தாள்களைத் திருத்தும் ஆசிரியர்களுக்கு வேறு மாதிரி சிக்கல்கள் இருப்பதாகச் சொல்லப் படுகிறது... ``திருத்துவதற்காக வரும் அத்தனை பேப்பர்களையும் தேர்ச்சி பெறச் செய்தாலோ, அதிக மதிப்பெண் பெறச் செய்தாலோ, நிர்வாகத்தின் பல கேள்விகளுக்கும் பதில் சொல்ல வேண்டியிருக்கும். அதனாலேயே பின்தங்கிய மாவட்டங்களில் இருக்கும் பொறியியல் கல்லூரி விடைத்தாள்களையும் பகுதிநேர மாணவர்களின் விடைத்தாள்களையும் மேம்போக்காகத் திருத்தி, முடிந்தவரை அரியர்களை அள்ளிப்போடுவதை பல ஆசிரியர்களும் வழக்கமாக வைத்திருக்கிறார்கள். அண்ணா பல்கலைக்கழகத்திலேயே படிக்கும் மாணவர்கள் சுமாராக எழுதியிருந்தாலும் மதிப்பெண்களை அள்ளிப்போடுவதும் எழுதப்படாத விதி’’ என அதிரவைக்கிறார்கள் சில ஆசிரியர்கள்.

இதனால் மறுமதிப்பீடு நடைமுறையில் பெரிய மாற்றங்கள் வேண்டும் என்ற கோரிக்கைகள் வலுக்க ஆரம்பித்திருக்கின்றன. ``குறிப்பாக விடைத்தாளை மட்டும் வைத்துக்கொண்டு, ஆசிரியர்கள் அவர்களுக்குத் தொடர்பு இல்லாத துறை சார்ந்த விடைத்தாள்களைத் திருத்துவது அடியோடு தடுக்கப்பட வேண்டும். உதாரணத்துக்கு கணிதம் நன்கு அறிந்த ஆசிரியர்தான் கணிதத் தேர்வுக்கான விடைத்தாள்களைத் திருத்த வேண்டும். விடைத் தாளிலேயே மதிப்பெண்களையும் இடக்கூடிய வகையில் மாற்றம் வேண்டும்’’ என்பது மாதிரியான பல கோரிக்கைகள் பொறியியல் கல்லூரி மாணவர்கள் தரப்பில் இருந்து முன்வைக்கப்படுகின்றன.

பெற்றோர்கள் தங்கள் சொத்துக்களை அடகுவைத்து பிள்ளைகளைப் படிக்க வைக்கிறார்கள். அது அவர்களின் கனவு; ஒரு தலைமுறையின் எதிர்காலம். அதனுடன் விளையாடவோ, விளையாட்டுத்தனமாக அணுகவோ யாருக்கும் உரிமை இல்லை. அண்ணா பல்கலைக்கழகம், தன் மதிப்பைத் தக்கவைத்துக்கொள்ள வேண்டும் எனில், இந்தச் சிக்கலில் கறார் நடவடிக்கை அவசியம்!

தனியார் கல்லூரிகளின் ஷார்ட் கட்!

கடந்த ஐந்து ஆண்டுகளில் அண்ணா பல்கலைக்கழகத்தில் மறுமதிப்பீட்டுக்கு முறையிட்ட 11.66 லட்சம் பேரில் 4.87 லட்சம் பேர் தேர்வாகியுள்ளனர். விண்ணப்பிக்கும் ஐந்து பேரில் இருவருக்கு ரிசல்ட் மாறுகிறது. இந்த ட்ரெண்டை தங்களுக்குச் சாதகமாகப் பயன்படுத்திக்கொள்கின்றன தனியார் கல்லூரிகள். ஒவ்வோர் ஆண்டும் அதிக அளவில் தேர்ச்சி சதவிகிதம் காட்டுவதற்கு இந்த மறுமதிப்பீட்டை உபயோகிக்கிறார்கள். 1,000 பேர் எழுதும் ஒரு தேர்வில், 250 பேர் தோல்வியடைந்தாலும் மறுமதிப்பீடு மூலம் இந்த எண்ணிக்கையைப் பாதியாகக் குறைத்து தேர்ச்சி விகிதத்தை உயர்த்திக்கொள்கின்றன.

 `ஒவ்வொரு தனியார் கல்லூரியும் தங்கள் மாணவர்கள் சரியாகப் படிக்காமல் இருந்தாலும், பயிற்றுவிக்கப் போதிய ஆசிரியர்கள் இல்லாமல்போனாலும், முறையாகக் கற்பதற்கு வசதிகள்
இல்லையென்றாலும் அவற்றைச் சரிசெய்ய முயற்சிப்பது இல்லை. அதற்குப் பதிலாக ஒரு செமஸ்டருக்கு 25 லட்சம் ரூபாயில் இருந்து 50 லட்சம் ரூபாய் வரைக்கும் மறுமதிப்பீட்டுக்குச் செலவழிக்கத் தயாராக இருக்கிறார்கள்’ எனக் குற்றம்சாட்டுகிறார்கள் கல்வியாளர்கள்!

பட்டதாரிகளின் தகுதி!

ஆஸ்பயரிங் மைண்ட்ஸ் என்ற நிறுவனம் வெளியிட்ட தேசிய வேலைவாய்ப்புத் தகுதி அறிக்கையில் (National Employability Report) 2016-ம் ஆண்டில் தமிழ்நாடு கடைசி இடத்தைப் பிடித்திருந்தது. இந்தியா முழுக்க 650 பொறியியல் கல்லூரிகளில் 1 லட்சத்து 50 ஆயிரம் மாணவர்களிடம் நடத்தப்பட்ட ஆய்வு இது. ஒரு பொறியியல் பட்டதாரி, வேலைவாய்ப்பைப் பெறுவதற்கு எந்த அளவுக்குத் தகுதியானவராக இருக்கிறார் என்பதை அறிகிற இந்த அறிக்கையில்தான் தமிழ்நாட்டுக்குக் கடைசி இடம். `இந்திய அளவில் 80 சதவிகிதம் பொறியியல் பட்டதாரிகள் வேலைவாய்ப்புத் தகுதி குறைவானவர்கள்’ என இந்த ஆய்வு தெரிவித்தது. தமிழ்நாட்டின் கம்ப்யூட்டர் சயின்ஸ் பட்டதாரிகளில் 10 சதவிகிதம் பேருக்குத்தான் மென்பொருள் கோடிங் எழுதவே வருகிறது என்றும் அதிர்ச்சி கொடுத்தது. நம் மாணவர்கள் புதிதாகக் கற்றுக்கொள்ளும் திறனும் படைப்பாற்றலும் பொது அறிவு அற்றவர்களாகவும், முடிவெடுக்கும் திறமையும் தலைமைப் பண்புகளும் இல்லாமல் இருப்பதும் தெரியவந்தது!

மறுமதிப்பீடு மெகா குளறுபடி!

இந்த 75 கோடி ரூபாய் தகவல் செய்தியாக வெளியானதும், தமிழகப் பொறியியல் கல்லூரிகளில் படித்த முன்னாள் மாணவர்களும் இன்னாள் மாணவர்களும் இணையத்தில் #AnnaUniversity என்கிற ஹேஷ்டேகில் ட்வீட்களும் ஸ்டேட்டஸ்களும் போட ஆரம்பித்தனர். அதில் ஒரு பக்கம் ஒவ்வொரு மாணவரும் இந்த மறுமதிப்பீட்டால் எப்படி எல்லாம் பாதிக்கப்பட்டோம் என்பதைக் கொட்டித்தீர்க்க, இன்னொரு பக்கம் கேலி மீம்ஸ்களால் அண்ணா பல்கலைக்கழகத்தைக் கலாய்த்துக்கொண்டிருந்தனர்.