Published:Updated:

பட்ஜெட் 2017 ஏமாற்றிவிட்டாரா நிதி அமைச்சர்?

பட்ஜெட் 2017 ஏமாற்றிவிட்டாரா நிதி அமைச்சர்?
பிரீமியம் ஸ்டோரி
பட்ஜெட் 2017 ஏமாற்றிவிட்டாரா நிதி அமைச்சர்?

ஜெ.சரவணன்

பட்ஜெட் 2017 ஏமாற்றிவிட்டாரா நிதி அமைச்சர்?

ஜெ.சரவணன்

Published:Updated:
பட்ஜெட் 2017 ஏமாற்றிவிட்டாரா நிதி அமைச்சர்?
பிரீமியம் ஸ்டோரி
பட்ஜெட் 2017 ஏமாற்றிவிட்டாரா நிதி அமைச்சர்?
பட்ஜெட் 2017 ஏமாற்றிவிட்டாரா நிதி அமைச்சர்?

முதன்முதலாக பிப்ரவரி 1-ம் தேதி அன்று தாக்கல் செய்யப்படும் பட்ஜெட் மற்றும் பண மதிப்பு நீக்கத்துக்குப் பிறகு தாக்கல் செய்யப்படும் பட்ஜெட் என்கிற நிலையில், மிகுந்த எதிர்பார்ப்புடன் தாக்கலாகி இருக்கிறது   2017 - 18-ம் நிதி ஆண்டுக்கான மத்திய பட்ஜெட். பல தரப்பட்ட மக்களின் எதிர்பார்ப்புகளை எல்லாம் இந்த பட்ஜெட் நிறைவேற்றி இருக்கிறதா, இல்லை மத்திய நிதி அமைச்சர் ஏமாற்றிவிட்டாரா  என்கிற கேள்விக்கான பதிலைப் பார்ப்போம்.

   அனைவருக்கும் சலுகை

இந்த பட்ஜெட் மூலம் பல நல்ல விஷயங்களைச் செய்திருக்கிறார் மத்திய நிதி அமைச்சர் அருண் ஜெட்லி. ‘பட்ஜெட்டில் எங்களை விட்டு விட்டீர்களே’ என்று யாரும் சொல்ல முடியாத அளவுக்கு, பெண்கள், குழந்தைகள், இளைஞர்கள், பெரியவர்கள், சிறு குறு தொழில் முதல் பெரு முதலாளிகள் வரை அனைத்துத் தரப்பினருக்கும் சில சலுகைகளை வழங்கி நல்ல பெயரை சம்பாதித்திருக்கிறார். 

   வருமான வரிச் சலுகை

தனிநபர் வருமானத்தில் ரூ.2.5 லட்சத்திலிருந்து ரூ.5 லட்சம் வரை வருமான வரி 10 சதவிகிதத்தில் இருந்து 5 சதவிகிதமாகக் குறைக்கப்பட்டுள்ளது.  இதன் மூலம் ரூ.5 லட்சத்துக்கு மேல் சம்பாதிக்கிறவர் களுக்கு ரூ.12,500 மிச்சமாகும். வெறும் 12,500 ரூபாய்தானா என்று நினைக்க வேண்டாம். கடந்த ஆண்டில் இருந்த வருமான வரி வரம்பின்படி, ரூ.1.25 லட்சம் ரூபாய் முதலீடு செய்திருந்தால் மட்டுமே இந்தத் தொகை நமக்கு மிச்சமாகி இருக்கும். இப்போது வருமான வரியானது 5 சதவிகிதமாகக் குறைக்கப்பட்டு இருப்பதன் மூலம், ரூ.1.25 லட்சத்தை செலவு செய்வதற்கு வழிசெய்து தந்திருக்கிறார் நிதி அமைச்சர். இந்தப் பணத்தைக் கொண்டு மக்களால் பல்வேறு பொருட்களை வாங்க முடியும். இதனால் பொருளாதாரம் வளர்ச்சி காணும். இந்த நடவடிக்கை மூலம் அரசுக்கு ரூ.15,000 கோடி வருமான இழப்பு ஏற்படும் என்றாலும், வரிக் கணக்குத் தாக்கல் செய்பவர்களின்  எண்ணிக்கையை அதிகப்படுத்த இந்த முடிவைத் துணிந்து எடுத்திருக்கிறார் மத்திய நிதி அமைச்சர்.

அதேசமயம், ரூ.50 கோடி வரை வர்த்தகம் செய்யும் நிறுவனங்களின் வருமான வரியைக் குறைத்திருக்கிறார். இன்றைக்கு இந்தியத் தொழில் துறையில் சிறு மற்றும் நடுத்தர நிறுவனங்கள்தான் 95% இருக்கின்றன. பெரு நிறுவனங்களின் பங்கு வெறும் 5% மட்டுமே என்பதால், சிறு நிறுவனங்களின் வரிச் சுமையை கொஞ்சம் குறைத்திருக்கிறார்.

  விவசாயத் துறைக்கு

வறட்சியைச் சமாளிக்க ஐந்து லட்சம் குளங்கள் வெட்டப்படும் என மத்திய நிதி அமைச்சர் அறிவித்திருப்பது வறட்சியினால் வாடும் விவசாயிகளுக்கு ஆறுதல் தரும் தீர்வாக இருக்கும். இதைக் கடந்த காலத்திலேயே செய்திருக்கவேண்டும் என்றாலும் இந்த பட்ஜெட் மூலமாகவாவது அரசாங்கம் செய்ய நினைக்கிறதே என்று மகிழ்ச்சி அடையலாம்.

விவசாயிகளுக்கு அளிக்கப்படும் கடன் அளவு ரூ.10 லட்சம் கோடியாக இலக்கு நிர்ணயம் செய்யப்பட்டு இருக்கிறது. கடந்த ஆண்டு சுமார் ரூ.9 லட்சம் கோடி நிர்ணயம் செய்யப்பட்டு இருந்தது. இப்போது சுமார் ரூ.1 லட்சம் கோடி அதிகரித்திருப்பது விவசாயிகளுக்கு இன்னும் அதிக அளவில் கடன் கிடைக்கும் வாய்ப்பை உருவாக்கும்.

எல்லாவற்றுக்கும் மேலாக, அடுத்த ஐந்து ஆண்டுகளில் விவசாயிகளின் வருமானத்தை இரண்டு மடங்காக உயர்த்தவும் இலக்கு நிர்ணயித்து இருக்கிறார்.  உண்மையில் இந்த இலக்கினை எட்ட முடியுமா என்கிற கேள்வி எழுந்தாலும், இதில் பாதியாவது நிறைவேறவேண்டும் என்பதுதான் விவசாயி களின் எதிர்பார்ப்பு. நிறைவேறுமா என்பதைப் பொறுத்திருந்தே பார்க்க வேண்டும்.

   பெண்கள் மற்றும் குழந்தைகளுக்கு

இந்த பட்ஜெட்டின் மூலம் பெண்கள் மற்றும் குழந்தைகளுக்கு சுமார் 28 ஆயிரம் கோடி ரூபாயைக் கடந்த ஆண்டைவிடக் கூடுதலாக ஒதுக்கி இருக்கிறார் நிதி அமைச்சர். கிராமப்புறங்களில் வேலை அளிக்கும் மகாத்மா காந்தி தேசிய ஊரக வேலைவாய்ப்புத் திட்டத்தின் கீழ் இதுவரை 45% அளவுக்கு பெண்களுக்கு வேலைவாய்ப்பு அளிக்கப்பட்டது. இது இனி 55 சதவிகிதமாக உயர்த்தப்படும் என்று அறிவிக்கப் பட்டுள்ளது வரவேற்கத்தக்க விஷயமே. அதேபோல, பிற்படுத்தப்பட்ட மக்களின் வளர்ச்சிக்காக சுமார் 12,500 கோடி ரூபாய் அதிகரித்திருப்பதும், நாடு முழுவதும் ஒரு கோடி குடும்பங்களை வறுமையிலிருந்து விடுவிக்க எடுத்துள்ள நடவடிக்கையும் குறிப்பிடத்தக்க விஷயம்! 

   நெடுஞ்சாலைத் துறை

பொருளாதார வளர்ச்சிக்கு முக்கியமான அம்சமாக இருக்கும் நெடுஞ்சாலைகளை அமைக்க மத்திய அரசாங்கம் அதிக அளவில் நிதி ஒதுக்கீடு செய்ய உள்ளது. கடந்த ஆண்டு சுமார் 14,977 கோடி ரூபாய் மட்டுமே நெடுஞ்சாலைகள் அமைக்க செலவிடப்பட்டது. இந்த ஆண்டு சுமார் ரூ.23,892 கோடி அரசுத் தரப்பில் தரப்படவிருக்கிறது. இது கடந்த ஆண்டைவிட சுமார் 60% அதிகம் என்பது முக்கியமான விஷயம்.

   கறுப்புப் பணம் ஒழிப்பு

பணத்தை ரொக்கமாகக் கையாள்வதைத் தடுப்பதன் மூலம் கறுப்புப் பணம் உருவாவதைக் குறைக்க சில முக்கிய நடவடிக்கைகளை எடுத்திருக் கிறார். உதாரணமாக, ரூ.3 லட்சத்துக்கு மேல் பணத்தை ரொக்கமாக பரிமாற்றம் செய்யக்கூடாது. செக் அல்லது ஆன்லைன் மூலமாகத்தான் செய்யவேண்டும் என்று சொல்லி இருப்பது ரியல் எஸ்டேட் துறைக்கு பாதிப்புகளை ஏற்படுத்தும் என்றாலும் கறுப்புப்பணம் உருவாவது நிச்சயம் தடுக்கப்படும். அதேபோல, வீட்டையோ அல்லது நிலத்தையோ விற்கும்போது நீண்ட கால மூலதன ஆதாய வரி மூன்று ஆண்டிலிருந்து இரண்டு ஆண்டாகக் குறைக்கப்பட்டு இருப்பது, ரியல் எஸ்டேட்டில் விற்பனையை அதிகரிக்க உதவும்.

இப்படி பல நல்ல விஷயங்கள் இந்த பட்ஜெட் டில் இருந்தாலும், ஏமாற்றம் தரக்கூடிய விஷயங் களும் சில இருக்கவே செய்கின்றன.

   தொழில் வளர்ச்சிக்கு ஒன்றும் இல்லை

மேக் இன் இந்தியா - பிரதமர் மோடி ஆட்சிப் பொறுப்புக்கு வந்தபின் மிகப் பிரபலமாக பேசப்பட்ட திட்டம். பல்வேறு பொருட்களை வெளிநாடுகளில் இருந்து இறக்குமதி செய்வதைவிட, நம் நாட்டிலேயே உற்பத்தி செய்து, அதை உலக நாடுகளுக்கு ஏற்றுமதி செய்யவேண்டும் என்பதே இந்தத் திட்டத்தின் நோக்கம். இதன் மூலம் பொருளாதாரம் பெரிய அளவில் உயரும் என்றுதான் எல்லோரும் எதிர்பார்த்தனர். ஆனால், பொருளாதார வளர்ச்சிக்கு ஆதரவாக கடந்த ஆண்டு பட்ஜெட்டில் நிதி அமைச்சர் அறிவித்த அளவுக்கான திட்டங்கள்கூட இந்த ஆண்டில் இல்லை. பெரிய அளவில் புதிய தொழிற்சாலைகளைத் தொடங்கும் திட்டங்கள் எதுவுமே இல்லை. ஏற்கெனவே செயல்பட்டு வரும் தொழில்கள் இப்போது செயல்படுகிற மாதிரி இயங்கிவந்தாலே போதும் என்று நிதி அமைச்சர் நினைத்தாரோ என்னவோ, தொழில் வளர்ச்சியின் மீது பெரிய கவனம் எதையும் காட்டமலேயே விட்டுவிட்டார்.
மோடியின் பண மதிப்பு நீக்க நடவடிக்கைக்குப் பின் பல தொழில்கள் பாதிப்படைந்துள்ளன. அரசு பெரிய அளவில் சலுகைகளை அளித்தால் மட்டுமே தொழில் வளர்ச்சி வேகமெடுக்கத் தொடங்கும்.  இதற்கான புதிய திட்டங்கள் எதுவும் இல்லாத நிலையில், பொருளாதார வளர்ச்சி எந்த அளவுக்கு அதிகரிக்கும் என்பது கேள்விக்குறியே!

   வேலைவாய்ப்புக்கும் வழி இல்லை

புதிய திட்டங்கள் எதுவும் இல்லாத நிலையில், புதிய வேலைவாய்ப்புக்கான திட்டங்களும் பெரிய அளவில் இல்லாதது நம் ஏமாற்றத்தை அதிகப்படுத்துவதாகவே இருக்கிறது. சமீபத்தில் கிடைத்த புள்ளிவிவரங்களின்படி, ஒரு ஆண்டுக்கு குறைந்தது ஒரு கோடி புதிய வேலைவாய்ப்புகளாவது உருவாக்கப்படவேண்டும். ஆனால், தற்போது 10 லட்சத்துக்கும் குறைவான வேலைவாய்ப்புகளே உருவாக்கப்பட்டு வருகின்றன. புதிய வேலைவாய்ப்புகளை அதிகரிக்கும் திட்டங்கள் இந்த பட்ஜெட்டில் வெளியாகும் என்று எல்லோரும் எதிர்பார்த்தனர். அது நிறைவேறவில்லை என்கிறபோது, பல லட்சம் ரூபாய் செலவு செய்து, கல்லூரிப் படிப்பை முடித்துவிட்டு, வேலை தேடி வரும் இளைஞர்கள் என்ன செய்து பிழைக்கப் போகிறார்கள் என்கிற கேள்விக்கான பதில் பட்ஜெட்டில் கிடைக்கவில்லை.

   என்ன காரணம்?

உ.பி உள்பட ஐந்து மாநிலங்களில் தேர்தலை வைத்துக்கொண்டு, அதிரடியாக ஏதாவது நடவடிக்கை எடுத்தால், வாக்குகளை இழக்க வேண்டி வருமோ என்கிற பயம் ஒருபக்கம்;         2019-ல் பொதுத் தேர்தல் என்பதால், அடுத்த ஆண்டில் நிதி அமைச்சர் தாக்கல் செய்யும் பட்ஜெட்தான் முழு ஆண்டுக்கு அவர் தாக்கல் செய்யும் கடைசி பட்ஜெட். அந்த சமயத்தில் அதிகமான சலுகைகளையும் தொழில் வளர்ச்சிக்கான திட்டங்களையும் அறிவிப்பதன் மூலம் அடுத்த பொதுத் தேர்தலிலும் ஆட்சியைக் கைப்பற்றலாமே என்கிற எண்ணம் நிதி அமைச்சருக்கு இருந்திருக்கலாம். அதனால் இந்த ஆண்டில் சாதகமாகவோ அல்லது பாதகமாகவோ அதிரடியாக எதுவும் செய்யாமல் இருந்திருக்கலாம்.

சுருக்கமாக, 2017-18-ம் ஆண்டுக்கான பொது பட்ஜெட் மூலம் நிதி அமைச்சர் இன்னும் நிறைய செய்திருக்கலாம் என்றாலும் பெரிய அளவில் ஏமாற்றிவிடவில்லை என்றுதான்  சொல்லவேண்டும்.

‘‘சிறு, குறு மற்றும் நடுத்தர நிறுவனங்கள் பயனடைய வாய்ப்பு!’’

பட்ஜெட் 2017 ஏமாற்றிவிட்டாரா நிதி அமைச்சர்?


 வ.நாகப்பன், பங்குச் சந்தை நிபுணர்

‘‘இரண்டு வீடு வைத்திருப்பவர்கள் ஒரு வீட்டில் வசித்தும், மற்றொரு வீட்டை பயன்படுத்தாமலும் வைத்திருப்பார்கள். இதற்கு குறிப்பிட்ட அளவு வாடகை கிடைக்கும் என்று கணக்கிட்டு அதற்கு வரி செலுத்த வேண்டும். அந்த வீட்டை வாடகைக்கே விடவில்லை என்றாலும் வரி செலுத்தவேண்டும் என்று இருந்தது. இதனை மாற்றி அமைப்பார்கள் என்ற எதிர்பார்ப்பு இருந்தது. இந்த பட்ஜெட்டில் மாற்றம் செய்யவில்லை. ஆனால், ஹவுஸிங் புரமோட்டர்களுக்கு உதவும் வகையில் மாற்றத்தைக் கொண்டு வந்திருக்கிறார்கள். வழக்கமாக வீடு கட்டி முடித்து சான்றிதழ் பெற்றவுடன், வீடுகளுக்கு வரிச் செலுத்தவேண்டும். இப்போது கட்டடம் கட்டி முடித்து, ஒரு வருடம் வரை எந்த வரியும் செலுத்த தேவையில்லை என்று அறிவித்து இருக்கிறார் நிதி அமைச்சர். இது அடுக்கு மாடிக் கட்டடத்தைக் கட்டி முடித்து விற்க முடியாமல் இருப்பவர்களுக்கு உதவியாக இருக்கும்.

ஒவ்வொரு பட்ஜெட்டிலும் புதிய திட்டங்களை அறிவித்து, அதற்கு என்று பெரிய அளவில் ஒதுக்கீடு செய்வார்கள். இந்த பட்ஜெட்டில் எந்த புதிய திட்டங்களும் அறிமுகப்படுத்தவில்லை. புதிய திட்டத்தை அறிமுகப்படுத்தி, அதனை நடைமுறைப்படுத்த நிறைய காலம் ஆகும். தற்போது ஏற்கெனவே உள்ள திட்டங்களுக்கு ஒதுக்கீடு செய்திருப்பதால் நடைமுறைப்படுத்துவது எளிது. கிராமப் பகுதிகளுக்கும், விவசாயிகளுக்குமான திட்டத்தில் ஒதுக்கீடு செய்திருப்பதால், வளர்ச்சியை நோக்கி செயல்பட்டு இருக்கிறார்கள். எதுவும் இலவசமாக கொடுக்கத் தேவை இல்லை என்பதில் தெளிவாக இருக்கிறார்கள்.

எங்கு எல்லாம் வரி வசூல் மற்றும் இதர வருமானத்தை உயர்த்த முடியுமோ, அங்கு எல்லாம் உயர்த்தப்பட்டு இருக்கிறது. கச்சா எண்ணெய் விலை நான்கு ரூபாய் குறைந்து இருந்தால், மத்திய அரசு இரண்டு ரூபாய் மட்டும் குறைத்து வருமானத்தை தக்கவைத்து இருக்கிறது. கடந்த காலத்தில் இறக்குமதி குறைந்திருக்கிறது. இதனால் நிதிக் கையிருப்பு அரசிடம் ஓரளவுக்கு இருக்கிறது. இந்தப் பணத்தை எல்லாம் என்ன செய்யப்போகிறார்கள் என்கிற கேள்வி இருந்தது. இதில் ரூ.4 லட்சம் கோடியை உள்கட்டமைப்புக்கும், ரூ.1.34 லட்சம் கோடியை ரயில்வேக்கும் ஒதுக்கீடு செய்து இருக்கிறார்கள். ரூ.64 ஆயிரம் கோடி சாலை மேம்பாட்டுக்கு ஒதுக்கீடு செய்திருக்கிறார்கள். இதன் மூலம் சிறு குறு மற்றும் நடுத்தர நிறுவனங்கள் பயனடைய வாய்ப்புண்டு. 

ஸ்டார்ட் அப் நிறுவனங்களுக்கு, தொடங்கிய ஐந்து வருடங்களில் மூன்று வருடங்களுக்கு வரி விலக்கு உண்டு என்றிருந்தது. இந்த பட்ஜெட்டில் ஐந்து வருடங்கள் என்பதை ஏழு வருடங்கள் என்று மாற்றி இருக்கிறார்கள். இதை பத்து வருடங்களாக மாற்றுவார்கள் என்ற எதிர்பார்ப்பு இருந்தது. ஏழு வருடங்கள் என்று மாற்றி இருப்பது ஓரளவுக்கு நன்மை செய்யும்.’’

- ஞா.சக்திவேல் முருகன்