Published:Updated:

‘‘எந்த வளர்ச்சிக்கும் உதவாத பட்ஜெட்!’’ - முன்னாள் நிதி அமைச்சர் ப.சிதம்பரம்

‘‘எந்த வளர்ச்சிக்கும்  உதவாத பட்ஜெட்!’’ - முன்னாள் நிதி அமைச்சர் ப.சிதம்பரம்
பிரீமியம் ஸ்டோரி
‘‘எந்த வளர்ச்சிக்கும் உதவாத பட்ஜெட்!’’ - முன்னாள் நிதி அமைச்சர் ப.சிதம்பரம்

ஜெ.சரவணன்

‘‘எந்த வளர்ச்சிக்கும் உதவாத பட்ஜெட்!’’ - முன்னாள் நிதி அமைச்சர் ப.சிதம்பரம்

ஜெ.சரவணன்

Published:Updated:
‘‘எந்த வளர்ச்சிக்கும்  உதவாத பட்ஜெட்!’’ - முன்னாள் நிதி அமைச்சர் ப.சிதம்பரம்
பிரீமியம் ஸ்டோரி
‘‘எந்த வளர்ச்சிக்கும் உதவாத பட்ஜெட்!’’ - முன்னாள் நிதி அமைச்சர் ப.சிதம்பரம்
‘‘எந்த வளர்ச்சிக்கும்  உதவாத பட்ஜெட்!’’ - முன்னாள் நிதி அமைச்சர் ப.சிதம்பரம்

வ்வோர் ஆண்டும் மத்திய அரசின் பட்ஜெட்  தாக்கல் செய்யப்படும்போது பலரும் பலவிதமாக விமர்சிப்பார்கள். அவர்களில் ஒருவரது விமர்சனத்தை மட்டும் அகில இந்தியாவே உன்னிப்பாகக் கவனிக்கும். அவர்தான் முன்னாள் நிதி அமைச்சர்    ப.சிதம்பரம்.

சென்னையில் உள்ள லயோலா இன்ஸ்டிடியூட் ஆஃப் பிசினஸ் அட்மினிஸ்ட்ரேஷன் (LIBA) சார்பில் நடந்த பட்ஜெட் விமர்சனக் கூட்டத்தில், சமீபத்தில் தாக்கல் செய்யப்பட்ட மத்திய பட்ஜெட் குறித்துப் பேசினார் ப.சிதம்பரம். அவர் பேசிய உரையின் சுருக்கம் இனி...

“பாஜக தலைமையிலான மத்திய அரசின் மூன்றாண்டு ஆட்சியில் தாக்கல் செய்யும் நான்காவது பட்ஜெட் இது. இந்த பட்ஜெட்டில் எதிர்பார்க்கப்பட்ட பெரும்பாலான விஷயங்கள் புறக்கணிக்கப்பட்டு இருக்கின்றன. மேலும், இந்தியப் பொருளாதார வளர்ச்சிக்கும் மக்களின் நலனுக்கும் வழிவகுக்கும் வகையிலான முடிவுகள் எதுவும் எடுக்கப்படவில்லை.

 30 கோடி பேர் பாதிப்பு

கடந்த நவம்பரில் எடுக்கப்பட்ட பண மதிப்பு நீக்க நடவடிக்கை, முற்றிலும் முட்டாள்தனமான ஒன்று. இதில் பாதிக்கப்பட்டவர்கள் கிட்டத்தட்ட 30 கோடிக்கும் மேல். அத்தனை பேரும் தினசரி சம்பாத்தியத்தைக் கொண்டு வாழ்க்கை நடத்துபவர்கள். தற்போது அவர்கள் மொத்த வாழ்வாதாரத்தையும் இழந்து நிற்கிறார்கள். அவர்களுடைய இழப்புகளுக்கு ஈடாக, அவர்களின் இயல்புநிலையை மீண்டும் கொண்டு வருவதற்கான திட்டங்களோ, அறிவிப்புகளோ இந்த பட்ஜெட்டில் இடம்பெறாதது முற்றிலும் ஏமாற்றம் அளிக்கிறது. அரசின் இந்த நடவடிக்கையினால் உருவாகியுள்ள பாதிப்புகள் 2018-19-ம் நிதி ஆண்டு வரை தொடரும்.

 செய்யவேண்டியதைச் செய்யாமல்...

நாட்டின் பொருளாதார வளர்ச்சியை ஊக்குவிக்க மக்களின் வருமானம், தேவை ஆகிய இரண்டையும் வளர்க்கும் வகையிலான நடவடிக்கைகள்தான் எடுக்கப்பட வேண்டும். மக்களின் வருமானம் அதிகரித்தால்தான், அவர்கள் முதலீடு செய்யவும், செலவு செய்யவும் முன்வருவார்கள். ஆனால், இந்த பட்ஜெட்டில் எடுக்கப்பட்டிருக்கும் வரிக்குறைப்பு நடவடிக்கையால் அப்படி எதுவும் நடக்கப் போவதில்லை. ஏனெனில், வரிக் குறைப்பில் எதைச் செய்யக்கூடாதோ, அதைச் செய்திருக்கிறார்; எதைச் செய்ய வேண்டுமோ, அதைச் செய்யாமல் விட்டிருக்கிறார் நிதி அமைச்சர். 

‘‘எந்த வளர்ச்சிக்கும்  உதவாத பட்ஜெட்!’’ - முன்னாள் நிதி அமைச்சர் ப.சிதம்பரம்

ஒட்டுமொத்த விகடனுக்கும் ஒரே ஷார்ட்கட்!

ரூ.2.5 லட்சத்திலிருந்து ரூ.5 லட்சம் வரையிலான வருமானத்துக்கான வரி 5 சதவிகிதம் குறைக்கப் பட்டுள்ளது. இதில் ரூ.2.5 லட்சம் முதல் ரூ. 3 லட்சம் வரை வருமானம் பார்ப்பவர்கள் 1.98 கோடி பேர்.  ரூ.3 லட்சம் முதல் ரூ. 5 லட்சம் வரை வருமானம் பார்ப்பவர்களின் எண்ணிக்கை இதைவிடக் குறைவு. இந்த 5 சதவிகித வரிக் குறைப்பினால்    ரூ. 2.5 லட்சம் முதல் ரூ. 3 லட்சம் வரை வருமானம்  உள்ள  ஒருவருக்கு ஆண்டுக்கு ரூ.5,000 மிச்சமாகும். இந்த ரூ.5,000 சேமிப்பு மக்களின் வாங்கும் திறனை அதிகரிக்கும் என்று சொல்வது அபத்தமானது. மாறாக, மறைமுக வரிகளான கலால் வரி, சேவை வரி மற்றும் இறக்குமதி வரி போன்றவற்றைக் குறைத்திருந்தால், பொருளின் விலையைக் குறைத்திருக்க முடியும். பொருளின் விலை குறைந்தால், அதிக அளவிலான மக்களால் பொருள்களை வாங்க முடியும். தேவை அதிகரித்திருக்கும். அதனால் கணிசமாக பொருளாதாரமும் வளர்ந்திருக்கும்.

மேலும், நிறுவனங்களுக்கு வழங்கப்பட்டிருக்கும் கார்ப்பரேட் வரிச் சலுகையும் பெரிய வித்தியாசத்தைக் கொண்டு வராது. இந்த வரிச் சலுகையினால் மிச்சமாகும் பணத்தையும், கடனாக வாங்கும் பணத்தையும் வைத்து அவர்கள் என்ன செய்ய முடியும்? சந்தையில் தேவையை அதிகரிக்காமல் முதலீடு செய்ய முடியுமா?

  விவசாயிகளும் இளைஞர்களும் ஏமாற்றப்பட்டிருக்கிறார்கள்

மோடி பதவி ஏற்றபோது இரண்டு கோடி வேலைவாய்ப்பை ஏற்படுத்துவோம் என்றார். ஆனால், 2015-2016-ம் ஆண்டில் வெறும் 1.5 லட்சம் வேலை வாய்ப்பையும் 2016-2017-ம் ஆண்டில் 77 ஆயிரம் வேலைவாய்ப்பையும் மட்டுமே உருவாக்கினார். அதிலும் 50 ஆயிரம், அரசு வேலைதான். இந்த பட்ஜெட்டிலும் வேலைவாய்ப்பை ஊக்குவிப்பதற்கான எந்தத் திட்டமும் இல்லை.
 
அதேபோல், விவசாயிகள் தற்கொலை செய்துகொள்ளும் அவலம் தொடரும் நிலையில், அவர்களுக்காகவும் எந்தவொரு முக்கியமான திட்டமும் பட்ஜெட்டில் இல்லை. இதுவரை மகாராஷ்ட்ராவில்தான் வறட்சியால் விவசாயிகள் அதிக அளவில் தற்கொலை செய்து வந்தார்கள். முதன் முறையாக தமிழகத்தில் இரண்டு மாதங்களில் 200-க்கும் மேற்பட்ட விவசாயிகள் தற்கொலை, செய்து கொண்டிருக்கிறார்கள். தமிழகத்தில் மட்டுமல்ல, நாடு முழுவதுமே விவசாயிகளின் நிலை மோசமாக உள்ளது.

ஆனால், இந்த பட்ஜெட்டில் விவசாயம் மற்றும் விவசாயம் சார்ந்த துறைகளின் வளர்ச்சிக்காக, கடந்த ஆண்டைக் காட்டிலும் 24% கூடுதலாக நிதி ஒதுக்கப்பட்டிருந்தாலும் அது மிகவும் மேம்போக்காகவே உள்ளது. 37 பக்க பட்ஜெட் அறிக்கையில் எந்த இடத்திலும் ‘குறைந்த பட்ச ஆதார விலை’ என்ற வார்த்தை இல்லை. விவசாயி களை முற்றிலும் ஏமாற்றிவிட்டது இந்த பட்ஜெட்.

 தாக்கம் தொடரும்

நம் நாட்டின் பொருளாதாரத்தை மேம்படுத்த வேண்டுமென்றால், அரசு முதலீடு, தனியார் முதலீடு, ஏற்றுமதி, தனிநபர் நுகர்வு ஆகிய நான்கும் அதிகரிக்க வேண்டும். இந்த அடிப்படையை வைத்துதான் மத்திய அரசின் திட்டங்கள் இருக்கவேண்டும். ஆனால், 2016-17-ம் நிதி ஆண்டில் அரசு முதலீடு செய்வதற்குப் பதிலாக முதலீடுகளை விற்றதுதான் அதிகம். அப்படித் திரட்டிய நிதியை மத்திய அரசாங்கம் என்ன செய்தது என்பது கேள்விக்குறியாக இருக்கிறது. இந்த நிலையில், 2017-18-ம் ஆண்டிலும் பங்குகளை விற்று நிதி திரட்ட இருக்கிறது. மேலும், தனியார் முதலீட்டை அதிகரிப்பதற்கான, சூழலையும் அரசு ஏற்படுத்தத் தவறிவிட்டது. ஏற்றுமதியை ஊக்குவிப்பதற்கான அறிவிப்புகளும் பட்ஜெட்டில் இல்லை. மேலும், ஐஎம்எஃப், உலக வங்கி உள்ளிட்ட பெரும்பாலான அமைப்புகள், இந்திய ஜிடிபி 0.5 சதவிகிதத்திலிருந்து 1.5 சதவிகிதம் வரை குறைய வாய்ப்பிருப்பதாகச் சொல்கின்றன. ஆனால், 2017-18-ல் இந்தியப் பொருளாதார வளர்ச்சி சிறப்பாக இருக்கும் என்கிறார் நிதி அமைச்சர் அருண் ஜெட்லி.

பண மதிப்பு நீக்க நடவடிக்கைக்குப் பிறகு இந்தியப் பொருளாதாரம் நிலைத்தன்மை யற்றதாகத்தான்  இருக்கிறது. இதன் தாக்கம் மேலும் இரண்டு ஆண்டுகளுக்குத் தொடர வாய்ப்புள்ளது என்பதே   பெரும்பாலான பொருளாதார நிபுணர்களின் கருத்து. எந்த வளர்ச்சிக்கும் உதவாத இந்த பட்ஜெட் இது” என்றார்.

பட்ஜெட் பற்றிய தன்னுடைய உரை முடிந்தவுடன், பார்வையாளர்கள் கேட்ட சில கேள்விகளுக்கும் பதில் அளித்தார் முன்னாள் நிதி அமைச்சர்!