Published:Updated:

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

ஒட்டுமொத்த விகடனுக்கும் ஒரே ஷார்ட்கட்

Use App
நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!
நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

நிவேதிதா லூயிஸ் - படங்கள்: லெய்னா

பிரீமியம் ஸ்டோரி

`பயணம் - காதலையும் சக்தியையும் உன் வாழ்க்கைக்குத் திருப்பித் தரவல்லது!'

- ரூமி

ந்தத் திட்டமிடலும் இல்லாமல் திடீர் என கைகளில் கேமராவுடன் கிளம்பிச் செல்வது ஒரு புது அனுபவம்தான். வடசென்னையின் சில நீராதாரங்கள், சென்னையின் சுவர், சோழவரம் இரண்டாம் உலகப்போர் ரன்வே, திருக்கள்ளில் (திருக்கண்டலம்) - தேவாரப் பாடல் பெற்ற தலம் மற்றும் பழவேற்காடு என இந்த முறை கொஞ்சம் பெரிய பயணமாகவே ஏற்பாடு செய்திருந்தார் வரலாற்று ஆசிரியர் வெங்கடேஷ்.

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

பிரெஞ்சுப் படைகளிடமிருந்து அன்றைய மதராஸ் நகரத்தைக் காப்பாற்ற வரையறுத்த எல்லைதான் இன்று பாரி பில்டிங் முன் கம்பீரமாக நிற்கும் தூண். ஜனவரி 1, 1773-ல் நிறுவப்பட்ட அந்தச் சதுரத் தூபி (ஒபெலிஸ்க்) ஜார்ஜ் டவுனுக்கும் அன்றைய நியூ பிளாக் டவுனுக்கும் இடையே நகரைக் காத்து நின்ற தூண். அவசரமாக ஓடிவந்த நண்பர் வேலுதரன், ``எம்டனைப் பார்க்கலாம் வாங்க'' என்று இழுக்க, ஹைகோர்ட் வாசலில் சென்று நின்றோம். 1914-ம் ஆண்டு முதலாம் உலகப்போரின்போது எம்டன் போர்க்கப்பல் மதராஸ் மீது தாக்குதல் நடத்தியது. அப்போது தகர்ந்த ஹைகோர்ட்டின் மதில் சுவர் பகுதியில், அதன் நினைவாக நிறுவப்பட்ட ஒரு கல்வெட்டையும் பார்த்தாயிற்று!

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

அடுத்துச் சென்றது சென்னையின் வடக்குச் சுவரை நோக்கி. சீனப் பெருஞ்சுவர் போல பெருஞ்சுவர் இல்லையெனினும், ஹைதர் அலி மற்றும் திப்புவின் படைகளிடம் இருந்து மதராஸைக் காப்பாற்றக் கட்டப்பட்ட அரண் - ஆறு கிலோமீட்டர் நீளம் கொண்டிருந்த மதராஸ் சுவர்! இன்று சுமார் அறுபது அடி நீளமும், பன்னிரண்டு அடி அகலமுமாக சுருங்கிவிட்டது. சேப்பாக்கம் அரண்மனையை வடிவமைத்த பால் பென்ஃபீல்டால், 1772-ல் கட்டி முடிக்கப்பட்ட இந்தச் சுவர், அன்று 17 கோட்டை அரண் முகப்புகளுடனும், வாயில்களுடனும் பிரமாண்டமாக இருந்தது. பின்னர், 1850-களில், நகர விரிவாக்கத்துக்கென தகர்க்கப்பட்டது. அதன் சிறுபகுதி மட்டும் இன்று ஒரு வரலாற்றுச் சின்னமாக, மாடிப் பூங்காவாக ராயபுரம் இப்ராஹிம் தெருவில் அமைதியாக நிற்கிறது, நூற்றாண்டுகளைத் தாண்டி!

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

அடுத்த அரைமணி நேரப் பயணத்துக்குப்பின் கால்கள் இளைப்பாறியது புழல் நீர்த்தேக்கத்தில். 1876-ல் ஆங்கிலேயரால் சென்னை நகரத்துக்கு நீர் கொண்டுவர வடிவமைக்கப்பட்டு கட்டப்பட்ட நீர்த்தேக்கம் - புழல். கொர்ட்டலையார் (கொசஸ்தலையாறு) ஆற்றில் இருந்து தாமரைப்பாக்கம், சோழவரம் ஏரி மூலமாக கொண்டுவரப்பட்ட தண்ணீர், ரெட் ஹில்ஸில் உள்ள வால்வு ஹவுஸ் வழியாக கீழ்ப்பாக்கம் வரை கொண்டுவரப்பட்டது. நவீன கருவிகள் எதுவுமின்றி, 140 ஆண்டுகளுக்கு முன்னரே நீர் ஆதாரத்தைச் சரியாக உபயோகிக்கத் தெரிந்தவர்கள் மேல் மரியாதையும், அதை இன்று காக்கத் தவறிய நம் மேல் கோபமும் வரத்தான் செய்கிறது. சென்னை பெறும் கிருஷ்ணா நதிநீர், புழல் தேக்கத்தில்தான் சேமிக்கப்படுகிறது. 

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

அடுத்த நிறுத்தம் சோழவரத்தில் உள்ள இரண்டாம் உலகப்போரின் போது உபயோகப்படுத்தப்பட்ட விமான ஓடுதளம் (ரன்வே). இப்போது ராணுவக் கட்டுப்பாட்டில் இருப்ப தால், அதை நெருங்கக்கூட முடிய வில்லை. துப்பாக்கி ஏந்திய ராணுவ வீரர்களைக் கண்டு நாங்கள் கொஞ்சமும்(!) அஞ்சவில்லை என்பதைப் பதிவுசெய்கிறேன்!

தாமரைப்பாக்கம் சிவன் கோயில் அடுத்த நிறுத்தம். லிங்க வடிவில் உயர்ந்து நிற்கும் கோயிலின் சிறப்பு... அதன் ஒலிநுட்பம் (அக்கவுஸ்டிக்ஸ்). `ஓம்' என்கிற நாதம் மெலிதாக எழுந்தாலும், பெரும் அதிர்வைத் தரும் அதன் லிங்க வடிவமைப்பைக் கண்டும் கேட்டும் மெய்சிலிர்த்துத்தான் போனோம். 

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

அடுத்துச் சென்றது தாமரைப் பாக்கம் தடுப்பணை. 1868-ல் கட்டப்பட்ட இந்த அணை, கொசஸ் தலையாற்றின் மீது சிவப்பு வண்ண லேட்டரைட் கற்கள் கொண்டு வடிவமைக்கப்பட்டிருக்கிறது. தானியங்கி மதகுகளுடன் பிரமாண் டமாக நிற்கும் அணையில் ஒரு சொட்டு தண்ணீர் இல்லை. அணைக்கு அருகே, 1915-ல் கட்டப் பட்ட பொதுப்பணித்துறை ஆய்வு மாளிகை ஒன்று இடிந்து தகர்ந்து காணப்படுகிறது. சிறிது செப்பனிட்டால் தாராளமாக உபயோகிக்கக்கூடிய கட்டடமே அது.

திருக்கள்ளில் சிவானந்தேஸ்வரர் (திருக்கள்ளீஸ்வரர்), ஆனந்த வல்லியம்மை கோயில் - திருஞான சம்பந்தரின் தேவாரப் பாடல் பெற்ற தலம். அழகிய சிறுகுளமும் (நந்தி தீர்த்தம்), புளிய மரங்களும் அடர்ந்த பகுதியில் அமைந்திருக்கிறது. சுவாமி தரிசனத்துக்கென கர்ப்பக்கிரகத்தில் எட்டிப் பார்த்தால், பஞ்சகோண உத்திரத்தில் கல்வெட்டுகள். அவற்றைப் படிக்க முடியாமல் வெள்ளைப் பூச்சு மூடியிருக்கிறது. வெளியே வந்தால், கோயில் சுவர் முழுக்க கல்வெட்டுகள். நீல நிற பெயின்ட்டுக்குள் ஒளிந்திருந்த சக்கரவர்த்தி விக்கிரம சோழனின் பெயரைப் படித்து அறிவதற்குள் தலைசுற்றிவிட்டது. பாண்டிய மற்றும் விஜயநகர கல்வெட்டுகளும் இங்குள்ளன. பிருகு முனிவர் வணங்கும் சக்தி - தக்ஷ்ணாமூர்த்தி இந்தக் கோயிலின் சிறப்பு. அப்பர், சுந்தரர், மாணிக்கவாசகர், சேக்கிழார், சம்பந்தர் இவர்களுடன் சூரியனும் ஒரே சந்நிதியில் வீற்றிருக்கிறார். `முகை மேவும் முதிர்சடையான் கள்ளில் ஏத்தப் புகழோடு பேரின்பம் புகுதும் அன்றே' என்று சம்பந்தர் பாடியிருக்கும் இந்தத் தலத்தில் வழிபட்டால், புகழும் பேரின்பமும் வந்து சேரும் என்பது நம்பிக்கை.

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

அடுத்த இலக்கு... பழவேற்காடு. `பறவைகள் அதிகம் உண்டு; படகு சவாரி செய்யலாம்' என்பது தவிர வேறு விவரம் அறிய வில்லை. திடீர் ஞானோதயம் வந்த ஓர்  இரவில் உட்கார்ந்து பழவேற்காடு குறித்து இன்டர்நெட்டில் ஆராய்ந்தால் - மயக்கம் வரும் அளவுக்குத் தகவல்கள். பழைய டச்சுக் கோட்டை, ஜெல்டிரியா கோட்டை, டச்சுக் கல்லறைகள், சின்ன மசூதியின் சூரிய ஒளி நிழற்கடிகாரம் (சன்-டயல்), 17-வது நூற்றாண்டு அந்தோணியார் கோயில், ஆதிநாராயணப் பெருமாள் கோயில், சமயேஸ்வரர் கோயில் என பார்க்க வேண்டிய இடங்களின் பட்டியல்  சூப்பர் மார்க்கெட் பில் போல நீண்டுகொண்டே போனது. 

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

பழவேற்காட்டில் முதலில் கால் வைத்த இடம் டச்சுக் கல்லறை. 1609-ல் போர்த்துகீசி யரைத் தோற்கடித்தப் பின்னரே டச்சு நாட்டினர் பாளையக்காடு துறைமுகத்தில் குடியேறினர். பழையகட்டா, பாளையகாட் என்பது பழவேற்காட்டுக்கு டச்சு நாட்டினர் கொடுத்தப் பெயர்கள். இந்தப் பெயரில்தான் புகழ்பெற்ற பாளையகாட் லுங்கிகள் இங்கே நெய்யப்பட்டன. அவற்றில் இருந்தே `மெட்ராஸ் செக்'குகள் என்ற உலகப் பிரசித்தி பெற்ற கட்டங்கள் (லுங்கியில்) தோன்றின. 

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

1646 முதல் 1777 வரை இங்குள்ள 76  கல்லறைகளில் டச்சுக்காரர்கள் அடக்கம் செய்யப்பட்டிருக்கிறார்கள். பிறந்த இடம், இறந்த இடம் குறிப்பிடப்பட்ட இவற்றில் ராட்டர்டேம், மசூலிப்பட்டினம், நாகப் பட்டினம் எனப் பல தொன்மையான நகரங்கள் இடம்பெறுகின்றன. பூக்கள், தேவதைகள், குழந்தைகள், கோட்டை மாதிரிகள் என விதம்விதமான படங்கள் கல்லறைகளில் செதுக்கப்பட்டிருக்கின்றன. இரு பெரிய சதுர ஸ்தூபிகளும் உள்ளன. ஒரு ரகசிய சுரங்கம், எதிரில் இருக்கும் இடிந்த கோட்டைக்குள் செல்வதாகவும் சொல்கிறார்கள்.

இடிந்த கோட்டை இருந்த இடத்தில், பெயர்ந்து கிடக்கும் ஒரு சிறிய சுவர் தவிர எதுவும் இல்லை. 1515-ல் கட்டப்பட்ட மாதா தேவாலயம் தேடிச் சென்றால், புனரமைப்பு என்ற பெயரில், பெரிய கான்கிரீட் காடு ஒன்றை சமீபத்தில் நிறுவி, `இதுவே அது' என்கிறார்கள். நல்லவேளையாக, 17-வது நூற்றாண்டு அந்தோணியார் தேவாலயம் இவர்களிடம் இருந்து தப்பிவிட்டது. ஓடுகள் வேய்ந்த கூரையும், அழகிய மர ஜன்னல்களுமாகக் கவர்கிறது. 

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

கொசஸ்தலையாறு கடலில் கலக்கும் இடம் ரம்மியமாகக் காட்சி தருகிறது. வழி நெடுகிலும் விதம்விதமான பறவைகள்... கடற் காகம், நீர்க்காக்கை, நாரை, அரிவாள் மூக்கன் (ஐபிஸ்) என கடற்பறவைகளின் அணிவகுப்பு மனதை மயக்குகிறது. அலைகளற்ற கடற்காயல், குளிர்க்காற்று, மணல் திட்டுகள் என வித்தியாசமான அனுபவம். ஒரு மணல் திட்டில் இறங்கியதும் அனைவருக்குள்ளும் குழந்தைகள் விழித்துக்கொண்டார்கள். ஓடினார்கள், குதித்தார்கள், மணலில் படங்கள் வரைந்தார்கள். கடல் பயணத்திலேயே லைட் ஹவுஸையும் பார்த்தாயிற்று. 

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

அடுத்து சென்றது சின்ன மசூதி... அல்-மஸ்ஜிதுல் முஷர்ரஃப். 1708-ல் கட்டப்பட்ட இந்த மசூதி, பழவேற்காட்டின் தொன்மையான லெப்பை இஸ்லாமியர்களின் அடையாளம். 6-ம் நூற்றாண்டில் யூசுஃப் பின் ஹஜாஜின் ஆட்சியின்போது மதினாவில் இருந்து தப்பி பழவேற்காடு வந்த அரேபியர்கள் இவர்களது மூதாதையர். 1915-ம் ஆண்டு நிறுவப்பட்ட சூரிய நிழற்கடிகாரம் இன்றும் அழகாக இந்த மசூதியில் இயங்குகிறது. மைக்குகள் இந்தியாவுக்குள் வராத காலங்களில் `அதான் ஓத' சிறுகோபுரம் ஒன்றும் கட்டியிருக்கிறார்கள்.

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

அத்தனையும் ரசித்துவிட்டு சென்ற அடுத்த இடம்தான் இந்தப் பயணத்தில் மிகவும் வேதனைப்படுத்திய இடம். ஆதிநாராயணப் பெருமாள் கோயில். பதினொன்றாம் நூற்றாண்டில் கட்டப்பட்ட இந்த அழகிய கோயில் இப்போது பொலிவிழந்து, மரங்களும் செடிகளும் கொடிகளும் தின்றுகொண்டிருக்கும் பரிதாப நிலையில் இருக்கிறது. இந்து அறநிலையத் துறை, ரீச் என்ற அமைப்பு, பொதுமக்கள், ஒரு வழக்கு என ஆதிநாராயணன் சிக்குண்டு கிடக்கிறார். மரங்கள் பிணைந்த மண்டபங்கள் அங்கோர்வாட் கோயிலை நினைவுறுத்துகின்றன. சிற்ப வேலைப்பாடுகள் - கடற்கன்னி, கருடர், கோதண்ட ராமர் என கண்ணைப் பறிக்கின்றன. மண்டபத்தின் உட்கூரையில் இருப்பது, ராமர் பட்டாபிஷேகம் முதல், லவ - குசா கதை வரையிலான ராமாயணக் கதைகள். அத்தனையும் அழகிய காட்சிகளாக செதுக்கப்பட்டிருக்கின்றன. மாயமானில் இருந்து, ராவணனின் பத்து தலைகள் வரை, அத்தனையும் கனக்கச்சிதம். ஆனால், கோயில் இன்னும் எத்தனை நாள்கள் மரங்களைத் தாங்கி நிற்கும் என்பது தெரியவில்லை. பூஜைகள் எதுவும் நடப்பதாகவும் தெரியவில்லை. கோயில் வாசல் தோண்டப்பட்டு, கதவு எரிக்கப்பட்டு… வார்த்தைகளில் வர்ணிக்க முடியவில்லை. தொல்லியல் துறை கையில் எடுத்தாலன்றி, இந்தக் கோயில் இன்னும் சில மாதங்கள் தாண்டுவதே கடினம்.

நம் ஊர்... நம் கதைகள் - இடிந்த கோட்டையும் எதிர்வரும் பறவைகளும்!

கனத்த மனதுடனேதான் சமயேஸ்வரர் கோயிலுக்கும் சென்றோம். அங்கும் இதே நிலை... மரங்களுக்கு நடுவில் உயிர்ப்புடன் இருக்க முயற்சிக்கும் சிவன். ஆனால், இங்கு பூஜைகள் நடக்கின்றன. வெளிமண்டபத்தின் உட்கூரையில் விதவிதமான கதைகள்... மனுநீதி சோழனும் பசுவும், கண்ணப்ப நாயனார் கதை என அத்தனையும் சிற்பங்களாக..! விட்டத்தில் தலைகீழாகத் தொங்கும் குரங்கு, பாம்பு நிலவை விழுங்கும் கிரகணம் என காட்சிகள். கோயிலின் வெளியே சுடுசெங்கலில் கட்டப்பட்ட அழகிய கிணறு... படிக்கட்டு தனியாக தரைக்கு அடியில் சென்று சேர்வதுபோல… அத்தனையும் அழகு!

திரும்பும் நேரம் மனதில் தோன்றியது ஒன்று மட்டுமே... காலம் யாரையும் எதையும் விட்டு வைப்பதில்லை. இருக்கும் கொஞ்சம் வரலாறு, பண்பாடு ஆகியவற்றின் மீதான அக்கறை இல்லையெனில், நாம் இழக்கப்போவது நம் வேர்களையே..!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு