Published:Updated:

ஆண்களுக்கும் உண்டு அழகு சிகிச்சைகள்!

ஆண்களுக்கும் உண்டு அழகு சிகிச்சைகள்!
பிரீமியம் ஸ்டோரி
News
ஆண்களுக்கும் உண்டு அழகு சிகிச்சைகள்!

ஆண்களுக்கும் உண்டு அழகு சிகிச்சைகள்!

ழைப்பிதழ், மண்டபம், புடவை, நகைகள் எனத் தொடரும் திருமணத்துக்கான பட்ஜெட்டில் பியூட்டி பார்லருக்கும் ஒரு தொகையை எடுத்துவைப்பது இன்று அத்தியாவசியம்.  மேக்கப் என்பதைத்தாண்டி, திருமணத்துக்கு முன்பான சருமப் பராமரிப்புகள், மேக்கப் என அழகு சார்ந்த பல விஷயங்கள் வந்துவிட்டன. ஆனால், அவை மணாமகளுக்கானவை என்ற நிலைமாறி, இன்று மணமகனுக்கும் அவை அவசியம் தேவைப்படுகின்றன. மணமகனுக்கான சருமப் பராமரிப்புகள் பற்றி விவரிக்கிறார், சென்னை விகாஷினி பியூட்டி சலூனின் உரிமையாளர் லஷ்மி...

ஆண்களுக்கும் உண்டு அழகு சிகிச்சைகள்!

“கல்யாணப் பொண்ணோட சருமத்துக்கு எந்த அளவுக்கு பியூட்டி சர்வீஸ் இருக்கோ, அதே அளவுக்கு மணமகனுக்கும் ஃபேஷியல், ஸ்பான்னு நிறைய வந்துடுச்சு. ஹேர் ஸ்பாவுல ஆரம்பிச்சு பெடிக்யூர் வரைக்கும் இந்த ஜெனரேஷன் இளைஞர் களும் ரெகுலர் சர்வீஸ்ல ஆர்வம்காட்ட ஆரம்பிச்சுட்டாங்க. கல்யாணத்துக்கு ரெண்டு மாதம் முன்னாடி இருந்தே ஸ்கின், ஹேர் கேர்னு எல்லாத்துலயும் ஆண்களும் கவனம் செலுத்தறாங்க” என்கிற லஷ்மி, மணமகனுக்கான பியூட்டி சலூன் சர்வீஸ்கள் பற்றி விவரிக்கிறார்...

1. 24 கேரட் கோல்டு ஃபேஷியல்

முகம் பளபளப்பாக இருப்பதற்கான பெஸ்ட் ஃபேஷியல் இது.

முதலில் சிறிது க்ளென்சர் எடுத்து முகத்தில் தடவி இரண்டு நிமிடங்களுக்கு மசாஜ் செய்து துடைத்துவிடுவார்கள். இது சருமத் துவாரங்களில் உள்ள அழுக்கை வெளியேறிவிடும்.

அடுத்து ஸ்கிரப்பிங் க்ரீம் எடுத்து முகத்தில் தடவி ஐந்து நிமிடங்களுக்கு மசாஜ் கொடுப்பார்கள். இது சருமத்தின் இறந்த செல்களை நீக்க உதவும்.

ஆண்களுக்கும் உண்டு அழகு சிகிச்சைகள்!

ஸ்க்ரப் செய்வதால் திறந்திருக்கும் சருமத் துவாரங்களை மூடுவதற்கு ஸ்டீம் செய்வார்கள்.

பிறகு, தேவையான அளவு கோல்டு ஃபேஷியல் மசாஜ் க்ரீம் எடுத்து முகத்தில் தடவி, கால்வானிக் மெஷின் மூலமாக மசாஜ் கொடுப்பார்கள்.

அதையடுத்து, 24 கேரட் கோல்டு பேக் எடுத்து, முகத்தில் தடவிப் பத்து நிமிடங்களுக்குப் பிறகு கழுவி விடுவார்கள்.

இந்த ஃபேஷியலைத் திருமணத்துக்கு மூன்று மாதங்களுக்கு முன்னர் இருந்தே, மாதம் ஒருமுறை எனத் தொடர்ந்து செய்தால், மண நாளில் மாப்பிள்ளை தங்கமாக ஜொலிக்கலாம்!

2. பாடி ஸ்பா

உடல் பளபளப்புக்கும் அசதி நீங்கி, புத்துணர்ச்சி பெறவும் இது உதவுகிறது.

உடல் முழுவதும் க்ளென்சர் தடவி ஐந்து நிமிடங்களுக்கு மசாஜ் கொடுத்து துடைத்துவிடுவர். இது சருமத்தில் உள்ள அழுக்கை நீக்கிவிடும்.

அடுத்து, உடல் முழுவதும் ஸ்கிரப்பிங் க்ரீம் தடவி 15 நிமிடங்களுக்கு மசாஜ் கொடுப்பர். இதனால் இறந்த செல்கள் நீங்கி சருமம் மிருதுவாகும்.

ஆண்களுக்கும் உண்டு அழகு சிகிச்சைகள்!

அதைத் தொடர்ந்து, திறந்திருக்கும் சருமத் துவாரங்களை மூட, ஸ்டீம் செய்த மிருதுவான டவலால் உடல் முழுவதும் ஒத்தி எடுப்பார்கள்.

பின்னர், பாதாம் அல்லது நல்லெண்ணெய் எடுத்து, அதில் ரோஸ் ஆயில், லேவெண்டர் ஆயில், யலாங் ஆயில் மூன்றையும் தலா மூன்று சொட்டுகள் கலந்து, ஒரு மணி நேரம் உடலுக்கு மசாஜ் செய்வார்கள்.

உடல் முழுவதற்கும் சீரான ரத்த ஓட்டம் பாயச்செய்து, மணமகனின் உடலையும் மெருகேற்றி மனதையும் ரிலாக்ஸ் செய்கிறது இந்த பாடி ஸ்பா.

3. ஹேர் ஸ்பா

பெரிய பற்கள் கொண்ட சீப்பால், தலைமுடியைப் பாகம் பாகமாகப் பிரித்து, வகுட்டில் சீரம் மற்றும் ஹேர் க்ரீமைத் தடவி மசாஜ் கொடுப்பார்கள்.

தலையில் மட்டுமல்லாமல் தலைமுடியின் வேர் முதல் நுனிவரை ஹேர் க்ரீமைத் தடவுவார்கள்.

முப்பது நிமிடங்களுக்கு இந்த மசாஜ் கொடுப்பார்கள்.

பின்னர் ஹேர் ஸ்பாவுக்கான ஷாம்பூ பயன்படுத்தி, தலையை அலசுவார்கள்.

முடியை கூல் ஹேர் ட்ரையரில் உலர்த்துவார்கள்.

ஆண்களுக்கும் உண்டு அழகு சிகிச்சைகள்!

இதை மாதம் இருமுறை தொடர்ந்து செய்துவந்தால், திருமண நாள் நெருங்கும் படபடப்பினால் ஏற்படும் தலைவலி மற்றும் பதற்றம் குறையும். தலைமுடியும் அலை அலையாகப் பளபளக்கும்.

4. ஆர்கானிக் ஸ்பா

மெனிக்யூர்

கைகளில் க்ளென்சர் தடவி துடைத்துவிட்டு, ஸ்கிரப்பிங் க்ரீமினால் மசாஜ் கொடுத்து இறந்த செல்களை நீக்கிவிடுவார்கள்.

பிறகு மெனிக்யூர் பிரஷ்ஷினால், கைமுழுவதும் தேய்த்துச் சுத்தம் செய்வார்கள்.

அடுத்ததாக, செடிகளில் இருந்து பிரித்தெடுக்கப்பட்ட இயற்கைப் பொருள்கள் அடங்கிய ஆர்கானிக் க்ரீம் கொண்டு, முப்பது நிமிடங்களுக்கு மசாஜ் கொடுப்பார்கள்.

மசாஜ் முடிந்ததும் கைகளைத் துடைத்துவிட்டு, நகங்களுக்கு க்யூட்டிகிள் க்ரீம் கொண்டு மசாஜ் செய்வதோடு, நகங்களை வெட்டியும் விடுவர்.

ஆண்களுக்கும் உண்டு அழகு சிகிச்சைகள்!

பிறகு, கை முழுவதற்கும் ஆர்கானிக் பேக் போட்டு உலர்ந்ததும் கழுவிவிடுவர்.

இதனால் கைகள் மிருதுவாகும்.

பெடிக்யூர் 

மெனிக்யூர் போன்றே க்ளென்சிங், ஸ்கிரப்பிங் என அனைத்து விஷயங்களும் பெடிக்யூருக்கும் செய்வார்கள். மசாஜ் மட்டும் நாற்பது ஐந்து நிமிடங்களுக்குச் செய்வார்கள்.
உடலின் அனைத்து நரம்புகளும் பாதங்களில் முடிவடைவதால், பாதங்களுக்கான மசாஜ் செய்வது புத்துணர்வை அளிக்கும்.

5. மேக்கப் மற்றும் ஹேர்ஸ்டைல்

ஆண்களுக்கும் உண்டு அழகு சிகிச்சைகள்!

மணமகனுக்கான மேக்கப் பளிச்சென இல்லாமல், மிதமாக இருப்பது அவசியம். எச்.டி ஏர்பிரஷ் மேக்கப் உபயோகித்தால் மேக்கப் போட்டதே தெரியாமல் இயற்கையாக இருக்கும். ஹேர் ஸ்டைலைப் பொறுத்தவரை, மணமகனின் உடையையும்,  எந்த நிகழ்வுக்கானது என்பதையும் கருத்தில்கொள்வது அவசியம். அதே வேளையில் மணமகனின் முக வடிவத்துக்குப் பொருத்தமான ஹேர் ஸ்டைலையே தேர்வு செய்ய வேண்டும்.  தலைமுடி பளபளப்பாக இருக்க ஹேர் ஜெல் தடவலாம். விரும்பினால், பளீரென கண்ணை உறுத்துவதாக இல்லாமல் மிதமாகத் தோற்றமளிக்கும் ஹேர் கலரை உபயோகிக்கலாம்.
இனி, மணமகனுக்கும் அழகு பட்ஜெட் அவசியம்!

- சுகன்

மாடல் : சாய், படங்கள்: மீ.நிவேதன்