Published:Updated:

நீரின்றி அமையாது உடல்

நீரின்றி அமையாது உடல்

பிரீமியம் ஸ்டோரி
நீரின்றி அமையாது உடல்

ண்ணீர் - உலகின் இன்றியமையாத ஓர் இயற்கை வளம். அறிவியல் முறையில் எடுத்துச் சொன்னால் H2O. அதாவது இரண்டு ஹைட்ரஜன் அணுக்கள், ஓர் ஆக்ஸிஜன் அணு இணைந்து உருவாவதாகக் குறிப்பிடப்படுகிறது. ஆனால், அறிவியல் முறையைப் பயன்படுத்தியோ, வேறு எந்த மூலக்கூற்றையும் பயன்படுத்தியோ தண்ணீரை உற்பத்தி செய்துவிட முடியாது. அப்படி இயற்கையாகக் கிடைக்கக்கூடிய பொக்கிஷம்தான் தண்ணீர். உலகின் மொத்தப் பரப்பில் 71% தண்ணீரால் சூழப்பட்டுள்ளது. இந்த நீர்ப்பரப்பில் மொத்தம் 97.5 % உப்பு நீராகத்தான் உள்ளது. இதில் நிலத்தடி நீர்பரப்பு வெறும் 2.5%. அதிலும் நன்னீர் பரப்பு வெறும் 0.26% மட்டுமே. இந்த அளவு உள்ள நீரைத்தான் உலக மக்கள் அனைவரும் பயன்படுத்திக்கொள்ள வேண்டும். இதில் உடல் ஆரோக்கியம் தொடங்கி மீதமுள்ள அனைத்திற்குமே தண்ணீர் அவசியம். மொத்தமாக 29% நிலப்பரப்பில் வசிக்கும் மக்களுக்கு வாழ்வாதாரம் 0.26%தான் என்பதால் தண்ணீரைச் சேமிப்பதும் அளவாகப் பயன்படுத்துவதும் மிகமிக அவசியம்.

நீரின்றி அமையாது உடல்
நீரின்றி அமையாது உடல்

காலையில் குடிக்கும் தண்ணீரின் முக்கியத்துவம் இதுதான்!

நமது உடலின் செயல்பாடுகளுக்கு முக்கியமான தேவை தண்ணீர்தான். மேலும், உடலின் பெரும்பகுதி தண்ணீரால் ஆனது. மூளை மற்றும் இதயத்தில் 73 சதவிகிதமும், நுரையீரலில் 83 சதவிகிதமும், சருமத்தில் 64 சதவிகிதமும், தசைகள் மற்றும் சிறுநீரகங்களில் 79 சதவிகிதமும், எலும்புகளில் 31 சதவிகிதமும் தண்ணீர் இருக்கும்.

நீரின்றி அமையாது உடல்

தண்ணீரே முதல் உணவு!

* அதிகாலையில் வெறும் வயிற்றில் தண்ணீர் அருந்துவதால் கிடைக்கும் முதல் நன்மை குடல் சுத்தம். அதனால்தான் தண்ணீர் குடித்தவுடன் சில நிமிடங்களில் மலம் வெளியேற்றப்படும். தண்ணீர் அருந்துவதைத் தினமும் பின்பற்றினால் உடலில் உள்ள கழிவுகள் முற்றிலும் வெளியேற்றப்படும்.

* வெறும் வயிற்றில் தண்ணீர் குடிப்பதால் உடலில் உள்ள கழிவுகளும் நச்சுக்களும் வெளியேறி விரைவில் பசிக்க ஆரம்பித்துவிடும்.

* பெரும்பாலானோருக்குத் தலைவலி ஏற்பட முக்கியமான காரணம், உடலில் நீர்ச்சத்து குறைவாக இருப்பதுதான். இதனால் தினமும் காலையில் வெறும் வயிற்றில் குடிக்கும் தண்ணீர் உடலின் நீர்ச்சத்தை அதிகரிப்பதன் மூலம் தலைவலியைக் குறைக்கும்.

* காலையில் உணவு உண்ணாமல் அலுவலகத்திற்குச் செல்பவர்கள் தினமும் அதிகாலையில் வெறும் வயிற்றில் தண்ணீர் குடித்து வந்தால் அல்சரை ஓரளவு தடுக்கலாம்.

* உடலின் எடையைக் குறைக்க நினைத்தால், காலையில் வெறும் வயிற்றில் தண்ணீர் குடிக்கலாம். இதனால் உடலில் தங்கியிருக்கும் நச்சுகள் வெளியேறுவதுடன் உடலின் வளர்சிதை மாற்றமும் அதிகரிப்பதால் தேவையற்ற கொழுப்புகள் வெளியேறும். உடல் எடை குறையும்.

* குடலானது சுத்தமாக இல்லாவிடில், முகத்தில் பருக்கள் அதிகரிக்கும். சருமம் தனது பொலிவை இழக்கக்கூடும். எனவே தினமும் போதுமான அளவு தண்ணீர் குடித்தால் குடல் இயக்கம் சீராகி முகம் அழகுபெறும்.

நீரின்றி அமையாது உடல்

தண்ணீரையே மருந்தாக்கலாம்

* மருதம்பட்டையை இரவு முழுவதும் வெதுவெதுப்பான தண்ணீரில் ஊறவைத்து, காலையில் குடித்து வந்தால் இதயம் பலப்படும். மேலும் ரத்தம் உறையாமல் இருக்கும் பிரச்னையும் தடுக்கப்படும்.

* சுத்தமான சந்தனத்தை உரசி, அதை மிளகின் அளவு எடுத்து, 60 மி.லி தண்ணீரில் கரைத்துக் குடித்தால் சிறுநீர் கழிக்கும்போது ஏற்படும் பிரச்னைகளுக்கு நல்ல மருந்தாக அமையும்.

* புதினா இலையைக் கொதிக்கும் தண்ணீரில் போட்டுவைத்து, அந்தத் தண்ணீரில் வாய் கொப்பளித்தால் துர்நாற்றம் நீங்கி, வாய் சுத்தமாகும்.

* வில்வ இலையின் நீரும் துளசியின் நீரும் நோய் எதிர்ப்புச் சக்தியை அதிகரிக்கும்.

* தண்ணீரில் ஓம இலையை ஊறவைத்துக் குடித்தால் செரிமானக் கோளாறுகள் நீங்கிப் புத்துணர்ச்சி கொடுக்கும். மேலும் வயிற்றுப் பிரச்னைகளுக்கும் இது நல்ல மருந்து.

* போதைப்பொருள்களின் மேல் வெறுப்பை ஏற்படுத்தப் பெருஞ்சீரகம் சிறிதளவு எடுத்துக் கொதிக்கும் தண்ணீரில் போட்டுவைத்து அந்தத் தண்ணீரை மறுநாள் பயன்படுத்தலாம். செரிமானமும் சீராகும்.

* சீரகம் சேர்த்துக் கொதிக்கவைத்து, பின்னர் ஆறவைத்த தண்ணீரைக் குடிக்கலாம். சுவையான இந்த நீர் செரிமானத்துக்கு நல்லது.  

* வெட்டிவேரைத் தண்ணீரில் சேர்ப்பதால் தண்ணீரில் உள்ள கிருமிகள் அழிந்து நீர் சுத்தமாகும். உடலின் சூட்டையும் குறைக்கும் தன்மை வெட்டிவேருக்கு உண்டு.

நீரின்றி அமையாது உடல்

யாருக்கு, எவ்வளவு தண்ணீர்?

* குழந்தைகளுக்குத் தேவையான தண்ணீர் ஆறுமாதத்தில் தாய்ப்பால் மூலமாகவே கிடைத்துவிடும். 6 மாதத்துக்குப் பிறகு குழந்தைக்குக் கட்டாயம் தண்ணீர் கொடுப்பது அவசியம். மூன்று வயதுக்குட்பட்ட குழந்தைகளுக்குத் தண்ணீர் தாகம் அவ்வளவாக எடுக்காது; அதனால் அவர்கள் கேட்காமலேயே அம்மாக்கள் அவர்களுக்குத் தண்ணீர் கொடுப்பது அவசியம்.

* 3 முதல் 6 வயது உள்ள குழந்தைகளுக்கு அவரவர் தேவைக்கேற்ப அவ்வப்போது தண்ணீர்  கொடுக்கலாம். வளரும் குழந்தைகளின் உடலுக்குத் தண்ணீரை உறிஞ்சும் சக்தியும் அதிகம்.

* 6 முதல் 10 வயது சிறுவர்கள் தினமும் ஒன்றரை லிட்டர் தண்ணீர் குடிக்கலாம். கால்பந்து, கிரிக்கெட் போன்ற விளையாட்டுக்களில் ஈடுபடும் சிறுவர்கள் இதைப்போல் இரண்டு மடங்கு நீர் அருந்த வேண்டும்.

* அலுவலகத்தில் அமர்ந்து வேலை செய்யும் 20 முதல் 30 வயதிற்குட்பட்ட ஆள்கள் குறைந்தபட்சமாக 2 லிட்டர் தண்ணீர்  குடிக்க வேண்டும்.

* நடனக் கலைஞர்கள், விளையாட்டு வீரர்கள் உள்ளிட்டோர் பயிற்சியாளரின் வழிகாட்டுதலின்படி ஐந்து லிட்டர் தண்ணீர் குடிக்கலாம்.

 * பொதுவாக வயதாக ஆகத் தண்ணீரும் உணவும் எடுத்துக் கொள்ளும் அளவு குறையும். இவர்கள் வெயில் காலங்களில் இரண்டு லிட்டர் தண்ணீர் குடிக்க வேண்டும்.

* 70 வயதுக்குமேல் தண்ணீர் குடிக்கும் தன்மை குறைய வாய்ப்பு உண்டு. தாகம் எடுக்காவிட்டாலும் வயதானவர்கள் தண்ணீரைக் குறிப்பிட்ட இடைவெளிகளில் குடிக்க வேண்டும்.

நீரின்றி அமையாது உடல்

யார் தண்ணீர் அதிகமாகக் குடிக்கக் கூடாது?

* சிறுநீரகச் செயலிழப்பு காரணமாக டயாலிசிஸ் செய்து கொண்டவர்கள் அதிகமான தண்ணீர் குடிக்கக் கூடாது. சிறுநீரகங்கள் செயலிழந்து இருப்பதால் தண்ணீர் வெளியேறாமல் நுரையீரல் மற்றும் கால்களில் தங்கிப் பாதிப்பை ஏற்படுத்தும். இவர்கள் மருத்துவர் கூறும் அளவுக்குத் தண்ணீர் குடிக்க வேண்டும்.

* இதயச்செயலிழப்பு உள்ளவர்கள் மருத்துவரின் ஆலோசனைப்படிதான் தண்ணீர் அருந்த வேண்டும்.  

* 50 வயதுக்கு மேற்பட்ட சர்க்கரை நோயாளிகள் மாலை 6 மணிக்குமேல் அதிகளவு தண்ணீரை அருந்தாமல் இருப்பது நல்லது.

* சிறுநீரகக் கல் பாதிப்புள்ளவர்கள் தினமும் கட்டாயம் இரண்டு முதல் மூன்று லிட்டர் தண்ணீர் குடிக்க வேண்டும்.

* வெயிலில் அதிகமாக அலைந்து திரிந்து வேலை பார்ப்பவர்கள் தினமும் நான்கு முதல் ஐந்து லிட்டர் தண்ணீர் குடிப்பது அவசியம்.

தண்ணீரை எப்படிக் குடிக்கலாம்?

* தண்ணீரை வெயில் காலங்களில் ஃபிரிட்ஜிலிருந்து அப்படியே எடுத்துக் குடிக்கக் கூடாது. அதை நமது உடலின் தசை நார்கள் ஏற்றுக்கொள்ளாது. இதனால் பல்கூச்சம் ஏற்படும். தண்ணீர் மிதமான குளிர்ச்சியில் இருக்குமாறு பார்த்துக்கொள்ளலாம்.

* தண்ணீரை மண்பானையில் ஊற்றிவைத்துக் குடிக்கலாம். மண்பானை வாங்கியவுடன், அதில் தண்ணீர் ஊற்றிவைத்துக் குடிக்கக் கூடாது. அதனை ஒரு வாரம் தண்ணீர் ஊற்றிவைத்துப் பழக்கப்படுத்திய பிறகே தொடர்ந்து பயன்படுத்த வேண்டும்.

நீரின்றி அமையாது உடல்

ஆர்.ஓ வாட்டர் அவசியமா?

பொதுவாக ஆர்.ஓ ப்ளான்ட்டின் மூலம் சுத்திகரிக்கப்பட்டுத் தற்போது கிடைக்கும் தண்ணீர் நகரங்கள் முழுவதும் பிரபலமாகிவிட்டது.  ஆர்.ஓ ப்ளான்ட்டினால் தண்ணீரில் உள்ள பாக்டீரியாக்கள் அழிக்கப்படுகின்றன. சுத்திகரிப்பின்போது, அமில மற்றும் காரத்தன்மையை அகற்றுவதன் மூலம் கால்சியம், பொட்டாசியம், மக்னீசியம் போன்ற தாது உப்புகள் கிடைக்காமலே போய்விடுகின்றன. எனவே அந்த ஆர்.ஓ தண்ணீரைவிடச் சாதாரண தண்ணீரைக் கொதிக்கவைத்து ஆறவைத்துக் குடிப்பது நல்லது. மினரல் வாட்டர் எனச் சொல்லி விற்கப்படும் தண்ணீரில் மினரலே இல்லை என்பதே நிதர்சனமான உண்மை. தண்ணீரில் இயற்கையாக இருக்கும் மினரல்களை நீக்கிவிட்டுக் கொடுப்பதற்குப் பெயர் மினரல் வாட்டர் இல்லை. சில நேரங்களில் இந்தத் தண்ணீரினால் சரும நோய்கள், கால்சியம் சத்துப் பற்றாக்குறை எனப் பல பாதிப்புகளும் ஏற்படுகின்றன. ஆர்.ஓ (Reverse Osmosis) என்ற தொழில்நுட்பம் மேலை நாடுகளில் பிரபலமானது. அது அங்கு நிலவும் சீதோஷ்ண நிலைக்கும் அவர்களின் உடலுக்கும் ஏற்றுக்கொள்ளும். ஆனால் நம் நாட்டுக்கு அது தேவையில்லை.

  இதற்கு என்னதான் தீர்வு?

சாதாரணமாகத் தெருக்களில் உள்ள குழாய்களில் கிடைக்கும் நீரும் மாநகராட்சிக் குடிநீருமே போதுமானவை. அந்தத் தண்ணீரைக் காய்ச்சி ஆறவைத்துப் பயன்படுத்தினாலே போதுமானது. அந்தத்  தண்ணீரில் இருக்கும் தாது உப்புக்களும் நமக்கு முழுமையாகக் கிடைக்கும். ஆனால் இதற்கெல்லாம் மாற்றாக மினரலே இல்லாத நீர்தான் நல்லது என்ற பரப்புரை நம்மிடையே வைக்கப்பட்டுவிட்டது. சுத்திகரிக்கப்பட்ட பாட்டில்களிலும் கேன்களிலும் பளிச்சென பேக்கிங் செய்யப்பட்ட வெண்மையான தண்ணீரை ஆரோக்கியமானது என நம்பிப் பயன்படுத்துகிறோம். உலகச் சுகாதார நிறுவனத்தின் அறிக்கையின்படி, நமக்குக் கிடைக்கும் நீரை 10 முதல் 15 நிமிடங்கள்வரை கொதிக்கவைத்துப் பருகலாம். தண்ணீரை நன்றாக மூடிவைத்துப் பயன்படுத்த வேண்டும். பயன்படுத்தும் பாத்திரங்களின் சுத்தமும் முக்கியம்.

நீரின்றி அமையாது உடல்

நகரங்களில் சமாளிப்பது எப்படி?

இன்றைய காலகட்டத்தில் மினரல் வாட்டர் தவிர்க்க முடியாத ஒன்றாக மாறிவிட்டது. அதனால் இழக்கும் சத்துகளைக் காய்கறிகள், கீரைகள், பழங்கள் மற்றும் சத்தான பிற உணவுகளின் மூலம் ஈடுசெய்ய வேண்டும். சுகாதாரமற்ற மினரல் வாட்டரால் மட்டுமல்ல, சுகாதாரமற்ற சாதாரணத் தண்ணீரால் பாதிப்பு ஏற்படுவதைத் தவிர்க்கவும் தண்ணீரைக் காய்ச்சிப் பருகுவதுதான் நல்லது.

நீரின்றி அமையாது உடல்

தண்ணீர் குடிப்பதால் உடலுக்கு ஏற்படும் நன்மைகள்

* சிறுநீரகத்தின் செயல்பாடு சீராக இருக்கும்.

* செரிமானம் சீராகி மலச்சிக்கல் நீங்கும்.

* ரத்த ஓட்டத்தைச் சீராக்கும் தன்மை தண்ணீருக்கு மட்டுமே உண்டு.

* சரும அழகு மேம்படும். உடலின் தசைகள் நெகிழ்வுடன் காணப்படும்.

* உடலின் அமிலத் தன்மை கட்டுப்படும்.

கேன் வாட்டரைத் தவிர்க்க என்ன செய்யலாம்?

* நீங்கள் வாங்கும் கேன் வாட்டர், முறையான அனுமதிபெற்ற  தயாரிப்பாளர்களிடமிருந்து விற்பனைக்கு வருகிறதா என்பதை உறுதி செய்துகொள்ளுங்கள். ஏனெனில் இங்கு அனுமதி வாங்காமல் கேன் வாட்டர் சப்ளை செய்யும் நிறுவனங்களே அதிகம்.

* வாங்கும் தண்ணீரைச் சற்று வேகமாக உபயோகப்படுத்திக்கொள்ளப் பழக வேண்டும். அதிக நாள்கள் திறந்து வைத்திருந்தால் கிருமிகள் தாக்க வாய்ப்புண்டு.

* உங்களுக்கு சப்ளை செய்யப்படும் கேன்கள் சுத்தமானவையா என்பதையும் கவனமாகப் பரிசோதிக்க வேண்டும். உள்ளே பூஞ்சை, அழுக்கு இவை எல்லாம் இல்லாமல் பார்த்து உபயோகிப்பதும் அவசியம்.

* வெளியிடங்களுக்குச் செல்ல நேர்ந்தால் வீட்டிலிருந்தே சுத்தமான தண்ணீரை எடுத்துச் செல்லலாம். உணவு விடுதிகளிலும்கூடச் சூடான நீரையே கேட்டுப்பருகலாம்.

நீரின்றி அமையாது உடல்

கேன் வாட்டர் அவசியமானதுதானா?

சில நேரங்களில் ஆர்.ஓ தண்ணீரைப் பருகும்போது சற்று இனிப்பாக இருப்பதுபோலத் தோன்றலாம். இதில் இளநீர் சுவைபோல இருக்கும் ஆர்.ஓ தண்ணீரும் உண்டு. அந்தச் சுவைக்கு என்ன காரணமாக இருக்கும்? யோசித்ததுண்டா? அதில் சேர்க்கப்படுகின்ற ஒருவித ரசாயனமே காரணம். ரசாயனப் பாதிப்பே வேண்டாம் என்பவர்கள், கொதிக்கவைத்து வடிகட்டிய தண்ணீரையே பயன்படுத்தலாம். ஆர்.ஓ கேன் வாட்டர் அனாவசியமானது.

நீரின்றி அமையாது உடல்

குடிநீரை இயற்கையாகச் சுத்திகரிக்கும் முறைகள் என்னென்ன?

தேற்றான்கொட்டை: தண்ணீரைச் செயற்கையான முறையில் சுத்திகரிப்பு செய்யவேண்டியதைத்  தவிர்த்து இயற்கையான வழிகளிலும் சுத்தம் செய்யலாம். சாதாரணமாகக் குழாயில் வரும் அந்தத் தண்ணீரைக் காய்ச்சிப் பருகுவதைத் தவிர்த்து, தேற்றான்கொட்டையைப்  போட்டுத் தண்ணீரைச் சுத்தப்படுத்தலாம். தேற்றான்கொட்டை மிகச்சிறந்த கிருமி நீக்கியாகச் செயல்படும் தன்மை வாய்ந்தது. இந்தத் தேற்றான்கொட்டை பெரும்பாலான ஆர்கானிக் கடைகளில் கிடைக்கின்றது. கலங்கலான நீரையே நன்னீராக மாற்றும் தன்மை உடையது தேற்றான்கொட்டை.

மண்பானை: மண்பானையில் குடிநீரை 2 முதல் 5 மணிநேரம் வைத்திருந்தால் அதிலுள்ள நச்சுகள் ஓரளவு வெளியேறிவிடும். குளிர்ச்சியான சுத்தமான நீரும் கிடைக்கும். 

நீரின்றி அமையாது உடல்

செம்புப் பாத்திரம்: செம்புப் பாத்திரத்தில் வைத்து அருந்தும் தண்ணீர் உடலுக்கு மிகவும் ஆரோக்கியத்தைக் கொடுக்கக்கூடியது. செம்பு  என்கிற உலோகத்துக்கு நீரில் உள்ள நச்சுக்களை அழிக்கும் தன்மை உண்டு.

தினமும் உடலுக்குக் கிடைக்கிற தண்ணீரின் அளவு திரவ உணவுகள் (தண்ணீர், பால், காபி, தேநீர், சூப், மென்பானங்கள் போன்றவை) மூலம் = 1,500-1,750 மி.லி.

நீரின்றி அமையாது உடல்

திட உணவுகள் மற்றும் காய், கனிகள் மூலம் = 600–900 மி.லி.

உணவு உடலில் ஆக்ஸிகரணம் அடையும்போது கிடைப்பது = 300–350 மி.லி.

மொத்தம் = 2,400–3,000 மி.லி.

தினமும் உடலிலிருந்து திரவம் வெளியேறும் அளவு

சிறுநீர் மூலம் = 1,200-1,500 மி.லி.

வியர்வை மூலம்    = 400–500 மி.லி.

சுவாசம் மூலம்    = 700–800 மி.லி.

மலத்தின் வழியாக = 100–200 மி.லி.

மொத்தம் = 2,400–3,000 மி.லி.

நீரின்றி அமையாது உடல்

தண்ணீர் உடலில் சேரும் விதம்

நாம் குடிக்கும் தண்ணீர் இரைப்பையில் மிகச் சிறிய அளவில் மட்டுமே கிரகிக்கப்படுகிறது. சிறுகுடலில்தான் இது மிக அதிக அளவில் உறிஞ்சப்படுகிறது; பெருங்குடலிலும் சிறிதளவு உறிஞ்சப்படுகிறது. வழக்கத்தில் உணவிலுள்ள தண்ணீர் சிறுகுடலில் உறிஞ்சியது போக 1,500 மி.லி. தண்ணீர் பெருங்குடலுக்கு வந்துசேர்கிறது. இதில் 150லிருந்து 200 மி.லி. வரை மலத்தில் வெளியேறுகிறது. என்றாலும் 5 லிட்டர் தண்ணீரை உறிஞ்சக்கூடிய ஆற்றல் பெருங்குடலுக்கு உண்டு.

நீரின்றி அமையாது உடல்

எந்தெந்த உணவுகளில் நீர்ச்சத்து அதிகம்?

* பெர்ரி வகைப் பழங்களில் நீர்ச்சத்து பொதுவாகவே அதிகமாக இருக்கும், அதுவும் ஸ்ட்ராபெர்ரியில் உள்ள நீர்ச்சத்து சற்று அதிகம். இதில் ஆன்டிஆக்ஸிடண்ட்ஸும் அதிகம். ஸ்ட்ராபெர்ரி கிடைக்கும்போது சாப்பிட்டு வந்தால் சருமத்தை இளமையாக வைத்துக்கொள்ளலாம். இந்தப் பழம் உடலின் கொலஸ்ட்ரால் அளவைக் குறைப்பதில் முக்கியப் பங்கு வகிக்கிறது. மேலும், உடலுக்கு வேண்டிய நீர்ச்சத்தைக் கொடுத்து முதுமையைத் தள்ளிப்போடும்.

* தர்பூசணியில் அதிக நீர்ச்சத்து இருக்கிறது. தர்பூசணிப் பழத்தை முடிந்தளவு தினமும் ஒரு கப் ஜூஸாகக் குடிக்கலாம்.

* முள்ளங்கியில் ஆன்டிஆக்ஸிடண்ட்ஸ் மற்றும் நீர்ச்சத்து அதிகம். எனவே அடிக்கடி முள்ளங்கி சாப்பிட்டால் முதுமையைத் தள்ளிப்போடலாம்.

நீரின்றி அமையாது உடல்

* தினமும் ஒரு வெள்ளரிக்காய் சாப்பிட்டு வந்தால், உடலுக்கும் சருமத்திற்கும் கிடைக்கவேண்டிய நீர்ச்சத்து கிடைக்கும்.

* தக்காளியில் வைட்டமின் சி, பொட்டாசியம் மற்றும் லைகோபைன் போன்றவை அதிகம். அத்துடன் 90% நீர்ச்சத்தும் இருப்பதால் இதையும் தினம் ஒரு டம்ளர் ஜூஸாக எடுத்துக்கொள்ளலாம்.

நீரின்றி அமையாது உடல்
நீரின்றி அமையாது உடல்

* கீரை வகைகளில் பசலைக்கீரையில் வைட்டமின்கள், கனிமங்கள் மட்டுமின்றி நீர்ச்சத்தும் அதிகம். இது சருமம் மட்டுமின்றி,உடலையும் ஆரோக்கியமாக வைத்துக்கொள்ளும்.

நீரின்றி அமையாது உடல்
நீரின்றி அமையாது உடல்

* கேரட்டில் பீட்டா கரோட்டின் அதிகமாக இருப்பதோடு, ஆன்டிஆக்ஸிடண்ட்ஸ், வைட்டமின் மற்றும் புரதச்சத்துகளும் அதிகமாக உள்ளன. தினமும் ஒரு டம்ளர் ஜூஸ் எடுத்துக் கொண்டால் உடல் வறட்சி நீங்கிச் சருமம் பொலிவுபெறும்.

நீரின்றி அமையாது உடல்

*ஆரஞ்சுப்பழத்தில் நீர்ச்சத்து அதிகமாக உள்ளதால்  தினமும் ஒரு ஆரஞ்சுப்பழம் சாப்பிடுவது உடலுக்கு நன்மை தரும்.

* நார்ச்சத்து அதிகமாகக் காணப்படும் அன்னாசிப் பழத்தில் நீர்ச்சத்து அதிகம் உள்ளது. இதைக் கர்ப்பிணிகள் உண்பதைத் தவிர்க்க வேண்டும். இல்லையெனில் கருச்சிதைவு மற்றும் குறைப்பிரசவத்தை ஏற்படுத்தும்.

 * திராட்சைப் பழத்தில் நீர்ச்சத்து மிக அதிகம். இந்தப் பழத்தை அதிகமாக எடுத்துக்கொண்டால் உடல் வறட்சி நீங்கி, செரிமானமும் நன்றாக இருக்கும். ஆனால், சளித்தொல்லையால் அவதிப்படுபவர்கள் இதைத் தவிர்ப்பது நல்லது.

நீரின்றி அமையாது உடல்

* நீர்ச்சத்து, நார்ச்சத்து ஆகியவை நிறைந்த வாழைத்தண்டைத் தினமும் சாப்பிடலாம். அதுவும் சிறுநீரகப் பிரச்னை இருப்பவர்களுக்கு அருமருந்தாகச் செயல்படும். நீர்த்தன்மை அதிகமாக இருப்பதால் சிறுநீரை நன்றாக வெளியேற்றும்.

* இளநீரைப்போல மகத்தானது ஏதுமில்லை என்றும் சொல்லலாம். வெயிலின் தாக்கத்தைக் கட்டுப்படுத்த இளநீர் குடிப்பது நல்லது.

நீரின்றி அமையாது உடல்

சாப்பாட்டுக்கு இடையில் தண்ணீர் குடிக்கக் கூடாது... ஏன்?

சாப்பாட்டுக்கு இடையில் தண்ணீர் குடிப்பதைப் பெரும்பாலும் தவிர்க்க வேண்டும். இதனால் உடலில் செரிமானம் சீராக இருக்காது. எனவே உணவு உண்பதற்கு அரை மணி நேரத்துக்கு முன்பாகத் தண்ணீர் குடிக்கலாம். அல்லது சாப்பிட்டு முடித்ததும் தண்ணீர் குடிக்கலாம்.

நீரின்றி அமையாது உடல்

ஐஸ் வாட்டர் VS வெந்நீர் எது சிறந்தது?

சுட்டெரிக்கும் வெயிலில் அலைந்து திரிந்து வீட்டுக்கு வந்தால் பலரும் ஐஸ் வாட்டரைத்தான் தேடுவார்கள். அந்த அளவுக்கு இன்று ஐஸ் வாட்டருக்கு அடிமையாகிவிட்டோம். ஐஸ் வாட்டர் உடனடியாகத் தாகத்தை நீக்கி, உடலைக் குளுமையாக்கிவிடும். ஆனால் ஐஸ் வாட்டரைக் குடிப்பதால் உடலில் பல கோளாறுகள் ஏற்படும்.

நீரின்றி அமையாது உடல்
நீரின்றி அமையாது உடல்

குளிர்ந்த தண்ணீரால் உணவு செரிமானத்தில் சிக்கல் ஏற்படும். அத்துடன் கொழுப்பின் அளவும் அதிகரிக்கும். உயர் ரத்த அழுத்தம், வயிற்று வலி, பக்கவாதம், தலைவலி, பற்களில் பாதிப்பு ஆகியவை ஏற்படும். இதற்கு மாற்றாக வெந்நீரைப் பருகினால் செரிமானம் அதிகரித்து ஆயுட்காலமும் அதிகரிக்கும் என்பது மருத்துவர்களின் நீண்டகால அறிவுரை.

நீரின்றி அமையாது உடல்

வாட்டர் ரிட்டென்ஷன் vs டீஹைட்ரேஷன்

உடலில் 60 சதவிகிதம் தண்ணீர் எப்போதுமே காணப்படும். அப்போது தண்ணீர் அதிகமாவதை நீர் கோப்பு (வாட்டர் ரிட்டென்ஷன்) என்கிறோம். அதுவே உடலில் வறட்சி ஏற்பட்டுத் தண்ணீர் குறைந்தால் அதனை உடலின் வறட்சி நிலை (டீஹைட்ரேஷன்) என்கிறோம்.

நீரின்றி அமையாது உடல்
நீரின்றி அமையாது உடல்

வாட்டர் ரிட்டென்ஷன்- அறிகுறிகளும் தீர்வுகளும்

உணவில் உப்பு அதிகம் சேர்த்துக்கொள்வது, மசாலாக்கள் அதிகமான உணவு, அரிசி போன்ற கார்போஹைட்ரேட் உணவுகளைச் சாப்பிடுவது, உடல் பருமன், உடலை வருத்தி வேலை செய்வது, ஒரே நிலையில் அமர்ந்து வேலை செய்வது ஆகியோருக்கு இந்தப் பிரச்னைக்கான அறிகுறிகள் தெளிவாகத் தெரியும். தூங்கி எழுந்தவுடன் முகம் வீங்கியதுபோல இருக்கும்; களைப்பாக இருக்கும். 

நீரின்றி அமையாது உடல்

இந்த அறிகுறிகள் தென்பட்டால் சிறுநீரகக் கோளாறு உள்ளவர்கள், பருமனானவர்கள், ஹைப்பர் டென்ஷன் பிரச்னை உள்ளவர்கள் மருத்துவரை அணுகுவது நல்லது. இதுதவிர, ஆரோக்கியமான உடல் நிலையில் இருப்பவர்கள் உணவு விஷயத்தில் கவனம் செலுத்த வேண்டும். அரிசி உணவுகளைக்  குறைத்து, கேழ்வரகு, கோதுமை  உணவுகளையும், கீரை போன்ற நார்ச்சத்து உணவுகளையும் அதிகமாகச் சாப்பிடலாம். உணவில் உப்பின் அளவு குறைக்கப்பட வேண்டும்.

நீரின்றி அமையாது உடல்

டீஹைட்ரேஷன் -  அறிகுறிகளும் தீர்வுகளும்

தண்ணீர் கோத்துக்கொள்வது ஆபத்தானதுபோல, நீர் வறட்சி நிலையான டீஹைட்ரேஷனும் ஆபத்தானதுதான். சாதாரணமாக 10-ல் ஒரு நபருக்கு அதிகமாக இப்பிரச்னை இருக்கிறது. மயக்கம், எப்போதும் களைப்பு, தலைவலி ஆகியவை இதன் அறிகுறிகளாகும். உடலுக்குத் தேவையான தண்ணீர் முழுவதுமாகச் சேர்ந்தால் மட்டுமே தலைவலி நீங்கும். அதிக வெயில் மற்றும் வயிற்றுப்போக்கால் உடலில் தண்ணீர் இல்லாமல் வற்றிப்போகும். நாக்கு வறட்சியாவது, தாகம் எடுப்பது, உதடுகள் வெடிப்பது, இதயத்துடிப்பு அதிகரிப்பது, சிறுநீர் குறைவாக வெளியேறுவது ஆகியவை இதன் அறிகுறிகளாகும். இதற்கு முக்கியமான காரணம், தாகம் எடுக்கும்போது மட்டும் தண்ணீரைக் குடிப்பதுதான்.

நீரின்றி அமையாது உடல்

அடிக்கடி தண்ணீர் குடிக்க வேண்டும். புகைப்பிடிக்கும் பழக்கம் உள்ளவர்களுக்கு டிஹைட்ரேஷன் பிரச்னை அதிகமாக வர வாய்ப்பு உண்டு. அதன் விளைவாக நுரையீரல் புற்றுநோய் தாக்கலாம். இதற்கெல்லாம் ஒரே தீர்வு, புகையை நிறுத்திவிட்டுத் தண்ணீரை அதிகம் குடிக்க வேண்டும். வெறும் தண்ணீரைக் குடிக்கப் பிடிக்காதவர்கள், எலுமிச்சை, சீரகம்  கலந்த தண்ணீரைக் குடிக்கலாம்.

- துரை.நாகராஜன்

நீரின்றி அமையாது உடல்

உடலையும் உள்ளத்தையும் நல்வழிப்படுத்தும் வழிகள், உணவுப் பழக்கங்கள், உடற்பயிற்சிகள் முதலிய வாழ்வியல் முறைகளை அறியவும், மருத்துவ உலகின் ஆச்சர்யங்களை விரல்நுனியில் தெரிந்துகொள்ளவும் ‘டாக்டர் விகடன்’ சோஷியல் நெட்வொர்க்கிங் பக்கங்களில் இணைந்திடுங்கள்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு