Published:Updated:

கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

கொஞ்சம் ப்ளஸ்... நிறைய லாபம்! - தென்னை தரும் பொருள்கள்!
பிரீமியம் ஸ்டோரி
கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

மதிப்புக் கூட்டும் தொழில்கள்! - 2

கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

மதிப்புக் கூட்டும் தொழில்கள்! - 2

Published:Updated:
கொஞ்சம் ப்ளஸ்... நிறைய லாபம்! - தென்னை தரும் பொருள்கள்!
பிரீமியம் ஸ்டோரி
கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

திப்புக் கூட்டல் என்பது குறிப்பிட்ட சில பொருள்களுக்கு மட்டும் கிடையாது. விவசாயத்தில் கிடைக்கும் அனைத்துப் பொருள்களையும் மதிப்புக் கூட்ட முடியும். அதன்படி தென்னையை எடுத்துக்கொண்டால் தேங்காய், தென்னை மட்டை, இளநீர், தேங்காய் எண்ணெய் ஆகியவை கிடைக்கும் என்பது நம்மில் பலருக்குத் தெரியும். இவை தவிர்த்து  தேங்காய் பவுடர், கயிறு, தென்னை நார்க்கட்டி, பதப்படுத்தப்பட்ட இளநீர், தென்னங் கருப்பட்டி எனப் பல வடிவங்களில் மதிப்புக் கூட்டினால் நிச்சயமாக லாபம் கிடைக்கும். இவற்றைத் தமிழ்நாட்டில் அதிகமாக கொங்கு மண்டலத்தில் செய்துவருகிறார்கள். இந்த இடத்தைத் தவிர்த்து, தமிழ்நாட்டில் அதிகமாகத் தென்னை வளர்க்கும் விவசாயிகளும் மதிப்புக் கூட்டல் செய்து வருகிறார்கள். மதிப்புக் கூட்டல் சம்பந்தமாக இலங்கையில் சுற்றுப்பயணம் மேற்கொண்ட உடுமலையைச் சேர்ந்த எழுத்தாளர் ரவியிடம் பேசினோம்.  

கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

“தமிழ்நாட்டில்தான் மதிப்புக் கூட்டல் பற்றிய விழிப்பு உணர்வு அதிகமாக இல்லை. ஒரு சிலரைத் தவிர அதிகமான ஆட்கள் மதிப்புக் கூட்டலின் பக்கம் வரத் தயங்குகிறார்கள் என்பதுதான் உண்மை. இதைத் தமிழக அரசும் ஊக்குவிக்க முன்வர வேண்டும். இலங்கையில் மதிப்புக் கூட்டல் பற்றிய சுற்றுப்பயணம் மேற்கொண்டபோது அங்கே பார்த்த தொழில்நுட்பங்கள்தான் மதிப்புக் கூட்டல் பற்றிய அவசியத்தைப் புரிய வைத்தது. இலங்கையில் தென்னையிலிருந்து மது வகைகள், தோசைப் பொடி, கூடை, மிதியடிகள், தென்னங் கருப்பட்டி எனப் பல பொருள்களைத் தயார் செய்கிறார்கள். இலங்கை செல்லும் ஒரு சில விமானங்களில் பதப்படுத்தப்பட்ட இளநீரைக் கொடுக்கிறார்கள்.

தென்னைக்கு என்றே தனியாக வாரியம் அமைத்து மதிப்புக் கூட்டல் செய்த பொருள்களை ஏற்றுமதி செய்து வருகிறார்கள். மேலும், தேங்காயிலிருந்து பால், பவுடர் ஆகிய பொருள்களை அதிகமாகத் தயாரிக்கிறார்கள். தமிழ்நாட்டில் தென்னையில் செய்யப்படும் மதிப்புக் கூட்டுப் பொருள்கள் அரிதாகி வருகிறது. அரசு கொஞ்சம் முனைப்புக் காட்டி, மதிப்புக் கூட்டல் மூலம் பலருக்குத் தொழில் வாய்ப்புகளை ஏற்படுத்த முன்வர வேண்டும்” என்றார்.

தேங்காய் நார் மற்றும் தேங்காய் நார்க் கட்டி உற்பத்தி

பொள்ளாச்சியைச் சேர்ந்த ஸ்ரீராகவேந்திரா ஃபைபர் புராடெக்ட்ஸ் உரிமையாளர் சி.பாலசுப்பிரமணியம், 1994-ம் ஆண்டு முதல் தென்னையிலிருந்து மதிப்புக் கூட்டித் தேங்காய் நார் மற்றும் தேங்காய் நார்க்கட்டி ஆகியவற்றை வெளிநாடுகளுக்கு ஏற்றுமதி செய்கிறார். தென்னை நார்களில் மதிப்புக் கூட்டல் பற்றி அவர் நம்மிடம் பகிர்ந்துகொண்ட விஷயங்கள்...

“தேங்காய் நார்களிலிருந்து பல பொருள்களை உற்பத்தி செய்யலாம். ஆனால், அதற்கு மூலக் காரணமாக விளங்கும் நாரை, முறைப்படி உற்பத்தி செய்ய வேண்டும். 1994-ம் ஆண்டு முதல் தேங்காய் நார் உற்பத்தியில் ஈடுபட்டு வருகிறேன். இதில் வெள்ளை மற்றும் பழுப்பு நிற நார்கள் என இரு வகை உண்டு. வெள்ளை நார்கள் சற்று தரம் உயர்ந்தவை. பச்சை தேங்காய் மட்டையிலிருந்து தயாரிக்கப் படுகிறது. இது அழகான கால்மிதிகள், சோஃபாக்கள் எனப் பல பொருள்களைத் தயாரிக்கப் பயன்படுகின்றன.

பழுப்பு நிறக் கயிறுகள், அழகு சாதனப் பொருள்கள் போன்றவற்றைத் தயாரிக்க, பழுப்பு நிற நார்கள் பயன்படுகின்றன. பச்சை தென்னை மட்டையை கன்வேயரில் போட்டு நார்களைத் தனியாகப் பிரித்துவிடுவோம். பின்னர், மட்டைகளை பாலிஷ் செய்து, சல்லடையில் சலித்து நார்கள் எடுத்து, தரம் பிரித்துக் காயவைப்போம். அதைச் சரியாக 30 கிலோ அளவிற்கு எடைபோட்டு பண்டலாகக் கட்டி ஏற்றுமதி செய்வோம். கன்வேயரில் போடப் பட்ட மட்டைகளை அரைத்து நார்களைப் பிரிக்கும்போது அதிலிருந்து துகள்கள் தனியாக விழும். அந்தத் துகள்களைக் கொண்டு தேங்காய் நார்க் கட்டிகளாகவும் உற்பத்தி செய்து ஏற்றுமதி செய்கிறேன்” எனத் தன் அனுபவங்களைப் பகிர்ந்து கொண்டார்.   

ஒட்டுமொத்த விகடனுக்கும் ஒரே ஷார்ட்கட்!

கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

கயிறு பிசினஸ்

“தென்னை நாரிலிருந்து தயாரிக்கப்படும் கயிறு பிசினஸ்தான் தற்போது டாப்பாக இருக்கிறது” என்கிறார் திருப்பூரைச் சேர்ந்த கெளதமன். மேலும், அவர் கூறும்போது...

“மட்டையிலிருந்து தயாரிக்கும் நார்களை வாங்கி கயிறு தயாரிக்கப் படுகிறது. பிணைந்திருக்கும் தென்னை நார்களின்மீது தண்ணீர் ஊற்றிப் பிரித்துவிடுவோம். அதன் பின்னர் வில்லோயிங் மெஷினில் அள்ளிப்போட வேண்டும். அதிலிருந்து  கயிறு தயாரிப்பதற்கு ஏற்ற வகையில் மெஷினிலிருந்து நார் வெளியே வரும். அடுத்ததாக ஆட்டோ ஃபீடர் மெஷினிலிருந்து ஸ்பின்னிங் முறையில் கயிறாகத் தயாராகிறது. இதெல்லாம் நடக்க ஒரு நாள்தான் தேவைப்படும். கயிறு தயாரிப்பதில் 1.30 முதல் 1.90 ரன்ஏஜ்(Runage) என்று சொல்லக்கூடிய அளவுகள் உள்ளன. இதில் நான் தயாரிப்பது 1.60 என்ற அளவில்தான் இருக்கும். இந்த அளவுள்ள கயிறுகள் மேட் போன்ற அழகுசாதனப் பொருள்கள் தயாரிப்பதற்காக அதிகமாக விற்பனையாகும். 2016-ம் ஆண்டில் நான் ஆரம்பித்த கயிறு தயாரிக்கும் தொழில் தற்போது  வேகமெடுத்து இருக்கிறது. புதிதாக இந்தத் தொழிலைத் தொடங்க நினைத்தால் சுமார் 1 கோடி ரூபாய் தேவைப்படும். எங்களுடைய பொருள்கள் பெரும்பாலும் கேரளாவிற்கு அதிகமாக ஏற்றுமதியாகின்றன. முதலில் இந்தத் தொழிலைப் பார்க்கும் முன்னர்  பல நிறுவனங்களுக்குச் சென்று  தொழில் நுட்பங்களைக் கற்றுக்கொள்ள வேண்டும்.  கயிறு தயாரிக்கும் தொழிலுக்கு நல்ல டிமாண்ட் இருக்கிறது. இது தவிர, இதுபோன்ற தொழிலுக்கு வரும் புதியவர்கள் அதிகத் தொழில்நுட்பங்களைக் கற்றுக் கொண்டு வரவேண்டும். அப்போதுதான் இனி வரும் காலங்களில் இந்தத் தொழிலில் சாதிக்க முடியும்” என்றார்.

தென்னையில் இங்கே குறிப்பிட்ட பொருள்களை மட்டும்தான் மதிப்புக் கூட்டல் செய்யமுடியும் என்பது கிடையாது. தென்னையின் நுனிமுதல் அடிவரை இருக்கும் அனைத்துப் பொருள்களுமே மதிப்புக் கூட்டல் செய்யக் கூடியவைதான்.

(மதிப்புக் கூடும்)

- துரை நாகராஜன்

படங்கள்: வீ.சிவக்குமார்.

கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

லாபம் தரும் தேங்காய் நார்!

சி.பாலசுப்பிரமணியம், ஸ்ரீராகவேந்திரா ஃபைபர் புராடெக்ட்ஸ்

“1000 தேங்காய்க்கு 95 கிலோ தேங்காய் நார் கிடைக்கும். கிலோ 23 ரூபாய்க்கு விற்பனை செய்கிறேன். ஒரு நாளைக்கு 4 டன் தேங்காய் நார் உற்பத்தி செய்கிறேன். மைசூரிலிருந்து தேங்காய் மட்டை ஒரு லோடு ரூ.43,000 - 47,000-க்கு வாங்குகிறோம்.  தேங்காய் நாரானது அதிகமாக சொகுசுப் படுக்கைகள், சொகுசு நாற்காலிகள் செய்ய சீனாவுக்கு ஏற்றுமதி செய்யப்படுகிறது. வருடத்துக்கு தோராயமாக 2 கோடியிலிருந்து 2.5 கோடி ரூபாய் வரை இந்த தொழிலில் லாபம் கிடைக்கிறது

தேங்காய் நார்க்கட்டிகளை பல நாடுகளுக்கும் அதிகமாக ஏற்றுமதி செய்கிறேன். ஒரு கட்டியின் எடை 5 கிலோ, விலை 70 ரூபாய், ஒரு டன் 14,000 ரூபாய். செலவு போக ஒரு டன்னுக்கு 2,500 ரூபாய் லாபம் கிடைக்கிறது. ஒரு நாளைக்கு 10 டன் நார்க்கட்டிகள் உற்பத்தி செய்து விற்றுவிடுகிறேன். இதில் வருடத்துக்கு 3 முதல் 3.5 கோடி ரூபாய் வரைக்கும் லாபம் கிடைக்கும்.

1994-ம் ஆண்டு வெறும் ரூ.15 லட்சம் முதலீட்டில் ஆரம்பித்தேன். அன்றைக்கு இவ்வளவு இயந்திரங்கள் கிடையாது. பிறகு பல இயந்திரங்களை வாங்கினேன். இப்போது இதுபோல தொழிற்சாலை அமைக்க வேண்டுமானால், குறைந்தது 1.5 கோடி ரூபாய் முதலீடு தேவை. இந்தத் தொழிலை ஆரம்பிக்க நினைப்பவர்கள் தொழிலை ஆரம்பிக்கும் முன்னர், அதற்கான தொழில் வாய்ப்புகளையும், சந்தை வாய்ப்புகளையும் ஏற்படுத்திக்கொள்ள வேண்டும்.”

கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

லாபம் தரும் எண்ணெய்!

செல்வம், உடுமலைப்பேட்டை

“13 வருடங்களாக இயற்கை விவசாயம் செய்துவருகிறேன். என்னிடம் 200 தென்னை மரங்கள் இருக்கின்றன.  மாதம் 4,000 முதல் 5,000 தேங்காய்கள் கிடைக்கும்.  தேங்காய் எண்ணெய் எடுப்பதற்காகவே இரண்டு மரச்செக்கு இயந்திரங்களை வைத்திருக்கிறேன். ஒரு கிலோ தேங்காய்க்கு 560 மி.லி எண்ணெய் கிடைக்கும். தோட்டத்தில் பறிக்கும் தேங்காய்களை உடைத்து ஈரப்பதம் போகும்வரை காயவைத்து, அதன் பின்னர் மரச்செக்கில் போட்டு எண்ணெய் எடுத்துக்கொள்ளலாம்.

இந்த பிசினஸுக்கு முதலீடு எனப் பார்த்தால் ஒரு மெஷின்  வாங்க ரூ.1,50,000 ரூபாய் தேவைப்படும். தென்னை மரம் இல்லாதவர்கள் தேங்காய்களை வாங்கி அதனை எண்ணெயாக மாற்றி விற்பனை செய்து லாபம் சம்பாதிக்கலாம். இதுபோக மின்சாரச் செலவு மாதம் ரூ.30,000, ஆள் கூலி தினம் ரூ.250 எனத் தனியாகச் செலவழிக்க வேண்டியிருக்கும். ஒரு லிட்டர் தேங்காய் எண்ணெய் 270 ரூபாய்னு கொடுக்கிறேன். ஒரு கிலோ தேங்காய் பருப்பே 120 ரூபாய் ஆகிவிடும். ஒரு லிட்டர் தேங்காய் எண்ணெய்க்கு ஒன்றரை கிலோ தேங்காய் தேவை. இதன் விலையே 180 ரூபாய் ஆகிவிடும். இதுதவிர மின்சாரம், ஆள்கூலி என 50 ரூபாய் ஒதுக்கிவிட்டால் மொத்தம் 230 ரூபாய் செலவாகிவிடும். ஒரு லிட்டருக்கு 40 ரூபாய் லாபம் கிடைக்கும். ஒரு நாளைக்கு 8 முதல் 10 லிட்டர் வரைக்கும் விற்பனையாகிறது. எனக்குத் தென்னை மரங்கள் இருப்பதால் பருப்பு செலவைக் கணக்கில் வைத்துக்கொள்ள மாட்டேன். மரச்செக்கு என்பதால் வெப்பம் அதிகமாக வெளிவருவதில்லை. புதிதாக இத்தொழிலுக்கு வரும் தொழில்முனைவோருக்கு லாபம் தரக்கூடியத் தொழிலாக இது விளங்குகிறது.”

கொஞ்சம் ப்ளஸ்... நிறைய லாபம்! - தென்னை தரும் பொருள்கள்!

கருப்பட்டியில் லாபம்!

கணேஷ், பொள்ளாச்சி 

“நான் 120 தென்னை மரங்களை வளர்க்கிறேன். கருப்பட்டி காய்ச்சுவதற்கு முந்தைய நாள், தென்னை மரத்தில் இருக்கும் பாளையைச் சீவி சுண்ணாம்பு தடவப்பட்ட பானையைக் கட்டி விடுவோம். பூச்சிகள் உள்ளே செல்லாத வண்ணம் பானைக்கு வளைபோட்டு கட்டிவிடுவோம். ஒரு பாளைக்கு அதிகபட்சமாக ஒரு லிட்டர் வரை கிடைக்கும். காலையில் மண்பானைக் கலயத்தில் இருக்கும் நீரைச் சேகரித்துப் பெரிய பாத்திரத்தில் ஊற்றிக் காய்ச்சுவோம். சிறிது கெட்டியானவுடன் மிதமான சூட்டில் தென்னம் பாகை இறக்கி அச்சில் ஊற்ற வேண்டும். பின்னர் நன்றாகக் காய வைத்து எடுத்தால் தென்னங் கருப்பட்டி தயார். ஒரு நாளில் 100 கிலோ முதல் 150 கிலோ வரைக்கும் உற்பத்தி செய்கிறேன். ஒரு கிலோ 180 ரூபாய்க்கு விற்பனை செய்கிறேன்.”

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism