கொஞ்சம் ப்ளஸ்... நிறைய லாபம்! - சூப்பர் வருமானம் தரும் சுருள்பாசி!

ம திப்புக் கூட்டல் என்பது குறிப்பிட்ட சில பொருள்களுக்கு மட்டும் கிடையாது. விவசாயத்தில் கிடைக்கும் அனைத்துப் பொருள்களையும் மதிப்புக் கூட்ட முடியும். இதுதவிர, உணவுப்பொருளாக வளர்க்கும் பாசியில் இருந்தும் மதிப்புக் கூட்டப்பட்ட பொருள்களைத் தயார் செய்ய முடியும். இதற்கு உதாரணமாகச் சுருள்பாசியைச் சொல்லலாம்.

. “ஈரச் சுருள்பாசியிலிருந்து பொடி, கேப்ஸ்யூல், மாத்திரை, அப்பளம், சாக்லேட், லட்டு, ஜாம், கடலை மிட்டாய், சமையல் பொடிகள், ஐஸ்கிரீம், சோப், ஷாம்பூ, முக அழகுப் பவுடர் மற்றும் ஆயில் ஆகியவற்றைத் தயாரித்து நல்ல லாபம் பார்க்கலாம்” என்று நம்பிக்கையுடன், தனது தொழில்நுட்பங்களையும், சந்தை வாய்ப்புகளையும் பகிர்ந்துகொள்கிறார், சுருள்பாசி வளர்க்கும் ரத்தின ராஜ சிங்கம்.

இவர், கடந்த பத்தாண்டுகளுக்கும் மேலாகச் சுருள்பாசி வளர்ப்பில் ஈடுபட்டு வருகிறார். காஞ்சிபுரம் மாவட்டம், சிறுசேரி சிப்காட் அருகே நத்தம் கிராமத்தில் அமைந்துள்ளது, ஈழ ஏதிலிய மறுவாழ்வு கழகத்தின் சகோதர நிறுவனமான ‘நல்லாயம் நான்குநிலை ஆராய்ச்சி மையம்.’

. இதன் திட்ட ஒருங்கிணைப்பாளர்தான் ரத்தின ராஜ சிங்கம். கடந்த பத்து வருடங்களுக்கும் மேலாகச் சுருள்பாசி வளர்ப்பிலும், மதிப்புக் கூட்டலிலும் ஈடுபட்டு வருகிறார். மதிப்புக் கூட்டல் பற்றிய இத்தொடரில், தனது சுருள்பாசி மதிப்புக்கூட்டும் தொழில்நுட்பங்களைப் பகிர்ந்துகொள்கிறார்.

“மதிப்புக் கூட்டலுக்குச் சுருள்பாசி தவிர்த்து அனைத்து உணவுப்பொருள்களையும் மதிப்புக் கூட்டலாம். ஆனால், சந்தை வாய்ப்புகளை அவ்வளவு எளிதாக அமைத்துக்கொள்ள முடியாது” என்று பீடிகை போட்டவர், அதற்கான காரணங்களையும் அடுக்குகிறார்.

“என்னிடம் சுருள்பாசி பொடியாக வாங்கினால் ஒரு கிலோ 1,000 ரூபாய். அந்த ஒரு கிலோ பொடியையே, ஒரு கேப்ஸூலுக்கு அரை கிராம் என்ற அளவில் அடைத்தால், இரண்டாயிரம் கேப்ஸ்யூல்கள் கிடைக்கும். 60 கேப்ஸ்யூல் அடங்கிய பாட்டில் 150 ரூபாய் என விற்பனை செய்தால், இரண்டாயிரம் கேப்ஸூலுக்கு 5,000 ரூபாய் வருமானம் கிடைக்கும். இதுதான் மதிப்புக் கூட்டல் பிசினஸின் சக்ஸஸ். இப்போது உள்ள சூழலில் மதிப்புக் கூட்டல் உணவுப்பொருள்களுக்குச் சந்தையில் நல்ல வரவேற்பு உள்ளது.

பெரும்பாலான ஆர்கானிக் கடைகளிலும், பார்மஸிகளிலும் சுருள்பாசி பொருள்களை வாங்கி விற்பனை செய்ய ஆரம்பித்திருக்கிறார்கள். இதைப் பொடியாக மட்டும் கொடுத்துக் கொண்டிருந்தால், மக்களிடம் குறைவான அளவில் மட்டும்தான் விற்பனை செய்ய முடியும்.

.

இதுவே கேப்ஸ்யூல், மாத்திரை, லட்டு என்று அதிகமான பொருள்களைச் சந்தைப் படுத்தினால், அதிகமாக விற்பனை செய்ய முடியும். நல்ல லாபமும் பார்க்க முடியும்” என்றவர், சுருள்பாசி தயாரிப்பைப் பற்றி விளக்கத் தொடங்கினார்.

தயாரிப்பு முறை

“சுருள்பாசி வளர்க்க 28 டிகிரி செல்சியஸ் முதல் 37 டிகிரி செல்சியஸ் வரை வெப்பநிலை நிலவும் பகுதி மட்டுமே ஏற்றது. பொதுவாக, தமிழ்நாட்டில் நிலவும் வெப்பநிலை சரியாக இருக்கும். வளர்க்கும் இடமும் உபயோகப்படுத்தும் தண்ணீரும் சுத்தமாக இருக்க வேண்டும்.

காற்று மாசுபாடு உள்ள இடங்களாக இருந்தால் நிழல்வலைக்குடில் அமைத்துக் கொள்ளலாம். இதை அமைத்தால் பூச்சிகள் வராது. வழக்கமாக 10 அடி நீளம், 5 அடி அகலம், 1 அடி உயரத்தில் தொட்டி அமைப்பது வழக்கம். இப்போது நவீன முறையில் 15 அடி நீளம், 7 அடி அகலம், ஒன்றரை அடி ஆழத்தில் தொட்டி அமைத்து விற்பனை செய்கிறோம். இப்படித்தான் என இல்லாமல் நமது வசதிக்கேற்றதுபோல நீள, அகலத்தை அமைத்துக் கொள்ளலாம்.

. தொட்டியில் சுத்தமான தண்ணீர் நிரப்பி, ஒரு லிட்டர் தண்ணீருக்கு ஒரு கிராம் தாய்ப்பாசி, 8 கிராம் சோடியம் பை-கார்பனேட், 5 கிராம் சோடியம் குளோரைடு, 0.2 கிராம் யூரியா, 0.5 கிராம் பொட்டாசியம் சல்பேட், 0.16 கிராம் மெக்னீசியம் சல்பேட், 0.052 மில்லி பாஸ்பாரிக் அமிலம் என்ற அளவில் தொட்டியில் விட்டுக் கலக்க வேண்டும்.

தினமும் பகல் நேரத்தில் 15 நிமிடம் தண்ணீரைக் கலக்கிவிட வேண்டும். தாய்ப்பாசி விட்ட ஏழாவது நாளிலிருந்து பத்து நாள்களுக்குள் அறுவடை செய்ய ஆரம்பிக்கலாம்.

தொடர்ந்து மூன்று மாதத்திற்குத் தினமும் அறுவடை செய்யலாம். அதற்குப் பிறகு தாய்ப்பாசியை மாற்றிவிட வேண்டும். காலையில் 6 மணியிலிருந்து 8 மணிக்குள் பாசியை அறுவடை செய்துவிட வேண்டும். தண்ணீருடன் சேர்த்து அப்படியே அள்ளி சல்லடையில் ஊற்றினால், பச்சை நிறத்தில் பாசி தேங்கும். அந்த ஈரப்பாசியை மெல்லிய வலைக்குள் போட்டு 50 கிலோ எடை கொண்ட கல்லால் ஒரு நிமிடம் அழுத்தினால், தண்ணீர் வடிந்துவிடும்.

.

அடுத்து இடியாப்பம் பிழியும் கருவியில் போட்டுப் பிழிந்து, பசுமைக் குடிலில் 5 மணி நேரம் காய வைக்க வேண்டும். அதன் பின்னர் தூளாக்கி மதிப்புக் கூட்டி விற்பனை செய்யலாம்” என்று ஒரே மூச்சில் சொல்லி முடித்தவர், மதிப்புக் கூட்டல் தொழில்நுட்பங்களைப் பகிர்ந்துகொண்டார். சுருள்பாசி ஜூஸ்

“எலுமிச்சை சாறு, தண்ணீர், நாட்டுச் சர்க்கரை, ஒரு கிராம் சுருள்பாசி பொடி (ஒரு நபருக்கு 1 கிராம் என்ற அளவில்) ஆகியவற்றைக் கலந்து ஜூஸ் தயாரிக்கலாம். அந்த ஜூஸில் சுருள்பாசி வாசனை வந்தால், ஜூஸை ஃப்ரீசரில் வைத்து அருந்தலாம் அல்லது ஐஸ் கட்டிகளைக் கலந்து பருகலாம். இதை இன்னும் பாட்டிலில் அடைத்து விற்பனை செய்ய முடியவில்லை. அதனால், ஜூஸ் தயாரிக்கும் இயந்திரத்தின் மூலம் நேரடியாகவே தயாரித்துக் கொடுத்துவருகிறோம்.

200 மிலி கொண்ட ஒரு டம்ளர் ஜூஸ் 15 ரூபாய். ஒரு ஜூஸுக்கு செலவாக 5 ரூபாய் போனாலும் பத்து ரூபாய் லாபமாக நிற்கும். வாரம் இருமுறை 300 ஜூஸ்களுக்கு மேல் விற்பனை செய்வதன் மூலம் 3,000 ரூபாய் லாபமாக நிற்கும்.

சுருள்பாசி கேப்ஸ்யூல்

கேப்ஸ்யூல்களின் மேல் உறையை வாங்கி அதில், அரை கிராம் அளவு சுருள்பாசி பொடியை நிரப்ப வேண்டும். இதற்கென பிரத்யேகமாக உள்ள இயந்திரத்தில் கேப்ஸ்யூல் உறைகளை வரிசையாக அடுக்க வேண்டும். பின்னர் அதன் மேற்புறமாக உறைகளில் அரை கிராம் அளவுக்கு நிரப்ப வேண்டும்.

பின்னர், இயந்திரத்தின் மேற்பகுதியை அழுத்தினால் கேப்ஸ்யூல் தயாராகிவிடும். 60 கேப்ஸ்யூல்கள், 120 கேப்ஸ்யூல்கள் என இரண்டு வகையான பாட்டில்களில் அடைத்து விற்பனை செய்கிறோம். 60 கேப்ஸ்யூல்கள் அடங்கிய பாட்டிலின் விலை 150 ரூபாய், 120 கேப்ஸ்யூல்கள் அடங்கிய பாட்டிலின் விலை 250 ரூபாய்.

சுருள்பாசி மாத்திரை

மாத்திரைகள் தயாரிக்கப் பயன்படும் மாவு போன்ற கலவையை வாங்கி அதில், ஒரு மாத்திரைக்கு 400 மி.கிராம் சுருள்பாசி பொடி என்ற அளவில் கலந்து தயாரிக்கப்படுகிறது. 60 மற்றும் 120 மாத்திரைகள் என இரண்டு வகையான பாட்டில்களில் அடைத்து விற்பனை செய்யப் படுகிறது. 60 கேப்ஸ்யூல்கள் அடங்கிய பாட்டிலின் விலை 150 ரூபாய், 120 கேப்ஸ்யூல்கள் அடங்கிய பாட்டிலின் விலை 250 ரூபாய்.

சுருள்பாசி அப்பளம்

கறுப்பு உளுந்தை அரைத்துக் கொண்டு, அதனுடன் ஒரு கிலோவுக்கு 30 சதவிகிதம் என்ற அளவில் சாதாரணமாக அப்பளம் தயாரிப்பது போன்றே தயாரிக்கலாம். 50 கிராம் கொண்ட ஒரு கட்டு அப்பளம் 35 ரூபாய்.

சுருள்பாசி சாக்லேட்

ஒரு கிலோ ஹோம் மேட் சாக்லேட் கட்டியை வாங்கியோ அல்லது சாக்லேட் கட்டியைத் தயாரித்து வைத்துக்கொள்ளவோ வேண்டும். சூடான வெந்நீரின்மீது ஒரு பாத்திரத்தை வைத்து, அது சூடேறும்போது ஒரு கிலோ சாக்லேட் கட்டியை சிறு சிறு துண்டுகளாக நறுக்கிப் போட வேண்டும். அப்போது சாக்லேட் கட்டிகள் உருக ஆரம்பிக்கும். அத்துடன் 30 சதவிகிதம் சுருள்பாசி பொடியைக் கலந்து கிளறிவிட வேண்டும்.

பின்னர் அதை சாக்லேட் தயாரிக்கும் அச்சில் இட்டு ஃப்ரீசரில் வைத்துவிட வேண்டும். (இதற்கென சந்தைகளில் விதவிதமான அச்சுக்கள் விற்பனை செய்யப்படுகின்றன) பின்னர் எடுத்து, வண்ணவண்ண பாக்கெட்டுகளில் பாக்கெட் செய்ய வேண்டும். 6 சாக்லேட் பீஸ் கொண்ட பாக்கெட் ஒன்றின் விலை 35 ரூபாய்.

கம்பு லட்டு

கம்பு மாவையும், பச்சைப் பயிறு மாவையும் வாசம் வரும் வரை தனித்தனியாக வறுத்துக் கொள்ள வேண்டும். அத்துடன் பொடித்த கருப்பட்டியைச் சேர்த்துக் கலந்துகொள்ளவும். இதனுடன் நெய்யைச் சூடாக்கி, பொடித்த எள், உப்பு, சேர்த்து பிசைய வேண்டும். கை பொறுக்கும் சூட்டில் பாலை சூடாக்கி மாவில் கொஞ்சமாக தெளித்து, இறுதியாக 300 கிராம் சுருள்பாசி பொடியைக் கலந்து உருண்டை பிடிக்கவும். ஒரு உருண்டை 10 ரூபாய்.

ஜாம்

. பச்சை வாழை, கொய்யா, பப்பாளி, அன்னாசி, விதை நீக்கிய திராட்சை ஆகியவற்றைச் சாறு எடுத்துக் காய்ச்ச வேண்டும். நன்றாக காய்ச்சிய பின்னர், இறக்கும் தருவாயில் 1 கிலோவுக்கு 30 சதவிகிதம் சுருள்பாசிபொடியைக் கலந்து தயார் செய்ய வேண்டும். 200 கிராம் கொண்ட ஒரு பாட்டிலின் விலை 100 ரூபாய்.

கடலை மிட்டாய்

வெல்லத்தைக் கொண்டு பாகு காய்ச்ச வேண்டும். பாகு உருகியதும் வறுத்த கடலை பருப்பை போட்டுக் கிளற வேண்டும். இளம் சூட்டில் அடுப்பிலிருந்து இறக்கும் தருவாயில், 1 கிலோவுக்கு 30 சதவிகிதம் சுருள்பாசி என்ற அளவில் கலந்து கடலை மிட்டாய் தயாரிக்கலாம்.

கலவையை அரிசி மாவு தடவிய சதுர பலகையில் கொட்ட வேண்டும். இதன் பின்னர் அச்சில் இட்டு, கடலை மிட்டாய் தயாரிக்கலாம். ஒரு கடலை மிட்டாய் 10 ரூபாய். பலகையில் அரிசி மாவு தடவிக்கொள்வதால் கடலை மிட்டாய் அச்சிலிருந்து எளிதாக எடுக்க வரும். இதுதவிர, கேக், ஐஸ்கிரீம், சோப்பு, குளியல் எண்ணெய், தேங்காய் எண்ணெய் ஆகியவற்றைத் தயாரிக்கும்போது சுருள்பாசி பவுடர் 30 சதவிகிதம் சேர்த்து, பொருள்களை மதிப்புக் கூட்டித் தயாரிக்கலாம்.

சந்தை வாய்ப்பு

இப்போது பார்மஸிகளிலும், ஆர்கானிக் கடைகளிலும் இவற்றை மக்கள் ஆர்வமுடன் விரும்பி வாங்குகின்றனர். அதனால் சந்தை வாய்ப்பு பற்றிய கவலை வேண்டாம். பொருள்களைத் தரமாக கொடுப்பதும் நமது சந்தை வாய்ப்பை அதிகப்படுத்தும். அதிக லாபத்திற்கு ஆசைப்பட்டு, போலிகளைத் தயாரிக்கக் கூடாது. அதேபோல மதிப்புக் கூட்டல் பற்றிய தொழில் நுட்பங்களை முறையாகக் கற்றுக்கொண்டு தொழிலை ஆரம்பித்தால் வேலை எளிதாகவும், வருமானம் அதிகமாகவும் இருக்கும். இதற்காக தமிழ்நாட்டில் பெரும்பாலான இடங்களில் பயிற்சி கொடுக்கப்படுகிறது” என்றார்.

கடந்த ஆறு வருடங்களுக்கும் மேலாக ரத்தின ராஜசிங்கம் இதுபற்றிய பயிற்சியைக் கொடுத்துவருகிறார். மாதம் 500 கிலோ வரை சுருள்பாசியை அறுவடை செய்து, பொடியை மதிப்புக்கூட்டி விற்பனை செய்துவருகிறார். சுருள்பாசி பொடியை, கிலோ 1,000 ரூபாய்க்கு விற்பனை செய்தால் 500 கிலோவுக்கு 5 லட்சம் ரூபாய் வரைக்கும் வருமானம் கிடைக்கும். இதையே மதிப்புக் கூட்டி விற்பனை செய்தால் வருமானம் இன்னும் அதிகமாகக் கிடைக்கும். இதில் ஒரு கிலோவுக்கு 350 ரூபாய் செலவு என்ற கணக்கின்படி 1 லட்சத்து 75 லட்சம் செலவு போக 3 லட்சத்து 25 ஆயிரம் லாபமாக நிற்கும். இதற்காக முறையான திட்டமிடலும் அவசியம்.

சாதாரண நிலையிலிருந்து ஒரு பொருளை மதிப்புக் கூட்டல் செய்வதன் மூலம் நல்ல லாபம் பார்க்க முடியும் எனத் தொடர்ந்து பார்த்துவருகிறோம். தொடர்ந்து இன்னும் பல பொருள்களை மதிப்புக் கூட்டல் செய்யும் முறைகள் குறித்துப் பார்ப்போம்.

(மதிப்புக் கூடும்)

துரை நாகராஜன் படங்கள் : தே.அசோக்குமார்

. சுருள்பாசி உணவின் அவசியமும், பயன்களும்!

எ திர்காலத்துக்கான சிறந்த உணவு என்று உலகச் சுகாதார நிறுவனத்தாலும் விண்வெளி ஆராய்ச்சிக்குச் செல்லும் விஞ்ஞானிகளுக்கான உணவாக நாசாவாலும் அங்கீகரிக்கப்பட்டது ‘ஸ்பைருலினா’ (Spirulina) எனும் சுருள்பாசி. மிகக் குறைந்த விலையில் நிறைந்த சத்துக்களைக்கொண்ட ஒரு மகத்துவ உணவு. சயனோ பாக்டீரியா குடும்பத்தைச் சேர்ந்த சுருள்பாசியான ஸ்பைருலினா, நன்னீரில் மிதந்து வாழும் தன்மையைக்கொண்ட நீலப்பச்சைப் பாசி. ஒரு கிலோ ஸ்பைருலினா உணவு, 1,000 கிலோ காய்கறிகளுக்குச் சமமான சத்துக்களைக் கொண்டது. எளிதில் செரிமானம் ஆகும் தன்மையும், அதிக அளவு புரதமும் இருப்பதால், உடல் வளர்ச்சிக்குப் பெரிதும் உதவுகிறது. இதில் உள்ள பீட்டாகரோட்டின், தோல் சுருக்கத்தைத் தடுத்து, பொலிவாக வைக்கிறது. நிறைவுறாத கொழுப்பு அமிலமான, காமா லைனோலெனிக் அமிலம் (Gamma linolenic acid) உடல் பருமனைக் குறைக்கக்கூடியது. ரத்தக் குழாய் தொடர்பான பிரச்னைகளையும் சரிசெய்கிறது. சூப்பர் ஆக்சைடு டிஸ்மியூடேஸ் (Superoxide dismutase-SOD) என்ற என்சைம் செல்களுக்குப் புத்துணர்ச்சியைத் தருகிறது.

பி12 கல்லீரல் மற்றும் கணையம் போன்ற உறுப்புகளுக்குத் தேவையான ஆற்றலைத் தருகிறது. மக்னீசியம், கால்சியம், பொட்டாஷியம் போன்ற இதர சத்துகளும் இதில் நிறைந்துள்ளன. இதில் அதிகம் உள்ள குளோரோபில், உடலில் உள்ள நச்சுக்களை நீக்கி, நோய் எதிர்ப்புச் சக்தியை அதிகரிக்கச் செய்கிறது. இரும்புச் சத்து அதிகம் இருப்பதால், ரத்தசோகைக்கு மருந்தாக இருக்கிறது. இதை மருத்துவரின் பரிந்துரையுடன் எடுத்துக்கொள்ளலாம்.

. ஜி.எஸ்.டி-யினால் குறைந்தது மாநிலங்களின் வருமானம்!

ஜி .எஸ்.டி வரியினால் மாநில அரசாங்களின் வரு மானம் குறையும் என்பது ஏற்கெனவே எதிர்பார்க்கப் பட்ட ஒன்றுதான். எதிர் பார்த்த மாதிரியே இந்தியா வின் பல்வேறு மாநில அர சாங்கங்களின் வருமானம் ஏறக்குறைய 39 ஆயிரம் கோடி ரூபாய் அளவுக்குக் குறையும் என கணக்கிடப் பட்டிருக்கிறது. இது வெறும் நான்கு மாதங்களுக் கான கணக்கு மட்டுமே. முழு ஆண்டுக்கு சுமார் 90 ஆயிரம் கோடி ரூபாய் வரை பற்றாக்குறை ஏற்படும் என எதிர்பார்க்கப்படுகிறது. ஜி.எஸ்.டி வரி நடை முறைப் படுத்துவதற்குமுன், இந்தப் பற்றாக்குறை ரூ.55 ஆயிரம் கோடிகளாக மட்டுமே இருக்கும் என சொல்லப்பட்டது.

கொஞ்சம் ப்ளஸ்... நிறைய லாபம்! - சூப்பர் வருமானம் தரும் சுருள்பாசி!

துரை.நாகராஜன்