ஆசிரியர் பக்கம்
கார்ஸ்
Published:Updated:

தீபாவளி சரவெடி... புது எர்டிகா ரெடி!

தீபாவளி சரவெடி... புது எர்டிகா ரெடி!
பிரீமியம் ஸ்டோரி
News
தீபாவளி சரவெடி... புது எர்டிகா ரெடி!

மாற்றம் / மாருதி எர்டிகாதொகுப்பு: தமிழ்

மாருதி பிரியர்கள் தயாராக இருங்கள்; எர்டிகா மூலம் எகிறியடிக்கக் காத்திருக்கிறது மாருதி. அண்மையில் நடந்த இந்தோனேஷியா மோட்டார் ஷோவில் செம ஸ்டைலான எர்டிகாவைக் காட்சிக்கு வைத்துப் பரவசப்படுத்திவிட்டது மாருதி. சட்டெனப் பார்க்கும்போது எர்டிகாவா இது என்று நம்ப முடியவில்லை. நமக்குக் கிடைத்த தகவல்களின்படி எர்டிகா இப்படித்தான் இருக்கும். முன்பைவிட கொஞ்சம் பெரிதாக வளர்ந்திருக்கிறது எர்டிகா. ஃப்ரெஷ் லுக்கில், ஸ்டைலிஷான அலாயோடு அசத்துகிறது. பழசைவிட மூக்குக் கொஞ்சம் அகலமாக இருக்கிறது. கிரில்கள் சாதாரண, நீளமான டிசைன்தான்; ஆனால் ஸ்போர்ட்டி! தூரத்தில் இருந்து முன் பக்கத்தைப் பார்த்தால், சட்டென இனோவா போல் தெரிகிறது. ஹெட்லைட்டுகளுக்கு குரோம் ஃபினிஷிங் ஸ்டைலிஷ். இது பென்ஸ் ‘A’ கிளாஸை நினைவுப்படுத்தியது. கீழே பனி விளக்குகளைத் தனியாக ‘C’ வடிவ பிராக்கெட்டில் கொடுத்தது நச் ஐடியா. இது ஃபார்முலா கார் விங்குகளை நினைவுப்படுத்தியது. முன் பக்கம் பென்ஸ் என்றால், பின் பக்கம் டெய்ல் லைட்டுகள் வால்வோ XC-60 காரை நினைவுப்படுத்தின. வால்வோவில் டெயில் லைட்டுகளை இப்படித்தான் உயர்த்தி டிசைன் செய்திருப்பார்கள். ‘D’ பில்லரும் இனோவாவை நினைவுபடுத்துகிறது. காரின் பக்கவாட்டில் ஷார்ப்பான கோடுகள் எடுப்பாக இருக்கின்றன. மொத்தத்தில் டிசைனில் பல கார்களின் கலவைகளில் கலந்துகட்டி அடிக்க வருகிறது எர்டிகா.

பழசைவிட நீளத்தில் 99 மிமீ-யும், அகலத்தில் 40 மிமீ-யும் கூடியிருக்கிறது புதிய எர்டிகா. நிச்சயம் கேபின் இடவசதி தாராளமாக இருக்கும். ஆனால், வீல்பேஸ் அதே 2,740 மிமீதான். 3-வது வரிசை சீட்டுகளில் ஏதேனும் இடவசதி மாற்றம் இருந்தால் நல்லது. ஃப்யூல் டேங்க் அதே 45 லிட்டர். இந்தோனேஷியா காரில் 180 மிமீ கிரவுண்ட் கிளியரன்ஸ் இருந்தது. ஆனால், விற்பனையில் இருக்கும் நம் எர்டிகாவின் கி.கி - 185 மிமீ.

தீபாவளி சரவெடி... புது எர்டிகா ரெடி!

வழக்கமான மாருதிகள் போல் ‘ஹார்ட்டெக்’ பிளாட்ஃபார்மில்தான் தயாரிக்கப்பட்டிருக்கிறது புதிய எர்டிகாவும். அண்டர்பாடி கன்ஸ்ட்ரக்ஷன் உறுதியாகத் தயாரிக்கப்பட்டு இருப்பதால், விபத்துகளின்போது பாதிப்புகளைக் குறைக்கும் என்கிறது மாருதி. அப்படியென்றால், எடை குறைவாக இருக்கும். பெர்ஃபாமென்ஸும் மைலேஜும் இன்னும் அதிகரிக்கலாம்.

எர்டிகா மேனுவல்/ஆட்டோ என முதலில் பெட்ரோலில்தான் வரலாம். 1.5 லிட்டர், 104bhp பவர் கொண்ட K15B பெட்ரோல் இன்ஜின். 5 ஸ்பீடு மேனுவலுக்கு 18.06 கி.மீ-யையும், 4 ஸ்பீடு டார்க் கன்வெர்ட்டர் ஆட்டோமேட்டிக்குக்கு 16.73 கி.மீ-யையும் க்ளெய்ம் செய்கிறது மாருதி. 185/65 செக்ஷன் கொண்ட அதே 15 இன்ச் அலாய் வீல்கள்தான்.

தீபாவளி சரவெடி... புது எர்டிகா ரெடி!

உள்பக்கம் - அப்படியே டிசையர். ஃப்ளாட் பாட்டம் ஸ்டீயரிங் வீல், இன்ஸ்ட்ரூமென்ட் பேனல் எல்லாமே டிசையரில் இருந்துதான் எடுத்திருக்கிறார்கள். டேஷ்போர்டின் கீழே பீஜ் கலர், மேலே கறுப்பு நிறம். இது ஒரு மாதிரி புதுமையாகத்தான் இருக்கிறது. ஒரு சந்தோஷமான விஷயம் - இதில் 6.8 இன்ச் டச் ஸ்கிரீன் இன்ஃபோடெயின்மென்ட் சிஸ்டம் இருந்தது. இந்தோனேஷிய மாடலில் இருந்த கூல்டு கப் ஹோல்டர்கள் இந்தியாவுக்கு வந்தால், செமையாக இருக்கும். இந்தோனேஷிய மாடலில் ஆட்டோமேட்டிக் கிளைமேட் கன்ட்ரோல் இல்லை. ஆனால், நமக்கு வரவிருக்கும் எர்டிகாவின் ஸ்பை ஷாட்டில் ஆட்டோ கிளைமேட் கன்ட்ரோல் இருந்தது.

எர்டிகாவின் ஸ்பெஷலே டீசல்தான். அதுவும் 1.3 லிட்டர் மல்ட்டிஜெட் ஃபியட் இன்ஜின்தான் எர்டிகாவுக்குப் பெயர் வாங்கிக் கொடுத்ததே! வாடிக்கையாளர்கள் நிச்சயம் டீசலை எதிர்பார்ப்பார்கள். சொல்ல முடியாது - அதைத் தாண்டி 1.5 லிட்டர் டீசல் இன்ஜின் கொடுத்து மாருதி அசத்தினாலும் ஆச்சரியப்படுவதற்கில்லை. வரும் தீபாவளிக்கு எல்லாம் வெட்ட வெளிச்சமாகிவிடும்.