Published:Updated:

கைவிரிக்கும் சர்க்கரை ஆலைகள்... கையாலாகாத தமிழக அரசு...

கைவிரிக்கும் சர்க்கரை ஆலைகள்... கையாலாகாத தமிழக அரசு...
பிரீமியம் ஸ்டோரி
News
கைவிரிக்கும் சர்க்கரை ஆலைகள்... கையாலாகாத தமிழக அரசு...

கவலையில் கரும்பு விவசாயிகள்

‘‘எங்களுக்கு வழங்க வேண்டிய நிலுவைத் தொகை பல கோடி ரூபாயைத் தர மறுக்கும் தனியார் சர்க்கரை ஆலைகளை அரசே ஏற்று நடத்த வேண்டும்” என்று கொந்தளிக்கிறார்கள் கரும்பு விவசாயிகள்.

கடலூர் மாவட்டத்தில் உள்ள அம்பிகா சர்க்கரை ஆலை, தஞ்சை மாவட்டத்தில் உள்ள திருஆரூரான் சர்க்கரை ஆலை ஆகிய இரண்டும், கடந்த மூன்று ஆண்டுகளாக விவசாயிகளுக்குத் தர வேண்டிய பல கோடி ரூபாயைத் தராமல் பாக்கிவைத்துள்ளன. நிலுவைத் தொகையை வழங்க வேண்டும் என்று விவசாயிகள் தொடர்ந்து போராட்டங்களை நடத்தி வருகின்றனர். இந்த நிலையில், இந்த ஆலைகளின் குடோன்களுக்கு அதிகாரிகள் சீல் வைத்துள்ளனர்.

கைவிரிக்கும் சர்க்கரை ஆலைகள்... கையாலாகாத தமிழக அரசு...

இது தொடர்பாக, தஞ்சை மாவட்ட காவிரி விவசாயிகள் பாதுகாப்புச் சங்கத்தின் செயலாளர் சுந்தர விமலநாதன், ‘‘திருஆரூரான் சர்க்கரை ஆலை 2016-17, 2017-18 ஆகிய ஆண்டுகளுக்கு வழங்க வேண்டிய 40 கோடி ரூபாயை இன்னும் வழங்கவில்லை. இதற்காக, விவசாயிகளைத் திரட்டிப் போராட்டங்களை நடத்திவந்தோம். இந்நிலையில்தான், வருவாய் வசூல் சட்டத்தின்கீழ் சர்க்கரை ஆலையில் உள்ள குடோனுக்குத் தஞ்சை மாவட்ட நிர்வாகம் சீல் வைத்தது. குடோனில் 1,506 டன் சர்க்கரை மூட்டைகள் இருந்ததாகச் சொல்லப்படுகிறது. அதிகாரிகள் சீல் வைக்கப்போகும் தகவல், முன்கூட்டியே ஆலை நிர்வாகத்துக்குத் தெரிவிக்கப் பட்டுள்ளது. அதனால், பெரும்பாலான சர்க்கரை மூட்டைகளை ஆலை நிர்வாகம் அப்புறப்படுத்தி விட்டது. சீல் வைக்கப்பட்டுள்ள சர்க்கரையை விற்பனை செய்தால், மூன்று கோடி ரூபாய்தான் கிடைக்கும். ஆனால், விவசாயிகளுக்கு வரவேண்டிய தொகையோ 40 கோடி ரூபாய்.

விவசாயிகள் கொடுக்கும் கரும்பினால் ஆலை பல கோடி ரூபாய் லாபம் சம்பாதிக்கிறது. கரும்புச் சக்கையிலிருந்து மின்சாரம் தயாரிக்கிறது. 1996-ம் ஆண்டு 28 கோடி ரூபாயில் ஆரம்பிக்கப் பட்ட துணைமின் நிலையத்தின் மூலம், 10 ஆண்டுகளில் 210 கோடி ரூபாய் லாபம் சம்பாதித் துள்ளனர். கரும்புக் கழிவுப் பொருள்களிலிருந்து தயாரிக்கப்படும் காகிதம், உரம், எத்தனால் ஆகியவற்றின் மூலமாகவும் கோடிக்கணக்கில் லாபம் பார்க்கிறார்கள். ஆனால், விவசாயிகளுக்குப் பணம் தருவதற்கு மட்டும் அவர்களுக்கு மனம் வரவில்லை. ஆரூரான் சர்க்கரை ஆலையைத் தமிழக அரசே ஏற்று நடத்த வேண்டும்” என்றார்.

இதேபோல கடலூர் மாவட்டம் பெண்ணாடத்தில் உள்ள அம்பிகா சர்க்கரை ஆலையின் குடோனுக்கும் சீல் வைக்கப்பட்டுள்ளது. இப்பகுதியைச் சேர்ந்த முன்னோடி கரும்பு விவசாயி கோதண்டராமன், ‘‘இந்தச் சர்க்கரை ஆலை, விவசாயிகளுக்கு 60 கோடி ரூபாய் தர வேண்டியுள்ளது. குடோனுக்கு சீல் வைக்கப்பட்டதன் மூலமாக, அங்கிருந்த ஒன்பது ஆயிரம் டன் சர்க்கரை கைப்பற்றப்பட்டுள்ளது. அதை விற்பனை செய்தால், விவசாயிகளுக்கு 25 கோடி ரூபாயைக் கொடுக்கலாம். தனியார் சர்க்கரை ஆலைகள் திட்டமிட்டே விவசாயிகளை ஏமாற்றுகின்றன. மத்திய அரசின் திறமையற்ற செயல்பாடுகளால், சர்க்கரை ஆலைகள் கடுமையான நெருக்கடிக்குத் தள்ளப்பட்டிருப்பதும் இப்பிரச்னைக்குக் காரணம்’’ என்றார்.

கைவிரிக்கும் சர்க்கரை ஆலைகள்... கையாலாகாத தமிழக அரசு...

‘‘நிலுவைத் தொகையை வழங்காத ஆலையில் உள்ள சர்க்கரையைப் பறிமுதல் செய்து விற்பது, இப்பிரச்னைக்குத் தீர்வு ஆகாது. சொத்துகள் ஜப்தி என்ற நடவடிக்கை, ஆலையை முடக்கும் நிலைக்குக் கொண்டுபோகும். இதனால், இந்த ஆலைகளை நம்பியுள்ள விவசாயிகளின் வாழ்வாதாரம் முற்றிலும் பாதிக்கப்படும். ஆலை நிர்வாகங்களுடன் பேச்சுவார்த்தை நடத்தி, இந்தப் பிரச்னைக்குத் தீர்வுகாண வேண்டும்” என்கிறார் கரும்பு விவசாயிகள் சங்கத்தின் மாநிலச் செயலாளர் கார்மாங்குடி வெங்கடேசன்.

வெலிங்டன் நீர்ப்பாசன விவசாயிகள் சங்கத்தின் செயலாளர் சோமசுந்தரம், ‘‘கரும்பு அனுப்பிய 14 நாள்களுக்குள், கரும்புக்கான தொகையை விவசாயிகளுக்கு சர்க்கரை ஆலை நிர்வாகம் வழங்க வேண்டும். அப்படி முடியாத நிலையில், 15 சதவிகிதம் வட்டியை வழங்க வேண்டும். இதுதான் சட்டம். ஆனால், கடந்த இரண்டு ஆண்டுகளில் அனுப்பிய கரும்புக்கான 12 கோடி ரூபாயை, 15 மாதங்கள் ஆகியும் விவசாயிகளுக்கு சர்க்கரை ஆலைகள் வழங்கவில்லை. எங்கள் பெயரில் வங்கிக் கடன் இருப்பதால், வேறு பயிர்க் கடன் வாங்க முடியாத நிலை உள்ளது. குடும்பத்தில் எந்தச் செலவும் செய்ய முடியாமல், எங்களின் வாழ்வாதாரம் முற்றிலும் பாதிக்கப்பட்டுள்ளது’’ என்றார்.

கைவிரிக்கும் சர்க்கரை ஆலைகள்... கையாலாகாத தமிழக அரசு...

விவசாயிகளின் கோரிக்கை குறித்து தமிழக வேளாண்மைத் துறை அமைச்சர் துரைக் கண்ணுவிடம் பேசினோம். “நானும், தொழில்துறை அமைச்சர் எம்.சி.சம்பத்தும், மின்துறை அமைச்சர் தங்கமணியும் சேர்ந்து, சர்க்கரை ஆலை அதிபர்களிடம் 10 முறைக்கு மேல் பேச்சுவார்த்தை நடத்திவிட்டோம். விவசாயிகளுக்குத் தர வேண்டிய பணத்தைச் சீக்கிரம் கொடுக்குமாறு வலியுறுத்தினோம். ‘ஆலைகள் நஷ்டத்தில் இயங்குவதால், நிலுவைத்தொகையைத் தர வாய்ப்பில்லை’ என்று சொல்லிவிட்டனர். எனவே, சீல் வைக்க நடவடிக்கை எடுத்தோம். இனியும் பணம் தரவில்லையென்றால், அடுத்த கட்ட நடவடிக்கை குறித்து ஆலோசிக்கப்படும்” என்றார்.

பேச்சுவார்த்தை நடத்திய மூன்று அமைச்சர்களிடம், ‘நிலுவைத் தொகையைத் தர மாட்டோம்’ என்று சொல்லும் தைரியம் தனியார் ஆலை முதலாளிகளுக்கு வருகிறது என்றால், தமிழக ஆட்சி எந்த லட்சணத்தில் இருக்கிறது என்பது தெரிகிறது.

- கு.ராமகிருஷ்ணன், ஜி.சதாசிவம்
படங்கள்: எஸ்.தேவராஜன், ம.அரவிந்த்