குளத்தில் ஹோட்டல்... குழம்பும் நகராட்சி! - ‘குபீர்’ கிளப்பும் ‘டபீர்’ குளம்

நீ ர்நிலைகளில் உள்ள அனைத்து ஆக்கிரமிப்புகளையும் அகற்ற வேண்டும் என உயர் நீதிமன்றம் முதல் உச்ச நீதிமன்றம் வரை கடுமையான உத்தரவுகளைப் பிறப்பித்துள்ள நிலையில், மயிலாடுதுறையில் ஒரு குளத்தையே ஆக்கிரமித்து ஹோட்டல் நடத்துகிறார் ஒருவர். அதை, அரசின் அனைத்துத் துறைகளும் வேடிக்கை பார்க்கின்றன.

. நாகை மாவட்டம் மயிலாடுதுறை நகரில், திருவாவடுதுறை ஆதீனத்துக்குச் சொந்தமான டபீர் குளம் உள்ளது. இதன் சந்தை மதிப்பு ரூ.15 கோடி என்று சொல்லப்படுகிறது. ஆக்கிரமிப்பில் உள்ள அந்தக் குளத்தை மீட்பதற்கு கடந்த இரண்டு ஆண்டுகளாகப் போராடிவருகிறார், திருக்கோயில் திருமடங்கள் பாதுகாப்புப் பேரவையின் மாநிலச் செயலாளர் அழகிரிசாமி. அவரைச் சந்தித்தோம்.

‘‘காசி விஸ்வநாதர் கோயில் அருகே உள்ள டபீர் குளம், 66,655 சதுர அடி பரப்பளவு கொண்டது. இந்தக் குளத்தையும், குளத்தின் நீர்வரத்துப் பாதைகளையும் சேர்த்து சுமார் 40,000 சதுர அடி பரப்பளவுக்கு ஆக்கிரமித்து ஹோட்டல் ஒன்று கட்டப்பட்டுள்ளது. இதுபற்றி, தகவல் அறியும் உரிமைச் சட்டத்தின்கீழ் நகராட்சி மற்றும் அறநிலையத் துறையிடமிருந்து தகவல் பெற்றுள்ளேன். மயிலாடுதுறை நகராட்சி, ‘மேற்கண்ட குளம் ஆக்கிரமிப்பில் உள்ளது. அதை அகற்றுவதற்கு எங்களுக்கு அதிகாரம் இல்லை’ என்று தெரிவித்துள்ளது. மேலும், ‘அந்த இடத்தில் எந்தவிதக் கட்டடமோ, கொட்டகையோ கட்டுவதற்கு நகராட்சி நிர்வாகம் அனுமதி அளிக்கவில்லை’ என்றும் பதில் அளித்துள்ளனர். ஆனால், அங்கு ஹோட்டல் நடத்த அனுமதி தந்து, அதற்கு வரியும் வசூலிக்கிறது நகராட்சி நிர்வாகம்.

. இந்தக் குளம் திருவாவடுதுறை ஆதீனத்துக்குச் சொந்தமானது என்பதால், அதனைக் கண்காணிக்கும் பொறுப்பு இந்து சமய அறநிலையத் துறைக்கு உள்ளது. அவர்களோ, குளத்தில் கட்டடம் கட்டுவதற்குத் துறை சார்ந்த அனுமதி எதுவும் வழங்கப்படவில்லை என்று தெரிவித்துள்ளனர். இதைத் தவிரவும் டபீர் குளத்தின் மற்ற பகுதிகளையும் தனியாருக்குப் பட்டா போட்டுக் கொடுத்து, பெரும் தொகையை ஆதீன நிர்வாகம் பெற்றுள்ளது என்று பேசப்படுகிறது. இதுதொடர்பாக, சம்பந்தப்பட்ட துறைகள் அனைத்துக்கும் புகார் அனுப்பியுள்ளேன். ஆனால், எந்த நடவடிக்கையும் இல்லை. உச்ச நீதிமன்ற உத்தரவைத் தமிழக அரசு மதிக்க வேண்டாமா? நீர்நிலைகளைப் பாதுகாக்க வேண்டாமா?’’ என்றார் ஆதங்கத்துடன்.

டபீர் குளத்தில் ஹோட்டல் கட்டி நடத்திவரும் ஹர்சித்திடம் விளக்கம் கேட்டோம். ‘‘1980-ல் இந்த இடத்தை வாங்கி பதிவுசெய்துள்ளோம். இந்த இடம் எங்களுக்குச் சொந்தமானது என்பதற்கான அனைத்து ஆவணங்களும் எங்களிடம் உள்ளன’’ என்றார்.

திருவாவடுதுறை ஆதீன மேலாளர் குருமூர்த்தியிடம் கேட்டதற்கு, ‘‘அவங்க, குளத்துல ஹோட்டல் கட்டல. குளக்கரையிலதான் கட்டியிருக்காங்க. இதுபற்றி ஆர்.டி.ஓ அளவில் புகார் சென்று, அதிகாரிகள் வந்து ஆய்வு செஞ்சிட்டுப் போயிட்டாங்க. இதுல பிரச்னை ஏதும் இல்லை’’ என்றார் கூலாக.

மயிலாடுதுறை நகராட்சி நிர்வாகத்திடம் கேட்டபோது, ‘‘ஹோட்டல் கட்டுவதற்கு நாங்கள் அனுமதி கொடுக்கவில்லை. அங்கே கட்டடம் இருப்பதால், வரிவசூல் செய்கிறோம். அந்தக் கட்டடத்தை அரசு அகற்றினால், நாங்கள் வரி வசூலை நிறுத்திக்கொள்ளப் போகிறோம். அவ்வளவுதான்’’ என்றனர் சிம்பிளாக.

தொடர்புடைய எல்லோரும் இப்படி தொடர்பில்லாமல் பதில் சொல்லும் நிலையில், கபளீகரம் செய்யப்பட்ட டபீர் குளத்தை மீட்கப்போது யார்? - மு.இராகவன் படங்கள்: செ.ராபர்ட்