அதிகாரி முதல் ஆளும் கட்சியினர்வரை பங்கு... அம்பலமாகும் ஆ...வின் அட்ராசிட்டி!

ஐ ம்பது பைசாவோ, ஒரு ரூபாயோ, இரண்டு ரூபாயோ அதிகமாக வசூலிப்பது பெரிய விஷயமாக இல்லாமல் இருக்கலாம். ஆனால், தமிழகம் முழுக்க ஒவ்வொரு நாளும் பல லட்சம் ஆவின் பாக்கெட்டுகள் இப்படி அதிக விலைக்கு விற்கப்படுவது நிச்சயமாக மிகப்பெரிய மோசடி.

ஆவின் விற்பனை நிலையங்களில், ‘பால் பாக்கெட்டில் குறிப்பிடப்பட்டுள்ள அதிகபட்ச சில்லரை விலைக்கே விற்கப்பட வேண்டும். விலைப்பட்டியல் வைக்க வேண்டும். ஆவின் தயாரிப்புகள் தவிர வேறு எதையும் விற்கக்கூடாது. வாடிக்கையாளர்களுக்கு பில் தர வேண்டும்’ என்பது விதி. இந்த விதிமுறைகளை மீறிச் செயல்படும் ஆவின் விற்பனை நிலையங்கள், பால் முகவர்கள், தவறு செய்தவர்கள்மீது எடுக்கப்பட்ட நடவடிக்கைகள் குறித்த விவரங்களைத் தகவல் அறியும் உரிமைச் சட்டம் மூலம் ஆவின் நிறுவனத்திடம் கேட்டிருந்தோம்.

ஆவின் பொருள்கள் கூடுதல் விலைக்கு விற்கப்படுவதாக 2016-ம் ஆண்டு மட்டும் சென்னை நந்தனத்தில் உள்ள ஆவின் அலுவலகத்துக்கு 30 புகார்கள் வந்திருக்கின்றன. அவை ஒவ்வொன்றின்மீதும் என்ன நடவடிக்கைகள் எடுக்கப்பட்டன எனக் கேட்டிருந்தோம். அதற்கு, ‘நடவடிக்கை எடுக்கப்படுகிறது’ என்று இரண்டை வார்த்தைகளில் பதிலை முடித்துவிட்டனர். உண்மை நிலவரத்தை அறிவதற்காக ஜூ.வி செய்தியாளர்கள் தமிழகம் முழுக்கப் பயணித்தனர். பல அட்ராசிட்டிகள் நம் கவனத்துக்கு வந்தன!

. அதிகாரிகளுக்குக் கப்பம்

சென்னையில் ஆளும் கட்சிக்கு நெருக்கமான மூன்று பேர்தான் ஆவின் சந்தையைக் கையில் வைத்துள்ளனர். இவர்கள் மூலம்தான் சென்னையில் 12.50 லட்சம் ஆவின் பால் பாக்கெட்கள் விற்பனையாகின்றன. மேற்கு மாம்பலம் தம்பையா சாலையிலுள்ள மாநகராட்சி மண்டல அலுவலக வளாகத்தில் ஓர் ஆவின் பூத் உள்ளது. ஜூன் ஒன்றாம் தேதி இங்கு பால் வாங்கச் சென்றோம். மூன்று அரை லிட்டர் பச்சை வண்ணப் பால் பாக்கெட்கள் வாங்கினோம். பாக்கெட்டில் 20 ரூபாய் 50 பைசா என்று போட்டிருந்தது. ஆனால், பூத்தில் இருந்தவர் தலா 21 ரூபாய் வீதம் 63 ரூபாய் வாங்கினார். “ஏன் கூடுதலாகக் கேட்கிறீர்கள்?’’ என்று நாம் கேட்க, ஒன்றும் பேசாமல் நம் பையில் இருந்த பால் பாக்கெட்களைத் திரும்பவும் எடுத்தார். “நான் பணம் கொடுக்கிறேன். என்ன காரணம் சொல்லுங்கள்” என்றதற்கு, “எங்களிடம் முதலிலேயே மொத்தமாகப் பணம் வாங்கி விடுகின்றனர். அதனால், இப்படிக் கூடுதல் விலைக்கு விற்க வேண்டியுள்ளது. அதிகாரிகளுக்கு இது போகிறது. இதற்கு மேல் எதுவும் கேட்காதீர்கள்” என்றார் எரிச்சலுடன்.

துண்டு பேப்பரில் பில்!

கொங்கு மண்டலத்தில் ஆளும் கட்சிப் பிரமுகர்கள் பணத்தை வாங்கிக்கொண்டு, ஆவின் பெயரில் கடைகள் நடத்த அனுமதி வாங்கிக் கொடுத்துவிடுகிறார்கள். அரசுக்கு ரூ. 50,000 டெபாசிட் கட்ட வேண்டும். அனுமதி வாங்கிக் கொடுக்கும் அரசியல்வாதிகளையும் கவனிக்க வேண்டும். இப்படி, ஆவின் பெயரில் கடை நடத்துபவர்கள், அதிலேயே டீ, காபி, பஜ்ஜி, போண்டா போன்றவற்றை விற்கின்றனர். பாலுக்கு பில் கொடுப்பதில்லை. “பில் கொடுக்க மாட்டீங்களா?’’ என்று கேட்டதற்கு, “துண்டு பேப்பர்ல எழுதிக் கொடுப்போம்” என்கின்றனர். 50 காசு முதல் ஒரு ரூபாய் வரை அதிகம் வைத்துத்தான் பால் பாக்கெட்கள் விற்பனை செய்யப்படுகின்றன. சில ஏஜென்டுகள், அருகில் உள்ள மளிகைக் கடைகளுக்கு பால் பாக்கெட்களை மொத்தமாக விற்றுவிட்டு, பூத்தை மூடிவிடுகின் றனர். அங்கு, இரண்டு ரூபாய் வரை அதிக விலை கொடுத்து மக்கள் பால் வாங்குகின்றனர்.

நீலகிரியில் உள்ள ஆவின் பூத்களில் பால் பாக்கெட் இரண்டு ரூபாய் வரை அதிக விலைக்கு விற்கின்றனர். திருப்பூரில் 22 ரூபாய்க்கு விற்க வேண்டிய 500 மி.லி பால், 24 ரூபாய்க்கு விற்கப்படுகிறது. சில இடங்களில் லிட்டருக்கு 5 ரூபாய் வரை கூடுதலாக விற்கின்றனர். ஆவின் பூத்களில் விற்கப்படும் சுடுபால், 100 மி.லி 10 ரூபாய்க்கு விற்கப்படுகிறது. அதில் தண்ணீரைக் கலந்து லாபம் பார்க்கிறார்கள். ஆவின் பூத் ஏஜென்ட்கள் பலரும் பால் பாக்கெட்டுகளை மொத்தமாக மளிகைக் கடைகளுக்கு அதிக விலை வைத்து விற்கிறார்கள். ஆவின் பாலகங்கள் டீக்கடைகளாக அவதாரம் எடுத்துள்ளன. அங்கு டீ போடுவதற்குக்கூட அவர்கள் ஆவின் பால் பயன்படுத்துவதில்லை.

தயாரிப்புத் தேதி இல்லை

சேலம் ஆவின் பூத்களில் பால்கோவா, பன்னீர், தயிர், மோர், ஐஸ்க்ரீம் போன்ற பொருள்களில் தயாரிப்புத் தேதி, காலாவதி தேதி இரண்டுமே கிடையாது. கால் லிட்டர் பாலுக்கு 50 பைசாவும், அரை லிட்டருக்கு ஒரு ரூபாயும், ஒரு லிட்டருக்கு இரண்டு ரூபாயும் எம்.ஆர்.பி-யைவிட ஜாஸ்தி. மில்க் ஷேக் எம்.ஆர்.பி-யைவிட மூன்று ரூபாய் ஜாஸ்தி. நாமக்கல்லிலும் இதே நிலைதான். இந்தத் தொகை பூத் ஏஜென்ட், சப்ளையர், ஆவின் அலுவலர்கள் வரை செல்கிறது.

தேனி மாவட்டத்தில் உடனடி லாபம் பெற ஒரு ரூபாய் முதல் ஐந்து ரூபாய் வரை அதிகம் வைத்து பால் மற்றும் பால் பொருள்களை விற்கிறார்கள். பால் கார்டு பற்றிய விழிப்பு உணர்வு மக்களிடம் இல்லை. பெரும்பாலான ஆவின் பூத்கள் டீக்கடைகளாக மாறியுள்ளன.

ராமநாதபுரம் மாவட்டத்தில் அரை லிட்டர் பாக்கெட் ரூ.1.50 கூடுதலாக விலை வைத்து விற்கப்படுகிறது. வீட்டுக்கே நேரடியாக வந்து கொடுப்பதற்கு ரூ.3.50 கூடுதலாகக் கொடுக்க வேண்டியுள்ளது. ஆவின் தயாரிப்புகளான வெண்ணெய், நெய், பால்கோவா போன்றவற்றில் தயாரிப்புத் தேதி ஸ்டிக்கர்கள் ஒன்றுக்கு மேல் ஒன்று ஒட்டப்படுகின்றன.

கூலிங் சார்ஜ்!

நெல்லை மாவட்டத்தில் ஆவின் பால், லிட்டருக்கு நான்கு ரூபாய் அதிகமாக வைத்து விற்கப்படுகிறது. நெல்லை நகரில் ஆவின் பாலகம் என்கிற பெயரில் 100-க்கும் அதிகமான தனியார் பாலகங்கள் உள்ளன. அங்கு, ஆவின் பொருள்கள் விற்கப்படுவதில்லை. ஆளும்கட்சியினர், தங்களின் செல்வாக்கைப் பயன்படுத்தி ‘ஆவின் பாலகம்’ என்கிற பெயரில் சாலையோரங்களை ஆக்கிரமித்துக் கடைகளை அமைத்து உள் வாடகைக்கு விட்டுள்ளனர்.

தூத்துக்குடியில் தனியார் ஆவின் பூத்களில் கால் லிட்டர் பாக்கெட்டுகள் ரூ.1 கூடுதலாகவும், அரை லிட்டர் பாக்கெட்டுகள் ரூ.2 முதல் 3 வரை கூடுதலாகவும், ஒரு லிட்டர் ரூ.3 முதல் 4 வரை கூடுதலாகவும் விற்பனை செய்யப்படுகின்றன. வீட்டுக்கு டெலிவரி செய்பவர்கள், லிட்டருக்கு ரூ.2 முதல் 4 வரை கூடுதலாக வசூலிக்கின்றனர்.

. கடலூர் மாவட்டத்தில் பாக்கெட்டுக்கு ஒரு ரூபாய் கூடுதலாக விற்கப்படுகிறது. ‘‘ஃப்ரிட்ஜில் வைத்து விற்பனை செய்வதால் கூடுதல்தொகை வசூலிக்கிறோம்’’ என்கின்றனர்.

திருச்சி மாவட்டத்தில் 300-க்கும் மேற்பட்ட ஆவின் பூத்கள் உள்ளன. சில இடங்களில் நெய், வெண்ணெய், பால் பவுடர் என ஆவின் தயாரிப்புகள் விற்கப்படுகின்றன. மேலும் சில இடங்களில் ஆவின் ஹைடெக் ஐஸ்க்ரீம் ஜங்ஷன் போன்றவையும் உண்டு. திருச்சியிலும் பல இடங்களில் 3 ரூபாய் வரை கூடுதல் விலைக்கு பால் விற்கப்படுகின்றன.

தஞ்சாவூரில் அரை லிட்டர் பால் இரண்டு ரூபாய் அதிகமாகவும், ஒரு லிட்டர் பால் நான்கு ரூபாய் அதிகமாகவும் விற்கப்படுகிறது. நாகப்பட்டினம் மாவட்டத்தில் ரூ.5 வரை கூடுதல் விலைக்கு விற்கப்படுவதைக் காண முடிந்தது. கன்னியாகுமரி மாவட்டத்தில் புதிதாக ஆவின் பாலகங்கள் ஆங்காங்கே திறக்கப்படுகின்றன. அவை, பெரும்பாலும் பணம் பெற்றுக்கொண்டே வைக்கப்படுகின்றன. இதற்கு முன்பு டாஸ்மாக் கடை வழங்கப்பட்டது போன்று சில பாலகங்கள் கட்சி நிர்வாகிகளுக்கு வழங்கப்பட்டுள்ளன. அவர்கள் வேறு ஒருவருக்கு அதை தினசரி வாடகைக்கு விட்டுச் சம்பாதிக்கிறார்கள்.

ஏன் அதிக விலை?

தமிழகம் முழுவதும் விகடன் குழுமச் செய்தியாளர்கள் களத்தில் கண்ட விஷயங்களை ஆவின் நிர்வாக இயக்குநர் காமராஜிடம் சொல்லி விளக்கம் கேட்டோம். ‘‘பால் பாக்கெட் ஐந்து ரூபாய் வரை அதிக விலை வைத்து விற்கப்படுவதில்லை. சில்லரை பிரச்னை காரணமாக இதுபோல நடந்திருக்கும். பெரும்பாலான இடங்களில் விலைப் பட்டியல் வைத்திருக்கின்றனர். டீக்கடை போல நடத்துவதில்லை. சேலத்தில் தயாரிப்புத் தேதி இல்லாமல் விற்க வாய்ப்பில்லை. அங்குள்ள உணவுப் பாதுகாப்பு அதிகாரி நடவடிக்கை எடுக்கக்கூடியவர். நெல்லையில் தினமும் 50 ஆயிரம் மாமூல் கொடுப்பதாகக் கூறப்படுவது குறித்து விசாரிக்கிறோம். அதிகாரிகள் பினாமி பெயர்களில் கடை நடத்தினால், விஜிலென்ஸ் அதிகாரிகள் கண்டுபிடித்து விடுவார்கள். ஓய்வுபெற்றவர்கள் ஏஜென்சி எடுத்து நடத்துவார்கள். அதை நாம் தடுக்க முடியாது. ஆவினில் தவறே நடக்கவில்லை என்று சொல்லவில்லை. கஷ்டப்பட்டு சேவை செய்துகொண்டிருக்கிறோம். அங்கொன்றும் இங்கொன்றுமாக சிறிய தவறுகள் நடக்கின்றன. எங்கள் கவனத்துக்கு வரும்போது நடவடிக்கை எடுக்கிறோம்” என்றார் அவர்.

‘அங்கொன்றும் இங்கொன்றுமாக அல்ல, பெரும்பாலான இடங்களில் தவறாகவே நடக்கின்றன’ என்ற விஷயத்தை அவரிடம் தெளிவாகவே சொல்லியிருக்கிறோம். நடவடிக்கை இருக்கும் என நம்புகிறோம். - ஜூ.வி டீம் படங்கள்: தி.விஜய், க.சதீஷ்குமார்

அதிகாரி முதல் ஆளும் கட்சியினர்வரை பங்கு... அம்பலமாகும் ஆ...வின் அட்ராசிட்டி!

ஜூனியர் விகடன் டீம்