Published:Updated:

“நோபல் பரிசு வாங்கின மாதிரி சந்தோஷம்!”

விகடன் விமர்சனக்குழு

ஒட்டுமொத்த விகடனுக்கும் ஒரே ஷார்ட்கட்

Use App
“நோபல் பரிசு வாங்கின மாதிரி சந்தோஷம்!”
“நோபல் பரிசு வாங்கின மாதிரி சந்தோஷம்!”

வீயெஸ்வி - படங்கள்: கே.ராஜசேகரன்

பிரீமியம் ஸ்டோரி

‘இவராமே... அவராமே...’ என்று மே மாதத்திலிருந்தே பெயர்கள் கசிய ஆரம்பித்து விட்டன!

மியூசிக் அகாடமியின் `சங்கீத கலாநிதி’ விருதுக்கு, தவில் அரித்வாரமங்கலம் பழனிவேல், பாடகர்கள் ஓ.எஸ்.தியாக ராஜன், நெய்வேலி சந்தானகோபாலன், அருணா சாய்ராம் ஆகிய பெயர்கள் இசை வட்டத்தில் சுழன்றுகொண்டிருந்தன. அதிலும்
ஓ.எஸ்.தியாகராஜனின் பெயர் பல வருடங்களாகவே அடிபட்டு அடிபட்டு அவருக்கே அலுத்துவிட்டிருக்கும்.

இறுதியில், இந்த வருட `சங்கீத கலாநிதி’ விருதுக்கு அருணா சாய்ராம் ஒருமனதாகத் தேர்வுசெய்யப்பட்டிருக்கிறார். எப்பவுமே அகாடமியில் தேர்வு ஒரு மனதாகத்தான். முக்கால் மனது, அரை மனது, கால் மனது என்ற வியாபாரமே அங்கு கிடையாது!

விருது அறிவிக்கப்பட்ட இரண்டாவது நாள் காலை உச்சி வெயிலுக்கு முன்பாக அருணா சாய்ராமைச் சந்திக்கச் சென்றிருந்தேன். ``நமஸ்காரம்... வாங்கோ...’’ என்றவருக்கு, லேசாகத் தொண்டை கட்டியிருப்பதுபோல் தோன்றியது. இரண்டு நாள்களாகத் தொலைபேசி வழியே `கங்கிராட்ஸ்’ சொன்னவர்களுடனும், நேரில் வந்து வாழ்த்தியவர்களுடனும் பேசிப்பேசியே தொண்டை பாதிக்கப் பட்டிருக்கும்!

தினமும் காலையில் குளித்து முடித்தவுடன் வீட்டிலிருந்து நடந்து செல்லும் தொலைவில் இருக்கும் ராகவேந்திரர் மடத்துக்கும், அதற்கு எதிரே இருக்கும் நரசிம்மசுவாமி கோயிலுக்கும் சென்று வருவதும் அருணா சாய்ராமின் வழக்கம். மந்த்ராலய மகானின் பக்தை இவர். வீட்டுக்குக்கூட `மந்த்ராலயம்’ என்றுதான் பெயர் சூட்டியிருக்கிறார்.

“நோபல் பரிசு வாங்கின மாதிரி சந்தோஷம்!”

அந்த ஞாயிறன்று காலையும் கோயில்களுக்குச் சென்று வீடு திரும்பியவருக்கு அகாடமியின் தலைவர் என்.முரளியிடமிருந்து போன் வந்ததும், `நல்ல செய்தி’யை அவர் பகிர்ந்து கொண்டதும் யதேச்சையான நிகழ்வுகள்தாம்.

``ஒரு மணி நேரத்துக்கு என் கால்கள் தரையில் பதியவே இல்லை. அந்த அளவுக்கு மனதில் உற்சாகத் துள்ளல். இதற்கு முன்பாக எத்தனை விருதுகள் வாங்கியிருந்தாலும், என்னை மாதிரியான இசைக்கலைஞர்களுக்கு `சங்கீத கலாநிதி’ என்பது நோபல் பரிசு வாங்குவதற்குச் சமமாச்சே...” என்று சொன்ன அருணாவின் குரலில் பூரிப்பும் பெருமையும் காளிங்க நர்த்தனம் ஆடின!

இவரின் அப்பா சேதுராமனுக்கு, திருவாரூர் சொந்த ஊர். அம்மா ராஜலட்சுமி, திருச்சி அருகில் உள்ள சிறுகமணி என்ற கிராமத்தைச் சேர்ந்தவர். இருவருக்குமே இசைமீது அலாதிப்ரியம். அந்த நாள்களில் சங்கீத ஜாம்பவான்களிடம் நெருக்கத்தில் பழகும் வாய்ப்பும் கிடைத்திருக்கிறது. சேதுராமன், தனது திருமணத்துக்கு முன்பே மும்பையில் குடியேறியவர். இந்திய ரயில்வேயில் பணி. ``நான் மும்பையில் பிறந்தவள். பள்ளி, கல்லூரிப் படிப்புகள் மும்பையில்தான். பதினெட்டாவது வயதில் எனக்குத் திருமணமானதும் மும்பையில்தான். என் இரண்டு மகள்களை வளர்த்து ஆளாக்கியதும் அங்கேதான்” என்றார்.

அருணாவின் கணவர் சாய்ராம், மும்பையில் இந்தியன் ஆயில் கார்ப்பரேஷனில் பணிபுரிந்தவர். சென்னைக்குப் புலம்பெயர்வதற்கு முன்பு விருப்ப ஓய்வு பெற்றவர்.

அந்த நாள்களில் தெற்கிலிருந்து மும்பை செல்லும் சங்கீத வித்வான்கள் பலரும், அருணா சாய்ராம் வீட்டில் தங்குவதுதான் வழக்கம். ஒவ்வொரு கோடையிலும் மூன்று மாதங்கள் இந்த வீட்டில்தான் தங்குவார் இசைமேதை டி.பிருந்தா.   அப்போது பலரும் வந்து, பிருந்தாவிடம் இசை பயில்வது உண்டு.  வீட்டில் பாட்டு க்ளாஸ் நடைபெறும்போது பாவாடைச் சட்டைப் பருவத்தில் இருந்த அருணா, குறுக்கும் நெடுக்குமாக நடந்து போவார்.

``அப்படித்தான் ஒருநாள் நான் நடந்தவாறே ஏதோ பாடலை முணுமுணுத்துக் கொண்டிருந்தேன். இதைக் கவனித்த பிருந்தாம்மா, என்னை அருகில் அழைத்து `முழுசா பாடு...’ என்றார். பாடினேன். `நாளைக் காலைலேருந்து நீயும் வந்து க்ளாஸ்ல உட்கார்ந்துக்க’ என்றார். நான் அந்த மேதையின் மாணவியானது அப்படித்தான். மாயாமாளவகௌளை ராகத்தில் `மேருஸமான...’ பாடல்தான் அம்மாவிடம் நான் கற்ற முதல் கீர்த்தனை” என்கிறார் அருணா சாய்ராம். அதன்பிறகு பத்து வருடங்களுக்கு பிருந்தாவின் நிழலில் தன் இசையையும் ஞானத்தையும் வளர்த்துக்கொண்டிருக்கிறார்.

“நோபல் பரிசு வாங்கின மாதிரி சந்தோஷம்!”

குடும்பப் பொறுப்புகள் காரணமாக மும்பையில் தங்கியிருக்கவேண்டியிருந்ததால் ஒவ்வொரு டிசம்பர் சீஸனுக்கும் சென்னை வந்து செல்வது இவரது வழக்கமாயிற்று. இரண்டு பெண்கள் வளர்ந்து, படிப்பு முடிந்து, திருமணமாகி வெளிநாடு சென்றதும், `சென்னையில் நிரந்தரமாகத் தங்கினால்தான் தன்னுடைய இசைக்கனவு மெய்ப்படும்’ என்று தீர்மானித்து, மூட்டை முடிச்சுகளுடன் சென்னைக்கு வந்துவிட்டார்.

சிவப்புக்கம்பளம் விரித்து சென்னை அருணா சாய்ராமை வரவேற்றது. வித்தியாசமான கம்பீரக் குரலில் விதவிதமாகப் பாடி ரசிகர்களைத் தன் பக்கம் இழுத்தார். கச்சேரிகளில் கூட்டம் முண்டியடித்தது. ஏற்கெனவே பிரபலமாக இருந்தவர்கள் சுதாரித்துக்கொள்ளும் அளவு, இவருக்குப் புகழும் பிரபலமும் அதிகமானது.  

``நாகஸ்வர வித்வான் செம்பனார்கோயில் வைத்தியநாதன் அவர்களிடம் மல்லாரி உள்ளிட்ட சிலவற்றைக் கற்றுத் தெளிந்தேன். மேலும் சீனியர்கள் சிலரிடம் சென்று பல்லவி பாடுவதன் நெளிவு சுளிவுகளைக் கற்றேன்” என்று சொல்லும் அருணா சாய்ராம், மிகவும் பிரபலப் படுத்திய பாடல் `மாடு மேய்க்கும் கண்ணே..!’

``அந்த நாள்களில், என் பாட்டி அடிக்கடி இந்தப் பாடலைப் பாடிக்கொண்டிருப்பார். அதைக் கேட்டுக் கேட்டு அது என் மனதில் அப்படியே தங்கிவிட்டது. அதே மாதிரி, வீட்டில் அம்மா, கிருஷ்ணர் விக்கிரகம் வைத்து தினமும் பூஜை செய்து பாடுவார். நானும் கிருஷ்ண பக்தையானேன்” என்றவரின் வீட்டுப் பூஜை அறையில் கிருஷ்ணர் - ராதை விக்கிரகங்கள் கொள்ளை அழகுடன்.

``உங்கள் கச்சேரிகளில் கடைசி அரைமணிநேர துக்கடாப் பாடல்களைக் கேட்கத்தான் ரசிகர்கள் திரண்டு வருகிறார்கள் என்று பரவலாகப் பேசப் படுகிறதே?” என்ற கேள்வியைக் கேட்டு முடிப்பதற்குள் மறுத்தார் அருணா சாய்ராம்.

``கண்டிப்பாக அது உண்மை கிடையாது. அபங்  உள்ளிட்ட துக்கடாக்கள் என்னைப் பொறுத்தவரை Icing on the cake மாதிரி. என் கச்சேரிகளில் ராகம் தானம் பல்லவிக்கும் நேயர் விருப்பத் துண்டுச்சீட்டு வருவதுண்டு” என்று சிரித்தார். தோடியும் பிருந்தாவன சாரங்காவும் தனக்கு மிகவும் பிடித்த இரண்டு ராகங்கள் என்றார்.

ஒருகாலத்தில் மார்கழி சீஸனில் ஒரு டஜன் கச்சேரி களுக்குமேல் பாடிவந்தவர்தான் இவர். இப்போதெல்லாம் இரண்டு கச்சேரிகளுக்கு இடையே போதிய இடைவெளி வேண்டும் என்பதால், ஏழுக்கு அதிகமாக ஒப்புக் கொள்வதில்லை. இதனால் பாடும் சபாக்களை `ரொட்டேஷன்’ முறையில் தேர்வுசெய்கிறார். இதில் மியூசிக் அகாடமி மட்டும் விதிவிலக்கு!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு