Published:Updated:

அனுமதி இல்லை, ஆனாலும் ஊடுருவியிருக்கிறது!

ஒட்டுமொத்த விகடனுக்கும் ஒரே ஷார்ட்கட்

Use App
அனுமதி இல்லை, ஆனாலும் ஊடுருவியிருக்கிறது!
அனுமதி இல்லை, ஆனாலும் ஊடுருவியிருக்கிறது!

துரை.நாகராஜன்

பிரீமியம் ஸ்டோரி

ங்கள் தட்டிலிருக்கும் உணவு, மரபணு மாற்றம் செய்யப்பட்ட உணவாக இருக்கலாம். உஷார்!’ என அதிர்ச்சியைக் கிளப்பியிருக்கிறது சமீபத்திய ஆராய்ச்சி ஒன்று.

அனுமதி இல்லை, ஆனாலும் ஊடுருவியிருக்கிறது!

இந்தியாவில் மரபணு மாற்றுப் பயிராக, பருத்திக்கு மட்டுமே அனுமதி. வேறு எந்தப் பயிருக்கும் அனுமதி இல்லை. இதனால் நாம் மரபணு மாற்றுப் பயிர்களை உணவிலிருந்து தவிர்த்துவிட்டோம் என்று நினைத்துக்கொண்டிருக்கிறோம். ஆனால் அந்த நினைப்பிற்கு வேட்டு வைத்திருக்கிறது, ‘அறிவியல் மற்றும் சுற்றுச்சூழல் மைய’த்தின் ஆய்வு. இந்த ‘அறிவியல் மற்றும் சுற்றுச்சூழல் மையம்’தான் முன்னர் பெப்சி, கோக் போன்ற குளிர்பானங்களில் பூச்சி மருந்து அதிக அளவில் இருக்கிறது என்ற ஆய்வையும் வெளியிட்டது என்பது குறிப்பிடத்தக்கது.

2007-ல் மரபணு மாற்று அங்கீகாரக் குழு ‘உணவுப்பொருள்கள், கலக்கும் பொருள்கள் மற்றும் பதப்படுத்தும் பொருள்கள் என எதிலும் மரபணு மாற்று ஜீன்கள் இருக்கக்கூடாது. அப்படிப்பட்டவை தயாரிக்கப்படவோ, விற்பனை செய்யவோ, இறக்குமதி செய்யவோ கூடாது. மரபணு மாற்று அங்கீகாரக் குழுவின் அனுமதி பெற்றால் மட்டுமே இறக்குமதி செய்து கொள்ளலாம்’ என்று ஆணை பிறப்பித்தது.

2017-ம் ஆண்டு மே மாதம் உச்ச நீதிமன்ற‌த்தில் நடந்த ஒரு வழக்கில் இந்திய உணவுப் பாதுகாப்புத் தர நிர்ணய ஆணையம் ( FSSAI) தாக்கல் செய்த வாக்குமூலத்தில், ‘மரபணு உணவுகள் இந்த நாட்டில் அனுமதிக்கப்படாது. மரபணு அங்கீகாரக்குழுவே மரபணு மாற்ற உணவுகளை அனுமதிக்கும் பொறுப்பை வகிக்கும். அப்படி அனுமதித்த பின், உணவுப் பாதுகாப்புத் தர நிர்ணய ஆணையம் மரபணு மாற்ற உணவுகளைக் கட்டுப்படுத்தும். மரபணு மாற்றப்பட்ட உணவுகள் உற்பத்தி, விநியோகம், விற்பனை மற்றும் இறக்குமதி தொடர்பாக உணவுப் பாதுகாப்பு மற்றும் நியதி சட்டத்தின் 22 - வது பிரிவின் கீழ் எந்தவொரு கட்டுப்பாடுகளையும் மத்திய அரசு அறிவிக்கவில்லை. இருந்தும், மரபணு மாற்றப்பட்ட உணவு இந்தியாவில் விற்க அனுமதி இல்லை’ எனக் குறிப்பிட்டது. 

அனுமதி இல்லை, ஆனாலும் ஊடுருவியிருக்கிறது!

ஆனால், இதை மீறி, ஏராளமான மரபணு மாற்ற உணவுப்பொருள்களை நாம் பயன்படுத்த வேண்டிய சூழல். மேற்கண்ட  வாக்குறுதியைக் காப்பாற்றுவதில் மத்திய அரசின் ஆறு அமைப்புகள் கடமை தவறியிருக்கின்றன.

வர்த்தக அமைச்சகத்தின் வெளிநாட்டு வர்த்தக இயக்குநர் ஜெனரல் (Director General of Foreign Trade, in the Ministry of Commerce), மரபணு மாற்று அங்கீகாரக் குழு (Genetic Engineering Appraisal Committee -GEAC), உணவுப் பாதுகாப்புத் தர நிர்ணய ஆணையம் (FSSAI), நுகர்வோர் விவகாரம், உணவு மற்றும் பொது விநியோக அமைச்சகத்தின் நுகர்வோர் துறை (Department of Consumer Affairs, in the Ministry of Consumer Affairs, Food and Public Distribution), வேளாண் அமைச்சகத்தின் தாவரப் பாதுகாப்பு, தடுப்பு மற்றும் சேமிப்பு இயக்குநரகம் (Directorate of Plant Protection, Quarantine and Storage, under the Ministry of Agriculture & Farmers’ Welfare), நிதி அமைச்சகத்தின்- எக்ஸ்சைஸ் மற்றும் சுங்கம் வருவாய் வாரியம் (Central Board of Excise &Customs, in the Department of Revenue, Ministry of Finance), ஆகியவைதாம் அவை.

புதுடெல்லி, அறிவியல் மற்றும் சுற்றுச்சூழல் மைய (CSE) ஆராய்ச்சியாளர்கள், சோயாபீன், சோளம், கடுகு, பருத்தி விதை எண்ணெய் போன்ற 65 வகையான உணவுப் பொருள்களை ஆய்வு செய்திருக்கிறார்கள். 65 பொருள்களில் 30 பொருள்கள் உள்நாட்டுத் தயாரிப்புகள். மற்றவை அனைத்துமே வெளி நாட்டிலிருந்து இறக்குமதி செய்யப்பட்டவை. சோதனையின் முடிவில் இந்த உணவுப் பொருள்களில் மரபணு மாற்றுப் பொருள்கள் கலந்திருப்பது கண்டுபிடிக்கப்பட்டுள்ளது. வெளிநாட்டு எண்ணெய்களில் ஏழு பிராண்ட் கடுகு எண்ணெய்களில் நான்கில் மரபணு மாற்று ஜீன்கள் கலந்திருந்தன.

‘பாதுகாப்பான உணவுக்கான கூட்டமைப்பி’ன் ஒருங்கிணைப்பாளர் அனந்து இதுபற்றிப் பேசும்போது, “இறக்குமதி செய்யப்பட்ட 10 பொருள்களில் 9 பொருள்கள் அமெரிக்காவிலிருந்து வந்துள்ளன. பிறந்த குழந்தைகளுக்கான உணவில் பெருமளவு மரபணு மாற்றப்பட்ட பொருள்கள் உள்ளன.  மேலை நாடுகளில் குழந்தை உணவுகளில் இவை இருக்கக்கூடாது என்று எதிர்ப்பு தெரிவிக் கிறார்கள்.  ஆனால் இங்கே குழந்தைகளுக்கான உணவுப்பொருள்களிலும் இவை கலந்துள்ளது அதிர்ச்சியளிக்கிறது” என்றார்.

அறிவியல் மற்றும் சுற்றுச்சூழல் மைய துணை இயக்குநரான சந்திரபூஷன், “இந்த மரபணு மாற்றம் செய்யப்பட்ட டி.என்.ஏக்கள் உணவுப் பொருள்களில் கலப்பதால் நச்சுத்தன்மை, ஒவ்வாமை மற்றும் ஊட்டச்சத்துக் குறைபாடு ஆகியவை ஏற்படும்.  தற்போது குழந்தைகளுக்கான உணவுப் பொருள்களில் உள்ள கலப்படம் குறித்து பதிலளிக்க அமெரிக்காவின் ‘அபாட் நிறுவனம்’ கால அவகாசம் கோரியுள்ளது. இதுபோன்ற உணவுப் பொருள்களை சந்தையில் விற்பனைக்கு வருவதற்கு முன், அதில் இருக்கும் கலப்படம், லேபிளிங் உள்ளிட்டவற்றை ஆய்வு செய்ய ஆய்வுக் கூடம் அமைப்பது அவசியமானது” என்கிறார்.

இப்படித்தான் இந்தியாவில் இறக்குமதியாகிறது:

ஆய்வில் கண்டறியப்பட்ட மரபணு மாற்று உணவுப் பொருள்கள் அமெரிக்கா, கனடா, நெதர்லாந்து, தாய்லாந்து மற்றும் ஐக்கிய அரபுக் கூட்டமைப்பு போன்ற நாடுகளிலிருந்து இறக்குமதி செய்யப்பட்டவை. இவற்றில் அமெரிக்கா, கனடா ஆகிய நாடுகள் மரபணு மாற்றுப் பயிர்கள் உற்பத்தியில் முன்னணியில் இருப்பவை. மீதமுள்ள மூன்று நாடுகளிலும், மரபணு மாற்றுப் பயிர்கள் உற்பத்திக்குத் தடை விதிக்கப்பட்டிருந்தாலும், வணிக ரீதியாக மரபணு மாற்றுப் பொருள்களை அமெரிக்கா மற்றும் கனடாவிலிருந்து இறக்குமதி செய்து கொள்கின்றன. அவ்வாறு இறக்குமதி செய்யும் பொருள்களில் உணவுப் பொருள்களை தயாரித்து பல நாடுகளுக்கு ஏற்றுமதியும் செய்கின்றன. ஐக்கிய அரபு நாடுகள் இந்தியாவுக்கு அனுப்பும் ஹுட்சன் கனோலா (Hudson canola oil) எண்ணெயின் லேபிளில் ‘இது கனடாவின் விதையிலிருந்து பிரித்தெடுக்கப்படும் எண்ணெய்’ என்று அச்சிட்டுத்தான் அனுப்புகிறது. மறைமுகமாக மரபணு மாற்றுப் பயிர் என்றுதான் குறிப்பிடப்படுகிறது. இவையெல்லாம் நாம் கவனத்துக்கு வராமலே போய்விடுகின்றன. இதுதான் இப்படி என்றால் உள்நாட்டு உற்பத்திப் பொருள்களிலும் மரபணு மாற்று ஜீன்கள் கலந்திருப்பது மேலும் அதிர்ச்சியைத்தான் ஏற்படுத்துகிறது.

உள்நாட்டுக்குள்ளேயே பரவும் மரபணு மாற்று உணவுகள்!


உள்நாட்டு உணவுப் பொருள்களான திருப்பதி, அன்கூர், கின்னி மற்றும் விமல் ஆகிய பிராண்ட் பெயர்களில் விற்கப்பட்ட சுத்திகரிக்கப்பட்ட பருத்தி எண்ணெய்களை ஆய்விற்கு எடுத்துக் கொண்டது, சி.எஸ்.இ (CSE). இவற்றிலும் மரபணு மாற்று ஜீன்கள் கலந்திருந்தது கண்டு பிடிக்கப்பட்டது. மரபணு மாற்றுப் பருத்தியை 2002 -ம் ஆண்டு இந்தியாவில் மத்திய அரசு அறிமுகப்படுத்தியது. தற்போது நாட்டில் 94 சதவிகிதம் மரபணு மாற்றுப் பருத்தியானது பயிரிடப்பட்டு வருகிறது. அதன்மூலம் உருவாகும் எண்ணெய் மரபணு மாற்று ஜீன் கலந்ததாகத்தான் இருக்கின்றன. 

அனுமதி இல்லை, ஆனாலும் ஊடுருவியிருக்கிறது!

பருத்தி எண்ணெய் மலிவான, நடுத்தர வகை எண்ணெய். கடுகு எண்ணெய் மற்றும் சோயாபீன் எண்ணெய் போன்ற மற்ற காய்கறி எண்ணெய்களைவிட 30-40 சதவிகிதம் மலிவாகக் கிடைக்கிறது. எண்ணெய்களில் வறுத்து பேக்கிங் செய்யப்பட்டு விற்பனையாகும் namkeen snacks வகைகளில் பெருமளவு பருத்தி எண்ணெய் பயன்படுத்தப்படுகிறது.  (சிறு சிறு பாக்கெட்டுகளில் காற்றுடன் சேர்த்து அடைத்து, பெட்டிக் கடைகள் முதல் சூப்பர் மார்க்கெட் வரையில் விற்பனையாகும் கார, இனிப்பு வகைத் தின்பண்டங்கள்) பேக்கரிகளில் தயாராகும் அதிக நாள்கள் தாக்குப்பிடிக்கக்கூடிய உணவுப் பொருள்கள் பருத்தி எண்ணெய் கலந்த வனஸ்பதியோ, நெய்யோ கலந்துதான் தயார் செய்யப்படும்.

‘தமிழ்நாடு இயற்கை விவசாயிகள் கூட்டமைப்பி’ன் ஒருங்கிணைப்பாளர், ‘அறச்சலூர்’ செல்வம், “மத்திய சுற்றுச்சூழல் அமைச்சகத்தின் அனுமதி இல்லாமல் பி.டி உணவுகளும், விதைகளும் இந்தியாவிற்குள் வரவே கூடாது. அப்படி இருந்தும் மத்திய அரசு இந்த அளவிற்கு வேடிக்கை பார்த்துக்கொண்டு நிற்பது வேதனை தருகிறது” என்றார்.

இதுபோல பல வகையான மரபணு மாற்று உணவுப் பொருள்களை நம்மில் பெரும்பாலானோர் அறியாமலே பயன்படுத்திக்் கொண்டுதான் இருக்கிறோம். அது உள்நாட்டுத் தயாரிப்பாகவும் இருக்கலாம், வெளிநாட்டுத் தயாரிப்பாகவும் இருக்கலாம்... உலக அளவில் மரபணு மாற்றுப் பயிர்கள் குறித்த சர்ச்சைகளும் அச்சங்களும் எப்போதுமே தீர்ந்தபாடில்லை. ஆனால் சட்டப்படி அனுமதி இல்லாத ஒன்று, எளிதில் நம் உணவுகளில் ஊடுருவுவதுதான் கவலைக்குரிய விஷயமாக இருக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு