Published:Updated:

வருமான வரி கணக்குத் தாக்கல்... எந்தெந்தத் தவறுகளைத் திருத்தி தாக்கல் செய்யலாம்?

வருமான வரி கணக்குத் தாக்கல்... எந்தெந்தத் தவறுகளைத் திருத்தி தாக்கல் செய்யலாம்?
பிரீமியம் ஸ்டோரி
News
வருமான வரி கணக்குத் தாக்கல்... எந்தெந்தத் தவறுகளைத் திருத்தி தாக்கல் செய்யலாம்?

டாக்ஸ் ஃபைலிங்ஆடிட்டர் சதீஷ்குமார்

2018-19-ம் நிதியாண்டுக்கான வருமான வரி கணக்கைத் தாக்கல் செய்தவர்கள், அதில் ஏதும் தவறு செய்திருந்தால், அந்தத் தவற்றைத் திருத்தி மீண்டும் தாக்கல் செய்வதற்கு 2019-ம் ஆண்டு மார்ச் வரை அவகாசம் உள்ளது. இதனால் தவறாகத் தாக்கல் செய்தவர்கள் பதற்றப்பட வேண்டிய அவசியமில்லை.

2018, ஜூலை 31-ம் தேதி வரை 3.40 கோடி பேர் வரிக் கணக்கைத் தாக்கல் செய்திருந்த நிலையில், அதற்கான கெடு தேதி மேலும் ஒரு மாதக் காலம் அதாவது, ஆகஸ்ட் 31-ம் தேதி வரை நீட்டிக்கப்பட்டது. இதனால் வரிக் கணக்குத் தாக்கல் செய்பவர்களின் எண்ணிக்கை மேலும் அதிகரிக்கலாம் என எதிர்பார்க்கப்பட்டது. கடந்த ஆகஸ்ட் 31-ம் தேதி வரை வரிக் கணக்குத் தாக்கல் செய்தவர்களின் மொத்த எண்ணிக்கை 5.42 கோடியை எட்டியது. முந்தைய ஆண்டு 3.17 கோடி பேர் இந்தக் கணக்கைத் தாக்கல் செய்தனர். அதனுடன் ஒப்பிட்டால், வரிக் கணக்கைத் தாக்கல் செய்தவர்களின் எண்ணிக்கை 72% அதிகரித்துள்ளது. இதில் ஏறக்குறைய 34.95 லட்சம் பேர், கெடு முடியும் நாளான ஆகஸ்ட் 31-ம் தேதியன்று வரிக் கணக்கைத் தாக்கல் செய்துள்ளனர். 

வருமான வரி கணக்குத் தாக்கல்... எந்தெந்தத் தவறுகளைத் திருத்தி தாக்கல் செய்யலாம்?

இந்த நிலையில், “கெடு தேதி நெருங்கும் பதற்றத்தில், வருமான வரிக் கணக்கை அவசர அவசரமாகத் தாக்கல் செய்தவர்கள், அதில் ஏதாவது தவறான தகவல்களைக் குறிப்பிட்டி ருந்தாலோ, குறிப்பாக வருமானம் மற்றும் செலவினங்களில் திருத்தம் செய்ய விரும்பினாலோ அல்லது வங்கிக் கணக்கு எண்ணைத் தவறாக அளித்திருந்தாலோ அவற்றைத் திருத்தித் தாக்கல் செய்வதற்கான வாய்ப்பும் கால அவகாசமும் உள்ளது” என்கிறார் சென்னையின் பிரபல ஆடிட்டர் எஸ்.சதீஷ் குமார். 

வருமான வரிக் கணக்கைத்  திருத்தித் தாக்கல் செய்வதற் கான அவசியம் எப்போது ஏற்படும்?

‘‘நீங்கள் முன்னர் தாக்கல் செய்த வருமான வரிக் கணக்கு விவரங்களில் ஏதாவது தவறு ஏற்பட்டிருந் தாலோ அல்லது ஏதாவது தகவல் விடுபட்டிருந்தாலோ, புதிய தகவலைச் சேர்க்க விரும்பினாலோ,  வருமான வரிச் சட்டம் 1961-ன் கீழ், வருமான வரிக் கணக்கைத் திருத்தித் தாக்கல் செய்யலாம்.

எந்தெந்தத் தவறுகளைத் திருத்தித் தாக்கல் செய்யலாம்?

* வரி விதிப்புக்குள்ளாகும்  அல்லது விலக்குப் பெறும் வருமானத்தைத் தெரிவிக்கத் தவறியிருந்தால்

* தவறான ஐ.டி.ஆர் படிவத்தில் வரிக் கணக்கைத் தாக்கல் செய்திருந்தால்

* வங்கிக் கணக்கு விவரங்களைத் தவறாகத் தந்திருந்தால்

* படிவம் 26AS-ல் குறிப்பிட்டிருந்த வருமானத்து டன் உங்கள் வருமானம் பொருந்தாமல் இருந்தால்.

* வெளிநாட்டு வருமானம் அல்லது வெளி நாட்டில் சொத்து ஏதும் இருந்து, அதைக் குறிப்பிட மறந்திருந்தால்

*  தாக்கல் செய்யப்பட்ட வரிக் கணக்கில், வருமானம் 50 லட்சம் ரூபாய்க்கும் அதிகமாகக் குறிப்பிட்டிருந்து, அதேசமயம் தரப்பட வேண்டிய கடன் குறித்து  தகவல் தெரிவிக்கத் தவறியிருந்தால்

*  வீட்டு முகவரியைத் தவறாகத் தந்திருந்தால்

* டிடிஎஸ் அல்லது அட்வான்ஸ் வரி செலுத்தி யிருந்து, அதை க்ளெய்ம் செய்யத் தவறியிருந்தால்

இதுபோன்ற அனைத்துத் தவறுகளையும் திருத்தித் தாக்கல் செய்யலாம்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
வருமான வரி கணக்குத் தாக்கல்... எந்தெந்தத் தவறுகளைத் திருத்தி தாக்கல் செய்யலாம்?

   கால அவகாசம்

இதுபோன்ற தவறுகள் அல்லது விடுபட்ட தகவல்கள், நீங்கள் தாக்கல் செய்த வருமான வரிக் கணக்கில் இருக்குமானால், இந்தத் தவறுகள் ஒவ்வொன் றையுமே திருத்தித் தாக்கல் செய்ய முடியும். அதே சமயம், இதுபோன்ற திருத்தப் பட்ட வருமான வரிக் கணக்கைத் தாக்கல் செய்ய 2019 மார்ச் 31-ம் தேதி வரை அவகாசம் உள்ளது.

2017-18-ம் நிதியாண்டு வரைக்கும், திருத்தம் செய்யப் பட்ட வருமான வரிக் கணக்கை, சம்பந்தப்பட்ட நிதியாண்டு முடிவிலிருந்து ஓராண்டுக்குள் தாக்கல் செய்ய அனுமதிக்கப்படு கிறது. எனவே, 2017-18-ம் நிதி ஆண்டு இறுதியில் வருமான வரிக் கணக்குத் தாக்கல் செய்த ஒருவர், அதில் ஏதும் திருத்தம் செய்து தாக்கல் செய்ய விரும்பினால், 2019 மார்ச் 31 வரை அதைத் தாக்கல் செய்ய அவகாசம் அளிக்கப்பட்டிருந்தது. அதற்குமுன், கெடு தேதிக்குப்பின் தாக்கல் செய்யப்பட்ட வருமான வரிக் கணக்கில், திருத்தம் செய்து தாக்கல் செய்ய அனுமதிக்கப்படவில்லை.

வருமான வரிக் கணக்கில் திருத்தம் செய்து தாக்கல் செய்தால் என்ன விளைவுகள் ஏற்படும்?

வருமான வரிக் கணக்கைத் திருத்தம் செய்து தாக்கல் செய்தால், வருமான வரிக் கணக்கு மதிப்பீட்டின்போது, அதைச் செய்யும் அதிகாரி, ஏன் திருத்தம் செய்யப்பட்ட கணக்கைத் தாக்கல் செய்தீர்கள் என்று கேட்பார். இதைத் தவிர, வேறெந்த பின்விளைவும்  ஏற்படாது.

முகவரி உள்ளிட்ட தனிப்பட்ட தகவலிலோ அல்லது வங்கிக் கணக்கு விவரத்திலோ ஏதாவது திருத்தம் செய்தால், அதுகுறித்து சம்பந்தப் பட்ட அதிகாரி பெரிதாக ஆராய மாட்டார். அதேசமயம்,  வருமானம் அல்லது பிடித்தங்கள் அல்லது செலவினங்கள் குறித்து முதலில் தெரிவித்திருந்த தகவலில் பெரிய அளவில் திருத்தம் செய்தால், அது குறித்துக் கேள்வி எழுப்பி, நிச்சயம் ஆய்வு செய்வார்.  

வருமான வரி கணக்கைத் திருத்தித் தாக்கல் செய்வது எப்படி?

2019 மார்ச் 31-ம் தேதி வரை 4 முறை திருத்தப்பட்ட வரிக் கணக்கைத் தாக்கல் செய்யலாம்.  அசல் வருமான வரிக் கணக்கை எப்படித் தாக்கல் செய்தீர்களோ, அதே முறையில்தான் அதாவது, இணையதளம் வாயிலாகத் தாக்கல் செய்திருந்தால், அதே முறையிலேயே திருத்தப்பட்ட வரிக் கணக்கைத் தாக்கல் செய்வதிலும் கடைப்பிடிக்க வேண்டும். நேரில் சென்று தாக்கல் செய்திருந்தால், திருத்தத்துக்கும் நேரடியாகவே சென்று தாக்கல் செய்ய வேண்டும். ஒரே வித்தியாசம், முன்னர் தாக்கல் செய்த வரிக் கணக்கு விவரங்களையும், தற்போது செய்யப்பட உள்ள திருத்தங்களையும் படிவத்தில் குறிப்பிட வேண்டும்.
அதேபோல, வரிக் கணக்கைத் திருத்தித் தாக்கல் செய்வதற்காகத் தனிப் படிவம் எதுவுமில்லை. அதே படிவம்தான். ஆனால், திருத்தப் படிவம் என்பதற்கான இடத்தில் ‘டிக்’ செய்ய மறந்துவிடக்கூடாது. மேலும், முதல்முறை தாக்கல் செய்த அசல் வருமான வரிக் கணக்கு படிவத்தின் ஒப்புகை எண்ணையும் மறக்காமல் குறிப்பிட வேண்டும். திருத்தப்பட்ட வரிக் கணக்கைத் தாக்கல் செய்துவிட்டால், அதற்கு முன் தாக்கல் செய்த படிவத்தைத் திரும்பப் பெற்றுக்கொள்ள வேண்டும்.

எந்தத் தவறாக இருந்தாலும் திருத்தித் தாக்கல் செய்யலாமா?

 வரிக் கணக்குத் தாக்கலில் எந்தத் தவறு செய்திருந்தாலும், அதைத் திருத்தி மீண்டும்  தாக்கல் செய்யலாம். உதாரணத்துக்கு, வருமானம் ரூ.5 லட்சம் என்று முன்னர் தாக்கல் செய்த படிவத்தில் தெரிவித்திருந்து, தற்போது அதை ரூ.50 லட்சம் என்று திருத்தம் செய்ய விரும்பினாலும் திருத்தித் தாக்கல் செய்யலாம். திருத்தித் தாக்கல் செய்த வருமான வரிக் கணக்கிலும் ஏதேனும் தவறு ஏற்பட்டாலும், மீண்டும் திருத்தப் பட்ட வருமான வரிக் கணக்கைத் தாக்கல் செய்ய முடியும். 

ரூ.2 கோடிக்குக் குறைவான தொகைக்குத்தான் ஆகஸ்ட் 31 கடைசி நாளாக அறிவிக்கப்பட்டது. ரூ.2 கோடிக்கு  அதிகமான வரிக் கணக்குக்கு செப்டம்பர் மாதம் கடைசி வரை அவகாசம் உள்ளது. அதற்குமே மேலும் ஒரு மாதக் காலம் அதாவது, அக்டோபர் மாத இறுதி வரை அவகாசம் நீட்டிக்கப்படலாம். ஏனெனில், ஜி.எஸ்.டி வரி விதிப்புமுறை புதிதாக வந்துள்ளதால், ஜி.எஸ்.டி படிவங்கள் முழு அளவில் இன்னும் வெளியில் வர வில்லை. எனவே, அனைத்துப் படிவங்களும் வரும் வரை அரசு அவகாசம் கொடுக்க வேண்டியது அவசியமாக உள்ளது. ஜி.எஸ்.டி செலுத்துவதற்கான கடைசித் தேதி டிசம்பர் 2018 வரை இருப்பதால், ரூ.2 கோடிக்கு அதிகமான வரிக் கணக்குக்குத்  தாக்கல் செய்ய அவகாசத்தையும் அதற்குச் சமமாக நீட்டிக்க வாய்ப்புள்ளது’’ என்றார்.

தவறாக வரிக் கணக்கைத் தாக்கல் செய்திருந்தவர்கள் ஆடிட்டர் சதீஷ்குமார் சொன்னபடி நடக்கலாமே!

- பா.முகிலன்

தனிநபர்களுக்கு அதிக வருமான வரி!

இந்தியாவில் வருமான வரி விதிப்பு முறையில் தனிநபர்களுக்குத்தான் அதிகமாக வரி விதிக்கப்படுகிறது. தனியார் நிறுவனங்களுக்கெல்லாம் வருமான வரி 25% மட்டுமே. 1 கோடி ரூபாய்க்கு மேல் சென்றால்தான் சர்சார்ஜ் விதிக்கப்படுகிறது. ஆனால், தனிநபர்களுக்கு வருமானம் ரூ.50 லட்சத்துக்கு மேல் சென்றாலே 10% சர்சார்ஜ் விதிக்கப்படுகிறது. தற்போதைய மத்திய அரசு தனிநபர்களைக் காட்டிலும், நிறுவனங்களுக்குத்தான் அதிக சாதகமாகச் செயல்படுவதையே இது காட்டுகிறது.