Published:Updated:

ஹெல்த் இன்ஷூரன்ஸ்... குழப்பங்கள்... தீர்வுகள்!

ஒட்டுமொத்த விகடனுக்கும் ஒரே ஷார்ட்கட்

Use App
ஹெல்த் இன்ஷூரன்ஸ்... குழப்பங்கள்... தீர்வுகள்!
ஹெல்த் இன்ஷூரன்ஸ்... குழப்பங்கள்... தீர்வுகள்!

இன்ஷூரன்ஸ்

பிரீமியம் ஸ்டோரி

விபத்து அல்லது திடீர் மருத்துவச்செலவு நடுத்தரக் குடும்பத்தினரின் பொருளாதாரச்சூழலையே மாற்றிவிடுகிறது. சில நேரங்களில், ஹெல்த் இன்ஷூரன்ஸ் பாலிசி எடுத்தும் பெருமளவிலான தொகையை நாம் கட்டவேண்டிய கட்டாயம் ஏற்பட்டுவிடுகிறது. இதன் விளைவாக, பொதுமக்கள் ஹெல்த் இன்ஷூரன்ஸ் நிறுவனங்களைக் குற்றம்சாட்டுவதும், மருத்துவமனைகளைக் குற்றம்சாட்டுவதும் நடக்கின்றன. இந்தக் குழப்பங்களுக்கு என்னதான் தீர்வு என்று இன்ஷூரன்ஸ் ஆலோசகர் பி.மனோகரனிடம் கேட்டோம். விரிவான விளக்கம் தந்தார் அவர்.

ஹெல்த் இன்ஷூரன்ஸ்... குழப்பங்கள்... தீர்வுகள்!

குழப்பம் 1

“அதிக தொகைக்கு ஹெல்த் இன்ஷூரன்ஸ் எடுப்பது வீண். ரூ.25 லட்சத்துக்கு பாலிசி எடுத்திருந்து, அவ்வளவுக்கும் செலவாகியிருந்தாலும் க்ளெய்ம் செய்யும்போது ரூ.3 லட்சம் வரை மட்டுமே கிடைக்கும்.

தீர்வு: இது பொதுவானதொரு கருத்து. தேவையான மருத்துவச் செலவுகளை ஈடுசெய்வது (Reasonable necessary expenses) என்பதுதான் ஹெல்த் இன்ஷூரன்ஸ் பாலிசியின் நோக்கமே. ஒவ்வொரு நோய்க்கும் சிகிச்சைக்காகச் செலவிடும் தொகைக்கு ஒரு வரம்பு நிர்ணயிக்கப் பட்டிருக்கும். அது அந்தந்த பாலிசியிலேயே சொல்லப்பட்டிருக்கும். அந்தத் தொகையை மீறிச் செலவழிக்கப்படும்போதும், க்ளெய்ம் செய்யும்போதும் இழப்பீட்டுத் தொகை குறைவாகக் கிடைக்கக்கூடும்.

ஹெல்த் இன்ஷூரன்ஸ்... குழப்பங்கள்... தீர்வுகள்!

உதாரணமாக, கண் பொறை நோய்க்கான சிகிச்சையை எடுத்துக்கொண்டால், பார்வைக் குறைபாட்டை ஏற்படுத்தும் கண் பொறையை நீக்குவதற்கான சிகிச்சைக்கு இன்ஷூரன்ஸில் க்ளெய்ம் செய்ய முடியும். ஆனால், தற்போதைய நவீன சிகிச்சை முறையில் கண் பொறைச் சிகிச்சைக்குப்பிறகு லேசர் ட்ரீட்மென்ட் கொடுத்து விழியில் லென்ஸ் பொருத்தப் படுவதுண்டு. மூக்குக் கண்ணாடி அணிவதற்குப் பதிலாக இந்தச் சிகிச்சை செய்து கொள்கிறார்கள். கண்பொறை நோய்க்கான சிகிச்சைக்கு தோராய மாக ரூ.20,000 வரை செலவாகக் கூடும். ஆனால், விழியில் பொருத்தப்படும் லென்ஸ் ரூ.1.5 லட்சம் வரையிலும்கூட ஆகலாம்.
ஆனால், இந்த லென்ஸ் பொருத்தப்படும் சிகிச்சைக்கு இன்ஷூரன்ஸ் நிறுவனம் க்ளெய்ம் தராது. ஏனெனில், இந்தச் சிகிச்சை காஸ்மெட்டிக் என்ற வகையில் சேரக்கூடும். இன்ஷூரன்ஸ் என்பது வியாதியைக் குணப்படுத்தும் சிகிச்சைக்கு  எடுக்கப்படுவதே தவிர, காஸ்மெட்டிக் ட்ரீட்மென்ட்டுக்கு அல்ல.

இதுபோல, ஒவ்வொரு சிகிச்சை யிலும் டெக்னிக்கலாக அட்வான்ஸ் ட்ரீட்மென்ட் இருக்கிறது. அதில், காஸ்மெட்டிக் வகையாக இருக்கும்பட்சத்தில் க்ளெய்ம் செய்யும்போது கிடைக்காது. எனவே, இந்த  மாதிரியான சூழலில் முழுமையான க்ளெய்ம் எதிர்பார்க்க இயலாது. மற்றபடி, ரூ.3 லட்சம், ரூ.5 லட்சம் என்றெல்லாம் எந்த வரம்பும் கிடையாது.

குழப்பம் 2

அதிக தொகைக்குக் காப்பீடு செய்துவிட்டு, பின்னர் பிரீமியம் கட்டச் சிரமப்படுவதால், காப்பீட்டுத் தொகையைக் குறைக்கும்பட்சத்தில் பிரீமியம் தொகை அதற்கேற்ற விகிதத்தில் குறைக்கப்படுவதில்லை.

தீர்வு: காப்பீட்டுத் தொகையை யும், அதற்கான பிரீமியத்தையும் நேர்விகிதத்தில் கணக்கீடு செய்ய முடியாது. இன்ஷூரன்ஸில் பிரீமியம் நிர்ணயிக்கப்படுவது ஒவ்வொரு இன்ஷூரன்ஸ் நிறுவனத்திற்கும் மாறுபடும். இந்த பிரீமியத்தை நிர்ணயிப்பதற்கென தனித்துறையே இருக்கிறது. எந்த வயது வரம்பிலுள்ள வாடிக்கை யாளர்களிடமிருந்து அதிக க்ளெய்ம் வருகிறது, எந்த மருத்துவச் சிகிச்சைக்காக அதிக அளவில் க்ளெய்ம் கோரப்படுகிறது என்பதையெல்லாம் கணக்கீடு செய்து பிரீமியம் தொகை நிர்ணயிக்கப்படுகிறது. அதன்பின்னர் இந்த பிரீமியம் அட்டவணை ஐ.ஆர்.டி.ஏ அமைப்பிற்கு அனுப்பப்பட்டு ஒப்புதல் பெறப்படுகிறது. பிரீமியம் தொகை நிர்ணயம் குறித்து ஐ.ஆர்.டி.ஏ. அமைப்பின் கேள்விகளுக்கு விளக்கமளித்துத்தான் ஒப்புதல் பெறப்படுகின்றன. எனவே, காப்பீட்டுத் தொகையைக் குறைத்ததும், பிரீமியம் தொகையும் குறையும். ஆனால், அதே விகிதத்தில் குறையுமென்று பொத்தாம்பொதுவாக எதிர்பார்க்க முடியாது.

குழப்பம் 3

முகத்தாடைக்கும், பல்லுக் கும் சேதாரம் ஏற்படும்போது செய்யப்படும் சிகிச்சைக்கான காப்பீட்டுத்தொகை தரப்படா மல் மறுக்கப்பட்டு, இறுதியாக நீதிமன்றத்தில் போராடி க்ளெய்ம் பெறப்படுகிறது.

தீர்வு: பொதுவாக, பற்களுக் கான சிகிச்சை மருத்துவக் காப்பீட்டில் சேராது. ஏனெனில், பற்களைப் பாதுகாப்பதற்காகச் செய்யப்படும் சுத்தப்படுத்துதல், சிமென்ட் வைத்தல் உள்ளிட்ட சிகிச்சைகள், ஒரு குறிப்பிட்ட வயதுக்குப் பிறகு ரெகுலர் மெயின்டெனன்ஸ் செலவு போல வரும். இது நோய் ஆகாது. அழகு தொடர்பான சிகிச்சையில் அடங்கும். 

ஆனால், அதுவே விபத்தினால் ஏற்பட்ட சேதமாக இருந்தால், அந்த சிகிச்சைக்கான செலவு காப்பீட்டில் வரும். அதேபோல, தாடைக்கான சிகிச்சையில் விபத்தின் காரணமான சேதத்திற்கான சிகிச்சையில் சிக்கலில்லை. ஆனால், பிறப்பிலேயே தாடையில் ஏதேனும் குறைபாடுகள் இருந்து அதனைச் சீர்படுத்துவதற் காக சிகிச்சை மேற்கொண் டால், அது காஸ்மெட்டிக் என்ற வகையில் சேரும்.

எனவே, தாடையில் செய்யப்படும் சிகிச்சை எந்த வகையில் சேரும் என்பதில் தெளிவு இல்லாதபோது இத்தகைய முரண்பாடுகள் ஏற்படுவ துண்டு. இந்த மாதிரியான சூழல் களில் புகார் அளிப்பதற்காகத்தான் குறைதீர்ப்பு மையங்கள் (Ombudsman) இருக்கிறது. அதன்மூலம் தீர்வை எட்டலாம்.

ஹெல்த் இன்ஷூரன்ஸ்... குழப்பங்கள்... தீர்வுகள்!

குழப்பம் 4

மருத்துவக் காப்பீடு எடுத்தபோது இரண்டு ஆண்டு காத்திருப்புக் காலம் என்று சொன்னார்கள். ஆனால், ஆஞ்சியோ சிகிச்சை எடுக்கவேண்டி வந்தபோது,  நான்கு ஆண்டுகள் கழித்துத்தான் க்ளெய்ம் செய்ய முடியும் என்கிறார்கள். 

தீர்வு: காத்திருப்புக் காலத்தைப் பொறுத்தவரை, ஒவ்வொரு நோய்க் கானச் சிகிச்சைக்கும் மாறுபடும். ஓர் ஆண்டு, இரண்டு ஆண்டுகள், நான்கு ஆண்டுகள் என வகைப்படுத்தி யுள்ளார்கள். இதய நோயைப் பொறுத்தவரை, பாலிசி போடுவதற்கு முன்பே இருந்திருக்கக்கூடும். ஆனால், அதுகுறித்து பாலிசிதாரர் தெரியாமல் இருந்திருக்கலாம். அல்லது மறைத்திருக்கலாம். இது முன்கூட்டியே தெரிந்த நோயின் (pre-existing disease) வகையில் வருகிறது. எனவே, க்ளெய்ம் செய்ய நான்காண்டுகள் காத்திருக்கச் சொல்லியிருப்பார்கள். இது பாலிசியில் உள்ள நடைமுறைதான். பாலிசி எடுக்கும்போது வாய்வழியாக சொல்லப்படுவதை எப்போதும் நம்பாதீர்கள்; எழுத்து மூலம் அதனைக் கேட்டுப் பெறுங்கள்.

குழப்பம் 5 

சிகிச்சைக்காக மருத்துவமனை யில் சேரும்போது இன்ஷூரன்ஸ் இருந்தால், அதிக தொகைக்கு பில் போடுவதால் இழப்பீடு கிடைப்பதில் சிக்கல்.

தீர்வு: இந்தப் புகாரில் உண்மை உண்டு. இன்ஷூரன்ஸ் பாலிசி இருக்கிறது என்று தெரியவந்தாலே, 30-40% தொகை அதிகமாகத்தான் பில் வருகிறது. இதுகுறித்து நிறைய புள்ளிவிவரங்களும் திரட்டப்பட்டிருக்கின்றன. இதனைச் சரிசெய்ய வேண்டியது, இந்திய மெடிக்கல் கவுன்சிலின் கடமை. இப்படி அதிக தொகை வசூலிக்கப்படுவதற்கு மருத்துவமனை சார்பாக சில காரணங்கள் கூறப்படுகின்றன. அவற்றில் ஒன்று, இன்ஷூரன்ஸ் மூலம் மருத்துவம் பார்க்கும்போது சிகிச்சைக்கான செலவை இன்ஷூரன்ஸ் நிறுவனத்திடமிருந்து பெறுவதற்கு குறைந்தபட்சம் ஒரு மாதமாவது தாமதமாகும். எனவே, அதைக் கணக்கில் கொள்வதாகக் கூறப்படுகிறது. ஆனால், அதற்காக 30% வரை பில் தொகையை ஏற்றுவது ஏற்க இயலாததுதான். ஆனால், மருத்துவம் என்பது தற்போது வியாபாரமாக்கப்பட்டுள்ள சூழலில் இப்படி நடக்கத்தான் செய்கிறது.

அடுத்ததாக, இன்ஷூரன்ஸ்மூலம் சிகிச்சை பெறும்போது காப்பீட்டுத் தொகைக்கேற்ற அறையில் தங்குகிறார்கள். காப்பீட்டுத் தொகை அதிகமாக இருக்கும்போது டீலக்ஸ் அறையில் வைத்து சிகிச்சை தரப்படும். அங்கு வரும் மருத்துவருக்கான கட்டணமும் அதிகமாக இருக்கும். மற்ற சேவைகளுக்கான தொகையும் கூடுதலாக இருக்கும். எனவே, ஒட்டுமொத்த சிகிச்சைக்குண்டான செலவு அதிகரித்துவிடுகிறது. இதுவே குறைந்த அறை வாடகை எனில், மருத்துவருக்கான கட்டணம் குறைவாகவே இருக்கும். இதனையும் மருத்துவக் கவுன்சில்தான் சரிசெய்ய வேண்டும்.

இன்ஷூரன்ஸ் நிறுவனங்கள் சார்பாக டி.பி.ஏ (Third-Party Administrator) மூலமாக நேரடியாக மருத்துவமனைக்குச் சென்று அங்கு நடக்கும் தவறுகள் குறித்து விசாரணை நடத்தும் முறையும் இருக்கிறது. ஆனால், இந்த விசாரணையை அங்கொன்றும் இங்கொன்றுமாக சிலருக்கு மட்டுமே நடத்த முடியும். அனைத்து பாலிசிதாரர்களின் சிகிச்சைமுறையையும் கண்காணிக்கவோ, விசாரிக்கவோ இயலாது. இத்தகைய தவறுகளால் பொதுமக்களுக்கும் இழப்பு, இன்ஷூரன்ஸ் நிறுவனங்களுக்கும் இழப்பு.

ஹெல்த் இன்ஷூரன்ஸ்... குழப்பங்கள்... தீர்வுகள்!

குழப்பம் 6 

இன்ஷூரன்ஸ் முகவர்கள் தங்களது டார்கெட்டுக்காக பாலிசி குறித்து அதிகப் படியான நம்பிக்கையூட்டும்விதமாகப் பேசி விற்பனை செய்வதாகச் சொல்லப்படுகிறது. சிகிச்சைக்குச் செல்லும்போதுதான் அந்த பாலிசி யின் நிறைகுறை தெரியவந்து குழப்பம் ஏற்படுகிறது.

தீர்வு: ஹெல்த் இன்ஷூரன்ஸ் பாலிசியைப் பொறுத்தவரை, முகவர்களுக்கு அந்த பாலிசி குறித்து முழுமையாகத் தெரிந்திருக்கும் என்பது உறுதியில்லை. பாலிசியின் நிபந்தனைகள், விதிமுறைகள் பற்றி முழுமையாகப் புரிந்து கொள்ளாமல் இருக் கிறார்கள். தற்போது பாலிசி களில் பல வகைகள் வந்து விட்டன. நபர்களுக்கு ஏற்ப பாலிசிகள் இருக்கின்றன. தனிநபருக்கானது, குடும்பத்திற்கானது என இன்னும் பலவகை பாலிசி கள் இருக்கின்றன. எனவே, ஒரு முகவர் பாலிசிக்காக ஒருவரை அணுகும்போது சம்பந்தப்பட்ட நபரின் தேவையென்ன என்பதை முதலில் புரிந்துகொள்ள வேண்டும். அதற்கேற்ற பாலிசியை விவரிக்க வேண்டும். அதன்பின் ஒருவரது வருமானம் என்ன என்பதைப் பார்க்க வேண்டும். அவரது வருமானத்திற்குக் கட்டுபடியாகும் பிரீமியத்துக்குரிய பாலிசியை வழங்க வேண்டும். குறைந்த வருமானமுள்ளவரிடம் அதிக பிரீமியத்துக்கான பாலிசியைத் திணிக்கக் கூடாது. அதேபோல, முதல் 30 நாள்களுக்கு விபத்து தவிர, வேறெந்த சிகிச்சைக்கும் பாலிசி கவர் ஆகாது என்ற உண்மையைக் கண்டிப்பாகத் தெரிவிக்க வேண்டும். பாலிசி எடுப்பவர்களும் பாலிசியின் தன்மை மற்றும் நிபந்தனைகளைப் படித்து அறிவது அவசியம்.

குழப்பம் 7

சிகிச்சைக்கான செலவு குறைவாக இருந்தாலும் கூட முழுத்தொகையும் க்ளெய்ம் தரப்படுவதில்லை.

தீர்வு: உண்மைதான். சிகிச்சைக்கான செலவில் ஏதேனும் சில செலவுகள் இன்ஷூரன்ஸ் பாலிசிக்குள் வராததாக இருக்க கண்டிப்பாக வாய்ப்புண்டு. எனவே, எந்த ஹெல்த் இன்ஷூரன்ஸ் நிறுவனப் பாலிசியாக இருந்தாலும், சிகிச்சைக்கான செலவில் 100% முழுமையாகக் க்ளெய்ம் தரப்படாது. அதிகபட்சம் 85% வரை மட்டுமே கிடைக்க வாய்ப்புள்ளது. மீதம் 15% தொகை நம் கையில் இருந்துதான் செலவழிக்க வேண்டியிருக்கும். எனவே, இதனை முகவர்களும் பாலிசி போடும்போது வெளிப்படையாகவே சொல்ல வேண்டும். அப்போதுதான் சிகிச்சைக் காக மருத்துவமனைக்கு வருபவர்களும் தங்கள் கையிலிருந்து செலவழிக்கும் தொகையைத் தயார் செய்து வைக்க ஏதுவாக இருக்கும்.

குழப்பம் 8

மருத்துவப் பரிசோதனைக் காக மருத்துவமனையில் செலவிடும் தொகைக்கு க்ளெய்ம் கொடுப்பதில்லை என்கிற புகார்.

தீர்வு: நம் உடம்பில் ஏதேனும் வலி ஏற்பட்டதும் சந்தேகப்பட்டு மருத்துவமனைக்குச் சென்றால் அதுதொடர்பாக ஸ்கேன், இ.சி.ஜி எனப் பல்வேறு மருத்துவப் பரிசோதனைகளை எடுக்கச் சொல்வார்கள். அனைத்துப் பரிசோதனைகளும் முடித்து உடலில் வேறெந்த பிரச்னையும் இல்லை என்று மருத்துவர்கள் கூறும்பட்சத்தில், அந்தச் சோதனை களுக்கான செலவுகள் மருத்துவக் காப்பீட்டில் வராது. அதேவேளை, அந்தப் பரிசோதனை களுக்குப்பிறகு மருத்துவமனையில் சேர்க்கப்பட்டு அறுவைச்சிகிச்சை செய்யும் நிலை ஏற்பட்டால், அப்போது அந்தத் தொகையை க்ளெய்ம் செய்ய முடியும். இது ஹெல்த் இன்ஷூரன்ஸ் பாலிசி யிலேயே குறிப்பிடப்பட்டுள்ள நிபந்தனையே.

குழப்பம் 9

சில மருத்துவமனைகள், பாலிசி தாரர்களுடன் டீலிங் போட்டு, சிகிச்சைக்கான தொகையை உயர்த்திக்காட்டி, கூடுதலாக வரும் இன்ஷூரன்ஸ் தொகையை நோயாளிகளோடு பங்குபோட்டுக் கொள்வதாக புகார்.

தீர்வு: இத்தகைய தவறும் ஆங்காங்கே நடக்கத்தான் செய் கிறது. பில் போடும்முன்பாக காப் பீட்டுத்தொகை குறித்து விசாரிக்கி றார்கள். அந்தத் தொகையில் 80% வரை பில்லாகக் கொண்டுவருவதும் உண்டு. சில மருத்துவமனைகளில் நோயாளியை டிஸ்சார்ஜ் செய்வதில் இழுத்தடிக்கும் செயலில் இறங்கு கிறார்கள். மூன்று நாள்களில் சிகிச்சை முடிந்து கிளம்பவேண்டிய நபரை மேலும் சில நாள்கள் தங்க வைத்து பில் தொகையை உயர்த்துவதும் நடக்கிறது. இத்தகைய தவறுகள் பெரும்பாலும் கேஷ்லெஸ் சிகிச்சையில் நடப்பதில்லை. கட்டணம் கட்டி சிகிச்சை பெற்று, பின்னர் இன்ஷூரன்ஸ் மூலம் பணம் கட்டும் முறையில் இந்தத் தவறுகள் நடக்கின்றன. இப்படியான தவறு நடப்பது தெரியவந்தால், எதற்காகத் தாமதமென்று டி.பி.ஏ அமைப்பு கேள்வியெழுப்பவும் வாய்ப்புள்ளது. அதிக க்ளெய்ம் செய்ய மருத்துவமனை பாலிசி தாரருடன் பேரம் பேசும்பட்சத்தில் பாலிசிதாரர் அதற்குச் சம்மதிக்காமல் இருப்பது நல்லது. இப்படிச் செய்தது தெரியவந்தால் மொத்த க்ளெய்ம்  தொகையும் கிடைக்காமல் போக வாய்ப்பிருக்கிறது. 

குழப்பம் 10

உடல்நலத்தில் லேசாக பிரச்னை என்று மருத்துவமனைக்குப் போனால், பலவிதமான டெஸ்டு களைச் செய்து, பில் தொகையை எக்கச்சக்கமாக உயர்த்திவிடுகிறார் கள். மருத்துவமனையில் சொல்லக் கூடாத சொல், ‘இன்ஷூரன்ஸ்  பாலிசி இருக்கிறது’ என்பதுதானா?

தீர்வு:  பெரிய மருத்துவமனைகள் வியாபாரமயமாகிவிட்டதால் இத்தகைய சூழல். இன்ஷூரன்ஸ் இருப்பது தெரிந்தாலே நமக்குரிய நோயைப் பெரிதுபடுத்தி, அனைத்து பரிசோதனை களையும் செய்யவைத்து, இறுதியில் மருத்துவமனையில் அட்மிட் செய்யவைக்கும் முயற்சிகளும் நடக்கின்றன.

எனது சொந்த வாழ்க்கையிலேயே அப்படியொரு சம்பவம் நடந்தது. எனது தந்தைக்கு 75 வயது இருக்கும்போது, நெஞ்சுவலி என்று ஒரு பெரிய மருத்துவமனைக்குச் சென்றோம். அவரை பரிசோதித்துவிட்டு, 90% ரத்தக்குழாயில் அடைப்பு இருக்கிற தென்றும், உடனடியாக அறுவைச்சிகிச்சை செய்யாவிட்டால் உயிருக்கு ஆபத்து என்றும் கூறினார்கள். நான் அதை ஒப்புக்கொள்ளவில்லை. ஆனால், அறுவைச்சிகிச்சை இன்றியே எட்டு ஆண்டுகள் அவர் உயிரோடு இருந்தார்.

 எனவே, இப்படியான சூழலில் நமக்குக் கிடைத்த மருத்துவப் பரிசோதனை முடிவுகளை நமக்குத் தெரிந்த மருத்துவரிடமோ அல்லது இன்னொரு மருத்துவமனையிலோ கொடுத்து செகண்ட் ஒப்பீனியன் பெறுவது நல்லது. அப்படிக் கிடைக்கும் ஒப்பீனியனும் கண்டிப்பாக அறுவைச்சிகிச்சை தேவை என்று உறுதிப்படுத்தும்பட்சத்தில் அறுவைச்சிகிச்சைக்கு ஒப்புக் கொள்ளலாம். ஒரு சிகிச்சையை ஏற்பதும் மறுப்பதும் நோயாளி களின் உரிமைகளில் ஒன்றாகும்” என்றார் அவர்.

ஹெல்த் இன்ஷூரன்ஸ் பாலிசியை எதற்காக எடுக்கிறோம், பாலிசியில் எந்தெந்த சிகிச்சைகளுக்கு க்ளெய்ம் கிடைக்கும்  என்பதைத் தெளிவாகப் புரிந்து கொண்டால் பின்னர் ஏற்படும் குழப்பங்களை எளிதில் தவிர்க்கலாம்.

பி.மனோகரன்

- தெ.சு.கவுதமன்

தவறான பாலிசி... என்ன வழி?

தவறான பாலிசியை எடுத்துவிட்டால் மாற்ற முடியாது என சில முகவர்கள் சொல்கிறார்கள். பாலிசியைப் படித்துப் பார்க்காமல் பக்கம்பக்கமாக கையெழுத்துப் போடும் பழக்கத்தைக் கைவிட வேண்டும். பாலிசியின் நிபந்தனைகள், விதிமுறைகளை முழுமையாக வாசித்துப் பார்க்க வேண்டும். ச்குறிப்பாக, அந்த பாலிசியில் எதிர்பார்ஃக்கும் நோய்களுக்கான சிகிச்சைகளுக்கு வாய்ப்புள்ளதா என்பதைப் பார்க்க வேண்டும். இவற்றையெல்லாம் கவனிக்காமல் பாலிசியை எடுத்துவிட்டாலும்கூட, பாலிசி எடுத்ததிலிருந்து 15 நாள்களுக்கு ஃப்ரீ லுக் பீரியட் (Free look   period) என்ற காலக்கெடுவுக்குள் அந்த பாலிசி குறித்து தெளிவாக விசாரித்து, பாலிசி ஏற்புடையதாக இல்லையெனில் திருப்பியளிக்க லாம். அதேபோல, ஒரு நிறுவனத்தின் பாலிசி திருப்தியாக இல்லையென்றால், இன்னொரு நிறுவனத்தின் பாலிசிக்கு மாறிக்கொள்ளும் போர்ட்டபிளிட்டி வசதியும் உள்ளது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு