Published:Updated:

சி.இ.ஓ பதவி நீக்கம்... என்ன நடக்கிறது ஜி.இ நிறுவனத்தில்?

ஒட்டுமொத்த விகடனுக்கும் ஒரே ஷார்ட்கட்

Use App
சி.இ.ஓ பதவி நீக்கம்... என்ன நடக்கிறது ஜி.இ நிறுவனத்தில்?
சி.இ.ஓ பதவி நீக்கம்... என்ன நடக்கிறது ஜி.இ நிறுவனத்தில்?

உலக நிகழ்வு

பிரீமியம் ஸ்டோரி

வ்வளவு பெரிய பதவியில் இருந்தாலும் வேலை என்பது நிரந்தரம் இல்லை என்பதற்கு சமீபத்திய

சி.இ.ஓ பதவி நீக்கம்... என்ன நடக்கிறது ஜி.இ நிறுவனத்தில்?

உதாரணம் ஜான் ஃப்ளெனரி (John Flannery). இவர், ஜெனரல் எலெக்ட்ரிக் நிறுவனத்தின் தலைமைச் செயல் அதிகாரி. இந்த நிறுவனத்தின் ஒரு சி.இ.ஓ அந்தப் பதவியிலிருந்து நீக்கப்படுவது இதுவே முதல்முறை.

இவர் கடந்த ஆண்டு ஆகஸ்ட் மாதம்தான் ஜி.இ-யின் தலைவர் மற்றும் தலைமைச் செயல் அதிகாரி பொறுப்பை ஏற்றார். ஆனால், 14 மாதங்களுக்குள்ளேயே அவரது பதவி பறிக்கப்பட்டிருக்கிறது. இவருக்கு முன்பு ஜி.இ-யின் தலைமைப் பொறுப்பில் இருந்த ஜெஃப் இம்மெல்ட் 16 ஆண்டுகள் அந்தப் பொறுப்பில் இருந்தார். அவருக்குமுன்பாக இருந்த ஜேக் வெல்ஷ் 20 ஆண்டுகள் அந்தப் பதவியை வகித்தது குறிப்பிடத்தக்கது. 

ஜான் ஃப்ளெனரி நீக்கப்பட்டதைத் தொடர்ந்து அதன் இயக்குநர் குழுவில் இருந்த லாரம்ஸ் கல்ப் (Lawrence Culp) என்பவரை ஜி.இ-யின் தலைவராக இயக்குநர் குழு நியமனம் செய்துள்ளது. இவர் கடந்த ஏப்ரல் மாதம்தான் ஜி.இ நிறுவனத்தின் இயக்குநர் குழுவில் இணைந்தார். நூறு ஆண்டுகளுக்கு மேல் செயல்பட்டு வரும் ஜி.இ நிறுவனம், ஏற்கெனவே அந்த நிறுவனத்தில் பணி யாற்றியவர்களை மட்டுமே தலைவராக நியமித்து வந்தது. முதல்முறையாக நிறுவனத்துக்கு வெளியே இருந்து தலைமைச் செயல் அதிகாரியை ஜி.இ நிறுவனம் தற்போது நியமனம் செய்திருக்கிறது.

சி.இ.ஓ பதவி நீக்கம்... என்ன நடக்கிறது ஜி.இ நிறுவனத்தில்?

ஜான் நீக்கப்பட்ட அன்று ஜி.இ நிறுவன பங்கு ஒரே நாளில் 13% வரை உயர்ந்தது. இவர் பொறுப் பேற்றதிலிருந்து நிறுவனத்தின் பங்கு விலை தொடர்ந்து சரிந்து வந்தது. கடந்த 52 வாரத்தில் உச்சபட்ச விலையான 24.89 டாலரிலிருந்து  பங்கு விலை தொடர்ந்து சரிந்து 11.29 டாலர் அளவுக்குக் குறைந்தது. இதனால் நிறுவனத்தின் சந்தை மதிப்பு 100 பில்லியன் டாலருக்குக் கீழே சென்றது. ஆனால், 2015-ம் ஆண்டு நிறுவனத்தின் சந்தை மதிப்பு 300 பில்லியன் டாலருக்கு மேல் இருந்தது.

எனர்ஜி, ஹெல்த்கேர், மின்சாரம் என பல துறைகளில் செயல்பட்டு வரும் குழுமம் ஜெனரல் எலெக்ட்ரிக். ஜான், சி.இ.ஓ பொறுப்புக்கு வரும்போதே பல பிரச்னைகள் இருந்தன. நிறுவனத்தைச் சீரமைப்பதற்கு ஜான் எடுத்த நடவடிக்கைகள் போதுமானதாக இல்லை என்பது இயக்குநர் குழுவின் கருத்து. தவிர, நிறுவனத்தில் இருக்கும் பிரச்னைகளின் தீவிரத்துக் கேற்ப அவர் வேகமாகச் செயல்படவில்லை என்றும் இயக்குநர் குழு கருதியது. குறிப்பாக, ஜி.இ குழுமத்தின் ஜி.இ பவர் சரியாகச் செயல்படவில்லை. இந்தப் பிரிவின் லாபம் ஏற்கெனவே கணிக்கப்பட்ட அளவுக்கு இருக்காது என அந்த நிறுவனம் அறிவித்திருக்கிறது.

இதுமாதிரியான பல பிரச்னைகள் ஒன்றுசேர, டவ் ஜோன்ஸ் குறியீட்டில் இருந்து கடந்த ஜூன் மாதம் ஜி.இ பங்கு வெளியேறியது. நூறு ஆண்டு களுக்கு மேலாக டவ் ஜோன்ஸ் குறியீட்டில் உள்ள நிறுவனம் என்னும் சிறப்பு போனதைத் தொடர்ந்து இயக்குநர் குழு விவாதிக்கத் தொடங்கியது. பலரும் ஜி.இ பவர் நிறுவனப் பிரிவின் தலைவர் நீக்கப்பட வாய்ப்பு இருக்கிறது என்றுதான் நினைத்தார்கள். ஆனால், ஜானை நீக்குவது குறித்து சில வாரங்களாக இயக்குநர் குழு விவாதித்து வந்தது. கடந்த அக்டோபர் 1-ம் தேதி அறிவித்தது. 30 ஆண்டுகளாக ஜி.இ நிறுவனத்தில் பணிபுரிந்த ஜான்  நீக்கப்பட்டார்.

மொத்தப் பிரச்னைகளும் தீர்வு காண்பதற்காக ஜான் நீக்கப்பட்டாலும் பிரச்னை முந்தையத் தலைமைச் செயல் அதிகாரி ஜெப் இம்மெல்ட் காலத்திலே தொடங்கிவிட்டது. 2000-ம் ஆண்டு நிறுவனத்தின் சந்தை மதிப்பு 600 பில்லியன் டாலராக இருந்தது. அதீத நம்பிக்கையில் முந்தைய தலைவர் பல நடவடிகைகளை எடுத்தார். தேவையில்லாத கையகப்படுத்தல், எட்ட முடியாத இலக்குகள், தவறான நிதி நிர்வாகம் எனப் பல காரணங்கள் இருப்பதாக நிறுவனத்தின் முன்னாள் முக்கிய அதிகாரிகள் குற்றம் சாட்டியிருந்தனர்.

சினிமாவில் வருவதுபோல, பிரச்னையைத் தீர்க்க ஓர்  அதிகாரியை நீக்கிவிட்டு, வேறொருவரை நியமனம் செய்துள்ளனர். புதிய சி.இ.ஓ-வாக வந்திருக்கும் லாரன்ஸுக்கு ஜி.இ-யின் தலைமைப் பொறுப்பு மகிழ்ச்சியாக இருந்தாலும், மிகப் பெரிய சவால் அவருக்குக் காத்திருக்கிறது.

- வாசு கார்த்தி

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு