Published:Updated:

“விவசாயம் செய்தால் முன்னேறலாம்...” மொரீஷியஸ் அதிபர் நம்பிக்கை!

“விவசாயம் செய்தால் முன்னேறலாம்...” மொரீஷியஸ் அதிபர் நம்பிக்கை!
பிரீமியம் ஸ்டோரி
News
“விவசாயம் செய்தால் முன்னேறலாம்...” மொரீஷியஸ் அதிபர் நம்பிக்கை!

நாட்டுநடப்பு

வேலூர் வி.ஐ.டி பல்கலைக்கழகம் சார்பில், கடந்த மூன்று ஆண்டுகளாக ‘உழவர் களஞ்சியம்’ எனும் நிகழ்ச்சி நடத்தப்பட்டு வருகிறது. இந்த ஆண்டுக் கடந்த அக்டோபர் 8, 9 ஆகிய தேதிகளில் நான்காவது ஆண்டு உழவர் களஞ்சியம் விழா நடத்தப்பட்டது. தமிழ்நாடு வேளாண்மைப் பல்கலைக்கழகம் மற்றும் பசுமை விகடன் இதழ், நபார்டு ஆகியவற்றுடன் இணைந்து இவ்விழாவை நடத்தியது, வி.ஐ.டி பல்கலைக்கழகம். வேலூர், திருவண்ணாமலை, காஞ்சிபுரம் மாவட்டங்களைச் சேர்ந்த விவசாயிகள், மாணவர்கள் என ஆயிரத்துக்கும் மேற்பட்டோர் திரளாக இவ்விழாவில் கலந்து கொண்டனர்.

வி.ஐ.டி பல்கலைக்கழக வேந்தர் விஸ்வநாதன், ஆப்பிரிக்க - ஆசிய ஊரக வளர்ச்சித்துறையின் பொதுச்செயலாளர் வஸ்ஃபி ஹஸன் எல்-ஸ்ரிஹின் ஆகியோர் சிறப்பு விருந்தினர்களாகக் கலந்து கொண்டனர்.

“விவசாயம் செய்தால் முன்னேறலாம்...” மொரீஷியஸ் அதிபர் நம்பிக்கை!

நிகழ்ச்சியில் பேசிய பல்கலைக்கழக வேந்தர் விஸ்வநாதன், “விவசாயத்துக்கு வி.ஐ.டி பல்கலைக்கழகம் முன்னுரிமை அளித்து வருகிறது. முதற்கட்டமாக வேலூர், திருவண்ணாமலை மாவட்டங்களில் உள்ள விவசாயிகளின் நலனுக்காகப் பல வேளாண் வளர்ச்சித் திட்டங்களை மேற்கொள்ளும் வகையில் உழவர் களஞ்சியம் என்ற நிகழ்ச்சியைக் கடந்த சில ஆண்டுகளாக நடத்தி வருகிறோம். இந்திய நாட்டின் மக்கள்தொகை சுமார் 134 கோடி. இது உலக மக்கள் தொகையில் 18 சதவிகிதமாகும். தற்போதைய நிலவரப்படி, இந்தியாவில் 8.5 லட்சம் பேர் விவசாயத் தொழிலை விட்டுவிட்டனர். ஏரிகளையும், கால்வாய்களையும் தூர்வாரிச் சீரமைத்து வைத்தாலே மழைக்காலங்களில் வரும் நீரைச் சேமித்து வைத்து மழை இல்லாத காலங்களில் பயன்படுத்த முடியும். 100 நாள் வேலைத் திட்டத்தில் விவசாயப் பணிகளையும் சேர்க்க வேண்டும்” என்று அக்கறையுடன் பேசினார்.

தொடர்ந்து பேசிய வி.ஐ.டி. துணைத் தலைவர் ஜி.வி.செல்வம், “உழவர் களஞ்சியம் நிகழ்ச்சி விவசாயிகளிடையே புதிய பயிர்களைச் சாகுபடி செய்ய ஆர்வத்தை ஏற்படுத்தியுள்ளது. பாலாற்றினைச் சுத்தம் செய்வதற்காக வி.ஐ.டி., கிரீன் பாலாறு திட்டத்தைக் கொண்டு வந்து பாலாற்றினைச் சுத்தம் செய்து வருகிறது. இதனால், பாலாற்றில் நீர்வரத்து அதிகரித்துள்ளது. மேற்கொண்டு பல விவசாயத் திட்டங்களை முன்னெடுத்து வருகிறோம்” என்றார் உற்சாகத்துடன்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
“விவசாயம் செய்தால் முன்னேறலாம்...” மொரீஷியஸ் அதிபர் நம்பிக்கை!

நிகழ்ச்சியில் பேசிய ஆப்பிரிக்க ஆசியா ஊரக வளர்ச்சி நிறுவனத்தின் பொதுச் செயலாளர் வஸ்ஃபி ஹஸன் “தற்போது உணவு உற்பத்தி போதுமான அளவில் இல்லை. எனவே இயற்கை வளத்தைப் பயன்படுத்தி உணவு உற்பத்தியைப் பெருக்கி அதைப் பாதுகாக்க வேண்டியது நமது பொறுப்பு. ஒரு நாட்டின் நிலையான ஊரக வளர்ச்சியில் விவசாயத் தொழில்கள் முக்கியப் பங்கு வகிக்கின்றன. வேளாண்மையில் புதிய தொழில்நுட்பங்களைக் கையாள வேண்டும். அதற்கான தொழில்நுட்பங்களை உருவாக்கித் தரும் பணியில் ஆப்பிரிக்கா, ஆசிய ஊரக வளர்ச்சி அமைப்பு ஈடுபட்டுள்ளது” என்றார். நிகழ்ச்சியில் வேளாண் அதிகாரிகள் மற்றும் விஞ்ஞானிகள் கலந்து கொண்ட கருத்தரங்கம் மற்றும் கலந்துரையாடல் நிகழ்ச்சிகள் நடைபெற்றன. ‘காய்கறி மற்றும் பழங்களில், அறுவடைக்குப் பிறகான தொழில்நுட்பங்கள்’ என்னும் தலைப்பில் இந்தியத் தோட்டக்கலை ஆராய்ச்சி நிறுவனத்தின் முதுநிலை விஞ்ஞானி முனைவர் எஸ்.புவனேஸ்வரி உரையாற்றினார்.

‘இயற்கை வேளாண்மையில் நுண்ணுயிர்களின் பங்கு’ என்ற தலைப்பில் காந்திகிராம கிராமியப் பல்கலைக்கழக வேளாண் அறிவியல் நிலைய முதன்மை விஞ்ஞானி உதயகுமார் உரையாற்றினார். இரண்டாம் நாள் நிகழ்ச்சியில், மொரீஷியஸ் நாட்டின் அதிபர் பரமசிவம் பிள்ளை வையாபுரி கலந்துகொண்டு வி.ஐ.டி பண்ணையைத் துவக்கி வைத்தார். தொடர்ந்து பேசிய பரமசிவம் பிள்ளை, “நாங்கள் தமிழ்நாட்டில் இருந்து மொரீஷியஸ் சென்று வாழ்கின்ற ஐந்தாவது தலைமுறையைச் சேர்ந்தவர்கள். பல்வேறு நாடுகள் மற்றும் இந்தியாவில் உள்ள பல மாநிலங்களைச் சேர்ந்த மக்கள் வந்து வாழ்வதால் அவர்களின் உழைப்பால் முன்னேறிக் கொண்டிருக்கிறது, மொரீஷியஸ். இங்கு விவசாயமும் முக்கியத் தொழிலாக உள்ளது. விவசாயத்தைச் செய்தால் நாம் அனைவருமே முன்னேறலாம். விஐடி பல்கலைக கழக மாணவர்கள் நேரடியாகவோ அல்லது மறைமுகமாகவோ விவசாயத்தோடு தொடர்பு கொண்டு செயல்பட்டு வருவதைப் பாராட்டுகிறேன்” என்று மகிழ்ச்சியுடன் பேசி முடித்தார்.

விழாவில் நடத்தப்பட்ட கண்காட்சியில்... இயற்கை வேளாண் விளைபொருள்கள், பாரம்பர்ய விதை வகைகள், கால்நடை வளர்ப்பு தொடர்பான நூல்கள், வேளாண்மைத் தொடர்பான தகவல் மற்றும் சந்தேகத்தீர்வு மையங்கள், மரக்கன்று விற்பனை, எண்ணைவித்துக்கள், பசுமைக்குடில், மாடித் தோட்டம், இயற்கை கைவினைப்பொருள்கள், பாரம்பர்ய உணவுப்பொருள்கள் எனப் பல பயனுள்ள அரங்குகள் இடம்பெற்றிருந்தன.

- ம.தமிம், சு.சந்துரு,  படங்கள்: ச.வெங்கடேசன்