Published:Updated:

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4
பிரீமியம் ஸ்டோரி
News
அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4

காய்கறி, பழங்களுக்கு அமோகமான ஏற்றுமதி வாய்ப்பு!

விவசாய விளைபொருள்களில் எளிதாக அனுப்பக்கூடியவை, காய்கறிகள் மற்றும் பழங்கள்தான். இதோடு எளிதாக வளரக்கூடியதாகவும், எல்லோருக்கும் தெரிந்தச் சாகுபடி முறையாகவும் இருப்பதால் பலரும் காய்கறி ஏற்றுமதியில் ஆர்வம் காட்டுகின்றனர். மேலும், இந்தியாவில் உள்ள சீதோஷ்ண நிலை, காய்கறிகள் மற்றும் பழங்களை உற்பத்தி செய்வதற்கேற்ற வகையில் அமைந்திருப்பதால், காய்கறிகள் மற்றும் பழங்கள் உற்பத்தியில் இந்தியா, உலக அளவில் இரண்டாவது இடத்தில் இருக்கிறது. அதனால், ஏற்றுமதிக்கான வாய்ப்பும் அதிகமாக உள்ளது.

2017-18-ம் ஆண்டுக் காலகட்டத்தில் காய்கறி மற்றும் பழங்கள் ஏற்றுமதியில்... 9,410 கோடி ரூபாய் புழங்கியுள்ளது. 5,181 கோடி ரூபாய் அளவுக்குக் காய்கறி வர்த்தகமும், 4,229 கோடி ரூபாய்க்குப் பழங்கள் வர்த்தகமும் நடந்துள்ளதாக மத்திய வர்த்தக அமைச்சகம் தெரிவித்துள்ளது.

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4

ஏற்றுமதித் தொழிலில் ஈடுபட நினைப்பவர்கள், ‘அபீடா’ (APEDA) நிறுவனத்தில் சான்றிதழ் பெற்று... நீண்டநாள்கள் தாங்கக்கூடிய உருளைக்கிழங்கு, கருணைக்கிழங்கு, சேப்பங்கிழங்கு, பீட்ரூட், மரவள்ளிக் கிழங்கு போன்ற கிழங்கு வகைகளை முதலில் அனுப்பத் தொடங்கலாம். தற்போது கேரட், கத்திரி (குண்டு ரகங்கள்), வெண்டை, அவரை, பாகற்காய், பீர்க்கங்காய், பீன்ஸ், முருங்கைக்காய் போன்ற காய்கறிகள் அதிக அளவில் ஏற்றுமதி செய்யப்படுகின்றன. ஒட்டன்சத்திரம், ஒசூர் ஆகிய ஊர்களிலிருந்து அதிக அளவில் காய்கறிகள் ஏற்றுமதி செய்யப்படுகின்றன. மாம்பழம், பப்பாளி, கொய்யா (உள்பகுதி சிவப்பு நிறத்தில் இருப்பவை), வாழை போன்ற பழ வகைகள் அதிக அளவில் ஏற்றுமதியாகின்றன.

காய்கறி மற்றும் பழங்கள் ஏற்றுமதி செய்வதற்குச் சிங்கப்பூர், அரபு நாடுகள்தான் உகந்தவை. மலேசியாவிலேயே காய்கறிகள் விளைவதால் அந்த நாட்டுக்கு அனுப்புவதைத் தவிர்க்கலாம். அமெரிக்கா, ஐரோப்பிய நாடுகளுக்கும் காய்கறிகளை அனுப்பலாம். ஆனால், இத்தகைய நாடுகளில், ‘இடர்ப்பாடு’ (ரிஸ்க்) அதிகம். சிங்கப்பூரில் ஒரு கிலோ காய்கறி 125 ரூபாய் முதல் 175 ரூபாய் வரை விற்பனையாகிறது. பப்பாளி 1 கிலோ 200 ரூபாய் வரை விற்பனையாகிறது.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4

சிங்கப்பூருக்கு விமானம் வழியாக அனுப்பினால் ஒரு கிலோ காய்கறிக்கு 60-80 ரூபாய்ச் செலவாகும். கப்பல் வழியாக அனுப்பும்போது ஒரு கிலோ காய்கறிக்கு 10-15 ரூபாய்ச் செலவாகும். பொருளின் அளவைப் பொறுத்து அதற்கான போக்குவரத்தைத் தேர்ந்தெடுக்க வேண்டும்.

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4

கப்பலில் அனுப்பக் குறைந்தபட்சம் 10 டன் காய்கறிகள், பழங்களாவது இருக்க வேண்டும். விமானத்தில் 100 கிலோ, 200 கிலோ, 500 கிலோ என்று கூட அனுப்பலாம். அதேபோல, இப்போதெல்லாம் குளிர்பதன வசதிகள் கொண்ட கன்டெய்னர்கள் இருக்கின்றன. அதனால், பொருள்கள் சேதமில்லாமல் போய்ச் சேர்கின்றன. இதுபோன்ற குளிர்பதன வசதிகள் கொண்ட ஒரு கன்டெய்னரில் சிங்கப்பூருக்குப் பொருள்களை அனுப்ப 1,00,000 ரூபாய் (15 டன் அளவுக்கு) செலவாகும். ஒவ்வொரு நாட்டுக்கும் ஏற்றவாறு செலவுகள் மாறுபடும். அதேபோலக் கப்பலில் அனுப்பும்போது நேரடியாக (Final Destination) அந்த நாட்டை சென்றடைவதாக இருக்க வேண்டும். இன்னொரு நாட்டுக்குச் சென்று, பிறகு நாம் அனுப்பும் நாட்டுக்குச் செல்வதாக இருக்கக் கூடாது. புரூனே நாட்டுக்குக் காய்கறித் தேவையிருக்கிறது. ஆனால், அந்த நாட்டுக்கு நேரடியாகக் கப்பல் வசதி இல்லாததால், அந்நாட்டுக்குக் காய்கறி அனுப்புவதில் இன்றும் சிரமம் இருந்து வருகிறது.

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4

அரபு நாடுகளுக்குக் கப்பல் சென்று சேர, 7-8 நாள்கள் ஆகும். சிங்கப்பூருக்கு 5-7 நாள்கள் ஆகும். எந்த நாட்டுக்கு அனுப்புவதாக இருந்தாலும் சரி... அது 10 நாள்களுக்குள் சென்றடைவதாக இருக்க வேண்டும். அதேபோல விமானத்தில் அனுப்பும்போது 24 மணி நேரத்துக்குள் சென்றடைவதாக இருக்க வேண்டும். இதனால்தான் அமெரிக்கா, ஐரோப்பிய நாடுகளுக்குக் கப்பலில் அனுப்புவதில் இடர்ப்பாடு உள்ளது என்கிறோம். முடிந்தால் விமானத்தில் அனுப்பலாம். சிங்கப்பூருக்கு அடுத்து துபாய், கத்தார் உள்ளிட்ட அரபு நாடுகள் முக்கியச் சந்தையாக இருக்கின்றன. துபாயில் உள்ள ‘ஆவீர் (Aweer) மார்க்கெட்’ முக்கியமானது. துபாயில், தேங்காயின் தேவை அதிகமாக உள்ளது.

இந்த நாடுகளில் யார் நம்முடைய பொருள்களை வாங்குகிறார்கள் என்று பார்த்தால், அவர்கள் இந்தியர்கள்தான். குறிப்பாகத் தென்னிந்தியர்கள் அதிக அளவில் வாங்குகிறார்கள். தென்னிந்திய சமையலில் இங்கிருந்து நாம் அனுப்பும் பொருள்களே பிரதானம். இப்படியெல்லாம் பொருள்களை அனுப்புகிறோம். பணத்தை எப்படிப் பெறுவது என்று கேட்டால், விமானத்தில் அனுப்புகிறீர்கள் என்றால், கண்டிப்பாக முன்பணம் (அட்வான்ஸ்) பெறாமல் பொருள்களை அனுப்ப வேண்டாம். அதேபோல, வாங்குபவர் நன்கு தெரிந்த நபராக இருப்பது நல்லது. இந்தப் பொருள்களை அனுப்புவதற்கு முன் ப்ரீ சிப்மென்ட் டாக்குமெண்ட்ஸ் (Pre Shipment Documents-Invoice and other Documents) தயார் செய்ய வேண்டும். இது இருந்தால்தான் சுங்கத்தில் (Customs Department) பொருள்களை அனுப்ப முடியும். அனுப்பிய பிறகு ஒரு சில ஆவணங்களைத் (Post Shipment-Bank Documents) தயார் செய்ய வேண்டும். இந்த ஆவணங்களைத் தயாரிப்பது மிகவும் எளிதானதுதான். அதுகுறித்து அடுத்து வரும் இதழ்களில் பார்ப்போம்.

- ஏற்றுமதி பெருகும்.

கே.எஸ்.கமாலுதீன்,

தொகுப்பு. த.ஜெயகுமார்,  படங்கள்: வ.யஷ்வந்த்

திட்டமிட்டால் லாபம் நிச்சயம்!

கிருஷ்ணகிரியில் இருந்து மாம்பழம், தக்காளி போன்றவற்றை ஏற்றுமதி செய்துவரும் ‘ஹர்ஷா ஃபிரஷ்’ நிறுவனத்தின் உரிமையாளர் புகழேந்தியிடம் பேசியபோது... “பத்து வருஷமா மாம்பழத்தையும் 4 வருஷமா தக்காளியையும் ஏற்றுமதி செஞ்சுட்டுருக்கேன். உலக அளவுல இந்திய மாம்பழங்களுக்கு நல்ல வரவேற்பு இருக்கு. குறிப்பாகப் பங்கனப்பள்ளி, அல்போன்சா ரக மாம்பழங்கள் வர்த்தக ரீதியா நல்லா சந்தை வாய்ப்பைப் பெற்றிருக்கின்றன. இந்தியாவின் மிதமான மழையும், அதிகப்படியான வெப்பமும் உலக அளவுல நம்ம மாம்பழங்களுக்கு விற்பனை வாய்ப்பை ஏற்படுத்திக் கொடுத்திருக்கு. நான் இங்கிலாந்து, துபாய், சிங்கப்பூர்னு 14 நாடுகளுக்கு ஏற்றுமதி செஞ்சுட்டுருக்கேன்.

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4

இயற்கை முறையில் தேன் மூலமாத் தயாரிக்கப்படுற மெழுகைப் பூசி, பதப்படுத்தி அனுப்புறதால நீண்ட நாள்களுக்கு மாம்பழங்கள் தாங்குது. இந்த முறையில ஆப்பிள், ஆரஞ்சு மாதிரியான பழங்களையும் அனுப்பலாம். இந்தியாவுல ஜனவரி மாசத்துல இருந்து ஆகஸ்ட் மாசம் வரைக்கும் மாம்பழத்துக்கான சீசன் இருக்கும். ஒரு கிலோ மாங்காயை 20 ரூபாய்க்கு வாங்கி... ஏற்றுமதி மூலம் விற்பனை செய்தால் 200 ரூபாய்க்கு விற்க முடியும். 2,500 டன் கொள்ளளவு கொண்ட குளிர்பதனக்கிடங்கு அமைச்சுருக்கேன். அதுல வருஷத்துக்கு 350 டன் அளவு மாம்பழங்களைப் பதப்படுத்தி அனுப்பிட்டு இருக்கேன்.

நம்ம ஊர் நாட்டுத் தக்காளியில புளிப்புச்சுவை இருக்குறதால, அதுக்கும் நல்ல ஏற்றுமதி வாய்ப்பு இருக்கு. ஏற்றுமதி செய்றவங்க இனிப்புச் சுவையுள்ள பெங்களூரு தக்காளியைத் தவிர்த்து, நாட்டுத் தக்காளியை ஏற்றுமதி செய்யலாம். காட்டன் பாக்ஸ், தெர்மாகோல், பிளாஸ்டிக் டிரேனு தக்காளியை பேக் பண்ணி அனுப்பிட்டு இருக்கேன். துபாய், சிங்கப்பூர் நாடுகளுக்குத் தக்காளியை ஏற்றுமதி செய்யலாம். தக்காளியைக் கடல் மார்க்கமாக அனுப்புறதுதான் நல்லது. என் அனுபவத்துல விமானத்தில் அனுப்பினா செலவு கட்டுபடியாகலை. ஏற்றுமதியில இருக்கிற முக்கியப் பிரச்னை பணம் வாங்குறதுதான். அதனால, இப்பெல்லாம் கைக்கு அட்வான்ஸ் வந்தபிறகுதான் பொருள்கள அனுப்புறதுக்கான வேலையையே தொடங்குறோம். திட்டமிட்டு, கவனமாகவும் எச்சரிக்கையாகவும் செய்தால் ஏற்றுமதி தொழிலில் லாபம் பார்க்கலாம்” என்றார்.

தொடர்புக்கு: புகழேந்தி,
செல்போன்: 94432 40425

பேக்கிங் செய்யப் பயிற்சி

காய்கறிகள், பழங்கள் போன்றவற்றை ஏற்றுமதி செய்வதில், ‘பேக்கிங் மிகவும் முக்கியமானது. பேக்கிங் செய்யும் முறையில்தான் அது பாதுகாப்பாகச் சென்று சேர்வது உறுதிப்படுத்தப்படுகிறது. உதாரணமாக, பப்பாளியை நிற்க வைத்துத்தான் அடுக்க வேண்டும். கேரட்டின் தண்டுப் பகுதியை(முள்ளங்கி போன்று) கட் செய்யாமல் அனுப்ப வேண்டும். பாகற்காய், பீர்க்கங்காய் போன்றவற்றைப் படுக்க வைத்துத்தான் அனுப்ப வேண்டும். அட்டைப் பெட்டிகளில் (காட்டன் பாக்ஸ்) துளைகள் இருக்க வேண்டும். பழங்களை அனுப்பும்போது ஓர் அடுக்குக்கும் இன்னோர் அடுக்குக்கும் இடையில் செய்தித்தாள்களை வைக்காமல் மெத்தென்று இருப்பவற்றை (Tissue Paper) வைக்க வேண்டும். இப்படிப் பேக்கிங் செய்வதில் பல முறைகள் இருக்கின்றன. இதற்காக வழிகாட்டுகிறது, சென்னையில் உள்ள ஐ.ஐ.பி (IIP-Indian Institute of Packaging) என்கிற மத்திய அரசு நிறுவனம். பேக்கிங், சிப்பம் கட்டுதல் உள்ளிட்ட நவீன முறைகளைக் கற்றுத் தருகிறது, இந்நிறுவனம். இன்று பேக்கிங் செய்வதே ஒரு தொழிலாக வளர்ந்து கொண்டிருக்கிறது. ஆர்வமுள்ளோர் இங்கே பயிற்சி எடுக்கலாம். மேலும் விவரங்களுக்கு www.iip-in.com என்ற இணையதள பக்கத்தில் விவரங்களை அறியலாம்.

அள்ளித்தரும் அக்கரைச் சீமை... ஏற்றுமதிக்கு வழிசொல்லும் வெற்றி சூத்திரங்கள்! - 4

தொடர்புக்கு: துணை இயக்குநர், எண். 169, இண்டஸ்ட்ரியல் எஸ்டேட், 2வது மெயின் ரோடு, பர்மா காலனி, பெருங்குடி, சென்னை – 600096. தொலைபேசி: 044 24960730/24961560, செல்போன்: 93821 99089.