மத்திய அரசின் புதிய கட்டுப்பாடு... இ-காமர்ஸ் நிறுவனங்களுக்கு நெருக்கடி!

டி சம்பர் 26-ம் தேதி என்றாலே சுனாமிதான் அனைவருக்கும் நினைவில் வரும். ஆனால், இ-காமர்ஸ் நிறுவனங்களுக்கு இனி டிசம்பர் 26 என்றால், மத்திய அரசாங்கம் திடீரெனக் கொண்டுவந்த புதிய கட்டுப்பாட்டு விதிமுறைகள் மட்டுமே நினைவுக்கு வரும். இ-காமர்ஸ் நிறுவனங்களுக்கான அந்நிய நேரடி முதலீட்டுக் கொள்கையில் மத்திய அரசாங்கம் சில திருத்தங்களை அறிவித்திருக்கிறது. இந்த அறிவிப்பு வரும் பிப்ரவரி 1-ம் தேதி முதல் அமலுக்கு வரும் என்றும் அறிவிக்கப்பட்டிருக்கிறது. இதனால் பெரிய இ-காமர்ஸ் நிறுவனங்கள் கலக்கத்தில் உள்ளன. அதேசமயம், மத்திய அரசாங்கத்தின் இந்த அறிவிப்புக்கு ஆதரவான கருத்துகளும் சந்தையில் உள்ளன. இந்த புதிய கட்டுப்பாட்டு விதிமுறைகளினால் யாருக்கு லாபம், யாருக்குப் பாதகம் என்பது குறித்து பார்ப்பதற்குமுன், இப்போது வந்திருக்கும் புதிய விதிமுறைகளைப் பற்றி பார்ப்போம்.

அரசின் அறிவிப்பு என்ன?

மார்க்கெட் பிளேஸ் மாடல் முறையில் 100% அந்நிய முதலீடு அனுமதிக்கப் பட்டிருக்கிறது. அதாவது, இணையதளம் மட்டுமே நடத்தி, மற்ற ரீடெய்ல் நிறுவனங்களிடம் பொருள்களை வாங்கி விற்கும்பட்சத்தில் 100% அந்நிய முதலீடு அனுமதிக்கப்பட்டிருக்கிறது. ஆனால், இன்வென்ட்ரி மாடலில் (பொருள்களை வாங்கி வைத்து விற்பனை செய்வது) முழுமையாக அந்நிய முதலீடு அனுமதிக்கப்படவில்லை. ஆனால், இ-காமர்ஸ் நிறுவனங்கள் வாடிக்கையாளர் களுக்குத் தெரியும்வகையில் ஒரு நிறுவனத்தை நடத்தும் அதேசமயத்தில், இன்னொரு ரீடெய்ல் நிறுவனத்தையும் நடத்திக் கொண்டிருக்கும். உதாரணத்துக்கு, ஃப்ளிப்கார்ட் என்பது நமக்குத் தெரிந்த இணையதளம். ஆனால், ஃப்ளிப்கார்ட்மூலம் வாங்கப்படும் பெரும்பாலான பொருள்கள் டபிள்யூ.எஸ் ரீடெய்ல் என்னும் நிறுவனம்மூலமாக வாடிக்கையாளர்களுக்கு டெலிவரி செய்யப்படும்.

. அதேபோல, அமேசானை எடுத்துக் கொண்டால், வாடிக்கையாளர்களுக்குத் தெரிவது அமேசான். ஆனால் அமேசான் முதலீடு செய்துள்ள ரீடெய்ல் நிறுவனம் க்ளவுட்டெய்ல் (Cloudtail). இந்த நிறுவனம் பொருள்களை வாங்கி விற்பனை செய்துவருகிறது. இந்த முதலீடு அந்நிய முதலீட்டு விதிமுறைக்கு எதிரானது என அரசு தற்போது அறிவித்திருக்கிறது. க்ளவுட்டெய்ல் நிறுவனத்தில் இன்ஃபோசிஸ் நாராயண மூர்த்தியின் கட்டமரான் வென்ச்சர்ஸ் நிறுவனம் முதலீடு செய்திருக்கிறது.

மேலும், ஒரு வாடிக்கையாளரின் (vendor) மொத்த பொருளில் 25 சதவிகிதத்துக்கும் அதிகமான பொருள்களை ஒரு இணையதளத்தின் மூலமாக மட்டுமே விற்கக்கூடாது என்றும் கூறியிருக்கிறது.

அதேபோல, நிறுவனங்கள் பிரத்யேகமாக எந்த ஒரு இணைய தளத்தின் மூலமும் விற்கக்கூடாது என்று சொல்லப்பட்டிருக்கிறது. உதாரணத்துக்கு, ஷாமி போன்கள் (Xiaomi) ஃப்ளிப்கார்ட் இணைய தளத்தில் மட்டுமே விற்பனை செய்யப்பட்டது. அமேசான் நிறுவனமும் இதேபோல சில செல்போன் நிறுவனங்களிடம் ஒப்பந்தம் போட்டிருக்கிறது. இனி இதுபோல பிரத்யேக ஒப்பந்தங்கள் போட முடியாது. அனைவருக்கும் சம வாய்ப்பு வழங்க வேண்டும் என்பதுதான் அரசாங்கத்தின் திட்டமாகும்.

பாதிப்பு என்ன?

இந்திய இ-காமர்ஸ் சந்தையில் நான்கில் மூன்று பங்கு சந்தையை அமேசான் மற்றும் ஃப்ளிப்கார்ட் ஆகிய நிறுவனங்கள் வைத்திருக்கின்றன. இந்த இரு நிறுவனங்களுக்குதான் மிகப்பெரிய பாதிப்பு ஏற்படும் எனத் தெரிகிறது. இந்தப் பாதிப்பில் இருந்து தற்காத்துக்கொள்வதற்கு உடனடியாக நடவடிக்கை எடுக்கவேண்டிய கட்டாயத்தில் உள்ளன.

இ-காமர்ஸ் நிறுவனங்களின் முக்கியமான உத்தியே தள்ளுபடிதான். இனி இதுபோன்ற அதிக தள்ளுபடிகள் வழங்குவதற்கான சாத்தியங்கள் குறைவு. அதனால் இந்த இரு நிறுவனங்களும் அரசின் இந்த முடிவை மாற்றுவதற்கு ஒன்றாக இணைந்திருப்பதாகத் தகவல்கள் தெரிவிக்கின்றன. இந்த இரு நிறுவனங்களும் இந்தியத் தொழில் நிறுவனங்களில் கூட்டமைப்பு (CII) மற்றும் பிக்கி (FICCI) ஆகிய அமைப்புகளை நாடி இருப்பதாகத் தெரிகிறது. தவிர, பெரிய பிரைவேட் ஈக்விட்டி நிறுவனங்களும் அரசாங்கத்திடம் பேச இருப்பதாகத் தெரிகிறது. மேலும், ஷாமி, ஒன்பிளஸ் மற்றும் சாம்சங் ஆகிய செல்போன் நிறுவனங்களும் தங்களது விற்பனைக்கு மாற்றுவழியைக் கண்டுபிடித்தாக வேண்டும்.

மத்திய அரசாங்கம் கொண்டு வந்திருக்கும் இந்த விதிமுறைகளுக்கு அமேசான் மற்றும் ஃப்ளிப்கார்ட் நிறுவனங்கள் விமர்சனம் செய்தாலும், ஸ்நாப்டீல் நிறுவனத்தின் குணால் பஹல் இதனை வரவேற்றிருக்கிறார். அதேபோல, ஃபியூச்சர் குழுமத்தின் தலைவர் கிஷோர் பியானி மற்றும் சிறு வர்த்தகர்கள் சங்கங்கள் இதனை எதிர்த்திருக்கின்றன.

. தொழில்புரிவதற்கான சூழல்

இ-காமர்ஸ் துறையின் முன்னோடிகளில் ஒருவரும், ஃபெய்லிங் டு சக்ஸீட் (Failing to Succeed) புத்தகத்தின் ஆசிரியருமான வைத்தீஸ்வரனிடம் இதுகுறித்துப் பேசினோம். ‘‘இ-காமர்ஸ் நிறுவனங்கள் தொடங்கப்பட்டதில் இருந்து இதே நடைமுறையைதான் பின்பற்றி வருகின்றன. அப்போதெல்லாம் அரசு இந்த நடவடிக்கையை எடுக்கவில்லை. சில ஆண்டுகளுக்குமுன் அமலாக்கத் துறை இதுபோன்ற நிறுவனங்களிடம் விசாரிக்கத் தொடங்கியிருப்பதாகத் தெரிகிறது. ஆனால், இந்த நடவடிக்கை அப்படியே கிடப்பில் போடப்பட்டுவிட்டது.

இத்தனை ஆண்டுக் காலம் அமைதியாக இருந்துவிட்டு, தற்போது நடவடிக்கை எடுப்பதால் முதலீட்டுக்கான சூழல் பாதிக்கப்படும். தற்போதுதான் தொழில்புரிவதற்கான சூழலில் இந்தியா மேம்பட்டு வருகிறது. வால்மார்ட் 1,600 கோடி டாலர் முதலீடு செய்திருக்கிறது. அமேசான் நிறுவனமும் சில பில்லியன் டாலர் முதலீடு செய்திருக்கும் சூழலில், அரசாங்கத்தின் இந்த நடவடிக்கையால் தொழில் புரிவதே கடினம் என்றாகிவிடும்.

. எதற்காக நடவடிக்கை?

இ-காமர்ஸ் துறை வளர்ந்து வருகிறது. இந்த நிலையில், இந்திய பெரு நிறுவனங்கள் சில இ-காமர்ஸ் துறையில் களம் இறங்கத் திட்ட மிட்டிருப்பதாகவும் தெரிகிறது. அந்த நிறுவனங் களைப் பாதுகாப்பதற்காக இந்த நடவடிக்கையா என்னும் கேள்வியும் எழுகிறது. அதைவிட ஒவ்வொரு தளத்திலும் பல வெண்டார் நிறுவனங் கள், பல பொருள்கள் உள்ளன. இவற்றை யார், எப்படிக் கண்காணிப்பார்கள் என்னும் கேள்வியும் எழுகிறது என்று கூறினார்.

இப்போது வந்திருக்கும் விதிமுறைகள் ஏற்கெனவே நடைமுறைக்கு வந்திருந்தாலும், தேர்தல் நெருங்கிவரும் சூழலில் சிறுவர்த்தகத்துக்கு ஆதரவான நிலையை மத்திய அரசு எடுத்திருக்கிறது. இந்த விதிமுறைகளை இ-காமர்ஸ் நிறுவனங்கள் எப்படி எதிர்கொள்ளப்போகின்றன என்பதைப் பொறுத்தே, 2019-ம் ஆண்டில் அந்த நிறுவனங்கள் எப்படிச் செயல்படும் என்பதைக் கணிக்க முடியும்!

. - வாசு கார்த்தி

. அரசின் இந்த முடிவு வரவேற்கத்தக்கதே!

இந்திய ரீடெய்ல் சங்கத்தின் தலைமைச் செயல் அதிகாரி குமார் ராஜகோபலனிடம் மத்திய அரசாங்கம் கொண்டுவந்திருக்கும் விதிமுறைகள் பற்றிக் கேட்டோம்.

. ‘‘அரசின் இந்த முடிவு வரவேற்கத்தக்கது. ஏற்கெனவே இந்த விதிமுறைகளை அரசு மீண்டும் தெளிவாக்கி இருக்கிறது. வெளிநாட்டு முதலீடுகளை வைத்து இனியும் தள்ளுபடி கொடுக்க முடியாது. பல ஆண்டுகளாக இந்த நடைமுறை இருந்து வந்திருக்கிறது. தற்போது இதற்கு ஒருமுடிவு கிடைத்திருக்கிறது. திடீரென கெடுபிடிகள் விதித்தால் இ-காமர்ஸ் நிறுவனங்களுக்குப் பாதிப்பு ஏற்படாதா என்னும் கேள்விகள் கேட்கப்படுகின்றன. என்னைக் கேட்டால், கடந்த சில ஆண்டு கால நடவடிக்கைகளையும் விசாரிக்க வேண்டும் என்று சொல்வேன்.

உதாரணத்துக்கு, ஒரு குக்கரைக் கடையில் வாங்கினால் 2,500 ரூபாய் என வைத்துகொள்வோம். ஆன்லைனில் குறைந்தபட்சம் 20% வரை தள்ளுபடியில் கிடைக்கிறது என்றால், ஆன்லைன் நிறுவனத்தின் ரீடெய்ல் நிறுவனம் மொத்தமாக வாங்கி, வாடிக்கையாளர்களுக்குச் சலுகைகளுடன் தருகிறது. இதன் காரணமாக அனைவருக்கும் சமவாய்ப்பு மறுக்கப்படுகிறது. செல்போன் நிறுவனங்கள் பிரத்யேக ஒப்பந்தம் போடுவதால், விலை நிர்ணயம் செய்யும் வசதி இ-காமர்ஸ் நிறுவனங்களுக்குக் கிடைக்கிறது. அதனால் பல சிறு செல்போன் கடைகள் காணமல் போகின்றன’’ என்று கூறினார்.

விகடன் லேட்டஸ்ட்

மத்திய அரசின் புதிய கட்டுப்பாடு... இ-காமர்ஸ் நிறுவனங்களுக்கு நெருக்கடி!

Vikatan Correspondent