தூத்துக்குடி தியாகிகளுக்கு விகடன் செய்த கௌரவம்! - அச்சத்தில் பதறிய காவல் துறை...

தூ த்துக்குடி ஸ்டெர்லைட் ஆலைக்கு எதிரானப் போராட்டத்தின்போது நடந்த போலீஸ் துப்பாக்கிச்சூட்டில் உயிர்நீத்த 13 பேரும், விகடன் நம்பிக்கை விருதுகளின் டாப் டென் மனிதர்கள் பட்டியலில் இடம்பெற்றுள்ளனர். இவர்களின் தியாகத்தைப் போற்றும் வகையில் ‘விகடன் நம்பிக்கை விருதுகள்’ வழங்கும் விழாவில் அவர்களின் குடும்பத்தினர் கெளரவிக்கப்பட்டனர். இப்படியொரு தகவலைக் கேள்விப்பட்டதும் தமிழகக் காவல் துறைக்கு வியர்த்துவிட்டது. பாதிக்கப்பட்ட குடும்பத்தினர் விழாவில் கலந்துகொள்ள ஊரிலிருந்து கிளம்பியது தொடங்கி விழா நிறைவடையும்வரை அவர்களைத் தொடர்ந்து கண்காணித்தும், கேள்விகளால் துளைத்தும் படுத்தியெடுத்துவிட்டனர்.

சென்னை நந்தம்பாக்கம் வர்த்தக மைய அரங்கத்தில், ‘விகடன் நம்பிக்கை விருதுகள்’ வழங்கும் விழா ஜனவரி 9-ம் தேதி நடைபெற்றது. அதில் பங்கேற்பதற்காக தூத்துக்குடி துப்பாக்கிச் சூட்டில் உயிரிழந்த ஜான்சிராணி, ஸ்னோலின், கார்த்திக், மணிராஜன், கந்தையா, தமிழரசன், ரஞ்சித்குமார், ஜெயராமன், செல்வசேகர், காளியப்பன், சண்முகம், அந்தோணிசெல்வராஜ், கிளாஸ்டன் ஆகிய 13 பேரின் குடும்பங்களை, தூத்துக்குடியிலிருந்து சென்னைக்கு அழைத்துவர ஏற்பாடு செய்திருந்தோம். இதில் சண்முகம் குடும்பத்தினரைத் தவிர மற்ற 12 குடும்பங்களைச் சேர்ந்த 25 பேர் விழாவுக்கு கிளம்பத் தயாரானார்கள். அந்தத் தகவலை அறிந்த காவல்துறையின் உளவுப் பிரிவினர், சென்னைக்கு அவர்கள் கிளம்புவதற்கு இரண்டு நாள்களுக்கு முன்பிருந்தே அனைவரின் வீடுகளையும் தீவிரமாகக் கண்காணிக்க ஆரம்பித்தனர். இவர்களை ஒருங்கிணைத்து அழைத்துச்செல்லும் பணியில் ஈடுபட்டிருந்த நம்மைப் பற்றியும் விவரங்களைச் சேகரித்த போலீஸார், நம்மை தீவிரமாகக் கண்காணித்தனர்.

. சென்னைக்குப் புறப்படுவதற்கு முந்தைய நாள், எஸ்.பி.சி.ஐ.டி பிரிவைச் சேர்ந்த போலீஸ் ஒருவர் போன் செய்தார். “நிகழ்ச்சி எங்கே நடக்கிறது, எத்தனை நாள் அவர்கள் சென்னையில் தங்குவார்கள், எப்போது தூத்துக்குடிக்குத் திரும்புவார்கள், விருது நிகழ்ச்சி தவிர வேறு ஏதேனும் நிகழ்ச்சி இருக்கிறதா...” என்றெல்லாம் அடுக்கடுக்கான கேள்விகளை நம்மிடம் கேட்டார். அதைவிட அபத்தமாக, “மொத்தமாக அவர்களை அழைத்துச்சென்று, போன இடத்தில் அவர்களுக்கு ஏதாவது பாதிப்பு என்றால் என்ன செய்வீர்கள்...” என்று கேட்டார்.

தூத்துக்குடியில் பேருந்து ஏறும் இடத்தில் முன்கூட்டியே ஆஜரான சீருடை அணியாத போலீஸார், மறைவாக இருந்து எல்லோரையும் கண்காணித்தனர். ஸ்னோலினின் தந்தைக்குப் போன் செய்த போலீஸார், “எங்கே இருக்கீங்க. வீட்டுல உங்களைக் காணோமே...” என்று கேட்க, “விகடன் நிகழ்ச்சிக்குப் போகிறோம்...” என்று அவர் சொல்லியிருக்கிறார். அதற்கு, “அப்படியா... தகவல் சொல்லவே இல்ல. எப்போ வருவீங்க, எங்கே தங்குவீங்க, ஹோட்டல் பெயர் என்ன...” என்றெல்லாம் கேட்டுள்ளனர்.

சென்னை, நந்தம்பாக்கத்தில் உள்ள வர்த்தக மைய அரங்கில் விழா நடைபெற, தூத்துக்குடியிலிருந்து வந்த அனைவரும் அங்கு வந்துசேர்ந்தனர். அங்கு விரிக்கப்பட்டிருந்த சிவப்புக் கம்பளம் வழியாக அரங்கின் முக்கிய வரிசையில் 25 பேரும் அமரவைக்கப்பட்டனர். நிகழ்ச்சி தொடங்கிய அரை மணி நேரத்துக்குள், “துப்பாக்கிச்சூடு சம்பவத்தில் உயிரிழந்த குடும்பத்தைச் சேர்ந்தவர்கள் யார் யார் வந்துள்ளார்கள்” என்ற பட்டியலைக் கேட்டு போலீஸார் நச்சரிக்க ஆரம்பித்தனர். தொடர்ந்து, “அவர்களை எல்லாம் எப்போது மேடை ஏற்றுவீர்கள்?” என்றும் நச்சரித்தனர். அவர்கள் மேடையில் ஏற்றப்பட்டு கெளரவிக்கப்பட்ட பிறகே, காவலர்கள் அங்கிருந்து நகர்ந்தனர்.

பல இடையூறுகள் மற்றும் தீவிர கண்காணிப்புக்கு மத்தியில் விழா நிறைவடைந்தது. நிகழ்ச்சியில் பங்கேற்ற அந்த மக்கள் தங்கியிருந்த ஹோட்டலுக்குக் கிளம்பினர். அப்போதும் போலீஸார் அவர்களைப் பின்தொடர்ந்தனர். ஹோட்டலை அடைந்தவுடன், அங்கிருந்து வயர்லெஸ்ஸில் தகவல்களைக் கூறினார்கள். அந்த ஹோட்டல் பகுதி தீவிர கண்காணிப்புக்கு உட்படுத்தப்பட்டது. அது மட்டுமல்லாமல், இந்தக் குடும்பங்களின் பக்கத்து வீட்டினர், உறவினர்கள் எனப் பலரையும் கேள்விகளால் துளைத்துள்ளனர் போலீஸார்.

‘அனைத்துக் குடும்பங்களையும் எப்படி ஒருங்கிணைத்தார்கள்?’ என்பதுதான் போலீஸின் முக்கியக் கேள்வியாக இருந்தது. “எந்த அமைப்புகளின் நிகழ்ச்சிகளுக்கும் செல்லாத நாங்கள், விகடன் மீது வைத்துள்ள நம்பிக்கையின் அடிப்படையில்தான் ஒன்றாக இணைந்தோம்” என்பதுதான் இந்த மக்களின் பதிலாக இருக்கிறது.

இதுகுறித்து தகவல் அறிந்த நேர்மையான போலீஸ் அதிகாரி ஒருவர் நம்மிடம், “தூத்துக்குடி துப்பாக்கிச்சூடு சம்பவத்தில் தமிழகக் காவல்துறை மட்டுமல்ல, தமிழக அரசும் நேரடியாகச் சம்பந்தப்பட்டுள்ளது. இதுதொடர்பாக சி.பி.ஐ விசாரணையும் நடைபெற்றுவருகிறது. இதனால், அரசுக்கு ஏதேனும் நெருக்கடி ஏற்பட்டுவிடுமோ என்றுதான் இவ்வளவு கண்காணிப்பும்...” என்றார்.

மடியில் கனம் இல்லை என்றால், எதற்கு இத்தனை பயம்?

- இ.கார்த்திகேயன், படம்: கே.ராஜசேகரன்