Published:Updated:

அழகுக்கு மட்டுமல்ல... ஆபரணங்கள்!

அழகுக்கு மட்டுமல்ல... ஆபரணங்கள்!
அழகுக்கு மட்டுமல்ல... ஆபரணங்கள்!

படங்கள்: அசோக் அர்ஸ்

கைகள் பெண்களுக்கு அழகு சேர்ப்பவை மட்டுமல்ல... ஆரோக்கியமும் சேர்க்கவல்லவை என்றால் நம்புவீர்களா? ‘`நாம் அணிகிற கம்மல், மூக்குத்தி, வளையல், கொலுசில் ஆரம்பித்து மாங்கல்யம், மெட்டி வரைக்கும் அது அணியப்படுகிற இடத்தில் இருக்கிற புள்ளிகளைத் தூண்டுவதன் மூலம் பல ஹெல்த் பெனிஃபிட்களை நமக்கு வாரி வழங்குகின்றன’’ என்று சொல்லும் இயற்கை மருத்துவர் யோ.தீபா, அவற்றைப் பட்டியலிட்டார்.

அழகுக்கு மட்டுமல்ல... ஆபரணங்கள்!

இடுப்புக்கு மேலே தங்கம்; இடுப்புக்குக் கீழே வெள்ளி!

‘`நம் உடலின் மேல் பகுதியில் தங்கத்திலான நகைகளை அணிவோம். அதற்குக் காரணம், தங்கத்துக்கு நம் ஸ்ட்ரெஸ் ஹார்மோனை கட்டுப்படுத்துகிற தன்மை அதிகம். வெள்ளிக்கு இனப்பெருக்க உறுப்புகளையும் எலும்புகளையும் வலுப்படுத்துகிற தன்மை அதிகம். அதனால்தான் வெள்ளி நகைகளை இடுப்புக்குக் கீழ்ப்பகுதிகளில் அணிகிறோம்.

கொலுசும் குழந்தையின்மைப் பிரச்னையும்!

முன்பெல்லாம் கனமான வெள்ளித் தண்டைகளைச் சிறுமிகளிலிருந்து எல்லா வயதுப் பெண்களும் அணிந்திருப்பார்கள். அந்தத் தண்டை கால்களில் உரசுகிற பகுதியில் இருக்கிற புள்ளியானது தூண்டப்பட்டு, கருப்பைக்குப் பலம் கொடுத்து, குழந்தையின்மைப் பிரச்னை வராமல் தடுக்கும். மேலும் வயிற்றுவலி, கெண்டைக்கால் வலி, பாதவலி மூன்றையும் தடுக்கச் செய்யும் சக்தி, கால்களில் அணிகிற வெள்ளிக் கொலுசுகளுக்கு இருக்கிறது. தவிர, திடீரெனத் திரும்பினால் மயக்கம், குனிந்து நிமிர்ந்தால் மயக்கம் என்பது போன்ற பிரச்னைகளும் தொடர்ந்து கொலுசு அணிபவர்களுக்கு வராது. ஆனால், நீங்கள் அணிகிற கொலுசு தளர்வில்லாமல், வலி மற்றும் மயக்கம் தடுக்கும் புள்ளிகளை உரசுவதுபோல இருக்க வேண்டியது அவசியம். வெள்ளியைத் தவிர வேறு எந்த உலோகத்திலும் கொலுசு அணிந்தாலும் இந்தப் பலன்கள் கிடைக்காது. வெள்ளிக்கு மட்டும்தான் பூமியிலிருந்து பாசிட்டிவ் எனர்ஜியை எடுத்து உடலுக்குத் தருகிற வல்லமை உண்டு.

மெட்டியின் சிறப்புகள்!

மெட்டி போடுகிற விரலுக்கும், கருப்பைக்குப் போகிற ஒரு நரம்புக்கும் நேரடித் தொடர்பு இருக்கிறது. நம்முடைய அம்மாக்கள்,  கால் விரல்களில் இரண்டு தடினமான மெட்டிகளை அணிந்திருப்பதைப் பார்த்திருப்பீர்கள். நல்ல கனமான மெட்டியைப் போடும்போது, நீங்கள் நடக்கும்போதெல்லாம் அது விரலை அழுத்திக்கொண்டே இருக்கும். அதனால், கருப்பைக்கான புள்ளிகள் தூண்டப்பட்டு மாதவிடாய் பிரச்னை சரியாகும். இந்த மருத்துவக் காரணத்துக்காகத்தான், திருமணம் முடிந்தவுடன் மெட்டி அணிய வேண்டும் என்று முன்னோர்கள் சொல்லியிருக்கிறார்கள். கம்பி போன்ற மெல்லிய மெட்டிகளும், வெள்ளியல்லாத பிற உலோக மெட்டிகளும் இந்தப் பலனைத் தராது என்பதை மனதில் வைத்துக்கொள்ளுங்கள்.

அழகுக்கு மட்டுமல்ல... ஆபரணங்கள்!

கம்மல், மூக்குத்தி... டாக்டர்ஸ்!

காது குத்துவதைக் குழந்தைப் பருவத்திலும், மூக்குக் குத்துவதை டீஜ் ஏஜிலும் ஏன் செய்கிறோம் என்று யோசித்திருக்கிறீர்களா? காதுகளில் கம்மல் போடுவதற்காகக் குத்தப்படுகிற புள்ளிகள் கண்களுக்கானது. மிகச் சரியாக அந்தப் புள்ளிகளில் குத்தினால், கண் பார்வை தெளிவாக இருக்கும். அதனால்தான், குழந்தைப் பருவத்திலேயே காதுகுத்தி விடுகிறோம். மூக்குத்தியைப் பொறுத்தவரை ஒரு சிறுமி, பெரிய மனுஷியான பிறகுதான் போட்டு விடுகிறோம். இந்த வயதுக்குப் பிறகுதான், மாதவிடாய் காரணமாக அடிக்கடி தலையில் தண்ணீர் ஊற்ற வேண்டிய கட்டாயம் வருகிறது. இதனால் சைனஸ் பிரச்னை வராமல் இருப்பதற்குத்தான் மூக்குத்தி. ‘நான் கம்மல் போட்டிருக்கேன். மூக்குத்தியும் போட்டிருக்கேன். ஆனா, எனக்கு சைனஸும் இருக்கு, கண்ணிலேயும் பிரச்னை இருக்கே’ என்று சிலர்  நினைக்கலாம். காது, மூக்குக் குத்துபவர்களுக்கு அங்கிருக்கிற கண்கள் மற்றும் சைனஸ் புள்ளிகள் தெரிந்து சரியாகக் குத்தினால்தான் பலன் கிடைக்கும்.

மோதிர மேஜிக்!

ஐந்து விரல்களில் ஒன்றை மோதிர விரல் என்று குறிப்பிடுவோம். அந்த விரலில்தான் மோதிரம் போட வேண்டும் என்பதை வலியுறுத்துவதே அதன் பெயர்க்காரணம். அந்த விரலில் அப்படியென்ன சிறப்பு? மோதிர விரலில் இருக்கிற நரம்புகள்தான் நேரடியாக இதயத்துக்கும் மூளைக்கும் எனர்ஜியை அனுப்பக்கூடியவை. அதனால்தான், அந்த விரலில் மோதிரம் போட வலியுறுத்தப்படுகிறது. மோதிரம் தளர்வாக இருந்தாலும், நூல் சுற்றியாவது மோதிர விரலிலேயே பெரியவர்கள் போடச் சொன்னது இதனால்தான்.

மாங்கல்யம், அட்டிகை எதற்கு?!

நடு நெஞ்சில் தாலியோ அல்லது செயினில் உள்ள டாலரோ தொடர்ந்து உரசிக் கொண்டே இருந்தால், இதயமும் நுரையீரல்களும் பலமாகும். ரத்த அழுத்தமும் கட்டுப்பாட்டில் இருக்கும். இரண்டு தலைமுறைகளுக்கு முன்புவரை கழுத்தை இறுகப்பிடித்தபடி இருக்கும் அட்டிகை ரொம்பவும் ஃபேமஸ். நடுத்தரக் குடும்பத்து அம்மாக்கள் கல்யாணம், காதுக்குத்து என்றால் அணிந்துகொள்கிற இந்த அட்டிகையை, வசதியான வீட்டுப் பெண்கள் வீட்டில் இருக்கும்போதுகூட அணிந்திருப்பார்கள். இந்த ஆபரணம் தைராய்டு சுரப்பியைக் குறை, மிகை என்று எல்லை தாண்டாமல் பேலன்ஸ்டாக சுரக்க வைக்கக்கூடியது. 

வளையல் விஷயங்கள்!

வளையல் உரசுகிற மணிக்கட்டுகளில் கருப்பை மற்றும் சினைப்பைகளுக்கான புள்ளிகள் இருக்கின்றன. இந்தப் புள்ளிகளை வளையல்கள் தொடர்ந்து உரசிக்கொண்டே இருந்தால் கருப்பை, சினைப்பைகள் வலுவாகும். கூடவே மனப்பதற்றம், மாதவிடாய்க்கு முன்னால் வருகிற சிடுசிடுப்பு, மலச்சிக்கல் ஆகிய பிரச்னைகளும் வராது. இன்றைய பள்ளிக்கூடங்கள், பெண் குழந்தைகளை வளையல் அணிய அனுமதிப்பதில்லை. கழிவறைப் பிரச்னை காரணமாக மாணவிகள் தண்ணீர் குடிப்பதும் இல்லை. பள்ளியில் படிக்கிற பிள்ளைகளுக்குக்கூட ஸ்ட்ரெஸ் வருவதற்கு இவையும் ஒரு காரணம்.’’

ஆ.சாந்தி கணேஷ்    

அடுத்த கட்டுரைக்கு