Published:Updated:

நாற்றமெடுக்கும் நகரங்களுக்கு தூய்மை விருது! - கோவில்பட்டி, கும்பகோணம் கூத்து...

ஒட்டுமொத்த விகடனுக்கும் ஒரே ஷார்ட்கட்

Use App
நாற்றமெடுக்கும் நகரங்களுக்கு தூய்மை விருது! - கோவில்பட்டி, கும்பகோணம் கூத்து...
நாற்றமெடுக்கும் நகரங்களுக்கு தூய்மை விருது! - கோவில்பட்டி, கும்பகோணம் கூத்து...

நாற்றமெடுக்கும் நகரங்களுக்கு தூய்மை விருது! - கோவில்பட்டி, கும்பகோணம் கூத்து...

பிரீமியம் ஸ்டோரி

சிறந்த நகராட்சிக்கான விருதுகளை கோவில்பட்டி நகராட்சியும், கும்பகோணம் நகராட்சியும் சமீபத்தில் தட்டிச்சென்றுள்ளன. கோவில்பட்டி மாநில அரசு விருதையும், கும்பகோணம் மத்திய அரசு விருதையும் பெற்றுள்ளன. ஆனால், ‘‘விருது பெற்ற நகராட்சிகள் சுகாதாரமின்மையுடன் இருப்பது மட்டுமன்றி, கோவில்பட்டி நகராட்சியில் ‘தூய்மை இந்தியா’ திட்டத்தில் கழிப்பறை கட்டுவதில் ஊழலும் நடந்துள்ளது’’ என்று குற்றம்சாட்டுகிறார்கள் உள்ளூர் மக்கள்.  

நாற்றமெடுக்கும் நகரங்களுக்கு தூய்மை விருது! - கோவில்பட்டி, கும்பகோணம் கூத்து...

‘கோவில்பட்டி நகராட்சியில், தூய்மை இந்தியா திட்டத்தில், முறைகேடுகள் நடந்துள்ளன’ என்று குற்றம்சாட்டி பி.ஜே.பி-யின் பிரசாரப் பிரிவு மாவட்டத் துணைத் தலைவர் லட்சுமணக் குமார் நீதிமன்றத்தில் வழக்கு தொடர்ந்தார். அவரிடம் பேசினோம். ‘‘கோவில்பட்டி நகராட்சியில் தூய்மை இந்தியா திட்டத்துல 1,800 பயனாளிகளுக்குக் கழிவறைகள் கட்ட நிதி அளிக்கப்பட்டுள்ளது. ஆனால், பயனாளிகளிடம் கேட்டதுக்கு, ‘பழைய கக்கூஸை வெள்ளையடிக்கச் சொல்லிட்டு, எங்ககிட்ட அடையாள அட்டை வாங்குனாங்க’ என்று ஒரே மாதிரியான பதிலைச் சொன்னாங்க. 200 வீடுகளில் விசாரணை செய்ததில், 20 பேர்கூடத் தகுதியான பயனாளிகள் கிடையாது. 1,800 பேரில் 300 பேருக்குத்தான் பணம் கிடைச்சிருக்கு. மற்றவர்களுக்குப் போலி ஆவணங்கள் தயாரிச்சு ஊழல் செஞ்சிருக்காங்க. இந்த ஊழல் குறித்துப் பிரதமருக்குப் புகார் அனுப்பினேன். அதுக்குப் பிறகு, அப்போதைய நகரமைப்பு அலுவலர் காஜா முகைதீன் தலைமையில் விசாரணைக் குழு அமைச்சாங்க. விசாரணைக் குழுவின் அறிக்கையை வெளியிட வலியுறுத்தி, உயர் நீதிமன்ற மதுரை கிளையில் ரிட் மனுப் போட்டேன். அதில், ‘முறைகேடு நடந்தது உண்மைதான். நகராட்சி சுகாதார அலுவலர்கள் ஏழு பேர்மீது நடவடிக்கை எடுக்க நகராட்சிகள் நிர்வாக அலுவலகத்துக்குப் பரிந்துரை செய்து, அந்த நடவடிக்கை குறித்த ஆவணங்களை நீதிமன்றத்தில் சமர்ப்பிக்கிறோம்’ என்று நெல்லை மண்டல நகராட்சிகள் நிர்வாக இயக்குநர் அலுவலகம் நீதிமன்றத்தில் பதில் அளித்துள்ளது. இந்தத் திட்டத்தை எப்படி சீரழிச்சிருக்காங்க பாருங்க” என்றார் வேதனையுடன்.

நாற்றமெடுக்கும் நகரங்களுக்கு தூய்மை விருது! - கோவில்பட்டி, கும்பகோணம் கூத்து...

கோவில்பட்டி நகராட்சி ஆணையாளர் அச்சையாவிடம் கேட்டபோது, ‘‘விசாரணை அறிக்கை நெல்லை மண்டல நகராட்சி நிர்வாக இயக்குநர் அலுவலகத்திடம் உள்ளது. வழக்கு நீதிமன்றத்தில் நிலுவையில் உள்ளதால் மேற்கொண்டு எதுவும் பேச முடியாது” என்றார்.

இந்திய அளவில் ‘தூய்மையான நகராட்சிகள்’ பட்டியலில் கும்பகோணம் நகராட்சி மூன்றாவது இடத்தைப் பிடித்துள்ளது. டெல்லியில் கடந்த பிப்ரவரி 15-ம் தேதி நடைபெற்ற விழாவில், கும்பகோணம் நகராட்சிக்கு விருதும் ரூ.5 லட்சம் காசோலையும் வழங்கப்பட்டது. இதைக் கண்டு, கும்பகோணம் மக்கள் மகிழ்ச்சியில் இருப்பார்கள் என்று பார்த்தால், அவர்களோ வேதனை தெரிவிக்கின்றனர். கும்பகோணத்தில் கோயில் பகுதியில் இருக்கும் கழிவறைகள், பராமரிப்பு இல்லாமல் நாற்றம் எடுக்கின்றன என்று கொந்தளிக்கிறார்கள் மக்கள். அப்பகுதியில் பூக்கடை வைத்துள்ள முருகன், ‘‘துர்நாற்றம் தாங்க முடியலைங்க. நகராட்சி அதிகாரிகள்கிட்ட பலமுறை மனுக் கொடுத்தும், நடவடிக்கை இல்லை. கழிப்பறைகள் பராமரிக்கப்படாததால், இங்கே வர்ற மக்கள், கழிவறைக்கு வெளியே அசுத்தப்படுத்துறாங்க. நகராட்சி நிர்வாகம் இதைக் கண்டுக்கறதே இல்லை’’ என்றார்.

நாற்றமெடுக்கும் நகரங்களுக்கு தூய்மை விருது! - கோவில்பட்டி, கும்பகோணம் கூத்து...

தஞ்சை மாவட்டத் தகவல் அறியும் உரிமைச்சட்ட ஆர்வலர்கள் இயக்கத்தின் தலைவர் சுவாமிமலை சுந்தர விமலநாதன், ‘‘நீர்நிலைகளைத் தூய்மையாகப் பராமரிக்க வேண்டிய நகராட்சியே, பாசன வாய்க்கால்களில் செப்டிக் டேங்க் கழிவுகளைக் கலந்துவிடுகிறது. இதனால, கும்பகோணத்துக்குள் செல்லக்கூடிய பழவத்தான் கட்டளை வாய்க்கால், ஓலைப்பட்டினம் வாய்க்கால், தேப்பெருமாள் நல்லூர் வாய்க்கால், உள்ளூர் வாய்க்கால்கள் எல்லாம் சீரழிந்து கிடக்கின்றன. கும்பகோணம் ரயில் நிலையத்துக்கு வரும் மக்கள், கொசுத் தொல்லையால் சிரமப் படுகிறார்கள்’’ என்றார்.

நாற்றமெடுக்கும் நகரங்களுக்கு தூய்மை விருது! - கோவில்பட்டி, கும்பகோணம் கூத்து...

விடுதலைத் தமிழ்ப் புலிகள் கட்சியின் நிறுவனர் குடந்தை அரசன், ‘‘பொற்றாமரைக் குளத்தில் மனிதக்கழிவுகள் மிதக்கின்றன. அதில் புனித நீராடும் பக்தர்களை நினைத்தால் வேதனையாக இருக்கிறது. வரலாற்றுப் புகழ்மிக்க சந்திரக்குளம், குப்பைக்கிடங்காக மாறிவிட்டது. ஆயிக்குளத்தில் கும்பகோணம் நகராட்சியே குப்பைகளைக் கொட்டுகிறது. கும்பகோணம் நகராட்சி கட்டடத்தில் உள்ள சோலார் தகடுகளையே அவர்களால் தூய்மையாக வைத்துக்கொள்ள முடியவில்லை. பெரும்பாலான பகுதிகளில் பாதாளச் சாக்கடை திட்டம் அரை குறையாக இருக்கிறது. அதனால், திறந்தவெளி சாக்கடையைத்தான் மக்கள் பயன்படுத்துகிறார்கள்’’ என்று கொந்தளித்தார்.

இதுகுறித்து கும்பகோணம் நகராட்சி ஆணையர் உமாமகேஸ்வரியிடம் கேட்டோம். ‘‘பொதுக் கழிப்பிடங்களை முறையாகப் பராமரிக்கிறோம். ஆனாலும், அதிக அளவில் மக்கள் பயன்படுத்துவதால், சில இடங்களில் குறைபாடுகள் ஏற்படுவதைத் தவிர்க்க முடியவில்லை. ஆனாலும், நவீன எந்திரங்கள் மூலமாகக் கூடுதல் கவனம் செலுத்துகிறோம். பாதாளச் சாக்கடை திட்டத்தில் அவ்வப்போது புதிய இணைப்புகள் வழங்குவதால் சில இடர்பாடுகள் ஏற்படுகின்றன. கும்பகோணம் நகராட்சி, பல வகைகளிலும் சுகாதாரப் பணிகளைத் திறம்படக் கையாள்கிறது” என்றார்.

விருதுகள் வாங்கும் நகராட்சிகளே இந்த லட்சணத்தில் இருக்கின்றன என்றால், மற்ற நகராட்சிகளின் நிலை?

- கு.ராமகிருஷ்ணன், இ.கார்த்திகேயன்

படங்கள்: ம.அரவிந்த், ப.கதிரவன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு