Published:Updated:

பயிர்க் காப்பீட்டில் முறைகேடு... கொந்தளிக்கும் விவசாயிகள்!

பயிர்க் காப்பீட்டில் முறைகேடு... கொந்தளிக்கும் விவசாயிகள்!
பிரீமியம் ஸ்டோரி
News
பயிர்க் காப்பீட்டில் முறைகேடு... கொந்தளிக்கும் விவசாயிகள்!

பிரச்னை

யற்கைச் சீற்றங்களால் தங்களது பயிர்களை இழந்த விவசாயிகள், கடந்த இரண்டு ஆண்டுகளாகப் பயிர்க்காப்பீட்டு நிறுவனங்கள் வழங்கும் இழப்பீட்டுத் தொகைக்காகக் காத்திருக்கிறார்கள். இந்நிலையில், மிகக்குறைவான பணத்தை மட்டுமே காப்பீட்டு நிறுவனங்கள் இழப்பீடாக வழங்குகின்றன எனக் குற்றம் சாட்டுகிறார்கள் விவசாயிகள். பயிர் பாதிப்பு அளவீட்டில் முறைகேடு செய்து நிர்ணயிக்கப்பட்ட தொகையை வழங்காமல் அலைய விடுவதோடு, பயிர் இழப்பீட்டுத்தொகையைத் தேர்தல் செலவுகளுக்காகப் பயன்படுத்துகிறார்கள் என்று குற்றச்சாட்டு கிளம்பியுள்ளது. இதுசம்பந்தமாக காத்திருப்பு போராட்டம் போன்ற பல போராட்டங்களை முன்னெடுத்து வருகின்றனர் விவசாயிகள்.

பயிர்க் காப்பீட்டில் முறைகேடு... கொந்தளிக்கும் விவசாயிகள்!

இதுகுறித்து நம்மிடம் பேசிய தஞ்சை மாவட்டக் காவிரி விவசாயிகள் பாதுகாப்பு சங்கத்தின் துணைச் செயலாளர் சுகுமாறன், “இயற்கைச் சீற்றங்களால் பயிர்களை இழந்த விவசாயிகளுக்குக் கடந்த ரெண்டு வருஷமாவே இழப்பீட்டுத்தொகை கிடைக்கலை. இதுல நிறைய முறைகேடுகள் நடந்திருக்கு. 2016-17-ஆம் வருஷத்துக்கும், 2017-18-ஆம் வருஷத்துக்கும் சேர்த்து தஞ்சாவூர் மாவட்ட விவசாயிகளுக்கு 138 கோடி ரூபாயை நியூ இந்தியா இன்சூரன்ஸ் நிறுவனம் கொடுத்ததாச் சொல்றாங்க. ஆனா, கூட்டுறவு வங்கிகள்ல இன்னும் இழப்பீட்டுத்தொகை வரலைனு சொல்லி எங்களை அலைய விடுறாங்க. இன்சூரன்ஸ் நிறுவனம், கூட்டுறவுத்துறைக்கிட்ட கொடுத்த பணம் என்னாச்சுனு தெரியலை.

தஞ்சாவூர் மாவட்டத்துல ஒருசில தொடக்க வேளாண் கூட்டுறவு வங்கிகள்ல மட்டும்தான் இழப்பீட்டுத்தொகையை விவசாயிகளுக்குக் கொடுத்திருக்காங்க. அதுவும் குறைவான தொகையைத்தான் கொடுத்திருக்காங்க. சம்பந்தப்பட்ட அந்த வங்கிகள்லயும் காப்பீடு செஞ்ச மொத்த விவசாயிகளுக்கும் கொடுக்காம, ஒண்ணு ரெண்டு பேருக்குதான் கொடுத்திருக்காங்க. இதுல முறைகேடுகள் நடந்திருப்பதை எங்களால் ஆதாரப்பூர்வமா நிரூபிக்க முடியும்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
பயிர்க் காப்பீட்டில் முறைகேடு... கொந்தளிக்கும் விவசாயிகள்!

மேலத்திருப்பந்துருத்தி முதன்மை கிராமத்துல 20.26 சதவிகிதம், கூடுதல் கிராமத்துல 26.62 சதவிகிதம், திருவாளம்பொழில்ல 45 சதவிகிதம் பாதிப்புனு இன்சூரன்ஸ் நிறுவனம் நிர்ணயம் செஞ்சிருக்கு. இந்தக் கணக்குப்படி, முதன்மை கிராமத்துக்கு ஏக்கருக்கு 5,400 ரூபாயும், கூடுதல் கிராமத்துக்கு 7,280 ரூபாயும் திருவாளம்பொழிலுக்கு 9,700 ரூபாயும் இழப்பீடாக் கொடுக்கணும். ஆனா, இந்த மூணு கிராம விவசாயிகளுக்குமே ஏக்கருக்கு 4,050 ரூபாய்தான் கொடுத்திருக்காங்க. எனக்கு ஏக்கருக்கு 290 ரூபாய்தான் கொடுத்திருக்காங்க. விவசாயிகளுக்குச் சேர வேண்டிய பணத்தை இன்சூரன்ஸ் நிறுவனமும் கூட்டுறவுத்துறை அதிகாரிகளும் சேர்ந்து கொள்ளையடிக்கப் பாக்குறாங்க. இந்தப் பிரச்னைக்காக நாங்க உயர்நீதிமன்றத்துல வழக்கு தொடரப்போறோம்” என்றார், கோபமாக.

காவிரி டெல்டா விவசாயச் சங்கங்களின் கூட்டமைப்பு தலைவர் இளங்கீரன், “விவசாயிகளைப் பாதுகாக்கத்தான் பயிர் இன்சூரன்ஸ் திட்டம் கொண்டு வரப்பட்டது. ஆனால், இன்சூரன்ஸ் நிறுவனங்கள், கூட்டுறவுத்துறை அதிகாரிகள், ஆளுங்கட்சிக்காரங்க எல்லாம் சேர்ந்து விவசாயிகளுக்குச் சேர வேண்டிய பணத்தைக் கொள்ளையடிக்கதான் இந்தத் திட்டம் பயன்பட்டுக்கிட்டு இருக்கு. 2015-16-ஆம் ஆண்டுக் காவிரி டெல்டா மாவட்டங்கள்ல கடுமையான பாதிப்புகளுக்குள்ளான விவசாயிகளுக்குக் கிடைக்க வேண்டிய இழப்பீட்டுத் தொகை 300 கோடி ரூபாய் இன்னும் வழங்கப்படாமலே இருக்கு. இழப்பீட்டுத்தொகை வழங்குறதுல நிறைய முறைகேடுகள் நடக்குது. நாடாளுமன்றத் தேர்தல் செலவுகளுக்காக மத்திய, மாநில அரசுகளின் உத்தரவு பேர்லதான், இந்த முறைகேடுகள் நடத்தப்படுறதா தகவல்கள் பரவுது” என்றார்.

பயிர்க் காப்பீட்டில் முறைகேடு... கொந்தளிக்கும் விவசாயிகள்!

தஞ்சை மாவட்டக் காவிரி விவசாயிகள் பாதுகாப்புச் சங்கத்தின் துணைச் செயலாளர் சுவாமிமலை விமல்நாதன், “பயிர் இன்சூரன்ஸ் நிறுவனம் வெளிப்படைத் தன்மையோடு நடந்துகொண்டாலே, இதுபோன்ற குற்றச்சாட்டுகள் வராது. பயிர் பாதிப்பின் அளவு, எந்தெந்த விவசாயிகளுக்கு எவ்வளவு இழப்பீட்டுத் தொகை வழங்கப்பட்டது உள்ளிட்ட தகவல்களை இன்சூரன்ஸ் நிறுவனம் தங்களுடைய இணையதளத்தில் வெளியிடணும். எந்தெந்த வங்கிகள் மூலமாக எவ்வளவு தொகை, எந்தத் தேதியில் வழங்கப்பட்டது போன்ற தகவல்களையும் துல்லியமாக வெளியிடணும். இதில் முறைகேடுகள் நடைபெறாமல் தடுக்க மத்திய அரசு, பயிர் இன்சூரன்ஸ் செயலாக்கத்தை முழுமையாகக் கண்காணிக்க வேண்டும். இது தொடர்பா ஆளுநர்கிட்ட ஒரு வருஷத்துக்கு முன்னாடியே மனு கொடுத்தோம். ஆனா, எந்த நடவடிக்கையும் இல்லை” என்று ஆதங்கப்பட்டார்.

விவசாயிகளின் குற்றச்சாட்டுகள் குறித்துத் தஞ்சாவூர் மாவட்டக் கூட்டுறவுச் சங்கங்களின் இணைப்பதிவாளர் ஏகாம்பரத்திடம் பேசினோம். “இதில் எந்த முறைகேடும் நடைபெறவில்லை. இன்சூரன்ஸ் நிறுவனம் முடிவு செய்த விவசாயிகளுக்கு எங்களது தொடக்க வேளாண் கூட்டுறவு வங்கிகள் மூலமாக இழப்பீட்டுத் தொகை வழங்கப்பட்டுள்ளது. நாங்கள் தனிப்பட்ட முறையில் எந்த முடிவும் எடுப்பதில்லை” என்றார்.

கு.ராமகிருஷ்ணன்