மழைநீர் அறுவடை... மானியம் கொடுக்கும் அரசு!

ஒ வ்வோர் ஆண்டும் பருவத்தில் கிடைக்க வேண்டிய மழைப்பொழிவு கிடைக்காமல் விவசாயம் கேள்விக்குறியாகி வருகிறது. நிலத்தடி நீரும் அதலபாதாளத்துக்குச் சென்றுவிட்டதால், ‘போர்வெல்’ பாசனமும் எட்டாக்கனியாகிவிட்டது. பருவம் தப்பி மழை பெய்வதால் அந்த மழைநீர் உபயோகமற்றுப் போய்விடுகிறது. அதனால், கிடைக்கும் மழைநீரைச் சேமித்து வைக்க வேண்டியது அவசியமாகிவிட்டது. கோடை மழையிலிருந்தே மழைநீர் அறுவடையைத் தொடங்குவதுதான் சரியான செயல்.

. புவியியல் அமைப்புபடி, தமிழ்நாட்டின் நிலப்பகுதி, மேற்கில் உயர்ந்தும் கிழக்கில் தாழ்ந்தும் உள்ளது. மலையடிவாரப் பகுதிகள் கடல்மட்டத்திலிருந்து 850 அடி முதல் 1,400 அடி உயரத்தில் உள்ளன. தமிழ்நாட்டில் உள்ள 7 பெரிய ஆறுகளின் இரு பக்கங்களிலும் உள்ள நிலப்பரப்பு, வட தெற்காக ஆறுகளை நோக்கிச் சரிந்து காணப்படுகிறது.

இப்படிப் பல சரிவுகளைக் கொண்ட நிலப்பகுதியாகத் தமிழ்நாடு இருப்பதால், ஆங்காங்கு மழைநீரைத் தேக்கி நிலத்தடி நீர்மட்டத்தை உயர்த்த முடியும். அந்தவகையில் நிலத்தடி நீர்மட்டத்தை உயர்த்தும் வழிமுறைகள் குறித்து, திண்டுக்கல் மாவட்ட நீர்வடிப்பகுதி மேம்பாட்டு முகமை வேளாண் பொறியாளர், பிரிட்டோ ராஜிடம் பேசினோம்.

. “கடந்த 10 ஆண்டுகளாகவே முறையாக மழை பெய்யவில்லை. வெப்பச்சலன மழையாகத்தான் ஆங்காங்கு பெய்கிறது. பரவலாக மழைப்பொழிவு இல்லாததால், நிலத்தடி ஊற்றுகளில் தண்ணீர் சேகரமாவதில்லை. அதனால்தான், கிணறுகளிலும், ஆழ்துளைக் கிணறுகளிலும் நீர்மட்டம் குறைந்துகொண்டே வருகிறது.

சில வழிமுறைகளைப் பின்பற்றினால் மழைநீரைச் சேமித்து ஆழ்துளைக் கிணறுகளிலும், கிணறுகளிலும் நீர்மட்டத்தை உயர்த்த முடியும். கடந்த 50 ஆண்டுக்காலக் கோடை மழைப்பொழிவைக் கணக்கிட்டால்... ஏப்ரல் 14-ஆம் தேதி முதல் ஜூன் 1-ஆம் தேதி வரையிலான காலகட்டத்தில் 13 மழை நாள்கள் (1 உழவு) தமிழகத்துக்குக் கிடைத்து வருகிறது.

மேற்குத்தொடர்ச்சி மலைப்பகுதிகளில் அதிகமான மழையும், தமிழக உட்பகுதி மாவட்டங்களில் மிதமான மழையும் கிடைக்கக்கூடிய காலகட்டம் இது. இந்த மழையைச் சரியாகப் பயன்படுத்திக் கொண்டால், விவசாய நிலங்களில் உள்ள நீர் ஊற்றுகளில் நீரைச் சேமிக்கலாம். இப்படிச் சேமித்து வைக்கப்படும் நீர், ஆடிப்பட்ட விவசாயத்துக்கு உதவியாக இருக்கும்” என்ற பிரிட்டோ ராஜ் பகுதி வாரியாக மழைநீரைச் சேமிக்கும் முறைகளைச் சொல்ல ஆரம்பித்தார்.

மலைப்பகுதிகளில் மழைநீர்ச் சேமிப்பு

“மலைப்பகுதிகளில் உள்ள பட்டா நிலங்களில் முறையான வரப்புகள் அமைத்துத் தண்ணீரை வழிந்தோட விடாமல் நிலங்களில் சேகரிக்கலாம். சரிவான நில அமைப்புக் கொண்ட மலைப்பகுதிகளில் பூண்டு, உருளைக்கிழங்கு, ஏலக்காய் உள்ளிட்ட பயிர் செய்யும் விவசாய நிலங்களில்... படிக்கட்டு விவசாய முறைகளைப் பின்பற்றலாம். சமஉயரக் குழிகள் அமைப்பதன் மூலமும் தண்ணீரைச் சேமிக்க முடியும். நிலத்தின் மேல்பகுதியில், சரிவின் குறுக்கே 6 அடி நீளம், ஒன்றரை அடி அகலம், 2 அடி ஆழம் கொண்ட குழிகளை அமைக்க வேண்டும். இதனால், தேங்கும் நீர் பூமிக்குள் சீராக இறங்கும். மண்ணின் ஈரப்பதம் அதிகரிக்கும்.

. மலையடிவாரப் பகுதிகளில் மழைநீர்ச் சேமிப்பு

மலையிலிருந்து செங்குத்தாக மண்ணை அரித்துக் கொண்டு வேகமாக ஓடிவரும் மழை நீர், அப்படியே ஓடைகளில் சேரும். அதனால், பூமிக்குள் தண்ணீர் இறங்காது. இப்படிப்பட்ட இடங்களில்... சம உயரக் குழிகள் அமைத்து நீரைச் சேமிக்கலாம். நிலத்தை மூன்றாகப் பிரித்துக்கொண்டு, ஒவ்வொரு பாகத்திலும் வடக்கு முதல் தெற்கு வரை... 60 அடி நீளம், 3 அடி அகலம், 3 அடி ஆழம் கொண்ட குழிகள் எடுக்க வேண்டும். இந்த அளவில் அமைக்கப்படும் ஒவ்வொரு குழியும் 16,200 லிட்டர் தண்ணீர் தேங்கி நிற்கும். 5 அடி இடைவெளியில் தொடர்ந்து இதே அளவில் குழிகள் அமைத்தால் கணிசமான அளவில் மழைநீரைச் சேமிக்க முடியும். இதுபோன்ற குழி அமைக்க 6,000 முதல் 7,000 ரூபாய் வரை செலவாகும்.

சமவெளிப் பகுதிகளில் மழைநீர்ச் சேமிப்பு

நிலப்பரப்பு சரிவாக இல்லாமல் இருக்கும் பகுதிகளில் சம உயர வரப்புகள் அமைக்கலாம். வரப்பின் அடிப்பகுதி சுமார் 4 அடி அகலமும், மேல்பகுதி ஒன்றரை அடி அகலமும் இருக்க வேண்டும். உயரம் இரண்டரை அடி இருக்க வேண்டும். டிராக்டரில், 9 கைகலப்பை இணைத்து நிலத்தை உழுது, அப்போது கிடைக்கும் மேல்மண்ணைக் கொண்டு வரப்புகளை அமைக்க வேண்டும். வறண்ட நிலத்தில் உழுவது சிரமம் என்பதால், ஒரு மழை கிடைத்தவுடன் உழுது வரப்பு அமைக்கலாம்.

. நிலத்தில் கிழக்குப்பகுதி தாழ்ந்திருந்தால், வடக்கு மற்றும் தெற்கு திசைகளிலிருந்து கிழக்கு நோக்கி ‘ப’ வடிவில் வரப்புகள் அமைக்க வேண்டும். அதனால், மழைநீரும், நீரால் அரிக்கப்படும் மண்ணும் வரப்புக்குள்ளேயே சேகரமாகும். களிமண் பாங்காக இருந்தால், நிலத்தின் நான்கு பக்கங்களிலும் வரப்புகள் அமைக்க வேண்டும். இப்படி வரப்புகள் அமைக்க, ஒரு ஏக்கருக்கு 3,500 ரூபாய் முதல் 5,000 ரூபாய் வரை செலவாகும். வரப்புகள் அமைத்தபிறகு நிலத்தின் சரிவான திசைக்குக் குறுக்கு வாக்கில் உழவு செய்ய வேண்டும்.

பண்ணைக்குட்டைகள்

3 ஏக்கர் மற்றும் அதற்குக் குறைவான பரப்புள்ள நிலங்களுக்கு... 30 அடி நீளம், 30 அடி அகலம், 5 அடி ஆழம் அளவுள்ள சிறிய பண்ணைக்குட்டைகள் போதுமானவை. 4 ஏக்கர் மற்றும் அதற்கு அதிகமான பரப்புள்ள நிலங்களில், 60 அடி நீளம், 60 அடி அகலம், 5 அடி ஆழம் கொண்ட நடுத்தர அளவிலான பண்ணைக்குட்டைகளை அமைக்கலாம். 10 ஏக்கர் பரப்புக்கு அதிகமான நிலங்கள் மற்றும் மானாவாரி நிலங்களில்... 100 அடி நீளம், 100 அடி அகலம், 5 அடி ஆழம் கொண்ட பெரிய பண்ணைக்குட்டைகளை அமைக்கலாம். கிணறு அல்லது போர்வெல்லுக்கு மேற்பகுதியில்தான் பண்ணைக்குட்டைகளை அமைக்க வேண்டும். நிலத்தில் தண்ணீர் உருண்டோடும் பாதையில் பண்ணைக் குட்டையின் வாய்ப்பகுதி இருக்க வேண்டும். பண்ணைக்குட்டைகளால், நிலத்தடி நீர்மட்டம் உயரும். சிறிய பண்ணைக்குட்டை அமைக்க 15,000 ரூபாய் வரை செலவாகும். நடுத்தர அளவில் பண்ணைக்குட்டை அமைக்க 35,000 ரூபாய் வரை செலவாகும். பெரிய பண்ணைக்குட்டை அமைக்க 55,000 ரூபாய் வரை செலவாகும். தமிழ்நாட்டில் வேளாண் பொறியியல் துறை, மாவட்ட ஊரக வளர்ச்சித்துறை, மீன்வளத் துறை ஆகியவற்றின் மூலம், 80,000 ரூபாய் முதல் 1,25,000 ரூபாய் வரை மானியத்தொகையில் பண்ணைக் குட்டைகள் அமைத்துத் தரப்படுகின்றன. போர்வெல் மற்றும் கிணறுகளை உயிர்ப்பித்தல்

வறண்ட போர்வெல் அல்லது கிணறுகளுக்குள் நீரை அனுப்பி நிலத்தடி நீரை அதிகரிக்க முடியும். நிலத்தில் ஆங்காங்கே வரப்புகள் அமைத்து அவற்றில் சேகரமாகும் நீரை, குழாய்கள் மூலமாக ஆழ்துளைக் கிணற்றின் அருகில் உள்ள மழைநீர்ச் சேகரிப்பு அமைப்புக்குக் கொண்டு வர வேண்டும். இதனால், எப்போது மழை பெய்தாலும் மழைநீர் போர்வெல்லுக்குள் சென்றுவிடும்.

. போர்வெல் குழாய் மையப்பகுதியில் இருக்குமாறு 10 X 10 X 10 அடி என்ற அளவில் ஒரு குழி அமைக்க வேண்டும். இப்போது குழிக்கு நடுவில் பத்து அடி உயரத்தில் போர்வெல் குழாய் இருக்கும். போர்வெல் குழாயின் அடிப்பகுதியில் துளையிட்டு... கொசுவலையைத் துளையிட்ட இடத்தைச் சுற்றிக் கட்டிவிட வேண்டும். பிறகு குழிக்குள் கிணற்றுக்கல் அல்லது உடைகல்லை (150 எம்.எம்) போட்டு 6 அடிவரை நிரப்ப வேண்டும். அதற்கு மேல் 3 அடி உயரத்துக்கு 40 எம்.எம் அளவு கொண்ட ஜல்லிக்கற்களைக் கொண்டு நிரப்ப வேண்டும்.

மேற்பகுதியில் ஓர் அடிக்குக் குழியின் ஓரங்களில் செங்கற்களை வைத்துத் தொட்டிபோல அமைக்க வேண்டும். இப்படி அமைக்கும்போது, மழைநீரானது கற்களால் வடிகட்டப்பட்டுக் கிணற்றில் சேகரமாகும். தண்ணீர் போர்வெல்லுக்குள் செல்லும்போது, உள்ளே அடைபட்டிருக்கும் ஊற்றுகள் திறந்து தண்ணீர் சுரக்க ஆரம்பிக்கும்.

கிணற்றிலிருந்து பத்தடி தூரத்தில்... 10 அடி சதுரம், 6 அடி ஆழம் என்ற அளவில் குழி எடுத்துக்கொள்ள வேண்டும். அந்தக் குழியின் அடிப்பாகத்தில் தரையிலிருந்து அரையடி உயரத்தில் 4 அங்குல குழாய் ஒன்றைப் பொருத்தி, அதன் மறுமுனை கிணற்றுக்குள் இருக்குமாறு அமைக்க வேண்டும். குழாய் நகராத அளவுக்குச் சிமென்ட் கொண்டு பூசி விட வேண்டும். குழிக்குள் உள்ள குழாயின் முனையை மூடி மூலம் மூடிவிட்டு முனைப்பகுதியில் துளையிட்டு... துளையிட்ட பகுதியைக் கொசுவலை கொண்டு சுற்றிக் கட்ட வேண்டும். குழியின் அடிப்பகுதியிலிருந்து 3 அடி உயரம் வரை, கிணற்றுக்கல் அல்லது உடைகல் (150 எம்.எம்) போட்டு நிரப்ப வேண்டும். அதற்கு மேல் அடுக்காக 2 அடி உயரம் வரை 40 எம்.எம் அளவுகொண்ட ஜல்லிக்கற்களைக் கொண்டு நிரப்ப வேண்டும்.

மேற்பகுதியில் ஓர் அடிக்குக் குழியின் ஓரங்களில் செங்கற்களை வைத்துத் தொட்டிபோல அமைக்க வேண்டும். இப்போது நிலத்தில் விழும் மழைநீர், குழியில் சுத்திகரிக்கப்பட்டுக் கிணற்றுக்குள் சேகரமாகும்” என்ற பிரிட்டோ ராஜ் நிறைவாக, வீட்டில் மழைநீரைச் சேமிக்கும் வழிமுறைகளைச் சொன்னார்.

“கூரை வீடு, ஓட்டு வீடு, மாடி வீடு என எந்த வகைக் குடியிருப்பாக இருந்தாலும் மழைநீர்ச் சேகரிப்பு மிக அவசியம். அதுகுறித்த வரைபடங்கள் தமிழ்நாடு குடிநீர் வடிகால் வாரியங்களில் கிடைக்கும். வீடுகளைக் கட்டும்போதே மொட்டை மாடியின் தளம் ஒருபக்கமாகச் சரிவாக இருக்கும்படி அமைக்க வேண்டும். அதிலிருந்து வழிந்தோடும் தண்ணீர் ஒரே குழாயில் செல்லுமாறு அமைத்து வீட்டின் போர்வெல்லுக்குப் பத்தடி தூரத்தில் மழைநீர்ச் சேகரிப்பு அமைப்பை அமைக்க வேண்டும்.

வீட்டைச் சுற்றியுள்ள மண் தரைகள் அல்லது சிமென்ட் தரைகள் ஆகியவை மழைநீர்ச் சேகரிப்புத் தொட்டியை நோக்கிக் குவிந்தவாறு அமைக்க வேண்டும். மழைநீர்ச் சேகரிப்புத் தொட்டியை 10 X 10 X 10 அடி என்ற அளவில் அமைத்தால், 8,000 கனஅடி முதல் 10,000 கனஅடி வரை மழைநீரைச் சேமிக்கலாம். அதைச் சுத்திகரித்துக் குடிநீராகவும் பயன்படுத்தலாம். ஆண்டுக்கு இருமுறை மழைநீர்ச் சேகரிப்புத்தொட்டியைச் சுத்தம் செய்ய வேண்டும்’’ என ஆலோசனை வழங்கினார். தொடர்புக்கு, பிரிட்டோ ராஜ், செல்போன்: 99444 50552. துரை.நாகராஜன்