Published:Updated:

காட்டுப்பள்ளி துறைமுகம்... விரிவாக்கமா... அழிவுக்கான தொடக்கமா?

ஒட்டுமொத்த விகடனுக்கும் ஒரே ஷார்ட்கட்

Use App
காட்டுப்பள்ளி துறைமுகம்... விரிவாக்கமா... அழிவுக்கான தொடக்கமா?
காட்டுப்பள்ளி துறைமுகம்... விரிவாக்கமா... அழிவுக்கான தொடக்கமா?

காட்டுப்பள்ளி துறைமுகம்... விரிவாக்கமா... அழிவுக்கான தொடக்கமா?

பிரீமியம் ஸ்டோரி

ளர்ச்சி என்பது மக்களுக்கானது. ஆனால், மக்களின் வாழ்வாதாரத்தை அழித்துச் சிலரின் வளர்ச்சிக்காக மட்டுமே திட்டங்கள் கொண்டுவரும்போது வளர்ச்சியே பிரச்னையாகிறது. ஏற்கெனவே, அனல் மின் நிலையங்கள் கலக்கும் கழிவுகளால் மாசடைந்து, வாழ்வையே நரகமாக்கிவிட்ட எண்ணூரில் வாழும் மக்கள், ‘வளர்ச்சி’யை வெறுக்கத்தான் செய்வார்கள். அப்படியொரு மனநிலையில் இப்போது தவித்துக்  கொண்டிருக்கிறார்கள் காட்டுப்பள்ளி மற்றும் அதைச் சுற்றியுள்ள கிராமங்களைச் சேர்ந்த மக்கள்.

எண்ணூர் அடுத்த காட்டுப்பள்ளியில் ‘எல் அண்ட் டி’ நிறுவனத்துக்குச் சொந்தமான துறைமுகத்தைக் கடந்த ஆண்டு அதானி குழுமம் வாங்கியது. அதானியின் காட்டுப்பள்ளி துறைமுக விரிவாக்கத் திட்டமும், அந்தக் குழுமம் அதற்காகச் சுற்றி வளைக்கப்போகும் நிலமும் அந்தப் பகுதி மக்களை அதிர்ச்சியில் ஆழ்த்தியுள்ளது. 330 ஏக்கர் பரப்பளவில் அமைந்திருக்கும் தற்போதைய துறைமுகத்தை, 6,200 ஏக்கர்களுக்கு விரிவாக்கத் திட்டமிட்டிருக்கிறது அதானி குழுமம். அதன்படி மேல்மருவத்தூர் அருகிலிருக்கும் தாட்சூரிலிருந்து காட்டுப்பள்ளிவரை சாலை மற்றும் ரயில் பாதைகளையும் அமைக்கவும் திட்டமிட்டுள்ளனர். இதற்காகக் கொற்றலை ஆற்றுப்பகுதி உட்படப் பொதுநிலங்களும், தனியார் நிலங்களுமாகச் சேர்த்து ஆறாயிரம் ஏக்கருக்கும் அதிகமான நிலங்களைக் கையகப்படுத்த உரிமை கோரியுள்ளனர். இதனால் ஊரணம்பேடு, அத்திப்பட்டு, காட்டூர் போன்ற கிராமங்கள் பாதிக்கப்படும். ஆற்றின் வெள்ளநீர் வடிகால் பகுதியும் கையகப்படுத்தும் திட்டத்தில் அடக்கம். இந்தத் திட்டத்தால் செங்கனிமேடு, ராஜந்தோப்பு, ஏப்ரஹாம்புரம், காட்டுப்பள்ளி, களஞ்சி, காட்டூர், சிந்தாமணிபுரம், கருங்காலி ஆகிய ஊர்களில் இருக்கும் மக்களின் மரபு சார்ந்த தொழில் உரிமைகளும் கேள்விக்குள்ளாக்கப்பட்டுள்ளன.

காட்டுப்பள்ளி துறைமுகம்... விரிவாக்கமா... அழிவுக்கான தொடக்கமா?

துறைமுகம் விரிவாக்கத் திட்டத்துக்காக அந்நிலத்தின் தன்மையையே மாற்றியமைக்கவும் திட்டமிடப்பட்டுள்ளது. கடலிலிருந்து மணலைத் தோண்டியெடுத்து ஆழப்படுத்துவார்கள். ஆழப்படுத்திய பகுதியைச் சுற்றியும் அலைத்தடுப்புச் சுவர் கட்டுவார்கள். கடல் மட்டத்துக்கும் கீழிருக்கும் எண்ணூர் ஓடை, கொற்றலை ஆற்றுக் கழிமுகம், வெள்ள வடிகால் நிலம் ஆகியபகுதிகளில், கடலிலிருந்து எடுக்கும் மணலைக் கொட்டியோ அல்லது வேறு பகுதிகளிலிருந்து கொண்டுவரும் மணலைக் கொட்டியோ உயரப்படுத்துவார்கள். அடிக்கடி வெள்ளம் ஏற்படும் கழிமுகப் பகுதியை மேடேற்றி துறைமுகம் விரிவாக்கம் செய்யப்படுகிறது. துறைமுகக் கட்டுமானப் பணிகள், அதற்கான மின் உற்பத்தி, பெட்ரோலிய, கனிம மற்றும் வேதிமப் பொருள் களுக்கான சேமிப்புக் கிடங்குகள், கடும் குளிர் சாதனங்கள் போன்றவை அங்கு அமைக்கப்படும். இவற்றுக்காகக் கடல் மட்டத்தைவிடக் குறைவாக இருக்கும் நிலப்பகுதியை உயர்த்துவார்கள். இயற்கையான நிலவியல் அமைப்பைச் செயற்கையாக மாற்றியமைக்கிறார்கள்.

சுமார் 1,800 ஏக்கர் பரப்பளவுக்கு வங்காள விரிகுடாவிலிருந்து மணலை எடுத்து, அதன்மூலம் காட்டுப்பள்ளித் தரைமட்டத்தை உயர்த்துவார்கள். இது மேற்கே இருக்கும் நிலங்களில் வெள்ளநீர் வடிவதைத் தடுத்துவிடும். அதனால், கொற்றலை ஆற்றின் வழியாகப் புகும் வெள்ளநீரால் ஆயிரக்கணக்கான ஏக்கர் விவசாய நிலங்களும், புறம்போக்கு நிலங்களும் மூழ்கடிக்கப்படும். கடந்த 2015-ம் ஆண்டுப் பெருவெள்ளத்தின்போது சுமார் ஒரு லட்சம் கன அடிக்கும் அதிகமான வெள்ளநீரைக் கழிமுகத்தில் சேர்த்தது கொற்றலை ஆறு. அதன் வடிகால் பகுதியைத்தான் இப்போது ஆக்கிரமிக்கிறார்கள். இதனால், வடசென்னையிலிருந்து பழவேற்காடு வரை நீளும் கடற்கரையில் கடல்நீர் நிலத்தடியில் உள்வாங்கப் பட்டு, ஏற்கெனவே அதிகமாகிவிட்ட நீர்ப்படுகைகள் கடல்நீரால் ஆக்கிரமிக்கப்படும் ஆபத்தும் உண்டாகும். மணல் அரிப்பு பழவேற்காடு ஏரியின் தன்மையை மாற்றி, அதைக் கடலின் ஒருபகுதியாகவே மாற்றிவிடும்.

காட்டுப்பள்ளி துறைமுகம்... விரிவாக்கமா... அழிவுக்கான தொடக்கமா?

காட்டுப்பள்ளி துறைமுக விரிவாக்கம் உண் டாக்கவிருக்கும் சூழலியல் பிரச்னைகள் குறித்து நீரியல் வல்லுநர் பேராசிரியர் ஜனகராஜனிடம் பேசினோம். “கொற்றலை மட்டுமல்ல... அங்கு எத்தனையோ சிறு பெரு ஓடைகள் உள்ளன. அங்கு நிறைய உப்பங்கழிகள் அமைந்துள்ளன. அவற்றில் ஓடும் நீரும் கடலில் கலக்கின்றன. அதை எல்லாம் அடைக்கப்போகிறார்கள். மேடேற்றுவது ஒரு பக்கம் இருந்தாலும், அங்கிருக்கும் கடல் அலைகளைத் தடுப்பது அதைவிட ஆபத்தானது. கிட்டத்தட்ட ஒரு கிலோ மீட்டருக்கும் அதிகமான தூரத்துக்கு அலைகளின் ஏற்ற இறக்கங்கள் மறிக்கப்படும். ஓரிடத்தில் தடுத்தால் அலைகளின் வேகம் வேறிடத்தில் அதைவிட அதிகமாக இருக்கும். காலநிலை மாற்றத்தால் கடல் மட்ட உயர்வு ஏற்படும்போது, இந்தப் பிரச்னைகள் மேலும் அதிகரிக்கும். அதுபோக அவர்கள் வெளியேற்றப் போகும் வேதிமங்கள், கழிவுகளால் கடலில் மாசுபாடும் அதிகரிக்கும். காமராஜர் துறைமுகத்தால் ஏற்கெனவே எண்ணூர் கழிமுகம் முற்றிலும் பாதிக்கப் பட்டுவிட்டது. வடசென்னையின் பெருவாரி நிலங்களை இழந்து கொண்டிருக்கிறோம். அதைவிடப் பலமடங்கு பாதிப்பு இந்தத் திட்டத்தால் ஏற்படும். இது மிகப்பெரிய சூழலியல் பேரழிவு” என்றார்.

இந்தப் பிரச்னை தொடர்பாகத் களத்தில் செயல்பட்டுவருகிறது ‘Concerned Youth for People’ என்கிற இளைஞர்கள் குழு. அந்தக் குழுவைச் சேர்ந்த சுதிர், “இந்தத் திட்டத்துக்காகக் கட்டப்படும் சாலை மற்றும் ரயில் பாதைகள் ஊரணம்பேடு கிராமத்திலிருக்கும் மாமுனி ஏரிக்குக் குறுக்கே போகும். அதேபோல் இந்த ஏரியிலிருந்து கிழக்கேயும், ஆற்றுக்கும் ஏரிக்கும் இடையே பாயும் கால்வாய்களுக்குக் குறுக்கேயும் துறைமுகக் கட்டுமானங்கள் உருவாக்கப்படும். கழிமுகத்தில் உப்புநீர் ஊடுருவலை உருவாக்கி பல்லாயிரக்கணக்கான மக்களின் வாழ்வாதாரத்தை அழிக்கிறது இந்தத் திட்டம். முதலில் இதை விரிவாக்கத் திட்டம் என்று குறிப்பிடுவதே தவறு. 330 ஏக்கர் பரப்பளவு இருக்கும் துறைமுகத்தைச் சுமார் 6,200 ஏக்கர்களுக்கு, அதாவது இருபது மடங்கு அதிக நிலப்பரப்பைக் கையகப்படுத்துவதை வெறுமனே விரிவாக்கம் என்று சொல்ல முடியாது. 4,300 ஏக்கர் பொது நிலங்களையும் 1,900 ஏக்கர் விவசாயப் பகுதிகளையும் பணமாக்குவதே இந்தத் திட்டத்தின் குறிக்கோள்.

இது, மக்கள் நலனை முன்னிறுத்த வேண்டு மென்று அரசுக்கு வழிகாட்டும் நெறிமுறைக் கோட்பாடுகளுக்கு விரோதமானது. நூற்றாண்டு காலப் பழைமையான மக்களின் இயற்கை மற்றும் அடிப்படை உரிமைகளின்மீதும் அந்த நிலவியல் அமைப்பின்மீதும் அக்கறையின்றிச் செயல்படுத்தப்படவிருக்கும் இந்தத் திட்டம் நிறுத்தப்படவேண்டும். நாங்கள் இதுதொடர்பாக ஏற்படும் சூழலியல் பிரச்னைகளை ஊரணம்பேடு, களஞ்சி உள்ளிட்ட கிராமங்களில் கள ஆய்வு செய்து, மத்திய சுற்றுச்சூழல் அமைச்சகத்துக்குக் கடிதம் அனுப்பியிருக்கிறோம்” என்றார்.

காட்டுப்பள்ளி துறைமுகம்... விரிவாக்கமா... அழிவுக்கான தொடக்கமா?

மக்களின் நிலங்களைப் பாதுகாப்பாகப் பராமரிப்பதுதான் அரசாங்கத்தின் கடமை. அந்த நிலத்தைச் சொந்த நிலமாகப் பாவித்து விற்பனை செய்யக்கூடாது. அந்த நிலத்தில், ஆயிரக்கணக்கான மக்களின் வாழ்வாதாரம் இருக்கையில், அவர்களின் அனுமதி இல்லாமல் விரிவாக்கத் திட்டத்துக்கு அனுமதி கொடுக்கக் கூடாது. சூழலியல் முக்கியத்துவம் வாய்ந்த ஈர நிலங்களை, கழிமுகக் கடல்சார் நிலங்களைக் கையகப்படுத்தித் தனியார்மயமாக்குவது, அங்கு வாழும் விவசாயிகள், மீனவர்கள் உட்படப் பல்லாயிரக்கணக்கான மக்களின் வாழ்வாதாரங்களைப் பறிக்கும் செயல். இந்தத் திட்டம் செயல்படுத்தப் பட்டால், அம்மக்களின் வாழ்வாதாரம் பாதிக்கப்படுவதுடன், எதிர்காலத்தில் மீண்டும் அங்கு சூழலியல் சமநிலை மீள்வது என்பது இயலாத காரியமாகிவிடும்.

இந்தத் திட்டம் தொடர்பாக மத்திய சுற்றுச்சூழல் அமைச்சகத்துக்கு திட்ட மதிப்பீடு அனுப்பப்பட்டுள்ளது. ஆனால், இதுவரை மத்திய சுற்றுச்சூழல் அமைச்சகமும் இதுதொடர்பாக எதையும் நகர்த்தவில்லை. தமிழக அரசுக்கும் எதுவும் அனுப்பப்படவில்லை.

அதானி குழுமம் இந்த விரிவாக்கத் திட்டத்துக்கு முறையான சூழலியல் தாக்க மதிப்பீடு (Environmental impact assessment) செய்திருக்கிறதா? என்ற கேள்வியோடு, திட்டத்தினால் ஏற்படும் சூழலியல் பிரச்னைகளுக்கு விளக்கம் கேட்டும் அதானி குழுமத்தின் மக்கள் தொடர்பு அதிகாரியைத் தொடர்புகொண்டோம். மின்னஞ்சலில்  தகவல் அனுப்பச் சொன்னார்கள். கடந்த மார்ச் 14-ம் தேதியன்று விளக்கம் கேட்டு மின்னஞ்சலும் அனுப்பினோம். இந்த இதழ் அச்சில் ஏறும்வரை அவர்கள் தரப்பிலிருந்து பதில் எதுவும் வரவில்லை. விளக்கம் அளித்தால் பிரசுரிக்கத் தயாராக இருக்கிறோம்.

- க.சுபகுணம்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு