பிரீமியம் ஸ்டோரி

“அட நம்ம உளுந்தவடை மாதிரிதான் இருக்கு.”

“கொஞ்சம் ஃபோகஸ் பண்ணி எடுத்திரு்கலாம்.”

“யப்பா.. இது கிருஷ்ணர் சக்கரம்ப்பா! நம் முன்னோர்கள் ஒன்றும்...”

பொங்கலுக்கே வெடி வெடிக்கும் மீம் க்ரியேட்டர்களுக்கு, சென்ற வாரம் தீபாவளி. அறிவியல் உலகின் நீண்டகால மர்மமான கருந்துளை (Black hole) புகைப்படத்தை நாசா வெளியிட்டதுதான் காரணம். மனிதகுலம் தோன்றியதிலிருந்து இதுவரை எந்தத் தலைமுறையும் பார்த்திடாத, பார்க்க முடியுமென நம்பாத ஒன்றை நாம் பார்த்திருக் கிறோம். அதைத்தான் மீம் க்ரியேட்டர்கள் காமெடியாக துவம்சம் செய்திருக்கிறார்கள்.

கண்டோம் கருந்துளையை!

முதலில் கருந்துளை என்றால் என்னவென்று சுருக்கமாகப் பார்ப்போம். நட்சத்திரங்களின் வாழ் நாள் முடியும்போது அது அளவில் பெரியதாகும்; எடை கூடும். முடிவில் அவை வெடித்துச் சிதறும். இதை ஆங்கிலத்தில் Supernova என்பார்கள். வெடிப்புக்குப் பின் நட்சத்திரத்தின் கரு மட்டும் எஞ்சியிருக்கும். அது வேகமாகச் சுழலும். இவை அதிக நிறையைக் கொண்டிருக்கும். ஐன்ஸ்டீன் கோட்பாடுகளின்படி இதன் புவியீர்ப்பு விசை மிகவும் அதிகம். அதன் அருகில் செல்லும் ஒளிகூட அதன் புவியீர்ப்பு விசையிலிருந்து தப்பமுடியாது. இதனால் இதைப்  புகைப்படம் எடுப்பதென்பது சாத்தியமே இல்லாத ஒன்றாகக் கருதப்பட்டது. ஆனால் இந்த இருண்ட கருந்துளையைச் சுற்றி  நடக்கும் ஒரு வகையான ரேடியோ உமிழ்வுகள் மிகவும் சக்தி வாய்ந்தவை. அவற்றை நம்மால் பூமியிலிருந்தே பார்க்க முடிய வேண்டும் என்று நம்பி,  களத்திலிறங்கினார்கள் ‘ஈவென்ட் ஹோரைசன் டெலஸ்கோப்’ திட்டத்தின் ஆராய்ச்சியாளர்கள். ஆனால், படம் பிடிக்கப்படவேண்டிய M87 கேலக்ஸியின் கருந்துளை 5 கோடி ஒளி ஆண்டுகள் தொலைவில் இருக்கிறது. இதைப் படம்பிடிக்கும் அளவிற்கு நம்மிடம் இருக்கும் தொலைநோக்கிகள் திறன் வாய்ந்தவை கிடையாது. இதற்கு நமது பூமியின் அளவில் ஒரு தொலைநோக்கி தேவை. அது சாத்தியமில்லை. இதற்காகப் பூமி முழுவதிலும் 8 ரேடியோ தொலை நோக்கிகள் ஒரு நெட்வொர்க்காக அமைக்கப்பட்டு very long baseline interferometry (VLBI) என்ற முறையில் பூமியின் அளவில் ஒரு மெய்நிகர் தொலைநோக்கி அமைக்கப்பட்டது. இவை அனைத்தும் ஒன்றாக இணைந்து வேலைசெய்ய மிகத் துல்லியமான  ‘அட்டாமிக் கடிகாரங்கள்’ பயன் படுத்தப்பட்டன.

கண்டோம் கருந்துளையை!

அடுத்த சிக்கல் இந்தத் தொலை நோக்கிகளிலிருந்து பெறப்படும் டேட்டாவின் அளவு. சுமார் 5 பெட்டா பைட்டுகள் (10 லட்சம் ஜிகாபைட்). இந்த டேட்டாவை இணையம் மூலம் அனுப்புவதற்கு வாய்ப்பே இல்லை. அதனால் இந்த டேட்டா அடங்கிய ஹார்டு டிரைவ்கள் அனைத்தும் ’மசாசூசெட்ஸ் இன்ஸ்டிட்யூட் ஆஃப் டெக்னாலஜி’க்கு சொந்தமான Haystack என்ற விண்வெளி ஆய்வகத்துக்கு அனுப்பி வைக்கப்பட்டன. அங்கு 2017-ல் எடுக்கப்பட்ட இந்தப் படத்தை சரியாக புராசஸ் செய்யமட்டும் இந்தக் குழுவிற்கு இரண்டு ஆண்டுகள் தேவைப்பட்டன. மசாசூசெட்ஸ் தொழில்நுட்பப் பல்கலைக்கழகத்தின் Ph.D மாணவரான கேத்தி போமனின் CHIRP என்னும் அல்காரிதம்தான் உலகமே கொண்டாடிக்கொண்டிருக்கும் கருந்துளையின் புகைப்படத்தைத் தயார் செய்தது.

எல்லா கேலக்ஸிகளின் நடுவிலும் ஒரு பெரிய கருந்துளை இருக்கும் என்பதே ஆராய்ச்சியாளர்களின் கூற்று. நம் மில்க்கிவே கேலக்ஸியின் நடுவிலும் Sagittarius A* என்னும் கருந்துளை இருக்கிறது. அருகிலிருந்தும் இது படமாக்கப்படாததற்கு காரணம் உண்டு. இது சற்றே அமைதியான கருந்துளை. வாயுக்கள் மற்றும் துகள்கள் என, சுற்றியிருக்கும் பிளாஸ்மா பகுதிகள் வெளியிடும் ஒளி குறைவு. அதுவே M87-ன்  மையத்தில் இருக்கும் கருந்துளை மிகவும் பெரியது. அருகிலிருக்கும் அனைத்தையும் உள்ளிழுத்து சூப்பர் சார்ஜ்டு துகள்களை வெளியே உமிழ்கிறது. அந்தத் துகள்கள் சில நேரங்களில் ஒளியின் வேகத்தை எட்டி 5000 ஒளி ஆண்டுகள் வரை பயணிக்கின்றன. EHT குழுவைச் சேர்ந்தவர்கள் இந்தக் கருந்துளையை ‘மான்ஸ்டர்’ என்று குறிப்பிடுகின்றனர். நமது சூரியக்குடும்பத்தின் அளவைவிட அது பெரிதாக இருப்பதால்தான் படமெடுப்பது எளிதாக இருந்தது. இருப்பினும் நமது Sagittarius A* கருந்துளையையும் விரைவில் படம் பிடிக்கவேண்டும் என்ற முடிவில்தான் இருக்கும் இந்தக் குழு. இதற்காக இன்னும் சில தொலைநோக்கிகளை இந்த நெட்வொர்க்கில் இணைக்கும் பணியில் ஈடுபட்டிருக்கிறது.

கண்டோம் கருந்துளையை!

ஆல்பர்ட் ஐன்ஸ்டீன் இப்போது இருக்கும் எந்தத் தொழில்நுட்ப வசதிகளும் இல்லாமல் 1900-களில் வெறும் கணிதம் மற்றும் இயற்பியல் அறிவை வைத்து புவியீர்ப்பு தொடர்பான ஒரு கோட்பாட்டை நம்மிடம் விட்டுச் சென்றார். அவரின் அந்தக் கோட்பாட்டின் படிதான் அதற்குப் பின் வந்த கருந்துளை தொடர்பான அனைத்துக் கண்டுபிடிப்புகளும் சித்திரிப்புகளும் அமைந்தன. தியரியாகவே இருந்த இதற்கு, காட்சி ஆதாரம் என்ற ஒன்று இதுவரை இல்லவே இல்லை. இந்தப் புகைப்படம் 100 வருடங்களுக்கு முன்னே அந்த மனிதன் சொன்னது சரிதான் என்பதை உறுதிப்படுத்திருக்கிறது. ஒரு நாள் நமது அண்டம் எப்படி உருவானது என்ற பெரும்கேள்விக்கான விடையும் இதன்மூலமாகத் தொடரப்படும் ஆராய்ச்சிகளில் கிடைக்கலாம். அதையும் நாம் பார்க்க முடிந்தால் போதுமென்கி றார்கள் அறிவியல் ஆர்வலர்கள்.

- ம.காசி விஸ்வநாதன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு