Published:Updated:

தமிழகத்தின் ஈரம்: திருநெல்வேலி, புதுக்கோட்டை, நீலகிரி

ஒட்டுமொத்த விகடனுக்கும் ஒரே ஷார்ட்கட்

Use App
தமிழகத்தின் ஈரம்: திருநெல்வேலி, புதுக்கோட்டை, நீலகிரி
தமிழகத்தின் ஈரம்: திருநெல்வேலி, புதுக்கோட்டை, நீலகிரி

தமிழகத்தின் ஈரம்: திருநெல்வேலி, புதுக்கோட்டை, நீலகிரி

பிரீமியம் ஸ்டோரி
தமிழகத்தின் ஈரம்: திருநெல்வேலி, புதுக்கோட்டை, நீலகிரி

திருநெல்வேலி - தாகம் தீர்த்த தாமிரபரணி!

தி
ருநெல்வேலி மாவட்ட மக்களுக்குத் தட்டுப்பாடு இல்லாமல் குடிநீர் கிடைக்கிறது. காரணம், வற்றாத ஜீவநதியான தாமிரபரணி. ஆண்டு முழுவதும் தண்ணீர் பாயும் இந்த நதி, திருநெல்வேலி உள்ளிட்ட மூன்று மாவட்ட மக்களின் தாகம் தணிக்கிறது.

மாவட்டத்தில் மொத்தம் 11 அணைகள் உள்ளன. இவற்றில் பிரதானமாக விளங்குபவை பாபநாசம், மணிமுத்தாறு, சேர்வலாறு ஆகிய அணைகள். இந்த அணைகளிலிருந்துதான் தாமிரபரணி ஆற்றுக்கு ஆண்டு முழுவதும் தண்ணீர் கிடைக்கிறது. வடகிழக்குப் பருவமழைக் காலத்தில் இந்த அணைகள் ஏறக்குறைய முழுக் கொள்ளளவை எட்டின. ஆனால், திருநெல்வேலி, தூத்துக்குடி ஆகிய மாவட்டங்களில் உள்ள தொழிற்சாலைகள், குளிர்பான நிறுவனங்களுக்கு விநியோகம் செய்வதற்காக வறட்சிக் காலத்திலும் தண்ணீரை வெளியேற்றினர். இதனால் தற்போது 11 சதவிகிதம் தண்ணீரே இருப்பு உள்ளது. 5,500 மில்லியன் கன அடி கொள்ளளவுகொண்ட பாபநாசம் அணையில் 548 மில்லியன் கன அடி தண்ணீர்தான் உள்ளது.

தமிழகத்தின் ஈரம்: திருநெல்வேலி, புதுக்கோட்டை, நீலகிரி

2,225 மில்லியன் கன அடி கொள்ளளவுகொண்ட சேர்வலாறு அணையில் 118 மில்லியன் கன அடி தண்ணீரும், 5511 மில்லியன் கன அடி கொள்ளளவு உள்ள மணிமுத்தாறு அணையில் 804 மில்லியன் கன அடி தண்ணீரும் இருப்பில் உள்ளன. இந்தத் தண்ணீர் ஒரு மாத காலத்துக்குப் போதுமானதாக உள்ள நிலையில், தற்போது தென் மேற்குப் பருவமழை தொடங்கியிருக்கிறது.

கடனா, ராம்நதி, கருப்பாநதி, அடவிநயினார், குண்டாறு அணைகளில் தண்ணீர் வற்றியதால் சுற்றுப்புறப் பகுதி மக்களுக்குக் குடிநீர்ப் பஞ்சம் உருவாகும் ஆபத்து நிலவியது. திருநெல்வேலி மாநகராட்சிப் பகுதியில் சீரான குடிநீர் விநியோகம் நடப்பதை மாநகராட்சி உறுதிசெய்துள்ளது. மாநகராட்சி சார்பாகத் தினமும் 48 மில்லியன் லிட்டர் தண்ணீர் விநியோகிக்கப்பட்டு வருகிறது.

மேற்குத் தொடர்ச்சி மலையில் பெய்யும் மழையால் அணைகளின் நீர்ப்பிடிப்புப் பகுதிகளுக்குத் தண்ணீர் வரத்தொடங்கியிருக்கிறது. இதனால், அணைகளின் நீர்மட்டம் அதிகரிக்கத் தொடங்கியுள்ளது. தண்ணீர்ப் பஞ்சத் திலிருந்து மாவட்டம் தப்பியிருக்கிறது.

- ஆண்டனிராஜ்
படம்: எல்.ராஜேந்திரன்

புதுக்கோட்டை - கைகொடுத்த ஊற்று நீர்… உலை வைத்த மணல் கொள்ளை!

பு
துக்கோட்டை மாவட்டத்தில், குடிநீர்ப் பயன்பாட்டுக்காக ஏரிகள் எதுவும் இல்லை. ஹோல்ட்ஸ்வொர்த் அணை மட்டும் பெயருக்கு இருக்கிறது. காவிரிக் கூட்டுக் குடிநீர்த் திட்டம்தான் புதுக்கோட்டை மக்களுக்குத் தாகம் தீர்த்து வருகிறது. ஊரகப் பகுதிகளில் கிணறுகள், கண்மாய்கள் போன்றவற்றில் மக்கள் தண்ணீர் எடுத்து வருகிறார்கள். மாவட்டம் முழுக்கக் கூட்டுக் குடிநீர்த் திட்டம் செயல்பாட்டில் இருந்தாலும் சில பகுதிகளில் மக்களுக்குப் போதுமான அளவு குடிநீர் கிடைப்பதில்லை. பல பகுதிகளில் ஆற்றில் பள்ளம் பறித்து அதில் ஊற்றெடுக்கும் நீரைத்தான் சேகரித்துக் குடித்து வருகிறார்கள். அளவுக்கு அதிகமாக மணல் அள்ளப்படுவதால், ஊற்றுத் தண்ணீரும் எடுக்க முடியாத சூழ்நிலை உருவாகி வருகிறது. கூட்டுக் குடிநீர்த் திட்டக் குழாய்கள் அடிக்கடி உடைக்கப்படுவதால் தண்ணீர் விநியோகமும் அடிக்கடி தடைபடுகிறது.

தமிழகத்தின் ஈரம்: திருநெல்வேலி, புதுக்கோட்டை, நீலகிரி

ஒருகாலத்தில் சங்கிலித்தொடர் போல அனைத்து நீர்நிலைகளும் ஒன்றுடன் ஒன்றுடன் இணைக்கப்பட்டு நீர் சேகரிக்கப்பட்டு வந்தது. தற்போது, ஏரி, குளம், கண்மாய் போன்றவையும் அவற்றுக்கான வரத்துக் கால்வாய்களும் ஆக்கிரமிப்பில் சிக்கியிருக்கின்றன. அதனால், மழை நீரைச் சேகரிக்க முடிவதில்லை.

- ஆர்.மணிமாறன்
படம் : ஆர்.வெங்கடேஷ்

நீலகிரி - காய்ந்துபோன ‘தென்னகத்தின் தண்ணீர் தொட்டி’!

நீலகிரி மாவட்டம் இந்த ஆண்டு மிக மோசமான வறட்சியைச் சந்தித்துள்ளது. அணைகளின் நீர் இருப்பு வேகமாகச் சரிவதால் கடுமையான தண்ணீர்த் தட்டுப்பாடு நிலவுகிறது. மின் உற்பத்தியும் பாதிக்கும் அபாயம் ஏற்பட்டுள்ளது. 43.6 அடி கொள்ளளவுகொண்ட ரேலியா அணையில் தற்போது 25 அடி மட்டுமே தண்ணீர் உள்ளது. 58 அடி கொள்ளளவு கொண்ட பார்சன்ஸ்வேலி அணையில் 35 அடி மட்டுமே தண்ணீர் உள்ளது. இதே நிலை நீடித்தால் இன்னும் ஒரு மாதத்துக்கு மட்டும்தான் தண்ணீர் கிடைக்கும் நிலை உள்ளது.

‘தென்னகத்தின் தண்ணீர் தொட்டி’ என அழைக்கப்படும் நீலகிரியில் அப்பர் பவானி, அவலாஞ்சி, முக்குர்த்தி, குந்தா, பைக்காரா, எமரால்டு, போர்த்திமந்து, பார்சன்ஸ்வேலி, சாண்டிநல்லா, கிளன்மார்கன், மா யார், கெத்தை, காட்டேரி, காமராஜ் சாகர், ரேலியா எனச் சிறிதும் பெரிதுமாய் 20-க்கும் மேற்பட்ட அணைகள் உள்ளன. ரேலியா அணையைச் சுற்றி உள்ள பல காட்டேஜ்களில் ஆழ்துளைக் கிணறுகள் அமைக்கப்பட்டுள்ளன. இதனால் ரேலியா அணைக்கு நீர்வரத்தே இல்லாமல் போகும் நிலை ஏற்பட்டுள்ளது.

தமிழகத்தின் ஈரம்: திருநெல்வேலி, புதுக்கோட்டை, நீலகிரி

ஊட்டி நகரின் குடிநீர்த் தேவையைப் பூர்த்திசெய்யும் பிரதான அணையாக பார்சன்ஸ்வேலி உள்ளது. மேலும் டைகர் ஹில், மார்லிமந்து, கோரிசோலை, தொட்டபெட்டா, கோடப்பமந்து ஆகிய நீர்த்தேக்கங்களில் இருந்தும் தண்ணீர் எடுத்து விநியோகித்து வருகிறது, ஊட்டி நகராட்சி.

குன்னூர் நகரின் ஒரே குடிநீர் ஆதாரம், ரேலியா அணை. மேலும் கரன்சி மற்றும் ஜிம்கானா தடுப்பணைகளில் இருந்தும் குன்னூருக்குத் தண்ணீர் விநியோகிக்கப்படுகிறது. கோத்தகிரிக்கு, ஈளாடா மற்றும் அளக்கரைத் தடுப்பணைகளில் இருந்தும் கூடலூர் ஆற்றிலிருந்தும் தண்ணீர் எடுக்கப்பட்டு விநியோகம் செய்யப்படுகிறது.

நீலகிரியில் கடந்த 20 ஆண்டுகளாக எந்த அணையும் தூர்வாரப் படவில்லை. அணைகளில் பாதி அளவுக்கு மேல் சேறும் சகதியும்தான் நிரம்பியிருக்கின்றன. அணைகளின் நீர் ஆதாரங்களையும் முறையாகப் பராமரிப்பதில்லை.

- ரா.சதீஸ்குமார், படம்: கே.அருண்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு