Published:Updated:

"ஸ்னோலின், கத்வா சிறுமி.. இரண்டு பேர் குறித்தும் எழுதணும்னு நினைச்சேன்!" - 'ஸ்னோலின்' ஆல்பம் குறித்து அறிவு

வெ.வித்யா காயத்ரி
"ஸ்னோலின், கத்வா சிறுமி.. இரண்டு பேர் குறித்தும் எழுதணும்னு நினைச்சேன்!" - 'ஸ்னோலின்' ஆல்பம் குறித்து அறிவு
"ஸ்னோலின், கத்வா சிறுமி.. இரண்டு பேர் குறித்தும் எழுதணும்னு நினைச்சேன்!" - 'ஸ்னோலின்' ஆல்பம் குறித்து அறிவு

மே 22, 2018.. தமிழகத்திற்குக் கறுப்புத் தினம். ஆம்.. அப்பாவி மக்களைத் துப்பாக்கியில் கொன்று குவித்த தினம். ஸ்டெர்லைட் ஆலையை மூடக் கோரி போராட்டத்தில் ஈடுபட்ட மக்களைக் கலைப்பதாகச் சொல்லி, துப்பாக்கிச்சூடு நடத்தியது தமிழக காவல்துறை. இந்தத் துப்பாக்கிச்சூட்டிற்கு பலியான இளம்பெண்தான் ஸ்னோலின். பள்ளிப்படிப்பை முடித்துவிட்டு கல்லூரி சோலைக்குள் நுழையக் காத்திருந்தவளின் கனவைச் சிதைத்த தினம். வருகிற 22-ம் தேதி ஸ்னோலின் எனும் பட்டாம்பூச்சி கொல்லப்பட்ட தினம். ஸ்னோலினை மையப்படுத்தி, சென்னை கேஸ்ட்லெஸ் கலெக்ட்டிவ் குழுவைச் சேர்ந்த அறிவு எழுதிய பாடல் நாளை யூடியூப்பில் வெளியிடப்பட உள்ளது. இது குறித்து அறிவிடம் பேசினோம்.

"ஸ்னோலின், கத்வா சிறுமி.. இரண்டு பேர் குறித்தும் எழுதணும்னு நினைச்சேன்!" - 'ஸ்னோலின்' ஆல்பம் குறித்து அறிவு

"கடந்த ஆண்டு துப்பாக்கிச்சூடு நடந்ததற்குப் பிறகு எழுதின பாட்டு இது. ஹிப்ஹாப் ஆல்பம் பண்ணனும்னு நான் நினைச்ச சமயம்தான் தூத்துக்குடிச் துப்பாக்கிச்சூடு நடந்தது. அந்தச் சம்பவம் என்னை ரொம்பவும் பாதிச்சதனால அது குறித்து பாடல் எழுதணும்னு முடிவு பண்ணினேன். அதே மாதிரி, கத்வா சிறுமிக்கு நடந்த கொடுமைக்கு எதிராகவும் பாட்டு எழுதணும்னு நினைச்சிருந்தேன். இந்த இரண்டையும் மையமாக வைத்து ஒரு பாட்டு எழுதினேன். நான் 'தெருக்குரல்'னு ஒரு ஆல்பம் பண்ணறேன். அந்த ஆல்பத்தில் வருகிற பாடல் இது. 

இந்தியாவின் வடமுனையிலுள்ள ஒரு பெண்ணுக்கும், இந்தியாவின் தெற்குமுனையிலுள்ள ஒரு பெண்ணுக்கும் இடையே நடந்த கொடூரத்தை பதிவு பண்ணறதுதான் இந்த 'ஸ்னோலின்' ஆல்பம். 'கத்வா சிறுமி என் தங்கச்சி.. அவ என்கூட தான் இருக்கா'ன்னு ஸ்னோலின் பேசுற மாதிரியான வரிகளில் இந்தப் பாடலை எழுதியிருக்கேன்.  

"ஸ்னோலின், கத்வா சிறுமி.. இரண்டு பேர் குறித்தும் எழுதணும்னு நினைச்சேன்!" - 'ஸ்னோலின்' ஆல்பம் குறித்து அறிவு

ஸ்னோலின் மீது உள்ள பரிதாபத்துல பாட்டு எழுதக் கூடாது.. இந்தச் சமூகத்திடம் ஸ்னோலின் கேள்விக் கேட்குற மாதிரியான வரிகள் இருக்கணும் என்பதில் ரொம்பவே உறுதியா இருந்தேன். ஸ்னோலினைச் சுட்ட போலீஸ்காரரைப் பார்த்தும், அந்தத் துப்பாக்கியைப் பார்த்தும் 'நீ தானே என்னைச் சுட்ட.. பரவாயில்ல! என்னால உன் குழந்தைங்க நல்லாயிருக்காங்குறாங்கல்ல.. உன் மேல எனக்குக் கோபம் இல்லை.. ஆனாலும் நான் கோழையில்லை!'ன்னு சொல்கிற மாதிரியும், ஸ்னோலின் அவங்க அப்பாவைப் பார்த்து, 'எதுக்கு அப்பா அழுறீங்க.. பொண்ணா பிறந்தா ஒண்னும் தப்பு கிடையாது. ஒருவேளை நான் பொண்ணா பிறக்காமல் மாடா பிறந்திருந்தா எனக்காக இந்த நாடே வந்திருக்கும்னு' சொல்ற மாதிரியான வரிகளும் இருக்கு.

கத்வா சிறுமி, ஸ்னோலின் இரண்டு பேரும் பேசுற மாதிரி இந்தப் பாட்டு வரும். ஸ்னோலினின் நினைவு தினத்தை துயரத்தோட கடக்காமல் அந்த நாளில் நாம எதைப் பற்றி பேசணுங்குறது ரொம்பவே முக்கியம். அந்தப் பெண்ணுடைய மனநிலையிலிருந்து பேசியே ஆகணும். அதனாலதான் அந்தப் பொண்ணுடைய மனசாட்சியா பேசியிருக்கிறேன். இந்தப் பாடலை சில இடங்களில் பாடியிருக்கேன். ஆனா, முழுப்பாடலாக நாளைதான் வெளியிடுறோம்.

"ஸ்னோலின், கத்வா சிறுமி.. இரண்டு பேர் குறித்தும் எழுதணும்னு நினைச்சேன்!" - 'ஸ்னோலின்' ஆல்பம் குறித்து அறிவு

விகடன் அவார்ட்ஸ்ல ஸ்னோலினின் அம்மாவை பார்த்தேன். அவங்க ரொம்பவே உடைஞ்சு இருந்தாங்க. அவங்க கதறி அழுதப்போ என்ன ஆறுதல் சொல்றதுன்னே யாருக்கும் தெரியலை. அவங்களையும் கருத்தில் கொண்டுதான் இந்தப் பாடலை எழுதியிருக்கிறேன். ஜிப்ஸி படத்தில் 'தீவிரவியாதி'ன்னு ஒரு பாட்டு எழுதியிருக்கேன். அதுலேயும் ஸ்னோலின் பற்றி இரண்டு வரிகள் வைச்சிருக்கேன். இந்த பொதுச்சமூகம் மறுபடியும் அந்தத் துப்பாக்கிச்சூடு குறித்துப் பேசணும். இந்த சம்பவத்தை விவாதத்துக்குள்ளாக்கணும். ஒரு தீர்வு எட்டப்படுறதுக்கு நம்மளுடைய வரிகள் ஒரு காரணமா இருக்கணுங்குற நினைப்பில் தான் இந்த மாதிரியான பிரச்னைகள் குறித்து எழுதுறேன்" என்றார்.