முழு பாதுகாப்பு

எங்கும் எதிலும் கவனம்!

. நம் எல்லாப் பிரச்னைகளுக்கும் காரணம், கவனக்குறைவு. சிறு கவனக்குறைவும் பெரிய விளைவில் முடியும். பரீட்சை நேரத்தில் கவனமாக இருப்பதற்கான சில வழிமுறைகள்...

. குளியல் அறையில்...

. பரபரப்புடன் குளியல் அறைக்குள் ஓடாதீர்கள். ஈரமான தரை, கால்களை வாரி விட்டுவிடலாம்.

. ஹீட்டர் உஷார்!

. ஹீட்டர் போன்றவற்றில் பிரச்னை என்றால் அப்பா, அம்மாவிடம் சொல்வதே சரியானது. நீங்களே கையாள நினைக்காதீர்கள்.

. மின்சார சமாச்சாரம்!

. அயர்ன் பாக்ஸ் போன்ற மின்சார உபகரணங்களையும் பெரியவர்களின் பொறுப்பிலேயே விட்டுவிடுங்கள்.

. பேனா... வேணாம்!

. பேனா மூடி, பென்சில் ஆகியவற்றை வாயில் வைத்தவாறு யோசிப்பது, காது குடைவது போன்றவை ஆபத்தில் முடியும்.

. சமையலறை கவனம்!

. சமையல் அறைப் பக்கம் சென்றால், சூடான பாத்திரங்கள், கத்தி போன்றவை இருக்கும். எனவே, கவனமாகச் செல்லுங்கள்.

. சாப்பிடும்போதும்...

. உணவு மற்றும் உணவுப் பாத்திரங்களை எடுக்கும்போது, எச்சரிக்கையாக இருங்கள். உடலிலோ, கண்களிலோ படலாம்.

. காலணியைக் கவனி!

. காலணிகளை அணியும் முன்பு கவனிக்கவும். உள்ளே பூச்சிகூட இருக்கலாம். நன்கு உதறிவிட்டு அணியவும்.

. வெயிட்... வெயிட்!

. கனமான பொருட்களை எடுக்கும்போது, உதவிக்கு ஒருவர் இருப்பது நல்லது. கை தவறி நம் மீதே போட்டுக்கொள்ளும் நிலை ஏற்படலாம்.

. உயரம் உஷார்!

. உயரமான இடங்களில் இருக்கும் பொருட்களை எடுக்கும்போதும் உஷாராக இருக்க வேண்டும். தேவையற்ற விபத்தைத் தவிர்க்கலாம்.

. சாலையில் சைக்கிள்!

. சைக்கிள் ஓட்டும்போது, உங்கள் கவனம் முழுக்க பாதையில் இருக்கட்டும். ஓவர் டேக் எல்லாம் வேண்டவே வேண்டாம்.

. பேருந்து பாலிஸி!

. ஓடும் பேருந்தில் ஏறுவது, தொற்றிச் செல்வது போன்ற பாலிஸிகளை இப்போதும் எப்போதும் ஓரம் கட்டுங்கள்.

. விளையாட்டு கவனம்!

. ஃபுட்பால், கிரிக்கெட் போன்ற குழு விளையாட்டின்போது ரொம்பவே கவனமாக இருங்கள். தடுக்கி விழுந்து காயம் ஏற்படலாம்.

. கொஞ்சம் தவிர்ப்போம்!

. ஸ்கேட்டிங், டைவிங் போன்ற விளையாட்டுகளைத் தேர்வு முடியும் வரை கொஞ்சம் தவிர்க்கலாமே.

. வேண்டாம் வீண் சண்டை!

. வீணான வார்த்தை மோதல்கள், கைகலப்புகளில் ஈடுபடுவதையும் தவிர்க்கவும். சின்ன விஷயம் வினையாக மாறலாம்.

. ரிப்பேர்... பிரிப்பேர்!

. வாகனங்களைப் பழுதுபார்ப்பது போன்ற வேலைகளில் தனியாக ஈடுபடாதீர்கள். தகுந்த ஆலோசனையின்படி செய்யுங்கள்.

. உதவியில் கவனம்!

. முன்பின் தெரியாத நபர்களிடம் எச்சரிக்கையாக இருங்கள். அவர்களுக்கு உதவும்போது கவனமாக செயல்பட வேண்டும்.

. விபத்து வேடிக்கை!

. சாலை விபத்து, தீ விபத்து போன்ற இடங்களில் நுழைந்து வேடிக்கை பார்ப்பதைத் தவிர்க்கவும். நமக்கே விபரீதமாக மாறலாம்.

. கோடைக்கு குடை!

. கோடை வந்தாச்சு. வெயிலில் செல்வதைக் குறைத்துக் கொள்ளுங்கள். அப்படியே சென்றாலும் குடையுடன் செல்வது நல்லது.

. இருட்டைக் கவனி!

. வெளிச்சம் இல்லாத இருட்டான நேரத்திலோ, இடங்களிலோ செல்லும்போது மிகவும் கவனத்துடன் செல்லுங்கள்.

. விலங்குகள் ஜாக்கிரதை!

. தெருநாய், மாடு போன்றவற்றைக் கடக்கும்போதும் கவனமாக இருங்கள். அவற்றைச் சீண்டி, வம்பை விலைக்கு வாங்காதீர்கள்.

. செல்லங்களே... செல்லங்களே!

. வீட்டு நாய், பூனை, கிளி போன்ற செல்லப் பிராணிகளிடமும் கவனம். தூக்குவது, முத்தம் கொடுப்பது போன்றவை வேண்டாமே.

. முந்தாதே தாண்டாதே!

. கூட்டங்களில் முந்திக்கொண்டு ஓடுவது, பள்ளங்களைத் தாண்டுவது போன்ற சாகசங்களுக்குத் தடை போடுங்கள்.

. நோ... நோ... டூ வீலர்!

. அப்பாவின் டூ வீலரை ஓட்டுவது குஷியாக இருக்கலாம். ஆனால், அதற்கு இப்போது வயதும் இல்லை, தேவையும் இல்லை.

. வெளியே சென்றால்...

. வீட்டு முகவரி, செல்போன் எண்கள் எழுதிய அட்டை அல்லது காகிதத்தை பாக்கெட்டில் வைத்துக்கொள்வது சமயத்துக்கு உதவலாம்.

. முதல் உதவி...

. முதல் உதவி சிகிச்சைப் பொருட்களை மருத்துவரின் ஆலோசனையின்படி வீட்டிலே வைத்துக்கொள்வது சமயத்தில் பயன்படும்.

. செல்போன் பேச்சு!

. நடந்துகொண்டே செல்போன் பேசுவது, சாலையைக் கடப்பதைத் தவிர்க்கவும். இவை, நொடிப்பொழுதில் கவனத்தைச் சிதைத்துவிடும்.

. கண்ணாடி கவனம்!

. கண்ணாடி மற்றும் கூர்மையான பொருட்களைக் கையாளும்போது, மிகவும் கவனமாக இருப்பது காயங்கள் ஏற்படுவதைத் தவிர்க்கும்.

. பள்ளியில் கவனம்...

. பள்ளியில் மாடிப் படிகளில் வேகமாகச் செல்வது, வகுப்பறை மேஜைகளை நகர்த்துவது ஆகியவற்றில் கவனமாக இருங்கள்.

. லேப் கவனம்...

. பள்ளி ஆராய்ச்சிக்கூடத்தில், ரசாயனப் பொருட்களைச் சேர்க்கும்போது முழுக் கவனத்துடன் இருக்க வேண்டும்.

. எங்கேயும் எப்போதும் கவனம்...

. குளியல் அறை, சமையல் அறை சைக்கிள், பேருந்து சாலைகள், விலங்குகள் விளையாட்டு, வீண் பேச்சு பள்ளியிலும் கவனம்.

முழு பாதுகாப்பு

Vikatan Correspondent