Published:Updated:

வாசிக்க ஏங்கும் நூல் 'மண்வாசம்'

வாசிக்க ஏங்கும் நூல் 'மண்வாசம்'

வாசிக்க ஏங்கும் நூல் 'மண்வாசம்'

வாசிக்க ஏங்கும் நூல் 'மண்வாசம்'

Published:Updated:

இயற்கையில் இல்லாதது வேறு எதிலும் இருக்காது என்று நம்பிய தேசத்தில் வாழ்கிறவர்கள் நாம். ஆனால், அதை விட்டு வெகு தூரம் விலகிக் கொண்டிருக்கிறோம்.  ஆசிரியர், எழுத்தாளர், கவிஞர் என பன்முக அடையாளம் கொண்ட தமிழச்சி தங்கபாண்டியனின் மண்மனம் சார்ந்த பதிவுகளின் தொகுப்பு நூல் 'மண்வாசம்’.  

வாசிக்க ஏங்கும் நூல் 'மண்வாசம்'
##~##

ஒட்டுமொத்த விகடனுக்கும் ஒரே ஷார்ட்கட்!

விருதுநகர் மாவட்டத்தில் உள்ள 'மல்லாங்கிணறு’ என்ற கிராமத்து வாழ்க்கையில், தான் சந்தித்த எளிய மக்களையும் அவர்களின் ஆரோக்கிய ரகசியங்களையும் புத்தகம் முழுவதும் பகிர்ந்திருக்கிறார்!

'நம்மைச் சுற்றி இருக்கும் இயற்கை கொடைகளை நாம் கவனிக்கத் தவறி இருக்கலாம். ஆனால் நம் முன்னோர்கள் அவற்றை பொக்கிஷமாகப் பாதுகாத்தார்கள் என்று கூறும் தமிழச்சி, 'மஞ்சணத்தி’ மர இலையின் மகத்துவத்தில் ஆரம்பித்து, 'செம்பருத்தி’யின் பலன்கள், கை வைத்தியக் குறிப்புகள் பலவற்றை பக்குவமாகச் சொல்லித் தருகிறார். சளி, இருமல், பித்தம் போன்ற சின்னச் சின்ன உடல் உபாதைகளுக்கு, நம் வீட்டிலேயே இருக்கும் மருத்துவர் அஞ்சறைப்பெட்டி என்று சொல்லி, பயனுள்ள மருத்துவக் குறிப்பையும் அள்ளித் தந்துள்ளார். காந்தியடிகளின் எளிமையான உணவுப் பழக்கத்தில் ஒன்றான, ஆட்டுப் பாலின் சிறப்பை விளக்கமாகச் சொல்கிறார் தமிழச்சி. இவை தவிர அழகுக் குறிப்புகள், மருத்துக் குறிப்புகளை கதைகளாகவும், வாழ்வியல் சம்பவங்கள் மற்றும் தினமும் அவர் சந்திக்கும்  கிராமத்து மனுஷிகள் பேச்சிலுமாக‌ அலசி, தீர்வும் தந்திருப்பது அற்புதம்.  பேச்சு மொழிநடையிலும், எளிமையான சொற் சித்திரமாக இருக்கும் இந்நூல் ஒரு மருத்துவக் கையேடாகவே இருக்கிறது.

'அரைப்படி அரிசி அன்னதானமாம், விடியுமட்டும் மேளதாளமாம்’; 'வடையைத் திங்கணுமேயழிய துளையை எண்ணக் கூடாது’ போன்ற அங்கும் இங்குமாகத் தென்படும் செறிவான கிராமத்துச் சொலவடைகள் வாசிப்பதற்கு மேலும் சுவாரஸ்யம் கூட்டுகின்றன!

'மழையின் தொடர் முத்தத்தில் கரிசல் மண் கிறங்கிக் கிடந்தது. நெகிழ்ந்திருந்த அதன் மேனி மீது தவளையன்று மோகித்துத் தாவித் திரிந்தது' என்று கவிஞருக்கே உரிய வர்ணனைகளுடன் கவித்துவமான ஆழமான நுண்ணுணர்வுடன் எழுதப்பட்டிருக்கிறது இந்தப் புத்தகம்.  ஒவ்வொரு பக்கத்தையும் நிறைக்கிறது தமிழச்சி தங்கபாண்டியனின் எழுத்துச் சாரலின் மண்வாசம்.