பிரதீப்குமார், சேலம்-16.

ஞானியர்கள் தம் கடைசிக் காலத்தில் சொல்லிவைத்தாற்போல் புற்றுநோயை அனுபவித்து இருக்கிறார்களே... அதற்கு ஏதேனும் தெய்விகக் காரணங்கள் உண்டா?

மகானாக இருந்தாலும் சரி, மடையனாக இருந்தாலும் சரி, உடம்பு என்கிற வண்டி பொதுவானது. அது எப்போது வேண்டுமானாலும் ரிப்பேர் ஆகலாம். நீங்கள் சொல்வது தவறு. ரமண மகரிஷிக்கு மட்டும்தான் தோள் பகுதியில் புற்றுநோய் வந்தது. அவர் அதைச் சாதாரணமாக ஏற்றுக்கொண்டார். விவேகானந்தருக்குச் சர்க்கரை நோய் இருந்தது. 'ஹார்ட் அட்டாக்'கில் மறைந்த மகான்களும் உண்டு. இதற்கெல்லாம் 'தெய்விகக் காரணம்' எல்லாம் எதுவும் கிடையாது.வாட்ட சாட்டமாக வளர்ந்து, களியாட்டங் களில் மூழ்கி, எல்லாத் தப்புகளை யும் செய்யும் போலிச் சாமியார்கள் கடைசி வரை எந்த வியாதியும் வராமல் நடமாடவும் முடியும். இதற்கு என்ன காரணம் சொல்ல முடியும்?!

பா.ஜெயப்பிரகாஷ், சர்க்கார்பதி.

'பாராட்டு - புகழாரம்' என்ன வேறுபாடுங்க மதன்?

பாராட்டு என்பது ஒரு குறிப்பிட்ட விஷயத்துக்காக நாம் ஒருவர் மீது தூக்கிப்போடும் ஒரே ஒரு ரோஜா. புகழாரம் என்பது பெரிய ரோஜா மாலை. பாராட்டு என்பதைக்கூட நிஜம் என்று சொல்லலாம். புகழாரம் என்பது அநேகமாகப் பொய்!

என்னுடைய ஒரே ஒரு பதிலை மட்டும் படித்துவிட்டு என்னை நீங்கள் பாராட்டலாம். பதிலுக்கு நீங்கள் எதையும் என்னிடம் எதிர்பார்க்கக்கூட மாட்டீர்கள். புகழாரம் என்கிற ஒன்றைச் சூட்டிவிட்டு, நாளைக்கு மேலவையில் பதவிகூட நீங்கள் எதிர்பார்க்கலாம்!

ஜெ.கண்ணன், சென்னை-101.

மிருகங்களுக்கும் பறவைகளுக்கும் சூரிய கிரகணத்தின்போது பார்வை பறிபோகாதா?

இந்த முட்டாள்தனத்தை எல் லாம் செய்கிறவன் மனிதன்தான். மிருகங்களும் பறவைகளும் கிரகணத்தின்போது சூரியனைப் பார்க்காது!

சிவமலை சுந்தரம், சங்கரன்கோவில்.

இறந்தவர்களின் உடல் கனமாக இருக்கும் என்கிறார்களே உண்மையா?

இறந்த சில மணி நேரங்களில், தசைகளில் உள்ள புரோட்டீன்கள் இறுகி உடல் விறைத்துக்கொள் ளும், இதைத்தான் Rigor Mortis என்கிறார்கள். கூடவே, ரத்தம் ஓடுவது நின்றுபோய் 'க்ராவிடி' காரணமாக கீழ்ப் பகுதியில்தேங்கி உறைய ஆரம்பிக்கும். இதனால் உடல் வளைந்துகொடுக்காமல் போவதால், மேலும் கனமாகி விட்டதைப்போலத் தோன்றுகிறது என்பதுதான் உண்மை!

வே.முருகேசன், சென்னை-88.

துன்பங்களுக்கு எல்லாம் ஆசையே காரணம். அதனால், ஆசையை ஒழிக்க வேண்டும் என புத்தர் கூறுகிறாரே. அவரும் ஆசையை அனுபவித்த பின்தானே இவ்வாறு கூறுகிறார்?

ஆசையை அனுபவித்தவர் சித்தார்த்தர். துன்பங்களுக்கு ஆசையே காரணம் என்றவர் புத்தர். குழப்பிக்கொள்ள வேண்டாம்!

த.சத்தியநாராயணன், அயன்புரம்.

நரி முகத்தில் விழித்தது உண்டா?

நம்பினால் நம்புங்கள்! எனக்கு ஒன்பது வயது. உடம்பு சரியில்லாமல் போனதால், ஒரு ஜோசியரை வீட்டுக்கு வரவழைத்தார் பாட்டி (இத்தனைக்கும் தாத்தா டாக்டர்!). ஜோசியர் 'காலையில் நரி முகத்தில் விழித்தால் எல்லாம் சரியாகிவிடும்' என்று ஐடியா தந்தார். வீட்டுக்கு ஜோசியர் வருவார், நரி எப்படி வரும்? ஆகவே, காலையில் நான் விழிப்பதற்கு முன்பே என் கண்ணைத் துணியால் கட்டி, எழுப்பி 'ஜூ'வுக்கு அழைத்துச் சென்று, என் கையைப் பிடித்து நரியின் கூண்டுக்கு வெளியே நிறுத்தி, கண் கட்டை அவிழ்த்து விட்டார் பாட்டி. கண்ணைத் திறந் தால், எதிரே நரி. எங்கள் கண்கள் சந்தித்தன. 'எதிர்காலத்தில் விகடன் வாசகர்களின் விஞ்ஞானக் கேள்விகளுக்கு எல்லாம் பதில் சொல்லப் போறே! இந்த லூஸூத்தனம் உனக் குத் தேவைதானா?!' என்பதுபோல நரி என்னைப் பரிதாபமாகப் பார்த்தது. யார் கண்டார்கள்? உடம்பெல்லாம் சரியாகி, இன்று உங்களுக்கு எல்லாம், பதில் எழுதுவதற்குக் காரணம், அந்த நரிதானோ என்னவோ!

ஆர்.கே.லிங்கேசன், மேலகிருஷ்ணன்புதூர்.

புலவருக்கும் கவிஞருக்கும் என்ன வேறுபாடு?

ஒரு வேறுபாடும் இல்லை. முடியரசில் புலவர். குடியரசில் கவிஞர். இப்போது 'புலவர்' என்பதை நவீனமான அடைமொழியாகவும் ஏற்றுக்கொள்ள மாட்டார்கள். கவிப்பேரரசுவுக்கு போன் போட்டு, 'இனி உங்களைப் புலவர் வைரமுத்து என்று அழைக்கலாமா?' என்று கேட்டுப்பாருங்களேன்!

ஜி.மாரியப்பன், சின்னமனூர்.

சோம்பேறி; அமைதியானவன்; இருவருக்கும் என்ன வேறுபாடு?

வேலை செய்யப் பிடிக்காமல் உட்காருகிறவன் சோம்பேறி. வேலை செய்து முடித்த பிறகு உட்காருகிறவன் அமைதியான வன்!

பொன்விழி, அன்னூர்.

பீத்தோவன் அமைத்த சிம்பொனி இசையை இப்போதும் கேட்க முடியுமா? அவர் எப்போது காது கேட்கும் திறனை இழந்தார்?

ஜெர்மனியில், டிசம்பர் 16, 1770-ம் ஆண்டு பிறந்த பீத்தோவன், நான்கு வயதிலேயே மூன்று 'ஸோனாடா'க்களை (Sonata) உருவாக்கிய பிராடிஜி. (ஸோனாடா என்பது Instrumental Composition), 30 வயதில், உலகில் உச்சக்கட்டத்தில் இருந்தபோது அவருக்கு செவித்திறன் குறைய ஆரம்பித்து, பிறகு அடியோடு காது கேட்காமல் போய்விட்டது. அதற்குப் பிறகும் அவருடைய மூளைக்குள் இசை தொடர்ந்து முழங்கியது. மூன்றில் இருந்து எட்டாவது சிம்பொனி வரை அவர் படைத்தது முழுமையாக செவிப் புலனை இழந்த பிறகுதான். தான் படைத்த இசையைத் தன்னாலேயே கேட்க முடியாமல் மனம் உடைந்து போனார் அந்த மாமேதை. அவருடைய இசைத்தட்டுக்கள் அநேகமாக எல்லா இசைக் கடைகளிலும் கிடைக்கும்.இரவில், விளக்குகளை அணைத்துவிட்டு, படுத்துக்கொண்டு அந்த இசையைக் கேளுங்கள். உடல் சிலிர்த்து, கண்கள் கலங்கும்!

வி.சுகந்தா, திருப்பூர்.

உங்கள் டேபிள் க்ளீனாக இருக்குமா... கன்னாபின்னாவென்று இருக்குமா?

கன்னாபின்னாவென்றுதான். பல சமயங்களில் ஒரு வழியாக நான் தொலைத்துவிட்டேன் என்று நினைத்த ஒன்று, திடீரென்று எனக்கு டேபிளில் கிடைக்கும் பாருங்கள்... அந்த 'த்ரில்'லுக்கு இணையே கிடையாது!

'வித்யாராஜன்', சென்னை-16.

அவநம்பிக்கை எப்படி ஏற்படுகிறது?

அனுபவங்களால்தான்! பல தொழில்கள் செய்து தோற்ற ஒருவர் நண்பரிடம் சொன்னார். 'நான் ஒரு சுடுகாட்டை விலைக்கு வாங்கலாம் என்று பார்த்தால், உடனே எல்லோரும் செத்துப் போவதை நிறுத்திவிடுவார்களோ என்று பயமாக இருக்கிறது!'