சென்ற வார இணைய நிழல் உலகத் தகவல்கள் அதீத ஆர்வத்தை உண்டாக்கியிருப்பதில் மகிழ்ச்சி; SecondLife போன்ற தளங்களைப் பயன்படுத்தப் போதுமான பிராட்பேண்ட் வசதி இந்திய வீடுகளுக்கு வரவில்லை என்பது மறுபுறச் சோகம்!

பை தி வே, தொடர்ந்து படிப்பவர்களுக்கு ஒரு சுருக் எச்சரிக்கை. இந்த வாரம் நாம் அலசவிருப்பது இணையத்தில் சமீபத்தில் அறிமுகமாகிய/கும் புதிய தொழில்நுட்பங்கள் பற்றி அல்ல; மாறாக, இணையம் எனும் மாபெரும் பூதத்தின் எதிர்காலம் எப்படி இருக்கக்கூடும் என்பது பற்றித்தான்!

இணையத்தை இரு மாபெரும் யுகங்களாகப் பிரிக்கிறார்கள். முதல் யுகமான இணையம் 1.0-ல் தகவல்கள் (data) வலைத்தளப் பக்கங்களில் கொடுக்கப்பட, நெட்டிசனான நீங்கள் அவற்றைப் படித்துத் தகவல்களை எடுத்துக்கொண்டீர்கள். கிடைத்த தகவலை வைத்து எதிர்க் கேள்வி கேட்பதோ, பின்னூட்டம் இடுவதோ உங்களுக்குச் சாத்தியமில்லாமல் இருந்தது. அந்தத் தகவலைப் பெற்றுக்கொள்ளும் மற்றவர்களிடம் கலந்துரையாடுவதும் முடியாது. கிட்டத்தட்ட நூலகம் சென்று புத்தகம் படிப்பது போன்ற ஒரு சாதாரண மீடியாவாகவே இருந்த இணையம் 2001-ல் புது வடிவம் எடுக்க ஆரம்பித்தது.

இணையம் 2.0 என அழைக்கப்படும் இந்தப் புதிய யுகம், நெட்டிசன்களை ஒருங்கிணைக்க ஆரம்பித்தது. வலைப்பதிவுக் கலாசாரம் தொடங்கப்பட்டது; விக்கிகள் முளைத்தன; யாதொரு தகவலுக்கும் மின்னல் வேகத்தில் பின்னூட்டங்கள் இடப்பட்டன; சமூக நெட்வொர்க்கிங் தளங்களில் படங்களும், வீடியோக்களும் அப்லோட் செய்யப்பட்டு நண்பர்களுடன் பகிரப்பட்டன. கீ-போர்டைத் தட்டித் தடவி, இணையதளப் பக்கங்களைப் படித்துக்கொண்டு இருந்த திருவாளர் இணைய ஜனம் அலைபேசியிலிருந்து நொடிக்கு நொடி ட்விட்டத் தொடங்கினார்.

ஓர் எளிய உதாரணம்...

கோடை விடுமுறைக்கு எங்காவது போகலாம் என விருப்பம். ஆனால் எங்கே, எப்போது, எவ்வளவு செலவாகும் என எக்கச்சக்கக் குழப்பம். 1.0 யுகத்தில் யாஹூ போன்ற ஒரு தேடல் இயந்திரத்தைப் பயன்படுத்தி, தளம் தளமாகச் சென்று தகவல்களைச் சேகரித்து முடிவெடுப்பீர்கள். 2.0 யுகத்தில் 'விடுமுறை செல்வதாக உத்தேசம். ஏதாவது பரிந்துரை உண்டா?' என new.facebook.com போன்ற Social Networking தளத்தில் கேட்க, உங்கள் நட்பு வட்டாரம் உங்களது விடுமுறையைத் திட்டமிட உதவும். அல்லது, நீங்கள் செல்ல விரும்பும் இடத்துக்கு முன்பே சென்று வந்துள்ள பதிவர்களின் அனுபவங்களைப் படித்துத் தெரிந்துகொள்வதுடன், அவர்களிடம் சந்தேகங்களைக் கேட்டும் தெளிவு பெறலாம். விடுமுறையின்போது, நீங்கள் பார்த்த/ பார்க்கப்போகிற இடங்களைப்பற்றி ட்விட்ட, உங்கள் நட்பு வட்டம் அதை ஃபாலோ செய்யும்.

2009 பாதிக்கும் மேல் கரைந்துவிட்ட இன்றைய நாளில், இணையம் 2.0-ன் உத்வேகம் குறைந்தபாடில்லை. 2.0-ல் இன்னும் பல நூறு புதிய பயன்பாடுகள் (applications) வரும் வாய்ப்புகள் இருப்பதாகவே தெரிகிறது. அவற்றில் சில ஃபேஸ்புக், ட்விட்டர் போன்ற கில்ல ராகவும் இருக்கலாம்.

ஆனால், இணையம் 3.0 என்ற அடுத்த யுகத்துக்கு இப்போதே அடித்தளம் இடப்பட்டுவிட்டது. குறிப்புச் சொற்கள் எனப்படும் Keywords தகவல் சுரங்கமாக இருக்கும் இன்றைய இணையத்தின் உயிர்நாடி. கூகுளின் அடிப்படையான கூகுள்பாட் என்ற ரோபாட் இணையம் எங்கும் உலவி குறிப்புச் சொற்களுக்கான தகவல்களைக்கொண்டு இருக்கும் வலைத்தளங்களைத் தேடிக் கண்டுபிடித்துவைத்து, நீங்கள் தகவல் தேட உதவுகிறது. ஆனால், இதில் இருக்கும் மிகப் பெரிய குறைபாடு, குறிப்புச் சொற்களை தரம் பிரித்து அர்த்தப்படுத்திக்கொள்ள இன்றைய இணையத்தால் முடியாது. விடுமுறை உதாரணத்தையே தொடரலாம். ஆக்ரா சென்று தாஜ்மகாலைப் பார்ப்பது என முடிவு செய்து, அதைப் பற்றிய விரிவான தகவல்களைப் பெறவிரும்பி,

'தாஜ்மகால் விடுமுறை' என கூகுளில் சொடுக்கினால், தாஜ்மகாலுக்கு விடுமுறைக்குச் செல்வது பற்றிய தகவல்கள்கொண்ட வலைத்தளங்களுடன், கடந்த தீபாவளி விடுமுறையின்போது தாஜ்மகால் தேநீர் பருகிய வலைப்பதிவரின் தளமும் தேடல் பதிலாக வரலாம். காரணம் சிம்பிள், தாஜ்மகால் நினைவுச் சின்னமா, தேநீரா என்பதை வித்தியாசப்படுத்திப் பார்க்க இன்றைய இணையத்தால் முடியாது. அதைப் பொறுத்தவரை 'தாஜ்மகால்' என்பது ஒரு குறிப்புச் சொல். தட்ஸ் ஆல்!

இணையம் இப்படியே குறிப்புச் சொற்களால் கட்டப்படும் மீடியாவாக இருந்துவிட்டால், அதன் பலன் இன்னும் சில ஆண்டுகளில் முடிந்துபோகும். ஆனால், இணையத்தில் நடந்துவரும் சில முன்னேற்றங்களை ஒருங்கிணைத்தால், அதன் வலிமை மாபெரும் மாற்றத்தைக் கொண்டுவர இயலும்.

இணையத்தின் கட்டமைப்பு கணினிகளாலும், தொலைத்தொடர்பு இணைப்புகளாலும் ஆனது என்றாலும், இணையத்தின் நோக்கம் பயனீட்டாளர்களுக்குத் தகவலைத் தொகுத்துக் கொடுப்பது. மலைமலையாகக் குவிந்திருக்கும் டேட்டாவிலிருந்து தகவல்களைப் (Information) பகுத்துப் பிரித்தெடுக்க வலைத்தளங்கள் தமக்குள் முதலில் டேட்டா பரிமாறிக்கொண்டு, அதிலிருந்து தகவலைத் தொகுக்க வேண்டும். இணையத்தில் பிரபலமாகிவரும் இணைய சேவைக் கூறுகள் (Web Services) இதைச் சாத்தியமாக்கும்.

மனித மனம் சிந்திக்கும் முறைகளுக்கு இணையாக இணையத்தையும் கொண்டுவந்தால், அதன் பயன் பல மடங்கு அதிகரிக்கும். பார்க்கும், கேட்கும், உணரும் விஷயங்களில் இருந்து கிரகிக்கும் டேட்டாவைத் தொகுத்துக்கொண்டே போவதால்தான் மனித மனம் சிந்திப்பதில் செழுமை அடைகிறது. Meta-data என அழைக்கப்படும் டேட்டாவைப் பற்றிய டேட்டாவை, இணையம் திறமையாகக் கையாளத் தொடங்கியிருப்பதைச் சமீபத்தில் வெற்றியடைந்த வலைத்தளங்கள் காட்டுகின்றன. உதாரணத்துக்கு, Tag-ging. ஒருவர் அப்லோட் செய்யும் புகைப்படத்தின் பல்வேறு பகுதிகளை Tagging செய்ய, அந்தப் படத்தைப் பற்றிய 'அறிவு' அதிகரிக்கிறது.

நீங்கள் தயாரோ இல்லையோ, 'Semantic Web', 'Ontology' என்றெல்லாம் காபி, பிஸ்கட் சகிதம் குறுந்தாடியைத் தடவியபடி தியரிட்டிக்கலாகப் பேசிக்கொண்டு இருக்கும் கான்செப்ட்டுகளின் பிராக்டிகல் செயலாக்கம் இணையம் 3.0 விரைவிலேயே வந்துவிடும்.

இந்த வாரக் கட்டுரையை எழுதத் தொடங்கிய நாளன்று கோயம்புத்தூர் ஆர்.எஸ்.புரம் ஏரியாவில் சென்றுகொண்டு இருக்க, பின்னால் வந்த கார் இடிக்க, கீழே இறங்கி நிகழ்ந்ததைப் பார்வையிடுவதற்குள் இடித்த கார் ஹாலிவுட் பட ஸ்டைலில் பறக்கத் தொடங்க, எனது காரை ஓட்டிய சிவா துரத்தி, வழிமறிக்க... நீண்ட கதையின் சுருக். கிட்டத்தட்ட முழு நாளைப் போக்குவரத்துக் காவல் நிலையத்தில் செலவழித்தபோது ஒன்றைக் கவனித்தேன். மருந்துக்குக்கூட கணினி பயன்படுத்தப்படவில்லை. அன்றிரவு புறப்பட்டு சான்ஃபிரான்சிஸ்கோ வந்து சேர்ந்து செய்திகளை மேய்ந்தால், கோட்வீட் (new.cotweet.com) என்ற தொழில்நுட்பத்தைப் பயன்படுத்தி, சான்ஃபிரான்சிஸ்கோ தமது நகரவாசிகளின் புகார்களுக்குப் பதில் அளிக்கத் தொடங்கியிருக்கிறது. நாம் ஏன் தொழில்நுட்பங்களை விரைவாகப் பயன்படுத்த முடிவதில்லை என்ற ஏக்கம் எழுந்தது. இத்தனைக்கும் அலைபேசி சேவைத் தரம் அமெரிக்காவுக்குச் சற்றும் குறைவில்லாது இருக்கும் இந்தியாவில் ட்விட்டர் போன்ற இணையம் 2.0 தொழில்நுட்பங்கள் பொதுமக்கள் சேவைக்கு அற்புதமாக உதவும்.

ஓர் ஆறுதல்... கோவை கார் விபத்து சம்பவ வழக்கை விசாரித்த போலீஸ் சப் -இன்ஸ்பெக்டர் மேனகாவின் இணையம் மற்றும் கணினி ஆர்வம். எனக்கு நம்பிக்கை இருக்கிறது!