உங்கள் மனைவி வைரமா... தேளா? - ஹாய் மதன்-கேள்வி பதில்

ஹாய் மதன்-கேள்வி பதில் . உங்கள் மனைவி வைரமா... தேளா? . அமல்ராஜ், பாபநாசம்.

சேர, சோழ, பாண்டிய மன்னர்கள் காலத்தில் தமிழ் மொழி எப்படிப் பேசப்பட்டது? மன்னர்கள் எப்படித் தமிழ் பேசினார்கள்? எல்லோரும் சாதாரணமாகப் படிக்க முடியுமா?

.

இ தில் என்ன சந்தேகம்?!

எல்லோரும் தமிழில்தான் பேசினார்கள். கரிகால் சோழன் காலத்தில் மேலும் தூய தமிழில் உரையாடி இருக்க வேண்டும். போகப் போக, வடமொழியின் ஊடுருவல் நிகழ்ந்து தமிழில் கலப்படம் ஏற்பட்டது. பிற்காலச் சோழர்கள் தமிழுக்குள் ஊடுருவிவிட்ட சம்ஸ்கிருத வார்த்தைகள் கலந்த தமிழில் பேசினார்கள். (அட்சரம், ஆகாசம், ஹாஸ்யம் போன்ற சம்ஸ்கிருதத் தமிழ் வார்த்தைகள் 60 ஆண்டுகளுக்கு முன்பு வரைகூடப் பயன்படுத்தப்பட்டன). எத்தனை தமிழ்ப் பாடல்கள் பண்டைய தமிழ் மன்னர்களைப் போற்றிப் பாடப்பட்டன! சோழர்களின் ஆட்சியில் நடந்த பெருமையான நிகழ்ச்சிகளை விளக்கிச் சொல்லும் 'மெய்க்கீர்த்தி'கள் 'இனிய தமிழ் அகவற்பாவில்' பொறிக்கப்பட்டதாக தமிழ் வரலாற்று மேதை கே.ஏ.நீலகண்ட சாஸ்திரி குறிப்பிடுகிறார். ஆனால், அகம்-புறம் பாடல்களை இப்போது படிக்கும்போது சாமான்யர் களாகிய நமக்கு அர்த்தம் புரிய சிரமமாகவே இருக்கிறது. கரிகால் சோழனைப் போற்றி ஒரு புலவர் பாடுகிறார்...

குறும்பறை பயற்றுஞ் செல்குடி நிறுத்த பெரும்பெயர்க் கரிகால் வெல்போர்ச் சோழன் - (அகம்)

(அதாவது, மலைகள் மீது ஆடுகளை மேய்க்கும் குறும்பர் குடும்பங்களை கரிகால் சோழன் ஆதரவோடு காப்பாற்றியது பற்றிய பாடல் இது!)

கரிகால் சோழன் இதன் அர்த்தத்தைப் புரிந்துகொண்டு தலையாட்டினாரா என்று நினைக்க ஆச்சர்யமாக இருக்கிறது!

. ஜி.மாரியப்பன், சின்னமனூர். மனைவியே பல பேருக்கு எதிரி போல வாய்த்துவிடுவதற்கு முக்கியக் காரணம் என்ன?

சம்பிரதாய அணுகுமுறைப்படி மனைவியைத் தேர்ந்தெடுப்பது என்பது - தானாகவே நிகழ்கிற, எதிர்பாராத விதியை அல்லது அதிர்ஷ்டத்தைப் பொறுத்த ஒரு விஷயம். ஒரு பெரிய பானையில் வைரங்கள், முத்துக்கள், தேள், பாம்பு எல்லாம் போடப்பட்டு இருப்பதாக வைத்துக்கொள்வோம். ஒரு கரண்டியை உள்ளேவிட்டு எதையாவது எடுக்க வேண்டும் என்றால், கரண்டியில் வருவது வைரமாகவும் இருக்கலாம், பாம்பாகவும் இருக்கலாம் இல்லையா?! Random Choice! ஆகவேதான் நீங்கள் சொல்வது போல சிலர் அமைந்துவிடுகிறார்கள். இது கணவனைத் தேர்வு செய்வதிலும் நிகழலாம். 'தேமே' என்று சாதுவாகத் தோற்றம் அளிக்கும் மணமகன் ஒரு கொடூரமான 'சாடிஸ்ட்' என்பது பிற்பாடு தெரிய வருவதும் நிறையவே நடக்கிறது இல்லையா?!

. சுமாலி, மேலப்பாலையூர்.

இலங்கையை முழுமையாக இதற்கு முன்னர் எந்தத் தமிழ் மன்னராவது அரசாண்டது உண்டா?

ஆகா! ராஜராஜ சோழனின் புகழ்பெற்ற கப்பற்படை ஈழத்தைச் சுலபமாகவே வென்றது. சிங்கள மன்னன் (ஐந்தாம்) மகிந்தன் தப்பி ஓடி காட்டுக்குள் ஒளிந்துகொண்டான். ஈழத்தின் பல கிராமங்களை (கி.பி 1014-ல்) ராஜராஜ சோழன் தஞ்சை பெரிய கோயிலுக்குத் தானமாகக் கொடுத்தார். ஈழத்துக்கு 'மும்முடிச் சோழ மண்டலம்' என்று புதிய பெயர் வைக்கப்பட்டது. அனுராதபுரம் அருகில் உள்ள

. பொலன்னுறுவை என்னும் ஊர் சோழர்களின் தலைநகரம் ஆனது. அங்கே பெரிய சிவாலயம் ஒன்றைக் கட்டினார் ராஜராஜன் (இன்றும் அது உள்ளது) இருப்பினும், இலங்கையின் தென் கிழக்கில் இருந்த ரோகண நாட்டை மட்டும் ராஜராஜனால் கைப்பற்ற இயலவில்லை.

கி.பி. 1017-ல் ராஜராஜனின் மகனான ராஜேந்திரன் ஈழ நாட்டை (ரோகணம் உட்பட) முழுவதுமாகக் கைப்பற்றினார். சிங்களர்களின் 'மகாவம்சம்' கூட இதை ஒப்புக்கொள்கிறது, கூடவே, 'சோழர்களின் படை மிகவும் கொடூரமாக நடந்துகொண்டு எல்லாச் செல்வங்களையும் கொள்ளை அடித்ததாகவும் 'மகாவம்சம்' குற்றம் சாட்டுகிறது. (இது எல்லாம் சரி, தமிழ்நாட்டின் பல பகுதிகளை வென்ற சிங்கள மன்னர்களும் உண்டு!)

. ஜெ.பவித்ரா, தம்மப்பட்டி.

பண்டைய ராஜாக்கள் போரில் ஈடுபடும்போது தொடர்ந்து போரிட்டுக்கொண்டே இருப்பார்களா அல்லது உணவு இடைவேளைக்கு எல்லாம் பிரேக் எடுத்துக்கொள்வார்களா?

காலை 5 மணியில் இருந்து இரவு 9 மணி வரை மன்னர்கள் போரிட்டு இருக்க வாய்ப்பு இல்லை. காலைச் சிற்றுண்டியை முடித்துக்கொண்டு களத்தில் குதித்து, மாலையில் இருட்டுவதற்குள் அன்றைய போரை முடித்துக்கொண்டு, இரவு கூடாரங்களில் அமர்ந்து நன்றாகச் சாப்பிடுவார்கள் என்றே நான் நினைக்கிறேன். போரின்போது குதிரையில் தண்ணீர்ப் பானைகள் கூடவே சென்று இருக்கும். (கிரிக்கெட் மேட்ச் மாதிரிதான்!) ஆனால், மங்கோலிய மன்னன் செங்கிஸ்கான் மட்டும் குதிரைகளை தண்ணீர் குடிக்கக்கூட நிறுத்தக் கூடாது என்று தன் வீரர்களுக்கு ஆணையிட்டு இருந்தான். தாகம் எடுத்தால் குதிரையை ஓட்டிக்கொண்டு இருக்கும்போதே அதன் கழுத்தில் லேசாகக் குறுவாளால் கீறி, சுரக்கும் ரத்தத்தை உறிஞ்சி வாயை ஈரப்படுத்திக்கொள்ள வேண்டியதுதான்!

. வி.ஜி.சத்திய நாராயணன், சென்னை-61.

இந்திய அரசியல் ஏன் கூவம் நதி போல் ஆகிவிட்டது?

அரசியல் கூவம் ஒரு காலத்தில் தெளிவாக, நன்றாகத்தான் இருந்தது. பிறகு மெள்ள அசுத்தமான, கழிவுப் பொருட்களான அரசியல்வாதிகள் அதில் கலந்ததால்தான் இப்படி ஒரு கேள்வியை நீங்கள் கேட்கும்படி ஆகிவிட்டது!

. எஸ்.ரத்தினவேல், ஆண்டிபட்டி. சென்னையைச் சுற்றி உள்ள (தாம்பரம், பூந்தமல்லி, வேளச்சேரி) வளர்ச்சி ஆரோக்கியமான வளர்ச்சியா, இல்லை அழிவுக்கான வளர்ச்சியா?

தவிர்க்க முடியாத வளர்ச்சி. மொகலாயர்கள் ஆண்டபோது நியூ டெல்லி கிடையாது. பிற்பாடு கட்டப்பட்டது. அதே போல (இடப் பற்றாக்குறைக் காரணமாக) எதிர்காலத்தில் இரண்டு மூன்று சென்னைகள் உருவாகும். ஆனால், தொடர்ந்து கொசு கடிக்கும்!

.

உங்கள் மனைவி வைரமா... தேளா? - ஹாய் மதன்-கேள்வி பதில்

Vikatan Correspondent