Published:Updated:

சுஜாதா, கண்ணதாசனுக்கு அடுத்து எம்.ஜி.ஆர்! - பிரபலங்களின் கையெழுத்தை எழுத்துருவாக்கும் ஓவியர் நாணா பேட்டி

ஒட்டுமொத்த விகடனுக்கும் ஒரே ஷார்ட்கட்

Use App
சுஜாதா, கண்ணதாசனுக்கு அடுத்து எம்.ஜி.ஆர்! - பிரபலங்களின் கையெழுத்தை எழுத்துருவாக்கும் ஓவியர் நாணா பேட்டி
சுஜாதா, கண்ணதாசனுக்கு அடுத்து எம்.ஜி.ஆர்! - பிரபலங்களின் கையெழுத்தை எழுத்துருவாக்கும் ஓவியர் நாணா பேட்டி

சுஜாதா, கண்ணதாசனுக்கு அடுத்து எம்.ஜி.ஆர்! - பிரபலங்களின் கையெழுத்தை எழுத்துருவாக்கும் ஓவியர் நாணா பேட்டி

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

கவிஞர் கண்ணதாசனின் எழுத்துகளைப் பாடல்களாக கேட்டிருப்போம், சுஜாதா அவர்களின் எழுத்தில் அறிவியலை ரசித்திருப்போம்.
ஆனால், அவர்களின் கையெழுத்துகள் எப்படி இருக்கும் என்பதை ஒரு சிலர் மட்டுமே அறிந்திருப்பார்கள். அவர்களது கையெழுத்தை மற்றவர்களும் அறிந்துகொள்ளும் வகையில் கணினியில் எழுத்துருவாக மாற்றியிருக்கிறார் ஓவியர் நாணா. அவரைச் சந்தித்து  அதைப் பற்றி கேட்ட போது....

எப்படி இந்த யோசனை உங்களுக்குத் தோன்றியது?

''அடிப்படையில் நான் ஓர் ஓவியன். தந்தை ஓர் ஓவிய ஆசிரியர் என்பதால் எனக்கும் ஓவியத்தில் ஆர்வம் இருந்தது. ஊரில் விளம்பர பலகைகளில் படம் வரைந்து கொண்டிருந்தேன், பின்னர் சென்னைக்கு வந்தேன்.  இந்தியா டுடேவின் தொடக்க காலம் முதல் பணிபுரிந்திருக்கிறேன். டிஜிட்டல் இல்லாத காலகட்டத்தில் அப்பொழுது தலைப்புகளுக்கு வித்தியாசமான முறைகளில் எழுத்துகள் தேவைப்படும். அதை கையால் எழுதி மட்டுமே பிரதி எடுக்க முடியும்.  பலர் அந்த தலைப்பிற்கான எழுத்தை மட்டும் எழுதுவார்கள். ஆனால் நான் அதே வடிவத்தில் தமிழில் முழு எழுத்துகளையும் உருவாக்கினால் என்ன என்று யோசித்தேன். அப்படித் தோன்றியதுதான் ஒருவரது கையெழுத்தை எழுத்துருவாக மாற்றும் யோசனை.’’

முதலில் யாருடைய கையெழுத்தை எழுத்துருவாக மாற்றினீர்கள்?

’’முதலில் நான் எழுத்துருவாக மாற்றியது எழுத்தாளர் சுஜாதாவின் கையெழுத்தைத்தான். அவர் எழுதும் புத்தகங்களில் முன் அட்டை டிசைன் செய்து கொடுப்பேன். ஒருநாள் நாங்கள் பேசிக்கொண்டு இருக்கும்போது, அவரது கையெழுத்தை எழுத்துருவாக மாற்றினால் என்ன என்று பேச்சு எழுந்தது. அதை உருவாக்கி, அவரிடம் காட்டிய போது மகிழ்ந்தார்.  அவருக்கு ஏற்கெனவே இப்படி ஒன்று இருப்பது தெரிந்திருந்தாலும் நாங்கள் அதை செயல்படுத்திக் காட்டியதில் அவர் மகிழ்ச்சியடைந்தார். கடைசி நாள்களில் அவரது இயல்பான கையெழுத்து மாறியபோது இந்த எழுத்துரு அவருக்கு உதவியாக இருந்தது. எனக்கு அதைப் பயன்படுத்தி ஒரு கடிதம் எழுதியிருந்தார்.
எனக்கு மட்டுமில்லாமல் பலருக்கும் இந்த எழுத்துரு மூலமாக அவரது கையால் எழுதியதைப் போன்றே கடிதம் எழுதியிருக்கிறார்.’’

சாதாரணமாகக் கணினியில் இருக்கும் எழுத்துருவுக்கும் இதற்கும் என்ன வித்தியாசம்?

’’இதுவும் கணினியில் நாம் சாதாரணமாகப் பயன்படுத்தும் எழுத்துருவைப் போன்றதுதான். ஆனால் இதில் கூடுதல் அம்சமாக அவர்களது கையெழுத்தை முழுமையாக ஆராய்ந்து அதை தமிழில் இருக்கும் அனைத்து எழுத்துகளுக்கும் எழுத்துருவாக மாற்றியிருக்கிறேன். இதைப் பயன்படுத்தி நாம் எதைக் கணினியில் எழுதினாலும், அவர்களது கையெழுத்தைப்போலவே இருக்கும். இதன் மூலமாக ஒரு புதிய அனுபவத்தை பெற முடியும். ஒருவரின் எழுத்தை அவரது கையெழுத்து வடிவில் படிப்பது எழுதியவருக்கும் படிப்பவருக்கும் இடையே ஒரு முழுமையான பிணைப்பு ஏற்படுத்தும் என்று நம்புகிறேன்.’’

ஒருவரது கையெழுத்தை எழுத்துருவாக மாற்றுவதில் உங்களுக்கு என்ன சிக்கல்கள் இருந்தன..

’’எப்பொழுதும் ஒருவரின் கையெழுத்து அவர்கள் எழுதும் எல்லா இடங்களிலும் ஒரே மாதிரி இருப்பதில்லை.  ஒரு சில இடங்களில் அவர் அழுத்தியும், லேசாகவும் எழுதியிருக்கலாம். ஒரு சில எழுத்துகளின் வடிவங்கள் ஒவ்வொர் இடத்திற்குத் தகுந்தவாறு மாறுபடும்.
அதனால் எல்லா இடங்களிலும் கையெழுத்தை ஆராய வேண்டும் அதற்கு சற்று காலம் ஆனது. பின் அந்த எழுத்துகளை டிஜிட்டலுக்கு மாற்ற வேண்டும். தமிழில் இருக்கும் அனைத்து எழுத்துகளுக்கும் வடிவம் கொடுக்க வேண்டும் என்பது சற்றே கடினமான வேலைதான்.’’

ஆங்கிலத்தைப் போல் தமிழில் எழுத்துருக்கள் இல்லையே ..என்ன காரணம்...

’’ஆங்கிலத்தில் வெறும் 26 எழுத்துகள் என்பதால் அதற்கான எழுத்துருவை உருவாக்குவது எளிது. ஆனால் தமிழ் எழுத்துகள் அதிகம் என்பது ஒரு காரணமாக இருக்கலாம். அதோடு இந்தத் துறையில் யாரும் அவ்வளவாக ஈடுபாடு காட்டுவதில்லை. முன்னர் தமிழ் எழுத்துகளை உருவாக்கியவர்கள் பெரும்பாலானோர் டிஜிட்டலுக்கு மாறவில்லை. அப்படி டிஜிட்டலைப் பயன்படுத்தியிருந்தால் இன்று நம்மிடம் அதிகமாக எழுத்துருக்கள் இருந்திருக்கும்.’’

தமிழக அரசு  பாடநூல்களை அச்சிட நீங்கள் உருவாக்கிய எழுத்துருவை பயன்படுத்தப் போவதாகக் கேள்விப்பட்டோம்..  அதற்கான அவசியம் என்ன?

’’தமிழக அரசுக்காக மருதம் என்ற ஓர் எழுத்துருவை உருவாக்கி கொடுத்திருக்கிறேன். அதில் சிறிய குறைகள் இருக்கின்றன. அவற்றைச்  சரி செய்த பிறகு பாடப்புத்தகங்களில் அந்த எழுத்துரு பயன்படுத்தப்படும். அந்தத் துறை சார்ந்த அதிகாரிகள் முன்னெப்போதும் இல்லாத வகையில் எழுத்துரு உருவாக்கத்தில் அக்கறையாக இருக்கிறார்கள். பாடப்புத்தகங்கள் மட்டுமில்லாமல் அரசுக்கென தனியாக ஓர் எழுத்துரு என்பது அவசியம். அரசு சார்பில் வெளியாகும் விளம்பரங்கள் போன்ற எந்த ஓர் எழுத்து சம்பந்தமான வேலைகளுக்கும் தனியாக அரசு எழுத்துருவை பயன்படுத்தினால் அதன் தனித்துவம் வெளிப்படும்.’’

எழுத்துரு துறையில் உங்கள் எதிர்காலத் திட்டம் என்ன..?

’’அடுத்ததாக எம்ஜிஆர் அவர்களின் கையெழுத்தை எழுத்துருவாக மாற்றும் முயற்சியில் இருக்கிறேன். ஆங்கில எழுத்துருக்களுக்கு இணையாக தமிழிலும் எழுத்துருக்களை உருவாக்க வேண்டும் என்பது என் திட்டம்.’’

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு