Published:Updated:

`கேரியேஜை ஸ்டைலா ஹேண்டில் பண்ற அந்தத் தருணம்..!' - டைப்ரைட்டிங் மெமரிஸ் #MyVikatan

Representational image
Representational image ( Pixabay )

ஒரு அன்டர்கிரவுன்டினுள் பாழடைந்த அறைபோல் பழைமையாய் இருக்கும் நான் படித்த இன்ஸ்டிட்டியூட்...

பொறுப்புத் துறப்பு : இந்தக் கட்டுரை வாசகரின் படைப்பு. கட்டுரையில் குறிப்பிடப்பட்டுள்ள தகவல்களுக்கும் கருத்துகளுக்கும் அதன் ஆசிரியரே பொறுப்பாவார். கட்டுரை சம்பந்தமாக உங்களுக்கு ஆட்சேபனை இருந்தால், my@vikatan.com-க்கு மின்னஞ்சல் அனுப்புங்கள்!

சைக்கிள் ஓட்டுவது, நீச்சலடிப்பது போல அன்றைய 80-களில் 90-களில் டைப்ரைட்டிங் தெரிந்திருப்பது அவசியமான ஒன்று. மேல்நிலை வகுப்பு படிக்கும்போது டைப்ரைட்டிங் பிரிவு அறையைக் கடக்கும்போது அனைவரும் அந்த ஒலியைக் கேட்டிருப்போம்.. படபட, தடதடவெட அதன் வேகமும்.. க்ளிங் க்ளிங் என்ற சத்தமும்..!

Representational image
Representational image
MILKOVÍ / Unsplash

#டைப்ரைட்டிங் க்ளாஸ்

பழைய திரைப்படங்களில் காதல் மலரும் இடமாக டைப்ரைட்டிங் கிளாஸைக் காட்டியிருப்பார்கள். ஆனால் உண்மையில் மாநகர அவசரத்தில் ஒவ்வொருவரும் யாருடைய முகத்தைக்கூட நிமிர்ந்து பார்க்காமல் வேலைக்கு ஓடும் மக்கள் போலத்தான். மற்றவரின் முகம், மிஷின்களின் ஒலிகூட கேட்காமல் தம் மெஷினுக்கே தன்னுரிமை தந்து சுயசார்பாய் இருப்பார்கள்.

ஒரு அன்டர்கிரவுண்டினுள் பாழடைந்த அறைபோல் பழைமையாய் இருக்கும் நான் படித்த இன்ஸ்டிட்டியூட். காலை முதல் இரவு வரை விருப்பமான ஒரு மணி நேரத்தைத் தேர்வு செய்து சரியாய் அந்த நேரத்திற்குச் செல்ல வேண்டும். ஒவ்வொருவருக்கும் ஒரு மிஷின் இருக்கும். இறுதித்தேர்வில்கூட அந்த எண் இட்ட மிஷினே நமக்குக் கொடுப்பார்கள். பயிற்சி நேரத்தில் நாம் தாமதித்தால் நமக்குப் பின்னால் வருபவருக்குத் தாமதமாகும் என்பதால் சரியான நேரத்திற்குச் சென்று சரியான நேரத்தில் எழ வேண்டும். மாலை 6 மணி என்றால் நமக்குமுன் அந்த மெஷினில் அமர்ந்திருப்பவர் நமக்கு வழிவிட்டு நாம் 7 மணிக்குப் பிறருக்கு வழிவிட வேண்டும்.

#முதல் அனுபவம்

பிறந்த குழந்தையைத் தொடுவது போல்தான் முதன்முதலில் அம்மிஷினை தொடத்தூண்டும். பிறகு யாரும் கவனிக்காதபோது ஒரே சமயத்தில் எல்லா எழுத்தினையும் அழுத்தினால் என்ன ஆகுமென சோதிப்பதில் நமக்குள் இருக்கும் குழந்தை வெளிப்படும். ஒன்றுடன் ஒன்று மோதி நின்றவுடன் பரிசோதனை முடிவடைந்த மகிழ்ச்சி வரும்.

முதன்முறை மட்டும் ஆசிரியர் இருதாளினைப் பொருத்தி, கீபோர்டின் நடுவில் உள்ள எழுத்துகளுக்கு ஒவ்வொரு விரலுக்கும் பொருந்துமாறு எழுத்துகளை டைப் செய்துகாட்டினார். முதல் ஒரு வாரத்திற்கு இதுதான் பயிற்சி.

Representational Image
Representational Image
Peter Lewicki / Unsplash

இடது கைக்கு asdfgf வலதுகைக்கு ;lkjh எனத் தொடர்ந்து அடிக்க வேண்டும்.

``ப்ப்பூ இவ்வளவு தானா'' என அடிக்க ஆரம்பித்தால் முதல் இரு முறை மூன்று முறை வேகம் வந்து கை கன்னா பின்னாவென மற்ற பொத்தானையும் அடித்தது. முதல்நாள் ஒரு மணி நேரம் ஒரு பக்கம் அடித்து முடித்து கரெக்ஷன் வாங்கிக் கொண்டுதான் வெளியேற வேண்டும். நமக்கெல்லாம் எங்க வரப்போகுதென அவநம்பிக்கையில்தான் வெளியேறுவோம்.

#படிப்படியாக

ஒரு வாரத்திற்குப் பிறகுதான் தெரியும் வகுப்புக்கு வருவதும் ஓடிப்போவதும். அடுத்து லைனுக்குப் போகும் முன்பு சிலிண்டரில் பேப்பரைத் திருப்பி வைப்பது ஒரு கலை. அதைக் கற்றுக்கொண்ட பிறகு மூளை தானே ஒரு வரிசை முடிந்தவுடன் அடுத்தவரிசைக்குச் செல்ல அலாரம் கொடுக்கும். அடுத்து அதே விரல் மேல்வரிசைக்கு qwert வலது கைக்கு poiuy இது அடுத்த வாரம். அதற்கு அடுத்து கீழ் உள்ள கடைசி வரிசை இடது கைக்கு zxcvb வலது கைக்கு nm,./ இது போல் டைப் செய்வது. அடுத்து abcd நேராகவும் zyxw எனத் தலைகீழாகவும் அடித்துப் பழகினால்.. முதன்முறையாக Fair&lovely போட்டதுபோல் கொஞ்சம் பெருமித உணர்வு நம் மீது வரும்.

Representational Image
Representational Image

குரங்கு பெடல் ஓட்டியவனுக்கு பார் கம்பிக்குக் கால் போடுவது போல pack my nox with five dozen liquor jugs எனத் தொடங்கும் கட்டுரைகளை அடிக்கத் தொடங்குவோம். மினி பஸ் ட்ரைவர் ஸ்டேரிங்கை ஸ்டைலாய் வளைப்பது போல கேரியேஜை இடது புறம் அநாயசமாய்த் தள்ளுவோம். `அது நான்தானா நான்தானா அடேய் நீதானா நீதானா' என ரஜினியைப் பார்த்த சலூன் கடை சண்முகம் மாதிரி மனசு சரவெடி வெடிக்கும்.

டைப் செய்யும் போது நொடிப்பொழுதில் கண் பார்த்து மூளைக்குத் தகவல் அனுப்பி, விரல் வழியே மின்னல் வேகத்தில் எழுத்துகள் விழும். உடலின் மொத்த செல்களும் ஒன்றிணைந்து கவனம் முழுக்க ஓரிடத்தில் குவிக்கும் அதிசயத்தை உணரலாம் அப்போது.

#தேர்வு

சூப்பர் சிங்கருக்குத் தேர்வான டாப் டென் கன்டென்டன்ட் போல நம்முடன் இருக்கும் பத்துப் பேருக்கு டெஸ்ட் வைப்பார்கள். ஒரு கட்டுரையைப் பத்து நிமிடத்தில் அடித்துப் பழகிய பிறகு.. பப்ளிக் எக்ஸாம் ஒரு சுபயோக சுபதினத்தில் வரும். ஒரு பெரிய நீள ஹாலில், ரேஷன் கடைக்கு டோக்கன் வாங்க வந்தது போல் வரிசைகட்டி உட்கார்ந்திருப்பார்கள். நம் மெஷினைக் கண்டுபிடித்து அதில் அமர வேண்டும். முதல் தாளுக்குப் பத்து நிமிசம்தான் டைம்.

மகிழ்மதியைப் பார்த்த காளகேயர்கள் ஓடிவருவது போல விசில் சத்தம் கேட்டதும் அப்படியே விரல்கள் அடிக்கத் தொடங்கும். உடல் முழுக்க அட்ரினல் சுரக்கப் பத்து விரலும் மூலதனம் எனும் வார்த்தைக்கேற்ப விறுவிறுவென, கேரேஜ் தள்ளும் சத்தமும், டிங்கென்ற ஒலியைத் தவிர வேறெதுவும் கேட்காது. அப்படியே தறி குடோனுக்குள் நுழைந்தது போல் இருக்கும்.

Representational image
Representational image

கிளியின் கண்ணைப் பார்த்த அர்ஜுனன் போல எழுத்து மட்டும்தான் அப்போது கண்ணுக்குத் தெரியும். விரல்கள் கதகளி ஆடும். அந்த நிமிடங்கள் மிகவும் மகத்தானது. பிறகு சிறிது ஓய்வுக்குப் பிறகு இரண்டாம் தாள்.. அது மூளைக்கு வேலை கொடுக்கும். பேப்பரின் அளவுக்குத் தகுந்து ஒரு விலைப்பட்டியல் தயாரிக்க வேண்டும். column பிரித்து சரியான விகிதத்தில் டைப் ரைட்டரின் விசைப்பலகை மூலம் கோடிட்டு கட்டம் கட்ட வேண்டும். கொஞ்சம் அசந்தால் நம்மைக் கட்டம் கட்டிவிடும். பின் அலுவல் விண்ணப்பம் எனத் தேர்வு முடிந்தவுடன் திருமணம் முடிந்தது போல் ஒரு ஆசுவாசம் வரும்.

#தனி அனுபவம்

மனதை ஒருநிலைப்படுத்த கவனத்தைக் குவிக்க இன்று பல வழிமுறைகளைப் பின்பற்றுகிறோம்.

டைப் ரைட்டிங் ஒரு அற்புதமான பயிற்சி. உடல், மனம், மூளை மூன்றையும் ஒன்றிணைக்கிறது. இன்று பெரும்பாலும் அரசுப்பணிக்குத் தயார் செய்வோரும் மேல்நிலைத் தொழில்பிரிவு மாணவ-மாணவியர் மட்டுமே பயில்கின்றனர். ஒரு அனுபவத்துக்காக இந்த ஆறுமாத கலையைக் கற்கலாம்.

Representational image
Representational image

கணினியில் தவற்றைத் திருத்திச்செய்யும் வசதி உள்ளது. ஆனால் டைப்ரைட்டிங்கில் இவ்வசதி இல்லாததால் முழுக்க முழுக்கக் கவனம்தான் முதலீடு. கால்குலேட்டர் போல் கீபோர்டை அழுத்துவோர்க்கு மத்தியில் கண்ணால் பார்க்காமல் பொத்தானை அழுத்தும்போது பிறர் ஆச்சர்யமாய்ப் பெருமையாய் என்னைப் பார்க்கும் கெளரவத்தைக் கொடுத்தது டைப்ரைட்டிங்தான். அந்த இனிய அனுபவத்தை நீங்களும் அதைக் கற்கும்போது உணரலாம்.

-மணிகண்டபிரபு

விகடனில் உங்களுக்கென ஒரு பக்கம்...

உங்கள் படைப்புகளைச் சமர்ப்பிக்க இங்கே க்ளிக் செய்க https://www.vikatan.com/special/myvikatan/

My Vikatan
My Vikatan

ஏதோ ஓர் ஊரில், எங்கோ ஒரு தெருவில் நடந்த ஒரு விஷயம்தான் உலகம் முழுக்க வைரலாகிறது. உங்களைச் சுற்றியும் அப்படியொரு வைரல் சம்பவம் நடந்திருக்கலாம்... நடந்துகொண்டிருக்கலாம்... நடக்கலாம்..! அதை உலகுக்குச் சொல்வதற்காகக் களம் அமைத்துக் கொடுக்கிறது #MyVikatan. இந்த எல்லையற்ற இணையவெளியில் நீங்கள் செய்தி, படம், வீடியோ, கட்டுரை, கதை, கவிதை என என்ன வேண்டுமானாலும் எழுதலாம். மீம்ஸ், ஓவியம் என எல்லாத் திறமைகளையும் வெளிப்படுத்தலாம்.

உங்கள் படைப்புகளைச் சமர்ப்பிக்க இங்கே க்ளிக் செய்க https://www.vikatan.com/special/myvikatan/

அடுத்த கட்டுரைக்கு