Published:Updated:

`ஆள் மயக்கி வலைதளங்களும் தில்லாலங்கடி சைபர் குற்றவாளிகளும்..!’ - தப்பிப்பது எப்படி? #MyVikatan

Representational Image
Representational Image ( Pixabay )

இனிவரும் காலங்களில் பின்கண்ட செய்திகளை நாம் எதிர்கொண்டாலும் ஆச்சர்யப்பட ஒன்றும் இல்லை...

பொறுப்புத் துறப்பு: இந்தக் கட்டுரை வாசகரின் படைப்பு. கட்டுரையில் குறிப்பிடப்பட்டுள்ள தகவல்களுக்கும் கருத்துகளுக்கும் அதன் ஆசிரியரே பொறுப்பாவார். கட்டுரை சம்பந்தமாக உங்களுக்கு ஆட்சேபனை இருந்தால், my@vikatan.com-க்கு மின்னஞ்சல் அனுப்புங்கள்!

சமூக வலைதளங்களின் மூலம் நம்முடன் நட்பாக (சோஷியலாக) பழகி, நம்மை அறிந்தோ, அறியாமலோ நம் நம்பிக்கையின் அடிப்படையில் பகிரும் தகவல்களைத் திரட்டி, அந்தத் தகவல்களின் அடிப்படையில் நம்மைக் குறிவைத்து நிகழ்த்தப்படும் குற்றங்களே 'சோஷியல் இன்ஜினீயரிங்' எனப்படும் சைபர் குற்றங்களாகும்.

Representational Image
Representational Image
Pixabay

இன்று நம் அனைவருக்கும் நமது அருமை பெருமைகளை, கிடைக்கும் ஒவ்வொரு சந்தர்ப்பத்திலும் இந்த உலகுக்குப் பறைசாற்றிக்கொள்ள வேண்டும் என்ற ஆர்வம் மிக அதிகமாக இருக்கிறது. வெளியில் சொல்ல முடியாத அந்த உள்ளுணர்வுகளுக்கு வடிகாலாக வந்துசேர்ந்தவையே நாம் இன்று முழுநேரமும் உலவித்திரியும் சமூக வலைதளங்களான Facebook , Twitter , LinkedIn , Instagram போன்றவை. காலைக்கடனைக் கழிப்பதில் தொடங்கி, கல்லூரிக்குச் செல்வது முதற்கொண்டு, காதலிக்கோ, கட்டிய மனைவிக்கோ சேவைசெய்வது வரைக்கும் இன்று சமூக வலைதளங்களில் ஒவ்வொரு நிமிடமும் நம் வாழ்க்கையின் முக்கிய நிகழ்வுகளைப் பதிவேற்றி அதகளப்படுத்தி வருகிறோம்.

இன்று நமது அனைவரின் நாள்களும் அதிகாலையில் இந்தச் சமூக வலைதளங்களுடன் தொடக்கி இரவில் இந்தச் சமூக வலைதளங்களுடனேயே முடிவடைகின்றன. சமூக வலைதளங்களில் நாம் இல்லாவிட்டால் சமூகத்தில் இன்று நம்மை மற்றவர் பார்க்கும் பார்வைகூடக் கேலிக்குரியதாகவே இருக்கும் என்றால் அது மிகை அல்ல.

ஒரு குடும்பத்தில் தாத்தா தொடங்கி பேரன் வரைக்கும் அனைத்து வயதினரும் சமூக வலைதளங்களில் கணக்கு வைத்திருப்பதும், ஒரே வீட்டுக்குள் தீவுகள் போலத் தனி தனியாக அமர்ந்துகொண்டு கையடக்க 'ஸ்மார்ட் போன்களை' மூலம் சமூக வலைதளங்களில் உலவித்திரிவதும் பல குடும்பங்களில் நாம் சாதாரணமாகப் பார்க்கக்கூடிய காட்சி.

Representational Image
Representational Image
Pixabay

சொல்லப்போனால் இன்றைய குடும்ப உறவுகளைத் தனி தீவுகளாக மாற்றிவைத்த பெருமை இந்தச் சமூக வலைதளங்களையே சேரும். இனிவரும் காலங்களில் பின்கண்ட செய்திகளை நாம் எதிர்கொண்டாலும் ஆச்சர்யப்பட ஒன்றும் இல்லை

- Facebook-ல் லைக் விழாததால் தற்கொலை.

- Facebook விமர்சனம் / பதிவு காரணமாகக் கொலை.

- Facebook 100 லைக் போட்டால் சினிமா டிக்கெட் இலவசம் :-)

- Facebook -ல் இல்லாததால் விவாகரத்து.

- Facebook -ல் இருப்பதால் விவாகரத்து.

ஏற்கெனவே இந்த Facebook மூலம் காதல், கல்யாணம், போலீஸ் கைது என சகல வகையான ரகளைகளும் நிஜத்தில் அரங்கேறியிருப்பதை நாம் அனைவரும் அறிவோம். அதேசமயம் இயற்கைப் பேரிடர் போன்ற சம்பவங்கள் நடக்கும்போது இந்தச் சமூக வலைதளங்கள் மக்களுக்குப் பெரியஅளவில் உதவக்கூடியவை என்பது சென்னை வெள்ளத்தின்போது நாம் அனைவரும் கண்கூடாகப் பார்த்த உண்மை.

இது ஒரு நாணயத்தின் இரண்டு பக்கங்களில் ஒன்று, அவ்வளவே. இந்த நாணயத்தின் மறுபக்கத்தைப் பற்றியும் அது எப்படி சைபர் குற்றங்களை ஊக்குவிக்கிறது என்பதையும் இங்கு பார்ப்போம்.

சமுக வலைதளங்களில் முகமறியா நபர்களுடன் அரட்டை அடிப்பது என்பது பலருக்கும் பிடித்த பொழுதுபோக்கு. இது மிக அபாயகரமான ஒன்றும்கூட. ஒரு படத்தில் "நான் அமெரிக்காவில் இருந்துதான் பேசுகிறேன்" என்று போனில் பீலா விடுவதைப்போல, உங்கள் பக்கத்து ஊரான ஆட்டையாம்பட்டியில் இருக்கும் ஒரு நபர் அமெரிக்காவிலிருந்து உங்களுடன் பேசுவதாக உங்களை எளிதில் ஏமாற்றலாம். நீங்கள் புத்திசாலி என்றால் அந்த நபர் செய்தி அனுப்பும் கணினியின் முகவரியை (IP Address) வைத்து அந்த நபரின் தில்லாலங்கடியை எளிதில் கண்டுபிடித்து அந்த நபரின் முகமூடியை அவிழ்க்கலாம்.

Representational Image
Representational Image
Pixabay

ஆனால், சமூக வலைதளங்களில் உலவும்போது நம்மில் பெரும்பான்மையோர் நம்மிடம் சமூக வலைதளத்தில் பழகும் முகமறியா நபரின் உண்மை முகங்களை அறிய அவ்வளவாக ஆர்வம் காட்டுவதில்லை. எல்லோரையும் இயல்பாக நம்பும் நம்முடைய வெள்ளந்தித்தனம் நம்மை அவ்வளவாக யோசிக்க விடுவதில்லை. விளைவு ஒரு தமிழ்ப் படத்தில் காமெடி நடிகர் நானும் ரவுடிதான் நானும் ரவுடிதான் என்று தானாகப் போய் போலீஸ் ஜீப்பில் ஏறுவதுபோல, முகமறியா நபர் நமக்குச் சமூக வலைதளத்தில் விரிக்கும் வலையில் நாமாக வலியப் போய் சிக்குகிறோம்.

சைபர் பாதுகாப்பு நிபுணருக்கு ஆஹா ஓஹோ சம்பளம்... என்ன படிக்க வேண்டும்? #MyVikatan

பல நேரங்களில் இந்த முகமறியா நபர்கள் நம் நம்பிக்கையைப் பெறும்படி முதலில் நடித்து, பின் பண மோசடி, பாலியல் குற்றங்கள் என்ற பல விதமான குற்றத் தாக்குதல்களை நம்மைக் குறிவைத்து நிகழ்த்துகின்றனர். சமூக வலைதளத்தில் மார்பிங் செய்யப்பட்டு புகைப்படம் வெளியிடப்பட்டதால் சில பெண்கள் தற்கொலை செய்துகொண்ட செய்திகளை நாம் அனைவரும் பார்த்திருக்கிறோம்.

Representational Image
Representational Image
Pixabay

சோஷியல் என்ஜினீயரிங் தாக்குதல்களில் இருந்து நாம் நம்மை பாதுகாத்துக்கொள்ள வகுத்துக்கொள்ள வேண்டிய சுய கட்டுப்பாடு எல்லைகள் பின்வருமாறு :

சமூக வலைதளங்களில் பின்கண்ட கட்டுப்பாடுகளைக் கடைப்பிடித்தால் அது நம்மையும் நம் மன நிம்மதியையும் பாதுகாப்பு வளையத்துக்குள் வைக்கும்:

நம்மைப் பற்றிய அனைத்துத் தகவல்களையும் பகிர சமூக வலைதளங்கள் சுய விளம்பரப் பதாகைகள் அல்ல.
விமலாதித்தன்

1. முகமறியா நபர்களிடம் இருந்து வரும் நட்பு அழைப்பை உடனடியாக ஏற்காமல், அந்த முகமறியா நபர் இட்ட பதிவுகள், அந்த நபர் விரும்பிய (லைக்கிய) பதிவுகள், அவருடன் தொடர்பில் இருக்கும் நபர்களின் பின்னணி, நபர் பணிபுரியும் நிறுவனம், கல்வித் தகுதி, திருமணநிலை போன்றவற்றைத் தெளிவாக அலசி ஆராயுங்கள்.

நீங்கள் நட்பு அழைப்பை உடனடியாக ஏற்றால் உங்களை ஏமாற்றுவது மிக எளிது என்பதை நீங்களாகவே இந்த உலகுக்கு விளம்பரபடுத்துவது போலாகும். அழைப்பு விடுத்த நபரைப் பற்றிய அனைத்து விவரங்களையும் தெளிவாக அலசி ஆராய்ந்து திருப்தி அடைந்த பின்னே அந்த நபரின் நட்பு அழைப்பை ஏற்கவும். சைபர் குற்றவாளிகளில் ஆண், பெண் வித்தியாசம் கிடையாது.

Representational Image
Representational Image
Pixabay

2. நம்மைப் பற்றிய அனைத்துத் தகவல்களையும் பகிர சமூக வலைதளங்கள் சுய விளம்பரப் பதாகைகள் அல்ல. அதனால் உங்களை பற்றி நீங்கள் சமூக வலைதளங்களில் பகிரும் தகவல்களைக் குறைத்துக்கொள்ளுங்கள்.

3. நீங்கள் பணிபுரியும் நிறுவனம் சம்பந்தமான செய்திகளையோ, புகைப்படங்களையோ சமூக வலைதளங்களில் பகிரும்போது மிகக் கவனமாக இருக்க வேண்டும். உங்கள் அலுவலகத்தில் எடுத்த புகைப்படங்களை வைத்தே அலுவலகத்தின் நுழைவாயில் எங்கு இருக்கிறது, எத்தனை காவலர்கள் பாதுகாவலுக்கு உள்ளனர், மாடிப்படி எங்கு இருக்கிறது, லிப்ட் எங்கு இருக்கிறது போன்ற தகவல்களை சைபர் குற்றவாளிகளால் எளிதில் பெறமுடியும். அதன் மூலம் தங்கள் தாக்குதலுக்குத் திட்டமிட முடியும்.

உங்களுக்கும் உங்கள் மேனேஜருக்கும் நடுவில் நடக்கும் முட்டல் மோதல்களைப் பகிரவும் சமூக வலைதளங்கள் உகந்த இடங்கள் அல்ல. உங்கள் மேனேஜர் உடனான உங்கள் சண்டையைப் பற்றிய உங்கள் பதிவை உங்கள் மேனேஜர் பார்க்காவிட்டாலும், உங்கள் வளர்ச்சியைப் பார்த்து பொறாமையில் பொருமிக் கொண்டிருக்கும் உங்கள் பக்கத்து சீட்டு ஆசாமி உங்களுடன் சமூக வலைதளத்தில் நட்பாக இருந்துகொண்டே உங்களைப் பற்றி போட்டுக்கொடுத்து உங்கள் வேலைக்குச் சிக்கல் உண்டாக்க முடியும். இதைத் தவிர்க்க அலுவலகம் சம்பந்தமான விஷயங்களைப் பகிர்வதைத் தவிர்க்கவும்.

Representational Image
Representational Image
Pixabay

தீவிரவாதம், குற்றச் செயல்கள் ஆகியவற்றை ஆதரித்துப் பதிவுகளை இடுவதும், அத்தகைய பதிவுகளை விரும்புவதும் உங்களை ஒரு குற்றவாளியாகச் சித்திரித்து கூண்டில் ஏற்றிவிடவும் வாய்ப்பு இருக்கிறது. சமீபத்தில் பல்கலை மாணவர் ஒருவர் அவரின் முகநூல் பதிவுக்காகக் கைது செய்யப்பட்டது எல்லோருக்கும் நினைவிருக்கும். சமூக வலைதளங்களில் பதிவுகளை இடும்போதும், மற்றவர் இடும் பதிவுகளை லைக் செய்யும்போதும் அது உங்கள் வேலைக்கும் மன நிம்மதிக்கும் வேட்டுவைக்காத மாதிரி பார்த்துக்கொள்ளுதல் நலம்.

4. அலுவலகத்தில் உங்கள் மேஜையில் அனைவரின் கண் பார்வைக்கும் படும்படி உங்களைப் பற்றியும் உங்கள் வேலை பற்றியுமான தகவல் குறிப்புகளை மேஜைமீது வைக்க வேண்டாம். உங்கள் பக்கத்து சீட்டு நபர் முதல், அலுவலகக் காவலாளி வரை உங்கள் மேஜையைக் கடந்துசெல்லும் வாய்ப்பு உள்ளது. அவர்கள் உங்களைப் பற்றிய விவரங்களை அறியும் வாய்ப்பும் மிக அதிகம். அதனால் நீங்கள் இல்லாத சமயங்களில் உங்கள் உடைமைகளை, தகவல் விவரங்களைப் பாதுகாப்பாக அலுவல மேஜையில் பூட்டி வையுங்கள்.

Representational Image
Representational Image
Pixabay

5. நீங்கள் பயன்படுத்தும் கடவுச் சொற்களை (passwords) உங்கள் மேஜை மீதோ, உங்கள் கணினியிலோ ஒட்டி வைக்காதீர்கள் . அது முகமறியா சைபர் குற்றவாளிகளின் கையில் எளிதாக சிக்கி உங்கள் கணினியை 'ஹேக்' செய்ய உதவும். உங்கள் கடவுச் சொற்களை மற்றவர்களுடன் பகிருவதைத் தவிருங்கள். 'நண்பேன்டா' என உங்கள் கடவுச்சொற்களை அனைவரிடமும் பகிர வேண்டாம்.

6. சிக்கலான எளிதில் யூகிக்க முடியாத கடவுச் சொற்களையே எப்போதும் பயன்படுத்தவும். நம்மில் பலர் 12345 , ABCD போன்ற யாரும் எளிதில் யூகிக்கக்கூடிய கடவுச் சொற்களைப் பயன்படுத்துகிறோம். நம் பிறந்த தேதி, நம் குடும்ப உறவினர்களின் பெயர் இது போன்ற எளிதில் அறியக்கூடிய விவரங்களை வைத்தே ஒரு நிமிடத்தில் ஆயிரக்கணக்கான கடவுச் சொற்களை சாப்ட்வேர் நிரல்கள் மூலம் புதிதாக உருவாக்கவும், அதைப் பயன்படுத்தி உங்களின் ஆன்லைன் கணக்கை எளிதாக ஹேக் செய்யவும் சைபர் குற்றவாளிகளால் முடியும்.

Representational Image
Representational Image
Matthew Brodeur on Unsplash

அதனால் யாரும் யூகிக்க முடியாதபடி பல சொற்களின் முதல் எழுத்தைக் கொண்டும், பல தரப்பட்ட எண் மற்றும் ஆங்கில எழுத்துகளை இணைத்தும் கடினமான கடவுச் சொற்களைப் பயன்படுத்துவது உங்களை சைபர் குற்றவாளிகளிடமிருந்து காப்பாற்றும். எடுத்துக்காட்டுக்குக் கீழே உள்ளது போல முயற்சி செய்யவும்:

My QUALIFICATION IS COMPUTER ENGINEERING FROM OXFORD UNIVERSITY IN 1997

மேற்கொண்ட வாக்கியத்தின் உள்ள அனைத்துச் சொற்களின் முதல் எழுத்துகளையும் தனியாக எடுக்கவும் - MQCEFOU1997 .. இப்படிப்பட்ட ஒரு கடவுச் சொல்லை யாராவது எளிதில் யூகிக்க முடியுமா? இப்படிச் சில உபாயங்களைக் கடைப்பிடிப்பதன் மூலம் நாம் நமது ஆன்லைன் நடவடிக்கைகளை சோஷியல் குற்றவாளிகளிடமிருந்து பாதுகாத்துக்கொள்ளலாம்.

7. பொது இடங்களான ஹோட்டல், திரையரங்கம், அலுவலக கேன்டீன் போன்ற இடங்களில் தொலைபேசியில் அலுவலக மற்றும் சொந்த விவரங்களை உரத்த குரலில் பேசுவதைத் தவிர்க்கவும். உங்கள் பக்கத்தில் இருக்கும் நபர் தாராளமாக ஒரு முகமறியா சைபர் குற்றவாளியாக இருக்கக்கூடும்.

மேற்கண்ட உபாயங்களைப் பின்பற்றுங்கள் நண்பர்களே... அது உங்களையும் உங்கள் மன நிம்மதியையும் சைபர் குற்றவாளிகளின் தாக்குதல்களிலிருந்து பாதுகாத்துக்கொள்ள உதவும்.

மீண்டும் பேசுவோம் …

- விமலாதித்தன், Chief Information Security Officer, Bank Of Sharjah

`ஆள் மயக்கி வலைதளங்களும் தில்லாலங்கடி சைபர் குற்றவாளிகளும்..!’ - தப்பிப்பது எப்படி? #MyVikatan

விகடனில் உங்களுக்கென ஒரு பக்கம்...

ஏதோ ஒரு ஊரில், எங்கோ ஒரு தெருவில் நடந்த ஒரு விஷயம்தான் உலகம் முழுக்க வைரலாகிறது. உங்களைச் சுற்றியும் அப்படியொரு வைரல் சம்பவம் நடந்திருக்கலாம்... நடந்து கொண்டிருக்கலாம்... நடக்கலாம்..! அதை உலகுக்குச் சொல்வதற்காக களம் அமைத்துக் கொடுக்கிறது #MyVikatan. இந்த எல்லையற்ற இணையவெளியில் நீங்கள் செய்தி, படம், வீடியோ, கட்டுரை, கதை, கவிதை என என்ன வேண்டுமானாலும் எழுதலாம். மீம்ஸ், ஓவியம் என எல்லாத் திறமைகளையும் வெளிப்படுத்தலாம்

உங்கள் படைப்புகளைச் சமர்ப்பிக்க... https://www.vikatan.com/special/myvikatan/

அடுத்த கட்டுரைக்கு