Published:Updated:

சுதந்திர தினத்தை மெய்நிகராகக் கொண்டாட எளிய வழிமுறைகள்! #IndependenceDay #MyVikatan

Representational Image
Representational Image ( Pixabay )

சுதந்திர தினக் கொண்டாட்டங்களில் இத்தகைய ஒரு கடுமையான சூழல் வரும் என யாரும் எதிர்பார்த்திருக்க மாட்டோம்...

பொறுப்புத் துறப்பு: இந்தக் கட்டுரை வாசகரின் படைப்பு. கட்டுரையில் குறிப்பிடப்பட்டுள்ள தகவல்களுக்கும் கருத்துகளுக்கும் அதன் ஆசிரியரே பொறுப்பாவார். கட்டுரை சம்பந்தமாக உங்களுக்கு ஆட்சேபனை இருந்தால், my@vikatan.com-க்கு மின்னஞ்சல் அனுப்புங்கள்!

இந்தியாவின் சுதந்திர தினம் எப்போதுமே விமரிசையாகக் கொண்டாடப்படுவது வழக்கம். ஆனால், இந்த ஆண்டு கொரோனா அசாதாரண சூழ்நிலை காரணமாக சுதந்திர தின விழாவை மிக எளிமையாகக் கொண்டாட மத்திய, மாநில அரசுகள் திட்டமிட்டுள்ளன.

அதேபோல, அரசு அலுவலகங்கள், பள்ளிகள்,பொது இடங்கள் உள்ளிட்ட வழக்கமாகக் கொண்டாட்டங்களுக்கு என மக்கள் கூடும் இடங்களிலும், கூட்டம் கூட்டாமல் எளிமையான முறையில் விழாவைக் கொண்டாட ஏற்பாடுகள் செய்யப்பட்டுள்ளன.

Representational Image
Representational Image
Pixabay

சுதந்திர தினக் கொண்டாட்டங்களில் இத்தகைய ஒரு கடுமையான சூழல் வரும் என யாரும் எதிர்பார்த்திருக்க மாட்டோம்.

பொதுவாகவே, இந்தியாவின் சுதந்திர தினம் என்பது மக்கள் தங்களின் தேசபக்தியை வெளிப்படுத்தும் உணர்ச்சிகரமான மிகப்பெரிய திருவிழாவாகும். எனவே, மக்கள் இதைக் கொண்டாடாமல் இருக்கவும் முடியாது. ஆனால், எளிமையாகவும் உணர்வுரீதியிலும் இந்த விழாவைக் கொண்டாட வேண்டியது இன்றைய காலத்தின் கட்டாயமாகிவிட்டது.

நமது உண்மையான வாழ்க்கையில் (In Real Life - IRL) மக்கள் இணைந்து சுதந்திர தினத்தைக் கொண்டாட வாய்ப்பில்லை எனும்போது, மாற்று ஏற்பாடாக இந்தியாவின் இந்த மாபெரும் விழாவை மெய்நிகராகக் (Virtual Independence Day) கொண்டாடி மகிழலாம்.

இந்தியாவின் சுதந்திர தினத்தை மெய்நிகராகக் கொண்டாட சில யோசனைகள்:

சமூக வலைதளங்கள்:

சுதந்திர தினத்தன்று நாம் வழக்கமாக சமூக வலைதளங்களில் பல்வேறு வாழ்த்துப் பதிவுகளைப் பதிவிடுவோம்.

இந்த ஆண்டு இத்தகைய வாழ்த்துகளோடு நிறுத்திவிடாமல், சுதந்திர தினம், போராடிய தலைவர்கள், தொடர்புடைய இடங்கள், நாட்டின் ராணுவ பலம் உள்ளிட்டவற்றில் ஏதேனும் ஒன்றைப் பற்றி ஒவ்வொருவரும் சமூக வலைதளங்களில் தங்கள் பதிவுகளை இடலாம்.

இதனால், மக்களிடம் தேசம் குறித்த பெருமித உணர்வும், இளைய தலைமுறையினரிடம் விடுதலை குறித்த விழிப்புணர்வும் அதிகரிக்க வாய்ப்புண்டு.

Representational Image
Representational Image
Pixabay

தொலைக்காட்சி:

இந்த ஆண்டு கொடியேற்ற நிகழ்வுகளை நேரில் சென்று பார்க்கும் வாய்ப்பு பலருக்கும் கிடைக்காது. எனவே, கொடியேற்றுதல் நிகழ்வுகளின் நேரடி ஒளிபரப்புகளைத் தொலைக்காட்சி வழியே, நம் வீட்டில் உள்ளோருடன் பார்த்து ரசிக்கலாம்.

மத்திய, மாநில அரசுகளின் கொடியேற்றல் மற்றும் அதுசார்ந்த நிகழ்வுகளின் நேரடி ஒளிபரப்பை நமக்கு விருப்பமானவர்களுடன் இணைந்து காண்பது, உணர்ச்சிமிக்க, மன மகிழ்வூட்டக்கூடிய ஒன்றாக அமையும்.

நம்முடைய குழந்தைகளை கட்டாயம் இவற்றைப் பார்க்கச் செய்தல் வேண்டும்.

போட்டிகள்:

பள்ளிகள், தன்னார்வலர்கள் மற்றும் பொதுநல அமைப்புகள் உள்ளிட்ட பல்வேறு அமைப்புகள் சார்பில் சுதந்திர தினம் குறித்த கட்டுரை, ஓவியம் உள்ளிட்ட பல்வேறு போட்டிகளை இணையதளம் மூலமாக நடத்தி பரிசுகளை அறிவிக்கலாம்.

தேசபக்திப் பாடல்களை இணையதள வழியே குழுவாக இணைந்து பாடச் செய்தும், உறுதி மொழிகளை எடுக்கச் செய்தும் மாணவர்களிடையே சுதந்திரம் குறித்த விழிப்புணர்வை ஏற்படுத்தலாம்.

Representational Image
Representational Image
Pixabay

ஒளிபரப்புகள்:

பள்ளிகள், பல்வேறு தொழிற்சாலைகள் மற்றும் நிறுவனங்களில் சமூக இடைவெளியுடன் நடைபெறும் எளிமையான சுதந்திர தின கொடியேற்று நிகழ்வுகளை ஃபேஸ்புக், யூடியூப் போன்றவற்றில் அந்தந்த அமைப்புகள் நேரடியாக ஒளிபரப்பு செய்யலாம்.

இதன்மூலம் மக்கள் விழாக்களில் நேரடியாகக் கலந்துகொள்ள முடியாவிட்டாலும், மெய்நிகராகக் கலந்துகொண்ட திருப்தியும் பெருமித உணர்வும் மக்களுக்கு ஏற்படும்.

கலந்துரையாடல்கள்:

கூகுள் மீட், ஜியோ மீட், ஜூம் உள்ளிட்ட செயலிகள் மூலமாக குறிப்பிட்ட நேரத்தில் நண்பர்கள் மற்றும் உறவினர்கள் இணைந்து சுதந்திர தினம் குறித்த ஒரு கலந்துரையாடலை நிகழ்த்தலாம்.

ஒவ்வொருவரும் ஒரு குறிப்பிட்ட தலைப்பில் விடுதலை குறித்தும், நாட்டுக்காக அன்றும் இன்றும் தியாகங்களைப் புரிந்த வீரர்கள் குறித்தும் தங்களது எண்ணங்களையும் கருத்துக்களையும் பகிர்ந்துகொள்ளலாம். தேசபக்திப் பாடல்களை இணைய வழியே இணைந்து பாடலாம். இதன் மூலம் இந்த ஆண்டு சுதந்திர தினத்தை மேம்பட்ட ஆக்கபூர்வமான ஒன்றாக மாற்ற முடியும்.

Independence day celebration
Independence day celebration
Srinivasulu.V

சவால்கள்:

ஒவ்வொருவரும் தங்கள் நண்பர்கள் கூட்டத்தில் இருக்கக்கூடிய சிலருக்கு சுதந்திர தின சவால்களை (#IndependenceDayChallenge) சமூக வலைதளங்களின் வழியே அளிக்கலாம். தேச நலன் சார்ந்த புதியதொரு உறுதிமொழியை (Resolution) எடுத்துக்கொள்வது,

சுற்றுச்சூழல் தொடர்புடைய தூய்மைப் பணி, மரம் நடுவது உள்ளிட்ட சவால்களாக இவை இருக்கலாம்.

பிரபலங்களும் இந்தச் சவாலில் கலந்து கொள்ளும்போது, இத்தகைய ஆக்கபூர்வமான சவால்கள் பலருக்கும் ஊக்கமூட்டும் ஒன்றாக மாறும். இவை சுதந்திர தினத்தின் மகிழ்ச்சியை நிச்சயம் அதிகரிக்கச் செய்யும் என்பது உறுதி.

மேலும் தேசத்துக்கும் தேசத்தின் சுற்றுச்சூழலுக்கும் இத்தகைய சவால்கள் பெரும் நன்மை அளிக்கும்.

புகைப்படங்கள்:

நாமும், நமது குழந்தைகளும் தேசியக்கொடியுடன் இருப்பது போன்ற புகைப்படங்களை சமூக வலைதளங்களில் பதிவிட்டு மகிழ்ச்சியை வெளிப்படுத்தலாம்.

குழந்தைகளுக்கு தேசிய சின்னங்களின் முகமூடிகளை அணிவித்து புகைப்படம் மற்றும் வீடியோக்கள் எடுத்து பதிவிடுவதன் மூலம் சுதந்திர தினத்தின் உற்சாகத்தை வெளிப்படுத்துவதுடன், விழிப்புணர்வு ஏற்படும்.

Planting
Planting

சூழல் பாதுகாப்பு:

சுதந்திர தினத்தன்று குழந்தைகளுடன் இணைந்து சுதந்திர தினத்தின் நினைவாக செடிகளை நட்டு அவற்றை வீடியோவாகப் பதிவு செய்து நண்பர்களுடனும் உறவினர்களுடனும் நமது தேசபக்தியைப் பகிர்ந்துகொள்ளலாம்.

இந்தியர் ஒவ்வொருவருக்கும் நமது ரத்தத்தில் ஊறிப்போன நாட்டுப்பற்றும், தேசம் குறித்த பெருமித உணர்வும் இயல்பிலேயே இருக்கின்றன. நம்முடைய நாட்டுப்பற்றை ஊட்டி வளர்க்கவும், பெருமித உணர்வைத் தொடர்ந்து தக்க வைத்துக்கொள்ளவும் தேசியவிழாக்கள் கிரியா ஊக்கிகளாகச் செயல்படுகின்றன.

சுதந்திர தின ஸ்பெஷல் படம்..! #KidsTalentCorner

நமது தேசம் குறித்த ஆழமான காதலையும், அளவு கடந்த அபிமானத்தையும் அடுத்த கட்டத்துக்கும், அடுத்த தலைமுறைக்கும் சிந்தாமல் சிதறாமல் எடுத்துச் செல்ல இந்த ஆண்டின் சுதந்திர தின மெய்நிகர் கொண்டாட்டங்கள் உதவும் என்பதில் ஐயமில்லை!

Independence day celebration
Independence day celebration

`எதுவுமே சுலபமில்லை; ஆனால் எல்லாமே சாத்தியம்தான்’ (Nothing is easy. But everything is possible) என்ற பழமொழி இன்றைய சூழலுக்கு மிகச்சரியாகப் பொருந்தும். இந்தியாவின் மன உறுதியும், நாட்டுப்பற்றும் எந்தச் சூழ்நிலையிலும் குலைந்துவிடாது என்பதை உலகிற்கு பறைசாற்றுவதற்கு சுதந்திர தினம் நமக்கு நல்லதொரு வாய்ப்பை நல்கியுள்ளது.

ஆம்! நாம் உடலால் மட்டுமே தனிநபர்கள்; உள்ளத்தால் தேசம்!

- அகன் சரவணன்

விகடனில் உங்களுக்கென ஒரு பக்கம்...

உங்கள் படைப்புகளைச் சமர்ப்பிக்க இங்கே க்ளிக் செய்க https://www.vikatan.com/special/myvikatan/

My Vikatan
My Vikatan

ஏதோ ஓர் ஊரில், எங்கோ ஒரு தெருவில் நடந்த ஒரு விஷயம்தான் உலகம் முழுக்க வைரலாகிறது. உங்களைச் சுற்றியும் அப்படியொரு வைரல் சம்பவம் நடந்திருக்கலாம்... நடந்துகொண்டிருக்கலாம்... நடக்கலாம்..! அதை உலகுக்குச் சொல்வதற்காகக் களம் அமைத்துக் கொடுக்கிறது #MyVikatan. இந்த எல்லையற்ற இணையவெளியில் நீங்கள் செய்தி, படம், வீடியோ, கட்டுரை, கதை, கவிதை என என்ன வேண்டுமானாலும் எழுதலாம். மீம்ஸ், ஓவியம் என எல்லாத் திறமைகளையும் வெளிப்படுத்தலாம்.

உங்கள் படைப்புகளைச் சமர்ப்பிக்க இங்கே க்ளிக் செய்க https://www.vikatan.com/special/myvikatan/

அடுத்த கட்டுரைக்கு