Published:Updated:

பணம், உங்கள் பலம்!

ஆபத்பாந்தவனாக விளங்கும் அவசரகால நிதி!

பணம், உங்கள் பலம்!

ஆபத்பாந்தவனாக விளங்கும் அவசரகால நிதி!

Published:Updated:

ந்த ஒரு முதலீட்டையும் ஆரம்பிக்கும் முன் ஆயுள் காப்பீடு மற்றும் ஆரோக்கிய காப்பீடு எடுத்துக்கொள்வது அவசியம் என்பதை முந்தைய அத்தியாயங்களில் பார்த்தோம். முதலீட்டை மேற்கொள்ளும் முன் இன்னொரு விஷயத்தையும் மேற்கொள்வது அவசியம். அது, அவசரகால நிதியை (எமர்ஜென்சி ஃபண்ட்) உருவாக்குவது!

`லைஃப் இன்ஷூரன்ஸ் மற்றும் ஹெல்த் இன்ஷூரன்ஸ் இருக்கும்போது அவசரகால நிதி எதற்கு?' என நீங்கள் கேட்பது புரிகிறது. அதை உதாரணம் மூலம் பார்த்தால் எளிதில் புரியும்.

பணம், உங்கள் பலம்!

ஒட்டுமொத்த விகடனுக்கும் ஒரே ஷார்ட்கட்!

தனியார் நிறுவனம் ஒன்றில் வேலை பார்க்கும் சுகன்யா, வீட்டில் இருக்கும்போது திடீரென தவறி கீழே விழுந்துவிட்டார். அவருக்கு காலில் நல்ல அடி. உயிருக்கு ஆபத்து இல்லை. அவர் காலை சரிசெய்ய ஃபிசியோதெரபி சிகிச்சை எடுத்தார். ஃபிசியோதெரபி சிகிச்சையை தனியாக எடுக்கும்போது ஹெல்த் இன்ஷூரன்ஸ் பாலிசியில் இழப்பீடு கிடையாது என்பதால், மருத்துவச் செலவை சுகன்யாவே செய்யும்படி இருந்தது. அவரிடம் தனியாக சேமிப்போ, முதலீடோ இல்லை. செலவுக்கு மிகவும் திண்டாடிப் போனார். நிரந்தரப் பணியாளர் இல்லை என்பதால் அலுவலகம் செல்லாத நாட்களுக்கு அவருக்கு சம்பளமும் இல்லை. நகையை அடமானம் வைத்து 15 நாட்கள் செலவை சமாளித்தார். அடுத்து வந்த நாட்களில் நண்பர்கள், உறவினர்களிடம் கடன் வாங்கி ஒரு வழியாக மருத்துவச் சிகிச்சை எடுத்தார். மூன்று மாதம் கழித்து அலுவலகம் சென்ற அவருக்கு, மருத்துவச் செலவுக்கு வாங்கிய கடனை திருப்பிக் கொடுக்க மற்றும் நகையை மீட்கவே ஆறு மாதமானது. அந்த ஆறு மாத காலமும் அவர் நரக வேதனையைத்தான் அனுபவித்தார். இவர் மட்டும் அவசரகால நிதியை சேர்த்து வைத்திருந்தால், இந்தக் கஷ்டம் தவிர்க்கப்பட்டிருக்கும்.

சுகன்யா மட்டுமல்ல, இன்றைக்கு 90% இந்தியர்களிடம் அவசரகால நிதி இல்லாத நிலை இருக்கிறது என்பது நிதர்சனமான உண்மை.

அது என்ன அவசரகால நிதி?

எதிர்பாராமல் ஏற்படக்கூடிய திடீர் செலவுகள் ஒருவரை கடனில் தள்ளாமல் இருக்க அல்லது நீண்ட நாள் முதலீட்டைப் பதம் பார்க்காமல் இருக்க உதவுவதுதான் அவசரகால நிதி. திடீரென்று, பணிபுரியும் நிறுவனம் மூடப்பட்டாலோ, வேலை இழப்பு ஏற்பட்டாலோ... அடுத்த வேலையில் சேரும் வரை குடும்பச் செலவு பாதிக்கப்படாமல் இருக்க அல்லது அவசர மருத்துவச் செலவு ஏற்பட்டால் அதனைச் சமாளிக்க அவசர கால நிதி அனைவருக்கும் அவசியம்.

பொதுவாக, மாதக் குடும்பச் செலவை போல, சுமார்  3 முதல் 5 மடங்குத்  தொகையை அவசரச் செலவு நிதியாக வைத்திருப்பது நல்லது. இதற்கு குறைவு என்றால் அவசரச் செலவு ஏற்படும்போது, சமாளிப்பது கஷ்டம். உதாரணத்துக்கு, சுகன்யா குடும்பத்தின் மாதச் செலவு ` 25,000 என்றால், அவர் குறைந்தபட்சம் ` 75,000 முதல் அதிகபட்சம் ` 1,25,000 வரை அவசர கால நிதியாக வைத்திருக்க வேண்டும். இதனை ஒரே நாளில் உருவாக்குவது என்பது கஷ்டமான காரியம். இதற்கான தொகையை இத்தனை ஆண்டுகளில் சேர்க்க வேண்டும் என இலக்கு நிர்ணயித்து அதற்கு ஏற்ப ஆர்.டி போட்டு வரலாம். மியூச்சுவல் ஃபண்ட் திட்டத்தில் ரிஸ்க் இல்லா லிக்விட் ஃபண்டிலும் முதலீடு செய்து வரலாம். மாதச் சம்பளத்தில் சுமார் 25% தொகையை அவசரச் செலவு தொகுப்பு நிதிக்கு ஒதுக்கி முதலீடு செய்து வரலாம். இதனைவிட அதிகமாகச் சேர்க்க முடிந்தாலும் நல்லது.

பணம், உங்கள் பலம்!

கவனிக்க வேண்டிய ஐந்து முக்கிய விஷயங்கள்..!

• அவசரகால நிதியை முதலீடு செய்யும்போது, மூலதனத்துக்கு இழப்பு வரக்கூடாது.

• அந்தத் தொகையை முதலீடு செய்யவோ அல்லது அவசரத் தேவைக்கு எடுக்கும்போதோ, எந்தக் கட்டணமும் இருக்கக் கூடாது.

• அவசரகால நிதித்தொகை மொத்தமாகச் சேர்ந்தவுடன், அதில் 20% தொகையை வங்கி சேமிப்புக் கணக்கு, மீதியை ஃபிக்ஸட் டெபாசிட் அல்லது மியூச்சுவல் ஃபண்ட்களில் முதலீடு செய்து வைக்க வேண்டும். இதில் 5% முன் பின் இருக்கலாம் (விரிவான விவரத்துக்கு பார்க்க அட்டவணை). அப்போதுதான் இந்த அவசரகால நிதி மூலமும் வருமானத்தை ஈட்ட முடியும்.

• அவசரகால நிதியிலிருந்து ஏதாவது தொகையை எடுத்துச் செலவு செய்தால், மீண்டும் அதனை அதே அளவில் பராமரிப்பது அவசியம். உதாரணத்துக்கு, சுகன்யா அவசர காலத்துக்கு என ` 75,000 சேர்த்து வைத்திருந்து, அதில் ` 25,000-ஐ கணவருக்கு திடீரென ஏற்பட்ட மருத்துவச் செலவுக்கு செலவிட்டிருந்தால், வரும் மாதங்களில் கொஞ்சம் கொஞ்சமாகச் சேர்ந்து அதை மீண்டும் ` 75,000 ஆக உருவாக்கிவிட வேண்டும்.

• அவசரச் செலவு நிதியை கணவன், மனைவி இணைந்து ஜாயின்ட் கணக்கில் வைத்திருப்பது நல்லது. ஒருவருக்கு சிக்கல் எனில், மற்றவர் சிரமம் இல்லாமல் பணத்தை எடுத்துச் செலவு செய்ய முடியும்.

உங்கள் வீட்டின் அவசரகால நிதிக்கு இந்த முதல் தேதியில் இருந்து அஸ்திவாரத்தை ஆரம்பித்துவிடலாம்தானே?!

சி.சரவணன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism