Published:Updated:

பரீட்சை காலம்... பதமான உணவுகள்!

பரீட்சை காலம்... பதமான உணவுகள்!
பிரீமியம் ஸ்டோரி
பரீட்சை காலம்... பதமான உணவுகள்!

சமையல்

பரீட்சை காலம்... பதமான உணவுகள்!

சமையல்

Published:Updated:
பரீட்சை காலம்... பதமான உணவுகள்!
பிரீமியம் ஸ்டோரி
பரீட்சை காலம்... பதமான உணவுகள்!

``டென்த், ப்ளஸ் டூ தேர்வுகள்... மாணவர்களுக்கு மட்டும் அல்லாமல், பெற்றோர்களுக்கும்தான் என்பது

பரீட்சை காலம்... பதமான உணவுகள்!

போல ஆகிவிட்டது. அந்த அளவுக்கு தேர்வு நெருங்கும் சமயத்தில், பெரும்பாலான பெற்றோர்கள் அக்கறை, பரபரப்புடன் செயல்படுகிறார்கள். தேர்வு சமயத்தில் மாணவர்களின் படிப்போடு கூடவே உடல்நலம், மனநலம், உணவு சார்ந்த விஷயங்களிலும் பெற்றோர்கள் கவனம் செலுத்த வேண்டும். சீரான இடைவெளியில் ஆரோக்கியமான உணவு, போதுமான தூக்கம் அவர்களுக்குத் தேவை’’ என்று கூறும் சமையல்கலை நிபுணர் தீபா பாலசந்தர், பரீட்சை நேரத்தில் சாப்பிட ஏதுவான சில உணவு வகைகளை இங்கே வழங்குகிறார்...

மூலிகை பானம்

தேவையானவை: துளசி இலை - 10, இஞ்சி - சிறிய துண்டு, எலுமிச்சைச் சாறு - 2 டீஸ்பூன்,  கருப்பட்டித்தூள் (அ) வெல்லத்தூள் - 4 டீஸ்பூன், தண்ணீர் - ஒன்றரை கப்.

ஒட்டுமொத்த விகடனுக்கும் ஒரே ஷார்ட்கட்!

பரீட்சை காலம்... பதமான உணவுகள்!

செய்முறை: துளசி இலைகளைக் கழுவி சுத்தம் செய்யவும். இஞ்சியைத் தோல் சீவி, துருவவும். தண்ணீருடன் கருப்பட்டித்தூள் (அ) வெல்லத்தூள் சேர்த்து ஒரு கொதிவிட்டு இறக்கி, வடிகட்டவும். பிறகு, அந்த நீரை மீண்டும் அடுப்பிலேற்றி... துளசி இலை, இஞ்சித் துருவல் சேர்த்து தண்ணீர் ஒரு கப் ஆகும் வரை கொதிக்கவிடவும். பிறகு, இறக்கி வடிகட்டி, எலுமிச்சைச் சாறு கலந்து பரிமாறலாம்.

காபி, டீக்கு பதிலாக மாணவர்கள் இதைப் பருகுவதால்... சளி, இருமல் தொல்லை, அஜீரணக் கோளாறுகள் ஏற்படாமல் காத்துக்கொள்வதோடு, புத்துணர்ச்சியுடன் இருக்கலாம்.

வல்லாரை துவையல்

தேவையானவை: வல்லாரைக்கீரை - ஒரு கட்டு, வெங்காயம், தக்காளி - தலா ஒன்று, புளி - நெல்லிக்காய் அளவு, கடலைப்பருப்பு - 4 டீஸ்பூன், உளுத்தம்பருப்பு - 2 டீஸ்பூன், காய்ந்த மிளகாய், பச்சை மிளகாய் - தலா ஒன்று, தேங்காய்த் துருவல் - 5 டீஸ்பூன், பூண்டு - 4 பல், கறிவேப்பிலை, கொத்தமல்லித்தழை - சிறிதளவு, கடுகு, சீரகம், பெருங்காயத்தூள் - தாளிக்கத் தேவையான அளவு, எண்ணெய், உப்பு - தேவையான அளவு.

பரீட்சை காலம்... பதமான உணவுகள்!

செய்முறை: வல்லாரைக்கீரையை ஆய்ந்து, சுத்தம் செய்யவும். கறிவேப்பிலை, கொத்தமல்லித்தழையையும் சுத்தம் செய்யவும். வெங்காயம், தக்காளியை பொடியாக நறுக்கவும். வாணலியில் சிறிதளவு எண்ணெய் விட்டு கடுகு, சீரகம், பெருங்காயத்தூள் தாளித்து... காய்ந்த மிளகாய், பச்சை மிளகாய், கடலைப்பருப்பு, உளுத்தம்பருப்பு சேர்த்து வறுக்கவும். பின்னர் வெங்காயம், தக்காளி, பூண்டு, கறிவேப்பிலை, கொத்தமல்லித்தழை, வல்லாரைக் கீரை சேர்த்து வதக்கி... உப்பு, தேங்காய்த் துருவல் சேர்த்துக் கிளறி இறக்கி ஆறவிடவும். இதனுடன் புளி சேர்த்து மிக்ஸியில் துவையலாக அரைக்கவும். இதை இட்லி, தோசை சாதத்துடன் சாப்பிடலாம். 

வல்லாரை, ஞாபகசக்திக்கு மிகவும் உறுதுணையாக இருக்கும்.

நட்ஸ் இனிப்பு தட்டை

தேவையானவை:
பிஸ்தா, பாதாம், முந்திரி, பேரீச்சம்பழம் - தலா 10, கசகசா - ஒரு டீஸ்பூன், உலர் அத்திப்பழம் (டிபார்ட்மென்ட் கடைகளில் கிடைக்கும்) - 4, நெய் - ஒரு டீஸ்பூன்.

பரீட்சை காலம்... பதமான உணவுகள்!

செய்முறை: பேரீச்சையின் விதைகளை நீக்கிவிட்டு, பொடியாக நறுக்கவும். பாதாம், முந்திரி, பிஸ்தா, அத்திப் பழங்கள் ஆகியவற்றை சிறுசிறு துண்டுகளாக நறுக்கவும். பேரீச்சையை மிக்ஸியில் போட்டு ஒரு சுற்று சுற்றவும். வாணலியில் நெய் விட்டு, கசகசா சேர்த்து வறுக்கவும். பிறகு அதனுடன் நறுக்கிய பாதாம், முந்திரி, பிஸ்தா, அத்திப்பழம் மற்றும் பேரீச்சை விழுது சேர்த்துக் கிளறி இறக்கவும். ஆறிய பின் அந்தக் கலவையை சிறுசிறு உருண்டைகளாக்கி தட்டி எடுத்து வைக்கவும்.

இது ஒரு ஹெல்தியான உணவு. கவனித்தல் திறமையை அதிகரிப்பதோடு, இரும்புச்சத்தையும் தரவல்லது.

சத்து மாவு வெஜ் இடியாப்பம்

தேவையானவை: சத்து மாவு - ஒரு கப் (கடைகளில் பாக்கெட்டாக கிடைக்கும்), விரும்பிய காய்கறிகளின் கலவை - ஒரு கப், வெங்காயம் - ஒன்று, இஞ்சி - பூண்டு விழுது - ஒரு டீஸ்பூன், கடுகு, கடலைப்பருப்பு, உளுத்தம்பருப்பு - தாளிக்கத் தேவையான அளவு, கொத்தமல்லித்தழை - சிறிதளவு, எண்ணெய் - சிறிதளவு, உப்பு - தேவையான அளவு.

பரீட்சை காலம்... பதமான உணவுகள்!

செய்முறை: காய்கறிகள், வெங்காயத்தை பொடியாக நறுக்கவும். கொத்தமல்லித்தழையை சுத்தம் செய்யவும். சத்து மாவை வெறும் வாணலியில் வறுத்து, ஆறிய பின் அதனுடன் ஒரு டீஸ்பூன் எண்ணெய், கொஞ்சம் வெந்நீர் விட்டுப் பிசையவும். இந்த மாவை இடியாப்ப அச்சில் போட்டு பிழிந்து ஆவியில் வேகவிடவும். வாணலியில் சிறிதளவு எண்ணெய் விட்டு கடுகு, கடலைப்பருப்பு, உளுத்தம்பருப்பு தாளித்து... இஞ்சி -  பூண்டு விழுது, வெங்காயம், காய்கறி கலவை சேர்த்து வதக்கி, உப்பு போட்டு தண்ணீர் தெளித்து வேகவிடவும். காய்கள்  நன்கு வெந்த பின்பு வேகவைத்த இடியாப்பம், சுத்தம் செய்த கொத்தமல்லித்தழை சேர்த்துக் கிளறி இறக்கவும்.

இந்த இடியாப்பத்தில்... காய்கறிகளின் சத்துக்களுடன், தானியங்களின் சத்துக்களையும் ஒருசேர பெற முடியும் என்பதால், ஆரோக்கியத்துக்கு மிகவும் நல்லது.

க்ரீன் சப்பாத்தி

தேவையானவை:
கோதுமை மாவு - ஒரு கப், தண்ணீரில் அலசி, பொடியாக நறுக்கிய பாலக்கீரை - ஒரு கப், கொத்தமல்லித்தழை - சிறிதளவு, சிறிய பச்சை மிளகாய் - 2, சீரகம் - ஒரு டீஸ்பூன், எண்ணெய், உப்பு - தேவையான அளவு.

பரீட்சை காலம்... பதமான உணவுகள்!

செய்முறை: பாலக்கீரையுடன் சுத்தம் செய்த கொத்தமல்லித்தழை, பச்சை மிளகாய் சேர்த்து வேகவைக்கவும். ஆறிய பின் அதனுடன் சீரகம் சேர்த்து விழுதாக அரைக்கவும். கோதுமை மாவுடன் உப்பு, சிறிதளவு எண்ணெய், அரைத்த விழுது சேர்த்து சப்பாத்தி மாவு போல பிசையவும். பிசைந்த மாவை சிறிய உருண்டைகளாக உருட்டி சப்பாத்திகளாக திரட்டி, தோசைக்கல்லில் போட்டு, எண்ணெய் விட்டு இருபுறமும் வேகவிட்டு எடுக்கவும்.

சத்துமிக்க இந்த சப்பாத்திக்கு தொட்டுக்கொள்ள எதுவுமே தேவையில்லை.

முளைப்பயறு புட்டு

தேவையானவை:
முளைகட்டிய பச்சைப் பயறு - ஒரு கப், கேழ்வரகு மாவு - ஒரு கப், தேங்காய்த் துருவல் - 5 டீஸ்பூன், நேந்திரம் பழம் - ஒன்று, வெல்லத்தூள் - தேவைக்கேற்ப, உப்பு - ஒரு சிட்டிகை.

பரீட்சை காலம்... பதமான உணவுகள்!

செய்முறை: முளைகட்டிய பச்சைப் பயறை ஆவியில் வேகவிடவும். கேழ்வரகு  மாவுடன்  சிட்டிகை உப்பு சேர்த்துக் கலந்து, மாவின் மீது தண்ணீர் தெளித்து உதிர் உதிராகப் பிசிறவும். பின்னர் மாவை இட்லித் தட்டில் வைத்து ஆவியில் வேகவிடவும்.

வேகவைத்த மாவு, வேகவைத்த பச்சைப் பயறு, தேங்காய்த் துருவல், வெல்லத்தூள், பொடியாக நறுக்கிய நேந்திரம் பழத்துண்டுகளை ஒரு பாத்திரத்தில் சேர்த்துக் கலந்து சூடாக பரிமாறவும்.

ஆவியில் வேகவைப்பதால், இது உடல் ஆரோக்கியத்துக்கு உதவும். கேழ்வரகு, வெல்லம், நேந்திரம் பழம் மூலம் இரும்புச்சத்தை பெறலாம்.

கடலை - கறிவேப்பிலை சாதம்

தேவையானவை: வடித்த சாதம் - ஒரு கப், வேர்க்கடலை - ஒரு கப், கறிவேப்பிலை - ஒரு கப், பூண்டுப் பல் - 6, சீரகம் - ஒரு டீஸ்பூன், காய்ந்த மிளகாய் - 4, உளுத்தம்பருப்பு - 4 டீஸ்பூன், பெருங்காயத்தூள், உப்பு - தேவையான அளவு. 

பரீட்சை காலம்... பதமான உணவுகள்!

செய்முறை:  வெறும் வாணலியில் உளுத்தம்பருப்பு, காய்ந்த மிளகாய், சீரகம், வேர்க்கடலை, கறிவேப்பிலை, பூண்டு ஆகியவற்றை வறுத்து ஆறவிடவும். பின்னர் உப்பு, பெருங்காயத்தூள் சேர்த்து மிக்ஸியில் பொடிக்கவும். வடித்த சாதத்துடன் தேவையான அளவு பொடியை சேர்த்துக் கலந்து பரிமாறலாம்.

வேர்க்கடலையில் நியாசின் (விட்டமின் B3) உள்ளது. இது ஞாபகசக்திக்கு பெரிதும் உதவும்; மன அழுத்தத்தைப் போக்கும் திறன் கொண்டது.

படங்கள்: எம்.உசேன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism