Published:Updated:

யாரோ நெய்த புடவைகள்!

யாரோ நெய்த புடவைகள்!
பிரீமியம் ஸ்டோரி
யாரோ நெய்த புடவைகள்!

கவிதை

யாரோ நெய்த புடவைகள்!

கவிதை

Published:Updated:
யாரோ நெய்த புடவைகள்!
பிரீமியம் ஸ்டோரி
யாரோ நெய்த புடவைகள்!

சேலையில் தூக்கு மாட்டிக்கொள்ளப் போனேன்
ஒரு நாற்பது சேலை இருந்தது
பத்து உயரிய பட்டு
வீணாகிடும் வேண்டாம்.
ஆறு அதிக விலை கொடுத்து
வாங்கிய மெலிதான சேலை
பொண்ணு கட்டிக்கட்டும்.

யாரோ நெய்த புடவைகள்!

பூப்புனித நீராட்டு விழாவில் கட்டியது ஒண்ணு
கல்யாணப் புடவை ஒண்ணு
வளைகாப்புப் புடவை
இதுல ஒரு கறை வேற பட்டுவிட்டது
அப்போ அபசகுனமா நெனைச்சு மாமியார் ஒரே அழுகை.

ம்ம்... இந்த பிங்க் கலர் புடவையில்தான் முதல்
பையனுக்குத் தொட்டில் கட்டினோம்
ராசியான புடவை
ஐந்தாவது படிக்கும்போது பள்ளி விழாவில்
இரண்டாவது பொண்ணு
இந்த மஞ்சள் நிற புடவை கட்டித்தான்
மாறுவேட போட்டியில் கலந்துகொண்டாள்
அவருக்குப் பிடித்த சேலைகள் எட்டு
நான் போன பிறகு அவருக்குத் துணையிருக்கத் தேவைப்படும்.

மீதம் பதினொன்று
இதில் நல்ல சேலைனு பார்த்தா ஏழு
வெள்ளை நிற காட்டன் புடவை இதுதான் சரி
தூக்குப் போட்டுக்கொள்ளவே நெய்தது போல்
பெரிய பெரிய பூவில் பிடித்த கலரில் உனக்கு
மிகப் பொருத்தமா இருக்குனு சொல்வாங்க
கொடைக்கானல் போனபோது
அடம்பிடித்து ஆசையாய் வாங்கியது
இந்தப் புடவையையும் செத்த பிறகு எரித்துவிடுவார்களோ?

யாரோ நெய்து தைத்து மடித்து விளம்பரம் செய்து விற்ற
உடம்பை மறைத்த நூலாலான
ஒரு புடவையின் அழிவை
பற்றிக் கவலைப்படும் நான்
உடம்பை உறவை அன்பை ஆளும்
ஆன்மாவுக்கு ஏன் கவலைப்படவில்லை?
நான் ஏன் என்னை அழித்துக்கொள்ள வேண்டும்?
அதே சேலையைக் கட்டி
இயலாமைகளைதான் தூக்கிலிடப் போகிறேன்.

ஒட்டுமொத்த விகடனுக்கும் ஒரே ஷார்ட்கட்!

சீதா, சென்னை