Published:Updated:

காலேஜ் டிரான்ஸ்ஃபர், `டிசி'... கல்லூரி மாணவர்களுக்கு கனிவான கைடு!

ஒட்டுமொத்த விகடனுக்கும் ஒரே ஷார்ட்கட்

Use App
காலேஜ்  டிரான்ஸ்ஃபர், `டிசி'... கல்லூரி மாணவர்களுக்கு  கனிவான கைடு!
காலேஜ் டிரான்ஸ்ஃபர், `டிசி'... கல்லூரி மாணவர்களுக்கு கனிவான கைடு!

கல்வி

செய்திகளை உடனுக்குடன் தெரிந்துகொள்ள... இங்கே க்ளிக் செய்து இன்றே விகடன் ஆப் இன்ஸ்டால் செய்யுங்கள்!

பிரீமியம் ஸ்டோரி
காலேஜ்  டிரான்ஸ்ஃபர், `டிசி'... கல்லூரி மாணவர்களுக்கு  கனிவான கைடு!

‘‘கல்லூரி மாணவ, மாணவியர் தனிப்பட்ட காரணங்களினால் வேறு கல்லூரிக்கு மாற்றல் கோரும்போதும், `டிசி' பெறும்போதும் சில விஷயங்களைக் கவனிக்காவிட்டால் பின்னாட்களில் எதிர்காலத்தையே கேள்விக்குறியாக்கும் பிரச்னைகளைச் சந்திக்க நேரிடலாம்’’ என்று சொல்லும்  தமிழ்நாடு தொழில்நுட்பக் கல்வி இயக்குநரகத்தின் தொடர்பு அலுவலர் டாக்டர் ஆழ்வார்சாமி, பொறியியல் மாணவர்களின் இதுபோன்ற பிரச்னைகளுக்கான தீர்வு மற்றும் ஆலோசனைகளைத் தருகிறார்.

காலேஜ் டிரான்ஸ்ஃபர்

• ‘‘ஒரு பொறியியல் கல்லூரியில் படிக்கும் மாணவர், வேறு பொறியியல் கல்லூரிக்கு மாற்றல் கோரினால்... உடல்நிலை, பெற்றோர் வேலை நிமித்தம் என அதற்காக அவர் கூறும் காரணம் நியாயமானதாக இருக்கும் பட்சத்தில்தான் மாறுதல் கிடைக்கும்.

காலேஜ்  டிரான்ஸ்ஃபர், `டிசி'... கல்லூரி மாணவர்களுக்கு  கனிவான கைடு!

• படிக்கும் கல்லூரியில் அந்தக் கல்வியாண்டை முழுமையாக முடித்துவிட்டு, அடுத்த கல்வியாண்டின் தொடக்கத்தில்தான் (3, 5  மற்றும் 7-வது செமஸ்டர் - `ஆட்' செமஸ்டர்) வேறு கல்லூரிக்கு மாறுதல் பெற முடியும். மாறாக `ஈவன்' (2, 4, 6-வது) செமஸ்டர்களில் மாறுதல் பெறமுடியாது. படித்த அதே கோர்ஸில்தான் சேர முடியும்.

• மாறுதல் வேண்டும் மாணவர் தன் துறைத்தலைவர், கல்லூரி முதல்வரிடம் அது குறித்து விண்ணப்பிக்க வேண்டும். கல்லூரி நிர்வாகம் மாணவரின் சார்பில் ஆன்லைன் மூலமாக அவர் மாறுதலாகிச் செல்ல விரும்பும் கல்லூரி நிர்வாகத்திடம் டிரான்ஸ்ஃபர் தொடர்பான தகவல்களையும், அந்த மாணவரின் வருகைச்சான்றிதழ், மதிப்பெண் பட்டியல், நன்நடத்தைச் சான்றிதழ் ஆகியவற்றையும் மாணவர் சார்பாக பதிவேற்றம் செய்யும்.

• மாறுதலுக்கு விண்ணப்பித்த கல்லூரியில் அந்த மாணவருக்கான இடம் இருக்கும்பட்சத்தில், மாணவரின் தகவல்களைச் சரிபார்த்து அவரை தங்கள் கல்லூரியில் சேர்த்துக்கொள்வதற்கான ஒப்புதல் உறுதிமொழி (endorsement), தொழில்நுட்பக் கல்வி இயக்குநரகத்துக்கு அனுப்பிவைக்கப்படும். மேற்கண்ட செயல்பாடுகள் ஆன்லைன் மூலமாக, சம்பந்தப்பட்ட கல்லூரிகள், பல்கலைக்கழகம் மற்றும் தமிழ்நாடு தொழில்நுட்பக் கல்வி இயக்குநரகத்தால் ஒரே நேரத்தில் பார்வையிடப்படும்.

• மாணவர் விரும்பிய கல்லூரியில் இடம் இல்லாதபட்சத்தில், வேறு ஒரு கல்லூரியைத் தேர்வு செய்து, மீண்டும் தான் பயிலும் கல்லூரி நிர்வாகத்தின் மூலமாக விண்ணப்பிக்கலாம்.

• அரசு மற்றும் அரசு உதவி பெற்ற பொறியியல் கல்லூரி மாணவர்கள் அத்தகைய கல்லூரிகளுக்கும், அண்ணா பல்கலைக்கழக கட்டுப்பாட்டின் கீழ் வரும் தனியார் பொறியியல் கல்லூரி மாணவர்கள் அத்தகைய கல்லூரிகளுக்கும் மாறுதலாகிச் செல்லலாம். அவர்கள் போதிய வருகைப் பதிவு சதவிகிதம் வைத்திருக்க வேண்டும். எத்தனை பாடங்களில் வேண்டுமானாலும் அரியர்கள் வைத்திருக்கலாம்.

• தன்னாட்சி (autonomous) அங்கீகாரம் பெற்ற பொறியியல் கல்லூரியில் படிக்கும் மாணவர்கள், போதிய வருகைப் பதிவுடன் இருப்பதுடன், ஒரு பாடத்திலும் தோல்வியடைந்திருக்க (அரியர்ஸ்) கூடாது. அப்படி இருக்கும்பட்சத்தில், வேறு ஒரு தன்னாட்சி பெற்ற கல்லூரிக்கு (மட்டும்) மாறுதலாகிச் செல்லலாம்.

• ஒரு மாணவர் உடல்நிலை, குடும்பச் சூழல் என தனிப்பட்ட காரணங்களுக்காக படிப்பை இடைநிறுத்தம் (டிஸ்கன்டின்யூ) செய்யலாம். சில மாதங்கள் அல்லது வருடங்களுக்குப் பின்னர் மீண்டும் அந்த மாணவர் படிக்க முடிவெடுத்தால், தான் முன்பு படித்த கல்லூரியிலோ அல்லது வேறு ஒரு கல்லூரிக்கு மாற்றல் வாங்கியோ கோர்ஸை தொடரலாம். ஆனால், அந்த மாணவர் தான் முதலாம் ஆண்டு சேர்ந்ததில் இருந்து ஏழு ஆண்டுகளுக்கு உள்ளாக அப்படி தன் படிப்பை முடிக்க வேண்டும். அதற்கு அதிகமானால், அண்ணா பல்கலைக்கழகம் ‘கிரேஸ் பீரியட்’ கொடுக்கும் பட்சத்தில் மட்டுமே படிப்பைத் தொடர முடியும்.

அவசரப்பட்டு `டிசி' வாங்கிவிடாதீர்கள்!

• தனிப்பட்ட அல்லது வேறு காரணங்களுக்காக ஒரு மாணவரால் தான் படிக்கும் கல்லூரியில் தொடர்ந்து படிக்கமுடியாமல் போய், மாற்றுச்சான்றிதழ் (transfer certificate) கோரும்போது, சம்பந்தப்பட்ட கல்லூரி நிர்வாகம் அவர் பிரச்னைகளுக்கு தீர்வுகாண முயலும். ஒருவேளை `டிசி' கொடுப்பதுதான் தீர்வு என்று தெரியவந்தால், அதை வழங்கிவிடும்.

காலேஜ்  டிரான்ஸ்ஃபர், `டிசி'... கல்லூரி மாணவர்களுக்கு  கனிவான கைடு!

• சம்பந்தப்பட்ட மாணவர் `டிசி' பெற்றுக்கொண்ட தகவலை அவர் கல்லூரி நிர்வாகமே அண்ணா பல்கலைக்கழகத்துக்கு தெரிவித்துவிட்டு, அதிலிருந்து அவர் பெயரை நீக்கிவிடும். இதனால், `டிசி' பெற்ற மாணவரால் தான் இடைநின்ற செமஸ்டரில் இருந்து படிப்பைத் தொடர முடியாது. மீண்டும் படிக்க ஆசைப்பட்டால், முதலாம் ஆண்டின் முதல் செமஸ்டரில் இருந்துதான் ஆரம்பிக்க வேண்டும்.

• இதுபோன்ற சூழ்நிலைகளை எதிர்கொள்ளும் மாணவர்கள் அவசரப்பட்டு `டிசி'யை வாங்கிவிடாமல் டிஸ்கன்டின்யூ செய்துவிட்டு, பிரச்னை சரியானதும் மீண்டும் படிப்பை விட்ட இடத்தில் இருந்து தொடரலாம்.

• ஒழுங்கீன நடவடிக்கையில் ஈடுபடும் மாணவர் குறித்து சம்பந்தப்பட்ட கல்லூரி அண்ணா பல்கலைக்கழகத்துக்கு தெரிவிக்கும். பல்கலைக்கழக டிசிப்ளினரி கமிட்டி அந்த மாணவரையும், கல்லூரி நிர்வாகத்தையும் அழைத்து விசாரணை நடத்தும். பின்னர் மாணவரின் எதிர்காலம் பாதிக்கப்படாத வகையில் நடவடிக்கை எடுக்கும். ஒருவேளை மாணவர் பெரிய தவறு ஏதேனும் செய்திருந்தால், அவருக்கு `டிசி' வழங்கப்படும்.

`டிசி' பெற்ற பின்னர் படிக்க முடியுமா?

• `டிசி' பெற்ற மாணவர் தான் இடைநின்ற செமஸ்டரில் இருந்து சில மாதங்கள் அல்லது வருடங்கள் கழித்து மீண்டும் படிக்க ஆசைப்பட்டால், அதற்கு வழிவகை இல்லை. இருப்பினும் தவிர்க்கமுடியாத காரணத்தால் `டிசி' பெற்றுவிட்டு, மீண்டும் படிக்க ஆசைப்படுபவர்களுக்கு அரிதாக ஒரு வாய்ப்பு வழங்கப்படுகிறது. என்ன காரணத்துக்காக `டிசி' பெற்றார், எதனால் வேறொரு கல்லூரியில் சேராமல் இருந்தார், தற்போது மீண்டும் எதற்காக படிக்க விரும்புகிறார் என்பது போன்ற  நியாயமான காரணங்களுக்கான ஆதாரங்களுடன், சென்னையில் உள்ள தொழில்நுட்பக் கல்வி இயக்குநரகம், அண்ணா பல்கலைக்கழகத்தில் மாணவர் நேரில் மனு அளிக்க வேண்டும். அந்த மனுவில், மாணவர் கூறும் காரணங்கள் ஏற்றுக்கொள்ளப்பட்டு அந்த மாணவருக்கு மீண்டும் ஒரு வாய்ப்பு கொடுக்கலாம் என்ற ஒருமித்த கருத்து ஏற்பட வேண்டும். அப்போது மாணவரின் கோரிக்கை பற்றி, சம்பந்தப்பட்ட பல்கலைக்கழகத்திடம் ஆலோசிக்கப்படும். மாணவரின் கோரிக்கை ஏற்றுக்கொள்ளப் பட்டால், தொழில்நுட்ப கல்வி இயக்குநரகத் தின் சார்பில் மாணவரின் கோரிக்கை உயர்மட்ட உண்மைத்தன்மையுடைய கோரிக்கையாக (high level factual report) அரசுக்கு அனுப்பப்படும். அரசும் மாணவரின் கோரிக்கையை ஏற்கும்பட்சத்தில் அந்த மாணவருக்கு அவர் படித்த கல்லூரியிலோ அல்லது வேறு கல்லூரியிலோ அவர் விட்ட இடத்தில் இருந்து படிப்பைத் தொடர மீண்டும் ஒரு வாய்ப்பு கொடுக்கப்படும். ஆனால், இதுபோன்ற சம்பவங்கள் அரிதாகத்தான் நடைபெறுகின்றன.

காலேஜ்  டிரான்ஸ்ஃபர், `டிசி'... கல்லூரி மாணவர்களுக்கு  கனிவான கைடு!

• ஒரு மாணவர் நல்ல மதிப்பெண், வருகைப்பதிவு, நன்நடத்தை பெற்றிருக்கும்பட்சத்தில், சில தனியார் நிகர்நிலை பல்கலைக்கழகங்கள் தங்களின் விதிமுறை கமிட்டியின் ஒப்புதல் அளித்தால், இடைநின்ற செமஸ்டரில் இருந்தே அவர் மீண்டும் தொடர வாய்ப்புள்ளது.

• முடிந்தவரை முதலாமாண்டு சேர்ந்த கல்லூரியிலேயே இறுதியாண்டுவரை முடித்து வெளிவருவது நன்று. ஒருவேளை மாறுதல் வேண்டினால்,  படிக்கும் கல்லூரியின் முதல்வர், துறைத் தலைவர், பேராசிரியர்களிடம் அதற்கான ஆலோசனைகள் பெற்று செயல்படவும். எதிர்காலத்தை சிக்கலாக்கும் என்பதால் எக்காரணம் கொண்டும் கல்லூரியில் இருந்து இடையில் நின்றுவிடுவதோ அல்லது `டிசி' பெற்றுவிடவோ வேண்டாம்’’ என்ற எச்சரிக்கையை மீண்டும் ஒருமுறை வலியுறுத்துகிறார் டாக்டர் ஆழ்வார்சாமி.

கு.ஆனந்தராஜ், படங்கள்:ரா.வருண் பிரசாத்

பொறியியல் டு கலைக்கல்லூரி!

பொறியியல் கல்லூரியில் இடைநிற்கும் மாணவர், `டிசி' பெற்றுக்கொண்டு, விருப்பத்தின்பேரில் கலை அறிவியல் கல்லூரியில் பன்னிரண்டாம் வகுப்பு மதிப்பெண் அடிப்படையில் முதலாம் ஆண்டில் சேர்ந்து படிக்கலாம்.

கலை அறிவியல் கல்லூரி மாணவர்களுக்கு!

கலை அறிவியல் கல்லூரி மாணவர்களின் காலேஜ் டிரான்ஸ்ஃபர், `டிசி' சந்தேகங்களுக்கு விளக்கமளிக்கிறார், சென்னை பெட்ரிஷியன் கலை அறிவியல் கல்லூரி முதுநிலை பேராசிரியை டாக்டர் அகிலா சிவசங்கர்.

‘‘தமிழகத்தில் உள்ள கலை அறிவியல் கல்லூரி மாணவர்கள், நியாயமான காரணங்களுடன், கடைசி செமஸ்டர் தவிர மற்ற எல்லா செமஸ்டர்களின் தொடக்கத்திலும் ஒரு கல்லூரியில் இருந்து வேறொரு கல்லூரிக்கு மாறுதல் பெறலாம். படிக்கும் கல்லூரி நிர்வாகத்தின் மூலமாகவே, படிக்க விரும்பும் கல்லூரி நிர்வாகத்துக்கு விண்ணப்பம் அனுப்பி ஒப்புதல் பெறப்படும். மேலும், வெவ்வேறு பல்கலைக்கழக கட்டுப்பாட்டில் இருக்கும் கலை அறிவியல் கல்லூரிகளுக்குள்ளும் டிரான்ஸ்ஃபர் செய்துகொள்ளலாம். ஒருவேளை டிஸ்கன்டின்யூ செய்து `டிசி' பெற்று, சில காலம் கழித்து மீண்டும் அதே அல்லது வேறு கல்லூரியில் விட்ட படிப்பை படிக்க விரும்பினால், சம்பந்தப்பட்ட பல்கலைக்கழகம், கல்லூரிகளின் ஒப்புதல் கிடைக்கும்பட்சத்தில் ஒரு வாய்ப்பு வழங்கப்படும்.''

புகார் அளிக்கலாம்!

நியாயமான காரணம் இருந்தும், படிக்கும் கல்லூரி நிர்வாகத்தால் மாறுதல் கோரிக்கை நிராகரிக்கப்பட்டால், அந்த மாணவர் அது குறித்து தொழில்நுட்ப கல்வி இயக்குநரகம் மற்றும் அண்ணா பல்கலைக்கழகத்துக்கு புகார் கடிதம் அனுப்பலாம். விசாரணை மேற்கொள்ளப்படும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு