Published:Updated:

‘இங்கே நல்ல புரொஃபைல் பிக்சர் எடுத்துத்தரப்படும்!’

‘இங்கே நல்ல புரொஃபைல் பிக்சர் எடுத்துத்தரப்படும்!’
பிரீமியம் ஸ்டோரி
‘இங்கே நல்ல புரொஃபைல் பிக்சர் எடுத்துத்தரப்படும்!’

உள்ளதைச் சொல்கிறேன்விக்னேஸ்வரி சுரேஷ் - ஓவியம்: கார்த்திகேயன் மேடி

‘இங்கே நல்ல புரொஃபைல் பிக்சர் எடுத்துத்தரப்படும்!’

உள்ளதைச் சொல்கிறேன்விக்னேஸ்வரி சுரேஷ் - ஓவியம்: கார்த்திகேயன் மேடி

Published:Updated:
‘இங்கே நல்ல புரொஃபைல் பிக்சர் எடுத்துத்தரப்படும்!’
பிரீமியம் ஸ்டோரி
‘இங்கே நல்ல புரொஃபைல் பிக்சர் எடுத்துத்தரப்படும்!’

சமூக வலைதளங்கள் பல இருந்தாலும், `மூஞ்சிபுக்’ என்று செல்லமாக அழைக்கப்படும் ‘ஃபேஸ்புக்’தான், நம் வாழ்க்கையிலிருந்து தொலைந்துபோனவர்களைக் கண்டெடுக்கவும், இதுவரை சேர்த்துவைத்துள்ள நண்பர்களை நினைவுப்பெட்டகத்திலிருந்து தொலையாமல் பார்த்துக்கொள்ளவும் பிரதானமாக உதவுகிறது. தொடர்பில் இல்லாத பல நண்பர்களை, இன்னும் பார்த்தே இராத பல இணையதள நண்பர்களை, அவர்களின் இப்போதைய ஃபேஸ்புக் முகப்புப்படமே அவர்கள் என்று மனம் பதிந்துவைத்திருக்கிறது. ஆக, ஃபேஸ்புக்கில் கணக்கு வைத்துள்ளவர்களுக்கு முகப்புப்படத்தின் முக்கியத்துவமும் அருமையும் தெரியும்.

‘இங்கே நல்ல புரொஃபைல் பிக்சர் எடுத்துத்தரப்படும்!’

பல்வேறு சுவாரஸ்யங்களை உள்ளடக்கியது இந்த பிபி! அட, BP இல்லீங்க, PP. புரொஃபைல் பிக்சரைத்தான் அப்படி செல்லமாகக் கூப்பிடுகிறார் கள். ஃபேஸ்புக்கில் ஓர் அழகான புரொஃபைல் பிக்சரைப் பார்த்தவர்கள், உடனடியாக சம்பந்தப்பட்ட நபருக்கு நட்பின் அழைப்பை அனுப்புவார்கள். அல்லது அப்படி ஒருவர் அழைப்பு விடுத்திருப்பின் ஏற்றுக்கொள்வார்கள். ஃபேஸ்புக் ஒரு நட்பு பாலம் என்றால், அதற்கான சுலபமான வழி, நல்ல பிபி-தான்!

எந்த புது இடத்துக்குச் சென்றாலும், புரொஃபைல் பிக்சருக்காகவே தனியாகப் படம் எடுத்துக்கொள்ளும் மனிதர்கள் அதிகரித்திருக்கிறார்கள். ஏன், பலர் புதிய இடங்களுக்குச் செல்வதே படம் எடுத்து `அப்டேட்’ செய்வதற்குத்தான். ஷாப்பிங் மால்களும் திரையரங்குகளும் புரொஃபைல் பிக்சர்கள் எடுப்பதற்காகவே தனியாகச் சில இடங்களை அலங்கரித்துவைத்திருக்கின்றன.

இயற்கையை வஞ்சிக்க முடிகிற இடமாகவும் ஃபேஸ்புக் விளங்குகிறது. வருடாவருடம் புரொஃபைல் பிக்சர்களில் மனிதர்களின் வயது குறைகிறது. ஃபேஸ்புக்கில் கணக்கு ஆரம்பித்தபோது கையில், இடுப்பில் குழந்தைகளைச் சுமந்து நிற்கும் பெண்கள், நாளடைவில் கல்லூரி வாசலில் நிற்கிறார்கள். தொப்பையோடு ஆரம்பித்து, ஜிம் பாடியில் முடிக்கிறார்கள் ஆண்கள்.

பெண்ணைப் பெற்றவர்கள் முதல் காரியமாக ஃபேஸ்புக் கணக்கு தொடங்கி, பையனைப் பற்றி அறிய, அவன் புரொஃபைல் பிக்சருக்கு வரும் கமென்ட்டுகளைக் கண்ணாடி போட்டுப் படிக்கிறார்கள். நண்பிகள் எழுதிவைக்கும் ‘செம’, `கூல்’ வகையறாக்கள் பரவாயில்லை ரகம். `லவ் யூ டா’க்கள் சில வரன்களை அப்போதே முடிவுக்குக் கொண்டுவருகின்றன.

என் அழகான தோழி ஒவ்வொரு முறை `பிபி' மாற்றும்போதும், நிறைய பேர் தேடிவந்து தனிச்செய்தியில் பேசுகிறார்கள் என்று அலுத்துக்கொண்டார். அதிலும் ஒருவர், `எனக்கு மாலை நான்கு முதல் ஆறு மணி வரை ஃப்ரீ. அந்த நேரத்தில் தினமும் சாட் செய்ய முடியுமா?’ என்று கேட்டிருந்தார். இன்னும் ஒருவர், `ஃப்ரெண்ட்லியா பேசுங்க போதும்’ என்று சலுகை தந்திருந்தார். இதுபோன்ற விசித்திரமான கோரிக்கைகள், எல்லா புரொஃபைல் பிக்சருக்கும் வருமென்று சொல்வதற்கில்லை என்பதே இங்கே சற்று துயரமான செய்தி.

நல்ல `பிபி' கொண்டவர்களுக்குக் காலையிலும் மாலையிலும் தனிச்செய்தி யில், `அன்றைய நாள் இனிமையாக அமைய' நிறைய பேர் வாழ்த்துகிறார்கள். அவர்களில் ஒருவராவது வீட்டுக்கு அழைத்து, தங்கள் மனைவிக்கு `குட் ஈவினிங்’ சொல்வாரா என்று யோசித்துப்பார்ப்பது வீண்வேலையாகவே தோன்றுகிறது. எதற்காக தவறாக நினைக்க வேண்டும்? அறிமுகமில்லாத பெண்ணின் நாள் இனிமையாக இருக்க வாழ்த்துவதுகூட ஒரு சமூகசேவைதான் என்று அவர்கள் நினைத்திருக்கக்கூடும்!

அப்படித்தான், சமீபத்தில் முகநூலில் பிபி-யை வைத்துக் கண்டுபிடித்த என் பால்யகால தோழிக்கு நட்பின் அழைப்பை அனுப்பினேன். `மேற்படி நபர் ஏற்கெனவே 5,000 நண்பர்களைக்கொண்டிருப்பதால், உங்கள் நட்பு அவருக்குத் தேவையில்லை. வேண்டுமானால், நீங்கள் மட்டும் பின்தொடர்ந்துகொள்ளுங்கள்’ என்று ஃபேஸ்புக் என் சார்பில் தீர்மானித்து விட்டிருந்தது. அழகான பிபி-க்காக தனிச்சலுகையாக 5,010 நண்பர்கள் இருக்கலாம் போன்ற சலுகைகள் நாளை வரலாம். அதுவரை பழைய தோழி, பழைய தோழியாகவே இருக்கவேண்டியதுதான். அல்லது பின்னொரு நாளில், 5,000 பேரில் யாரையாவது அனுப்பி விட்டு, என் நட்பை அவர் ஏற்றுக்கொள்ளக்கூடும். ஏதோ சற்றே பெரிய மியூசிக்கல் சேருக்கு ஓடித் தோற்றதுபோல வேடிக்கையாக இருக்கிறது.

`பிபி'-கள் பல வகை மனிதர்களைக் குறிக் கின்றன. ஆகப்பெரிய கனவான்கள் தங்கள் பி.எம்.டபிள்யூவோடு எடுத்த படத்தையோ, வெளிநாட்டுச் சுற்றுப்பயணப் படத்தையோ வைத்திருக்கிறார்கள். அட்வென்சர் விரும்பிகளாகப் பதிவுசெய்ய விரும்புபவர்கள் பன்ஜி ஜம்ப்போ, பனிச்சறுக்கோ செய்கையில் கவனமாகப் படம் எடுத்து பிபி-யாக வைக்கிறார்கள். கல்லூரியோடு தொலைந்து போன நண்பன் ஒருவன், இப்போது புகைப்படக் கலைஞராகி, தான் எடுத்த உராங்குட்டான் படத்தை `பிபி' ஆக வைத்திருக்கிறான். அவன் நட்பின் அழைப்பில், எனக்கு தலைசுற்றிவிட்டது... இப்படி ஒரு நண்பரா? ஞாபகத்தில் இருக்கும் யார் முகத்தோடு பொருத்திப் பார்த்தாலும் எங்கேயோ பிசிறடிக்கிறது.

நாளொன்றுக்குக் குறைந்தது ஒரு பதிவு என்று சமூக வலைதளங்களில் எழுதுபவர் களின் வாழ்க்கை, சற்றேறக்குறைய ஒரு திறந்த புத்தகம். எதுவும் எழுதாமல் நான்கு நாட்களாக இருப்பது உறுத்தினால், புரொஃபைல் பிக்சரையாவது மாற்றிவிட வேண்டும் என்பது அவர்களுக்கான விதி. ஏனெனில், அவ்வாறு இருப்பை உலகுக்கு அறிவிக்காவிட்டால் சக எழுத்தாளர்கள் (இங்கே எல்லாருமே எழுத்தாளர்கள்தான்!) வசதியாக மறந்துவிடுவார்கள். நோட்டிஃபிகேஷன்ஸ் எதுவும் இல்லாத நாட்கள் வலைதளவாசி களுக்குத் திகிலூட்டுபவையாக இருக்கின்றன.

‘புன்னகை என்கிற முகவரி உங்களிடம் இருந்தால், நண்பர்கள் என்னும் கடிதம் வந்துகொண்டே இருக்கும்’, ‘ஒரு முட்டாள், தன்னை முட்டாள் என்று உணரும் நேரத்தில் புத்திசாலி ஆகிறான்’ - இப்படிப்பட்ட தத்துவங்களெல்லாம்கூட சிலரது முகப்புப் படங்களாக இருக்கின்றன. அதிலும் இத்தனை தத்துவங்களா அப்துல் கலாம் சொல்லிச் சென்றிருக்கிறார்!' என்று ஆச்சர்யமாக இருக்கிறது. ஏன், அவருக்கேகூட ஆச்சர்யமாக இருந்திருக்கலாம். ‘யாரோ’ என்ற அனானி எழுதுவதைவிட  கலாம் பெயரில் எழுதினால் தத்துவங்களுக்கு மதிப்பு அதிகம் என்பதை எழுதியவர் அறிவார்.

ஆனாலும், எனக்கு ஃபேஸ்புக்குக்கு வைக்க கோரிக்கை ஒன்று உண்டு. சாட்டிங்குக்கு தனி முகப்புப்படம் வைக்க அனுமதிக்க வேண்டும். என் தோழிகள் குடும்பசகிதமான படத்தையே வைத்திருக்கின்றனர். தோழியோடு தனியாக சாட் செய்யலாம் என்றால், அவள் கணவரும் கூடக்கூட வருவது அவஸ்தையாக இருக்கிறது.

இந்த `பிபி’யை வைத்து வெளிநாட்டுக்காரர்கள் ஆராய்ச்சிக் கட்டுரை எல்லாம் சமர்ப்பித்திருக் கிறார்கள். முகத்தை டைட் க்ளோசப்பில் போடுபவர்கள் தன்னம்பிக்கை மிக்கவர்களாம். சினிமாவின் கடைசி டைட்டில் கார்ட் போல மற்றும் பலராக பத்து பேர் இருக்கும் படத்தில் ஒளிந்துகொண்டிருக்கிறீர்கள் என்றால் மிகுந்த தாழ்வுமனப்பான்மை கொண்டிருக்கிறீர்களாம். தன்னம்பிக்கை மிளிரும் அஜித் படத்தைக் கொண்டவர்கள் மட்டும் தமிழ்நாட்டில் ஆயிரம் பேராவது இருப்பார்கள் என்று சொன்னால் வெள்ளைக்காரன் தலைசுற்றிப்போவான்.

ஒளிமயமான எதிர்காலம் புகைப்படக் கலைஞர்களுக்குத் தென்படுகிறது. சின்னதாக ஒரு வரி விசிட்டிங் கார்டில் சேர்த்துக் கொண்டால் போதும் - `இங்கே நல்ல புரொஃபைல் பிக்சர் எடுத்துத்தரப்படும்!’

அட, என் படத்தைப் பற்றி கேட்கிறீர்களா? எனக்கு வாசிக்கப் பிடிக்கும் என்பதைக் காட்ட, புத்தக அலமாரியை முகப்புப்படமாக வைத்திருக்கிறேன். அதுவும் இணையத்திலிருந்து எடுத்ததுதான்!